2010-05-26

འཛམ་གླིང་ཕྱི་རོལ་གྱི་སྲོག་ཆགས།

ཚན་རིག་པ་ཚོས་འཛམ་གླིང་གི་ཕྱི་རོལ་གྱི་སེམས་ཅན་དང་འབྲེལ་བ་བྱེད་རྒྱུ་ནི་མིའི་འགྲོ་བ་འདི་གཏོང་རྒྱུའི་ཉེན་ཁར་ཡིད་ཆེས་བྱེད་ཀྱི་ཡོད།

འཛམ་གླིང་ཕྱི་རོལ་དུ་སེམས་ཅན་འཚོ་གནས་བྱེད་ཀྱི་ཡོད་དམ་ཞེ་ན། བྱེད་ཀྱི་ཡོད། འོན་ཀྱང་མིས་མ་མཐར་ཡང་ཁོང་ཚོ་དང་འབྲེལ་བ་བྱེད་རྒྱུ་དེ་སྤོང་གི་ཡོད་པ་ཡིན་ཞེས་འཛམ་གླིང་འདི་ཚན་རིག་པའི་སྣེ་འཁྲིད་མཁན་སེ་ཊིཕན་་་ཧཱག་གྷིང་Stephen Hawkingགིས་བརྗོད་ཡོད། ཧཱག་གིང་གིས་འཇིག་རྟེན་གྱི་གསང་བ་ཆེན་པོའི་ཐོག་བསམ་ཚུལ་གསར་པ་ཞིག་སྟོན་གྱི་ཡོད་པའི་ནང་འཛམ་གླིང་གི་ཕྱི་རོལ་དུ་སེམས་ཅན་འཚོ་གནས་བྱེད་ཀྱི་ཡོད་པའི་ཚོད་དཔག་བྱེད་པ་ཌི་སི་་་ཀོ་ཝ་རི་བརྙན་འཕྲིན་ནང་འཐོན་ཡོད།
ཁོང་གིས་འཛམ་གླིང་ཕྱི་རོལ་གྱི་སེམས་ཅན་དེ་དག་ཕལ་ཆེར་རྒྱུ་སྐར་ཙམ་དུ་མ་ཟད་པར་ནམ་མཁའི་འཇིག་རྟེན་གྱི་ཆ་ཤས་གཞན་པའི་ནང་དུའང་འཚོ་གནས་བྱེད་ཀྱི་ཡོད་པ་དང་། ཡང་ན། སྐར་ཚོགས་ཀྱི་ལྟེ་བ་དང། ཡང་ན་སྐར་མ་ཕན་ཚུན་བར་གྱི་སྟོང་ཆ་ནང་ལྡིང་བསྡད་སྲིད་པ་ཡིན་ཞེས་བརྗོད།
ཧཱག་གྷིང་གི་འཛམ་གླིང་ཕྱི་རོལ་གྱི་སེམས་ཅན་ཐད་ཀྱི་རིག་པ་དེ་ནི་སྤྱི་བཏང་གི་ལས་སླ་པོ་དེ་འདྲ་ཞིག་མིན། ཁོང་གིས་འཇིག་རྟེན་ལ་galaxyདགུ་ཚིགས་སྐྱ་མོ་ཐེར་འབུམ་བརྒྱ་༡༠༠་༠༠༠་༠༠༠་༠༠༠ཡོད་པ་དང་། དེ་དག་རེ་རེ་བཞིན་སྐར་ཚོགས་ས་ཡ་བརྒྱ་ཕྲག་མང་པོས་སྐོར་ཡོད་པའི་འགྲེལ་བརྗོད་བྱེད་ཀྱི་ཡོད། དེ་ལྟ་བུའི་འཇིག་རྟེན་གྱི་ཁམས་རྒྱ་ཆེན་པོ་དེའི་ནང་འགྲོ་བ་ཆགས་པའི་གླིང་ནི་འཛམ་བུ་གླིང་གཅིག་པུ་མིན་པ་འདྲ།
ཿངའི་རྩིས་རིག་གི་ཀླད་པའི་ནང་འཛམ་གླིང་ཕྱི་རོལ་གྱི་སེམས་ཅན་གྱི་ཐད་དོན་དངོས་དང་རྗེས་སུ་མཐུན་པ་ཞིག་ཨང་གྲངས་རྐྱང་པའི་ལམ་གྱིས་བསམ་གཞིག་བྱེད་ཀྱི་ཡོད། དངོས་གནས་བརྩོན་དགོས་པ་ནི་འཛམ་གླིང་གི་ཕྱི་རོལ་གྱི་སེམས་ཅན་དེ་ཚོ་དོན་དངོས་གང་འདྲ་ཞིག་ཡོད་མེད་རྙེད་པ་བྱ་རྒྱུ་དེ་ཡིན།ཿཞེས་རང་ལོ་༦༨ལ་ཕེབས་པ་དེས་ལུང་འདྲེན་ལྟ་བུར་བརྗོད། ཧག་གྷིང་གིས་ཚོད་དཔག་བྱས་པའི་ལན་ནི་དེ་ཚོ་ཕལ་ཆེ་བ་ལོ་རྒྱུས་ཀྱི་རྒྱུས་རིམ་ནང་འཛམ་གླིང་འདིར་ཁྱབ་བརྡལ་ཕྱིན་ཟིན་པའི་སྲོག་ཆགས་རགས་པའམ་ཕྲ་མོ་དེ་ཚོ་དང་འདྲ་མཚུངས་སུ་ཡོད་ཆོག་པ་ཡིན།

article-1268712-094E6C76000005DC-755_634x368
ཁོང་གི་ཡིག་ཆ་གཞིར་གཟུང་གི་ལྗོངས་རིས་ཞིག་གི་ནང་རྐང་པ་གཉིས་ཅན་གྱི་རྩ་གཟན་གྱི་སེམས་ཅན་༼སྲིན་བུ་ནང་བཞིན་གྱི་རྩངས་པ་ཁ་རལ་སེར་པོ་ལྟ་བུའི་༽ཁྱུ་ཚོགས་འཛམ་གླིང་ཕྱི་རོལ་གྱི་བྲག་ངོས་ལྒང་ནས་འཕུར་ནས་ཡོང་བ་བསྟན་ཡོད་པ་དང་། ཡང་།
ལྗོངས་རིས་གཞན་ཞིག་གི་ནང་གཟའ་མིག་དམར་གྱི་ཟླ་བ་ཡུ་རོ་པ་Europaཟེར་བ་འཁྱགས་པ་འཐུག་པོས་སྐོར་ནས་ཡོད་པ་དེ་དག་གི་འོག་གི་རྒྱ་མཚོའི་ནང་དམར་མདངས་ཅན་གྱི་འོད་ཆེམ་ཆེམ་འཕྲོ་བའི་མཚོ་གནས་སྲོག་ཆགས་ཁྱུ་ཚོ་མང་པོ་ཆགས་ནས་ཡོད་པ་སྟོན་ཡོད།

ལྗོངས་རིས་དེ་ཚོ་སེམས་ཀྱི་ཚོད་དཔག་དང་རྟོག་བཟོ་བྱས་པ་དེ་འདྲ་ཡིན་ནའང་ཧག་གྷིང་གིས་ཚེ་སྲོག་གྲུབ་པ་འགའ་ཤས་རྣམ་དཔྱོད་ཅན་དང་ཉེན་ཁ་བཟོ་མཁན་ཡིན་སྲིད་པའི་གལ་གནད་ཅན་གྱི་གནས་དོན་ལ་བསམ་བློའི་སྣེ་ཁྲིད་བྱེད་པར་བེད་སྤྱོད་བྱས་ཡོད། ཁོང་གིས་ཡ་མཚན་གྱི་སྲོག་ཆགས་དེ་ཚོ་དང་འབྲེལ་བ་བྱེད་ན་འགྲོ་བ་མི་རིགས་རྩ་མེད་འགྲོ་སྲིད་པའི་ཡིད་ཆེས་བྱེད་པ་དང་། འཛམ་གླིང་ཕྱི་རོལ་གྱི་སེམས་ཅན་གྱིས་འཛམ་གླིང་འདིར་དཔུལ་རྒོལ་བྱས་ནས་བརྟེན་ས་བྱས་པའི་རྗེས་ཚུར་སྤོ་ཡོང་སྲིད་པའི་ཚོད་དཔག་ཀྱང་བྱེད་ཀྱི་ཡོད།

ཿང་ཚོས་འཕྲད་འདོད་མེད་པའི་ཕུལ་བྱུང་གི་སེམས་ཅན་དེ་ཚོ་ཡར་རྒྱས་ཇི་ལྟར་འགྲོ་བ་སོགས་ལ་བལྟ་བ་ཙམ་བྱས་ནས་བསྡད་དགོས། ངའི་སེམས་ནང་ཁོང་ཚོ་ནི་གྲུ་ཆེན་པོའི་ནང་འཚོ་གནས་བྱེད་པ་དང་། སོ་སོའི་གླིང་གི་ས་གཞི་ནས་ཐོན་ཁུངས་བེད་སྤྱོད་བྱེད་ཀྱི་ཡོད་པ་འཆར་གྱི་འདུག སྔོན་འཐོན་ཅན་གྱི་འཛམ་གླིང་ཕྱི་རོལ་གྱི་སེམས་ཅན་དེ་ཚོ་གཅིག་བྱས་ན་འབྲོག་པ་ཡང་ཡིན་སྲིད་པ་དང་། དེ་ཡང་དཀའ་ངལ་སེལ་ཐབས་དང་ཁོང་ཚོས་སླེབས་ཐུབ་པའི་གླིང་ཕྲན་དུ་ཞུགས་ཐབས་སུ་བྱེད་སྲིད་པ་ཡིན།ཿ

2010-05-15

མིང་གསར་འདོགས་ཚུལ། ༼སྲོག་ཆགས་ཀྱི་སྐོར།༽

ལེགས་ཆ་ཡོད་པའི་མིང་ཚིག

༡༽Zebra རྐྱང་ཁྲ
༢༽anole lizard མདོག་འགྱུར་རྩངས་པ།
༣༽ cuttlefish སྣག་ཉ།

དོགས་གཞི་ཡོད་པའི་མིང་ཚིག

༡༽ hippopotamus ཆུ་རྟ། ༼དེ་ནི་རྒྱ་སྐད་བོད་སྐད་དུ་ཐད་བསྒྱུར་བྱས་པ་འདྲ། ད་ལྟ་ཡོང་ཁྱབ་ཏུ་ཆུ་ཕག་ལབ་བཞིན་པ་བཞིན་ཆུ་ཕག་ཟེར་ན་ཡག༽
༢༽ kangaroo ཁུག་བྱི། ༼སེམས་ཅན་དེ་ནི་བྱི་བའི་རིགས་ཤིག་མིན་པར་སོང་མིང་ཟུར་ལ་བྱི་ལབ་ན་མི་ལེགས་སྙམ།༽
༣༽ giraffe ཤ་བ་སྐེ་རིང་། ༼མ་གཞི་མིང་དེ་ཡག་པོ་འདུག་ཀྱང་། ཡི་གེ་བྲི་དུས་སྟབས་དེ་བྱས་ཤྭ་སྐེ་རིང་བྲིས་ན་ཡག་པོ་འདུག་སྙམ།༽
༤༽ giant panda དོམ་ཁྲ ༼བྱི་ལ་དོམ་ཆེན་ལབ་ན།༽
༥༽ polar bear བྱང་སྣེའི་དོམ་དཀར། ༼འཁྱམས་དོམ་ལབ་ན་ལེགས་པ་མི་འདུག་གམ༽
༦༽ Seal མཚོ་གཟིག ༼ང་ཡིན་འཁྱམས་ཞིམ་ལབ་ས་རེད།༽
༧༽ Fur Seal མཚོ་ཁྱི། ༼འཁྱམས་ཁྱི།༽
༨༽ Dolphin མཚོ་ཕག ༼སེམས་ཅན་དེ་ནི་ཉ་རིགས་ཤིག་ཡིན་པར་སོང་། དེ་ཚོར་ཕག་ལྟ་བུ་མ་ལབ་ན་བཟང་། ལྷག་པར་དུ་མཚོ་ཕག་ཟེར་ན་ཆུ་ཕག་སྟེ་hippopotamus ལ་གོ་འགྲོ་བ་ཡིན། དེས་ན་ཉ་རྩལ་ཅན་ལབ་ན།༽་
༩༽ starfish མཚོ་སྐར། ༼མི་ལེགས་པ་དེ་ཙམ་མེད་ཀྱང་། དེ་ལས་སྐར་ཉ་ལབ་ན་སྐར་མའི་གཟུགས་ཅན་གྱི་ཉ་དང་སེམས་ཅན་ཡིན་པ་གོ་ཐུབ།༽
༡༠༽ jellyfish མཚོ་གདུགས། ༼གདུགས་ཉ་ལབ་ན།༽
༡༡༽ Whale ཆུ་སྲིན། ༼ཆུ་སྲིན་ཟེར་ན་དུས་རྒྱུན་རྩངས་པ་འདྲ་བའི་ཆུའི་ནང་གི་སེམས་ཅན་ཁ་ཆེན་པོ་དེར་གོ དེས་ན་དེ་འཛམ་གླིང་ནང་གི་ཉ་ཆེ་ཤོས་ཡིན་པས་ཉ་ཆེན་པོ་ལབ་ན།༽
༡༢༽ Shark གཏུམ་ཉ། ༼མིང་དེ་ཡག་པོ་འདུག་ཀྱང་། སྔོན་མ་ལོ་རྒྱུས་སུ་རྒྱ་མཚོ་ཆེན་པོར་བསྐྱོད་དུས་གྲུ་གཟིངས་གཏོར་མཁན་གྱི་ཆུ་སྲིན་དེ་ཡིན་པས། ཉ་སྲིན་ལབ་ན་མི་བཟང་ངམ།༽
༡༣༽ Cockroach བསེ་སྦྲང་། ༼མིང་ཚིག་དེ་གསར་རྩོམ་ཡིན་ན་དགོས་ཡག་མི་འདུག འབུ་དེ་ལ་བོད་སྐད་དུ་སྔར་ནས་ཞུ་ལུ་མ་ཟེར་གྱི་ཡོད།༽

རང་མོས་ཀྱི་མིང་ཚིག
༡༽ Gecko རྩངས་པ་སྒལ་ལེབ།
༢༽ butterfly ཕྱེ་མ་ལེབ།
༣༽ moth མེ་ལྕེབ།

བེད་སྤྱོད་ལྡན་པའི་བསྐྱེད།

ཉིན་རེའི་ནང་ཆུ་འཐུང་དུས་བཤད་པ།



དུས་ཚོད་གནད་སྨིན་ཐོག་ཆུ་མང་པོ་འཐུང་ན་མིའི་ལུས་པོའི་བདེ་ཐང་ལ་རྗེས་འབྲས་ལྡན་པའི་ནུས་པ་འཐོན་ཐུབ།

༡༽ གོམ་པ་རྒྱབ་ནས་ཕྱིན་པའི་རྗེས་ཆུ་ཕོར་པ་གཉིས་འཐུང་ན་དབང་རྩའམ་འབུད་རོལ་དེ་དག་གྲུང་པོ་བཟོ་བར་ཕན་ཐོགས་ཡོད།
༢༽ ཁ་ལག་མ་ཟས་གོང་གི་སྐར་མ་༣༠སྔོན་དུ་ཆུ་ཕོར་པ་གང་འཐུང་ན་ཟས་འཇུ་བར་ཕན་ཐོགས་ཡོད།
༣༽ གཟུགས་པོ་མ་འཁྲུ་གོང་རོལ་དུ་ཆུ་ཕོར་པ་གང་འཐུང་ན་ཁྲག་གཤེད་བཅོག་པར་ཕན་ཐོགས་ཡོད།
༤༽ མ་ཉལ་གོང་དུ་ཆུ་ཕོར་པ་གང་འཐུང་ན་གྲིབ་དང་སྙིང་བགད་ན་ཚ་འགོག་པའི་ཕན་ཐོགས་ཡོད།

མིང་གསར་འདོགས་ཚུལ། ༼བྱ་རིགས་ཀྱི་སྐོར།༽

རྒྱ་བོད་དབྱིན་གསུམ་གྱི་གསར་བྱུང་མིང་མཛོད་ལ་དཔྱད་པ།



ལེགས་ཆ་ཡོད་པའི་མིང་།
༡༽ trochilus བྱིའུ་མཐེ་བོང་།

དོགས་གཞི་ཅན་གྱི་མིང་།
༡༽ Seagull ཆུ་སྐྱར། ༼དེ་ལ་མཚོ་སྐྱར་བཏགས་ན།༽
༢༽ penguin བྱ་ཁྱེའུ། ༼བྱ་དེ་ལ་དབྱིན་སྐད་དུ་པཎ་གྷུན་ཟེར་བ་དང་བྱ་དེའི་འགྲོ་སྟངས་དེ་ཡང་པཎྟ་འདྲ་པོ་ཡོད་པའི་པཎ་བྱ་བཏགས་ན།༽
༣༽ goose ངང་པ། ༼མིང་དེ་ནོར་བ་འདྲ། དེ་ནི་རྒྱ་མིས་ཡཱ་ཙེ་ཟེར་བ་དེ་རེད། ༽

རང་མོས་ཀྱི་མིང་།
༡༽ budgie ནེ་ཆུང་།
༢༽ cockatiel དྲི་ཟའི་བྱེའུ།

ས་ཡོམ་ལགས། ཚེ་སྲོག་གི་ཕུར་པས་བཏབ་ཆོག

དུས་རབས་ཀྱི་འཛད་མཐར།
ཚུལ་རོལ་གྱི་ཐ་མར།
ས་གཞི་ཡོམ་ཡོམ་བྱས།

བྱང་ཤར་ནས་འུར་སྒྲ་གྲགས།
ལྷོ་ནུབ་ནས་སྨྲེ་ངག་འདོན།
ངེད་ཅག་བོད་མིའི་ཚེ་སྲོག
བཙན་པོའི་འབར་འཐིལ་ན་ཡོམ་ཡོམ་བྱས།
ཅི་རེད་དམ། ས་ཡོམ་རེད་ཨང་ས་ཡོམ།

རྟག་ཏུ་ས་ཡོམ་ལ་འཇིགས་ནས་ཡོད་ལ།
ས་ཡོམ་གྱི་གཞན་དབང་དུ་ཡོད།
ས་ཡོམ་ལས་བྲོས་པར་དཀའ་ལ།
ས་ཡོམ་དང་ལྷན་དུ་གནས་པར་ཡང་དཀའ།
གང་རེད་དམ། འདི་ན་ངེད་ཅག་གི་ཕ་གཞིས་ཡིན།

ས་ཆེན་པོ་དུམ་བུ་ལྔར་བཀས་ཀྱང་།
གནམ་ཆེན་པོ་ཆར་བཞིན་ཟགས་ཀྱང་།
དུས་རྟག་ཏུ་ས་ཡོམ་གྱིས་ཉེན་པ།
འདི་ནི། ངེད་ཅག་གི་ཕ་གཞིས་ཡིན་པས།
ཚེ་སྲོག་གི་ཕུར་པས་ཁྱོད་ལ་བཏབ་ཆོག
ས་ཡོམ་ལགས།

བྱ་མ་བྱི་དང་བྱ་མ་བྱིའུ་ཡི་ཁྱད་པར།


དེང་སང་མང་པོས་བྱ་མ་བྱི་ནི་འཕུར་རྩལ་ཅན་གྱི་ཐང་རྒྱུགས་རེད་ཟེར་བ་དང་། ཡང་ཁ་ཤས་ཀྱི་མ་རེད་ཙི་ཙི་སྒམ་པོ་རེད་ཟེར་ནས་རྩོད་བཞིན་ཡོད་མོད་ཀྱང་། ཁོ་བོས་ལྟར་ན་དེ་ལྟར་རྩོད་མི་དགོས་པར་བྱ་མ་བྱི་དང་བྱ་མ་བྱིའུ་ལ་ཁྱད་པར་ཞིག་འཆད་ན་མིང་ཚིག་ཕྱུག་ཏུ་འགྲོ་བས་མ་ཚད་རྩོད་པ་ཅང་མི་འདུག་སྙམ། དེ་ཡང་ཁོ་བོར་མཐའ་གཅིག་ཏུ་འདི་ཡིན་ཞེས་རྒྱུ་མཚན་ཁུངས་དང་བཅས་པའི་ངེས་བཟུང་གི་ཐ་སྙད་གང་མེད་ཀྱང་བོད་མི་སྤྱི་བྱིངས་ཀྱི་ངག་འགྲོས་ཀྱི་སྒྲ་གདངས་འདོན་སྟངས་དང་། ཐ་སྙད་ཀྱི་གོ་སྟངས་ལ་རིགས་པས་བརྟགས་ནས་བརྗོད་ན། དེ་ཡང་།


༡༽ བྱ་མ་བྱི་ནི་༼བྱ་ཡང་མ་ཡིན་བྱི་བ་ཡང་མ་ཡིན་པའི་དོན་ཡིན་པས་༽ཐང་རྒྱུགས་སམ་ནགས་བྱི་ཤིང་སྡོང་ཕན་ཚུན་བར་འཕུར་འགྲོ་མཁན་(fying squirrel)དེ་ཡིན་ལ།



༢༽བྱ་མ་བྱིའུ་ནི་༼ནམ་མཁའ་བྱ་ལྟར་འཕར་འགྲོ་བ་གང་ཞིག་ལ་བྱ་དང་བྱིའུ་གང་ཡང་མིན་པར་དོན་ཡིན་པས་༽ཙི་ཙི་སྒམ་པོའམ་ཕ་ཝང་ལ་གོ་དགོས་སྙམ།

དབྱིན་མིང་བོད་བྲིས། ༼༡༽

དེང་སང་བོད་པའི་སྤྱི་ཚོགས་ནང་དབྱིན་སྐད་ཀྱི་མིང་མང་པོ་ཞེ་པོ་གཅིག་བོད་ཡིག་ནང་འབྲི་དུས་དག་ཆ་སོགས་ལ་དཀའ་ངལ་འཕྲད་དེ་སྒྲ་གདངས་མི་མཐུན་མང་པོ་ཡོང་བའི་དཀའ་ངལ་བསལ་ཐབས་སུ། ཤེས་ལྡན་པ་མང་པོའི་དབྱིན་སྐད་མིང་མང་པོ་བོད་ཡིག་དུ་དོན་བསྒྱུར་བྱེད་པ་དང་། ཡང་བོད་སྐད་དུ་སྒྲ་མཐུན་མཐུན་འདྲ་བའི་བོད་མིང་བཏགས་པ་སོགས་བྱས་པ་མི་ལེགས་པར་མཐོང་ནས། ང་ཚོས་དབྱིན་མིང་དེ་ཚོར་སྒྲ་གདངས་གསལ་པོར་འཐོན་པའི་བོད་ཡིག་གི་དག་ཆ་ཞིག་གཏན་འབེབས་བྱུང་ན་ཅི་མ་རུང་བསམས་ནས། ད་ལན་འདིར་ཉིན་རེའི་ཚོར་བའི་ནང་དགོས་མཁོ་དང་བེད་སྤྱོད་ཆེ་བའི་དབྱིན་མིང་མང་དག་ཅིག་བོད་ཡིག་ཏུ་བྲིས་ཡོད། གཤམ་དུ་བྲིས་པ་དེ་ཚོ་ནི་གཏན་འབེབས་མིན་པར་ཁོ་བོས་དཔྱད་གཞིར་ཕུལ་བ་ཡིན་པས། བློ་གཟུ་བོར་གནས་པའི་དཔྱོད་ལྡན་པ་ཚོས་དབྱིན་མིང་དེ་དག་བོད་ཡིག་ཏུ་བྲིས་སྟངས་ཐད་བསམ་འཆར་གང་ལེགས་གནང་རོགས། ཁོ་བོས་ཁྱེད་རྣམ་པའི་བསམ་འཆར་ལ་ཉན་ཞིབ་ཀྱིས་རིམ་པས་གོམ་པ་མདུན་དུ་སྤོས་རྒྱུ་ཡིན།

གསལ་བཤད། དཔེར་ན་yahoo messengerལྟ་བུ་དབྱིན་མིང་ཚིག་གཉིས་ཅན་དེ་ཚོ་འབྲི་དུས་སྔ་ཕྱིའི་མཚམས་གཅོད་བདེ་ཆེད་༼ཡ་ཧཽ་་མེ་སེན་ཇར་ལྟ་བུ་༽བར་དུ་ཚེག་བར་ཉིས་རྩེག་བྲིས་ཡོད།
༡༽ དྲ་ཚིགས་ཁག་གི་མིང་།

gmail རྗི་མེལ།
google གྷོ་གྷལ།
yahoo ཡ་ཧཽ།
yahoo messenger ཡ་ཧཽ་་མེ་སེན་ཇར།
hotmail ཧོཊ་མེལ།
rediff རེ་ཌིཕ།
facebook ཕེ་སེ་བྷུཀ
twitter ཊེ་ཝི་ཊར།
qq ཁེའུ་ཁེའུ།
google talk གྷོ་གྷལ་ཊོཀ
skype སེ་ཀྱེ་པེ། སེ་ཀ་ཡེབ།
Flickr ཧྥ་ལིཀ་ཀར།
hi5 ཧྱེ་་ཕ་ཡེཕ།



༢༽ ཁ་པར་བཟོ་གྲྭའི་མིང།

Nokia ནོ་ཀི་ཡ།
Samsung སེམ་སུང་།
Sony Ericsson སོ་ནྱི་་ཨི་རིཀ་སོན།
Motorola མོ་ཊོ་རོ་ལ།
LG ཨེལ་རྗི།
Apple ཨེབ་པལ།
HTC ཨེཆ་ཊི་སི།
Micromax མིཀ་རོ་མེཀ་སེ།
Karborn ཀར་བྷོན།

གློད་ཀླད་བཟོ་གྲྭའི་མིང་།

Apple ཨེབ་པལ།
Acer ཨེ་སར།
hp ཨེཆ་པི།
Lenovo ལེ་ནོ་ཝོ།
Dell ཌེལ།
Toshiba ཏོ་ཤི་བྷ།
Sony སོ་ནྱི།

བོད་ཡིག་གི་སྒོ་བྱང་། ཤ་བཙོང་རྒྱུ་ཡོད།



གཞིས་ཆགས་འདིར་མོན་གྷོ་ཞེས་པའི་གྲོང་བརྡལ་དང་ཧོབ་ལི་ཞེས་པའི་གྲོང་ཁྱེར་གཉིས་ཡོད་པ་ནི་ངས་བརྗོད་ཡེ་མི་དགོས་པར་ས་གནས་འདིར་ཕེབས་མྱོང་མཁན་ཞིག་ཡིན་ན་མཁྱེན་གྱི་ཡོད་པ་སྨོས་མེད་རེད། དེ་གཉིས་སུ་ཚོང་ཁང་དང་ཟ་ཁང་། གློག་རྩེད་video gameཁང་དང་གློག་བརྙན་ཁང་། ཤ་ཁང་དང་དྲ་ཁང་། དངུལ་ཁང་དང་སྦྲགས་ཁང་། ཀུན་འཛོམས་ཁྲོམ་ར་shopping mallསོགས་དབྱིན་ཡིག་གི་སྒོ་བྱང་ཡོད་པ་མང་པོ་ཡོད་ནའང་། དེ་དག་ལས་བོད་ཡིག་གི་སྒོ་བྱང་ཡོད་པ་ནི་ཉིན་མོའི་སྐར་མ་ལྟར་ཡིན་པ་སྤྱིར་བཏང་གི་ཁོར་ཡུག་གི་རང་བཞིན་ཞིག་ཡིན་པ་ལས་ངོ་གནོངས་དང་ཞུམ་པ་སྐྱེས་དགོས་པའི་གནད་དོན་ཞིག་མིན། འོན་ཀྱང་གྲོང་བརྡལ་དེ་དག་ཏུ་དམིགས་བསལ་གྱི་ཤ་ཁང་མང་པོ་ཞིག་ལ་བོད་ཡིག་གི་སྒོ་བྱང་མཐོང་རྒྱུ་ཡོད་པ་ནི་དངོས་གནས་ངོ་ཚ་དགོས་པ་ཞིག་འདུག་ཡ། ངས་ཧོབ་ལི་གྲོང་ཁྱེར་དུ་ཤ་ཚོང་སའི་སྒོ་ཤེལ་ཁྲའི་སྟེང་ཕག་ཤ་ཡོད་ཅེས་པ་མཐོང་སོང་ལ། མོན་གྷོ་གྲོང་བརྡལ་གྱི་ཤ་ཁང་དེ་དག་གི་སྒོ་འགྲམ་དུ་བོད་ཡིག་གི་སྒོ་བྱང་བྲིས་པ་མང་པོ་མཐོང་སོང་།


ལྷག་པར་དུ་གོང་གི་འདྲ་པར་དེ་ལ་ཡག་པོ་ཞིག་གཟིགས་དང་། དེ་ནི་བོད་ཡིག་མ་རེད་ཟེར་ན་ནི་བོད་ཡིག་གི་གསལ་བྱེད་སུམ་ཅུའི་བདག་ཉིད་ཅན་ཞིག་ཡིན་ལ། བོད་ཡིག་རེད་ཟེར་ན་ནི་གཅི་ཀ་ཀན་ཟེར་བ་དེ་འདྲ་དེ་སྔ་བོད་ཡིག་ཐོག་མེད་ལ། དབྱིན་ཡིག་ཐད་འདོན་ཡིན་ན་ནི་chickenཞེས་པའི་དབྱིན་ཡིག་གི་སྒྲ་གདངས་ཁྱོན་ནས་འཐོན་མེད་ལ། ལྷག་པར་བོད་ཡིག་ནང་བྱ་ཤ་ཞེས་པའི་ཐ་སྙད་ཡོད་བཞིན་དུ་གཅི་ཀ་ཀན་ཟེར་བ་དེ་འདྲ་བྲིས་དགོས་དོན་ཨེ་ཡོད། གལ་ཏེ་བོད་ཡིག་ནང་བྲིས་དགོས་ན་༼བྱ་ཤ་ཚོང་ཁང་དང་། བྱ་ཤ་ལྟེ་གནས་དང་། བྱ་ཤ་སེན་ཀྲར་༽བྲིས་ཆོག་ལ། གལ་ཏེ་སྒྲ་ཐད་འདོན་དགོས་ན་༼ཅིག་ཀེན་སེན་ཊར་༽ཞེས་བྲིས་ནའང་འགྲིགས། དེས་ན་ཡི་གེ་དེའི་དཔེ་བྲིས་མཁན་ནི་གཏན་གཏན་བོད་མི་ཞིག་ཡིན་ངེས་ལ། བོད་མི་ཞིག་གིས་རྒྱ་གར་བ་ཚོར་སྒོ་བྱང་གི་དཔེ་འབྲི་དུས་གང་བྱུང་མ་བྱས་པར་གཟབ་གཟབ་ངང་བརྡ་སྤྲོད་དང་མཐུན་པ་དང་། སྒྲ་གདངས་གསལ་པོ་འཐོན་པའི་ཡི་གེ་བྲིས་དགོས། ལྷག་པར་རྒྱ་གར་བ་ཚོས་བོད་ཡིག་གང་བྱུང་བྲིས་དུས་དོ་བདག་ལ་ཡི་གེ་དེ་འགྲིགས་མི་འདུག་ཅེས་བོད་མི་ཚང་མས་གསལ་བཤད་རྒྱག་དགོས་འདུག རྒྱ་གར་བ་ཚོས་ནི་དཔེར་ན་མངའ་སྡེའི་ཡི་གེ་དབྱིན་ཡིག་གི་འོག་བོད་མི་ཚོས་བྲིས་པར་ལམ་སེང་བསམ་འཆར་འདོན་གྱི་འདུག
ལྷག་དོན་ཤ་ཁང་དེ་ཚོའི་སྒོ་བྱང་ལ་བོད་ཡིག་མང་པོ་ཡོང་བ་དེ་དངོས་གནས་ངོ་ཚ་དགོས་པ་དང་། མི་རིགས་ཀྱི་ཞབས་འདྲེན་ཞུ་ཡི་འདུག

རྒྱ་གར་གྱི་གྲོང་བརྡལ་ཙམ་དུ་མ་ཟད་བོད་མིའི་གཞིས་ཆགས་ཀྱི་ནང་དུའང་བརྡ་སྤྲོད་དང་མི་མཐུན་པའི་བོད་ཡིག་གང་མང་བཀོལ་སྤྱོད་ཡོང་གི་ཡོད་པ་དཔེར་ན། ལོ་སྔོན་མའི་ནང་མོན་གྷོ་གཞིས་ཆགས་ཀྱི་གཞིས་གྲོང་དགུ་ལ་རེག་དུག་༼AID/HIV༽སྐོར་གྱི་འཕྲོད་བསྟེན་ཁྱབ་བསྒྲགས་ཀྱི་སྦྱར་བྱང་༼poster༽ཆེན་པོ་དེ་འདྲ་རེ་བཙུགས་ཡོད། དེ་འདྲའི་ལོ་ནས་ལོ་བར་བསྡད་པའི་སྦྱར་བྱང་གི་སྟེང་བརྡ་དག་དང་མི་མཐུན་པ་བྲིས་པ་འོག་གི་འདྲ་དཔར་ནང་གསལ་བ་ལྟར་རེད།



དེར་༼དུག་སྦྲང་གིས་སོ་རྒྱབ་པ་ཞེས་པའི་དོད་དུ་༽དུག་སྦྲང་གི་སོ་རྒྱབ་པ་ཞེས་བྲིས་ཡོད། དུག་སྦྲང་གི་སོ་རྒྱབ་པ་ལབ་ན་གོ་རྒྱུ་མེད་ཅིང་། ད་དུང་གོ་བ་ལེན་ཤེས་མདོག་བྱས་ན་དུག་སྦྲང་གི་སོ་ཡོད་པར་གོ་ཉེན་ཡོད།


གཞིས་ཆགས་ཉུལ་བའི་ལམ་བར་མཐོང་སྣང་འགའ།།
གུང་སེང་དུས་བསྟུན་རང་བློར་འཆར་སྣང་ཞིག།།
དཔྱད་ཞིབ་ནན་མོ་བྱེད་པར་མ་ཁོམ་ནས།།
ཐད་ཀར་ཟིན་བྲིས་འདིར་སྤེལ་རིག་པ་འདོན།།

མིང་གསར་འདོགས་ཚུལ། ༼ཁོར་ཡུག་སྲུང་སྐྱོབ་སྐོར།༽

ལེགས་ཆ་ཡོད་པའི་མིང་།
acid rain སྐྱུར་ཆར།
pesticide ཞིང་སྨན།
fertillizer རྫས་ལུད།
wildlife reserve རང་བྱུང་སྲུང་སྐྱོབ་ཁུལ།

དོགས་གཞི་ཡོད་པའི་མིང་།
dust storm བྱེ་རྡུལ་དྲག་རླུང་།
soil erosion from water ཆུ་ཤོར་ས་ཉིལ།
desertification ས་ངོས་བྱེ་འགྱུར།

རང་འདོད་ཀྱི་མིང་གསར།
dust storm ཐལ་རྡུལ་རླུང་འཚུབ།

མིང་གསར་འདོགས་ཚུལ། ༼ནུས་ཁུངས་སྐོར༽

༡༽ ལེགས་ཆ་ཡོད་པའི་མིང་།

Negative contact ཕོ་གློག་སྐུད་སྣེ།
Positive contact མོ་གློག་སྐུད་སྣེ།
Voltage stabilizer གློག་ཤེད་བརྟན་ཆས།
solar powered street lamp ཉི་གློག་ལམ་སྒྲོན།
solar furnace ཉི་ཐབ།
battery གློག་སྣོད།

༢༽ དོགས་གཞི་ཡོད་པའི་མིང་།

electric generator གློག་འདོན་འཕྲུལ།
windmill རླུང་འཁོར།
nuclear power station ཉིང་རྡུལ་གློག་ཚུགས།
hydro-electric power station ཆུ་གློག་ས་ཚུགས།
solar powered water heater ཉི་གློག་ཆུ་སྲོ་ཆས།
solar cell ཉི་ནུས་གློག་རྫས།
oil pump སྣུམ་འཐེན་འཕྲུལ།

༣༽ རང་གི་འདོད་མོས་ཀྱི་མིང་།
electric generator སྐམ་གློག
windmill རླུང་ཁང་།
nuclear power station ནེག་རྡུལ་གློག་ཚུགས།
hydro-electric power station བབ་ཆུའི་གློག་ཚུགས།
solar powered water heater ཉི་འོད་ཆུ་དྲོད།
solar cell ཉི་རྫས།
oil pump སྣམ་འདྲེན་འཕྲུལ་ཆས།

མིང་གསར་འདོགས་ཚུལ། ༼གནམ་རིག་ས་ཁམས་སྐོར།༽

ཁོ་བོའི་གྲོགས་པོ་ཞིག་ལས་ཟི་ཁྲོན་མི་རིགས་དཔེ་སྐྲུན་ཁང་ནས་དཔར་དུ་སྐྲུན་པའི་༼རྒྱ་བོད་དབྱིན་གསུམ་གསར་བྱུང་རྒྱུན་བཀོལ་རིས་འགྲེལ་མིང་མཛོད་༽ཞེས་པའི་དེབ་གཅིག་གཡར་རྒྱུ་བྱུང་། དེབ་དེ་ནི་ཆེས་ཡོངས་གྲགས་མིན་པའི་མིང་ཚིག་གསར་པ་མང་པོ་དང་སྙིང་པ་འགའ་རེ་དཔར་རིས་བཅས་བཀོད་འདུག་པ་དང་། དེའི་ནང་དོགས་འཆར་ཡོད་ན་བསམ་འཆར་ཤོད་རོགས་ཅེས་ཀྱང་འཁོད་འདུག་པས། ངོས་ནས་གོ་སྐབས་བྱུང་དུས་དེབ་དེའི་ནང་གི་དོགས་གཞི་ཡོད་པའི་མིང་ཚིག་དང་། ཡང་ལེགས་ཆ་མཐོང་བའི་མིང་ཚིག་དེ་འདྲ་རིམ་པས་ཟིན་བྲིས་འདིར་བཀོད་ནས་དྲ་གྲོགས་ཚོའི་བསམ་འཆར་ཉན་རྒྱུ་ཡིན།


ལེགས་ཆ་ཡོད་པའི་མིང་ཚིག

༡ Radar རེག་བརྡ།
༢ satellite འཁོར་སྐར།
༣ annual solar eclipse ཉི་མ་གདུབ་འཛིན།
༤ total solar eclipse ཉི་མ་ཧྲིལ་འཛིན།
༥ partial solar eclipse ཉི་མ་ཆ་འཛིན།
༦ planetarium གནམ་རིག་ཁང་།
༧ terraced ཐེམ་ཞིང་།

དོགས་འཆར་ཡོད་པའི་མིང་ཚིག
༡ coral reef བྱུར་བྲག
༢ volcano མེ་རི།

སྐད་ཀྱི་ཟུར་ཆགས་ཞེས་པ།

སྐད་ཀྱི་ཟུར་ཆག་པ་དཔེར་ན་མོ་ཊ་ཟེར་ན་དབྱིན་སྐད་མོ་ཊོར་གྱི་ཟུར་ཆག་པ་དང་། ནེ་ལེ་ཟེར་ན་ལེགས་སྦྱར་གྱི་སྐད་ནེའུ་ལ་ཡི་ཟུར་ཆག་པ་དང་། དེ་བཞིན་དུ་འཇུར་ཏ་དང་དུ་ཀཱུ་ལ་སོགས་རྒྱ་གར་གྱི་སྐད་ཟུར་ཆག་པ་ཡིན་ཏུ་ཆུག་ཀྱང་། དངོས་དོན་གྱི་རྒྱུ་མཚན་གང་ཡང་མེད་པར་སྐད་གདངས་འདྲ་ཆོས་ཙམ་འཐད་གྲུབ་ཏུ་བྱས་ནས་དེ་དང་དེའི་སྐད་ཀྱི་ཟུར་ཆག་པར་ཁ་ཅིག་འདོད་པ་ནི་རིགས་པ་མིན་པར་སེམས་ཏེ། སྔོན་དུས་བོད་སྐད་དུ་མེད་པ་ཞིག་ཡུལ་ལུང་གཞན་ནས་བོད་དུ་དར་བ་ལས་དེ་དང་དེའི་མིང་གི་སྐད་ཟུར་ཆག་པ་དང་། ཡང་ཡུལ་གཞན་གྱི་གཞུང་ལུགས་བོད་དུ་བསྒྱུར་སྐབས་སྐད་ཀྱི་ཟུར་ཆག་ནས་བྱུང་བ་དེ་འདྲ་ལས། དེ་དང་དེའི་ཡུལ་གྱི་དངོས་པོ་དེའི་མིང་བོད་སྐད་དང་བརྗོད་པ་འདྲ་བ་ཙམ་གྱིས་སྐད་ཀྱི་ཟུར་ཆག་པར་མི་རིགས་ཏེ། འཛམ་གླིང་འདི་ན་སྐད་རིགས་ཇི་སྙད་ཅིག་ཡོད་པ་དེ་དག་གི་ནང་དུ་བོད་སྐད་དང་འདྲ་ཆོས་མཐུན་པ་གང་མང་ཡོད་པ་མཐོང་བའི་ཕྱིར། དཔེར་ན་ཉི་ཧོང་གི་གྲངས་གནས་དེ་ཚོ་བོད་སྐད་དང་འདྲ་བ་དང་། ཕ་དང་མ་ཟེར་བ་དེ་ཚོ་ཡུལ་ལུང་ཕལ་མོ་ཆེ་འདྲ་བ་དང་། ཡང་མི་ཞེས་པ་དེ་དབྱིན་སྐད་མེན་manཟེར་བ་དང་འདྲ་བ་སོགས་སོ།།

གལ་ཏེ་བོད་ཀྱི་མིང་ཚིག་འདི་དང་འདི། སྐད་རིགས་དེ་དང་དེ་ནས་ཟུར་ཆག་པ་ཡིན་པར་བརྗོད་འདོད་ན། ཐོག་མར་སྐད་རིགས་དེ་དང་དེ་ནས་ཟུར་ཆག་སྟངས་བརྗོད་དགོས་ལ། དེ་འདྲ་བརྗོད་རྒྱུ་མེད་ན་གཞུང་འདི་དང་འདི་ནས་གསུངས་འདུག་ཅེས་ཁུངས་དགོས་པ་ལས། བབ་ཅོལ་དུ་སྐད་གདངས་དང་འཇུག་ཡུལ་འདྲ་མཚུངས་སུ་ཡོད་པ་གཉིས་ཁུར་ཡོང་ནས་དེ་དེའི་སྐད་ཀྱི་ཟུར་ཆག་པ་རེད་ཟེར་ན་སྙིང་པོ་མ་མཐོང་ཞིང་། དེ་བས་རྒྱ་མིས་ང་ཚོར་ཧམ་པ་བཤད་ཀྱི་འདུག བྱས་ཙང་ང་ཚོས་ཀྱང་ཧམ་པ་བཤད་ཀྱི་ཡིན་ཟེར་ན་ངོ་ཚ་བས་གནས་ལས་མི་འདའ་སྙམ།

དེས་ན་ཕྱིས་སུ་ང་ཚོའི་ཕ་མེས་ཀྱི་བོད་སྐད་ཆེ་ཕྲ་གང་ཞིག་ཡིན་རུང་དེ་དང་དེ་ཡུལ་གཞན་གྱི་སྐད་ཀྱི་ཟུར་ཆག་པ་ཡིན་པ་བརྗོད་འདོད་ན་རྒྱུ་མཚན་ཁུངས་དང་བཅས་པར་བརྗོད་དགོས་པ་ལས་དེ་མིན་འདྲ་ཆོས་ཙམ་རྒྱུ་མཚན་དུ་བྱས་ན་རེ་ཞིག་ངོས་ལན་ཞུ་ཐབས་མེད།

སྦུར་པས་མགོར་བརྡུང་པ། དངོས་བྱུང་མཚར་གཏམ།

བོད་ཀྱི་ལུང་པ་ཞིག་ལ་མི་ཚང་ཆེན་པོ་ཞིག་ཡོད་པ་དེར་བུ་ཞིག་ཡོད། ཐེངས་ཤིག་ལུང་པ་དེ་གཞན་དང་དཁྲུག་པ་ཤོར་བས་མཚན་མོ་ཞིག་བུ་དེ་གྲོང་མི་མང་པོ་དང་ལྷན་དུ་མེ་མདའ་ཁུར་ནས་འཛིང་སར་སོང་བ་རེད། དཁྲུག་འཛིང་བྱེད་བཞིན་པའི་སྐབས་སྦུར་པ་((འབུ་སྒལ་པ་འཁྲེགས་པོ་ཞིག))ཞིག་འཕུར་ཡོང་ནས་བུ་དེའི་མགོ་བོར་ཤུགས་ཆེན་པོས་བརྡུང་པས། ཁོའི་བསམ་པར་དཱ་མེ་མདའ་ཕོག་སོང་དྲན་ནས་མགོ་བོ་རས་ཞིག་གིས་ཡག་པོ་བསྡམས་ནས་མི་ཚོར་མགོ་ལ་མེ་མདའ་ཕོག་སོང་ལབ་ནས་ལོག་ཡོང་བས་གྲོང་མི་ཚང་མ་ཧང་སངས་ནས་བལྟ་བར་སླེབས། མི་ཚང་མ་འཛོམས་སར་དེར་གཅིག་གིས་ཁོའི་མགོའི་རས་དེ་ག་ལེར་བཀྲོལ་བས་དེའི་ནང་སྦུར་པ་ཆེན་པོ་ཞིག་མ་གཏོགས་མགོ་བོར་རྨ་ཤུལ་གང་ཡང་མེད་པས་མི་ཚོ་གད་མོ་ཤོར་བ་དང༌། ཁོ་རང་ངོ་ཚ་པོ་བྱུང་བ་རེད།

ཟླ་བའི་ནང་རི་བོང་འདུག་ཟེར།

ཟླ་དཀར་གྱི་ནང་དུ་ཨ་ཁུ་རི་བོང་ཡོད། ར་ས་ཕོ་ཉས་ད་ལྟ་རང་དཔར་བླངས། ཚོུད། ༡༠་༣༥།



ལོ་ངོ་ཐེར་འབུམ་གྱི་སྔ་རོལ་ནས་མི་ཚོས་ཟླ་བའི་ནང་རི་བོང་འདུག་ཟེར།

རི་བོང་གི་ཨམ་ཆོག་ཆེན་པོ་འདུག་ཟེར།

རི་བོང་གི་མཚན་མ་འདུག་ཟེར།

རོང་ཆེན་པོ་འདུག་ཟེར།

ྋགོང་ས་མཆོག་འདུག་ཟེར།

གྷན་དྷི་འདུག་ཟེར།

ད་ལྟ་ག་རེ་འདུག་ལྟོས་དང༌།

ངས་ད་ལྟ་རང་བཅོ་ལྔའི་ཟླ་བའི་སྐུ་དཔར་ཞིག་བླངས་ཡོད།

གཤམ་གི་འཆན་བུའི་ནང་ཁྱེད་ཀྱི་ག་རེ་མཐོང་བ་བརྗོད་དང༌།

གློག་ཀླད་ཀྱི་ཟུར་ནས་ཀྱང་ལྟོས་དང༌།

རེད་ཡ། རེད་ཡ།

སོ་སོ་ལ་སོ་སོར་མཐོང༌། ངས་རྟག་ཏུ་འདི་ལྟར་སོམ།

ཟླ་བའི་ནང་རི་བོང་མཚན་མ་ཅིས། བྱ་རྒོད་ཀྱི་མཚན་མ་ཅིས་མ་ཡིན།

རྟག་ཏུ་རི་བོང་གི་མཚན་མ་མཐོང༌། དེ་མེད་པའི་ཟླ་བ་མེད།

ས་རོང་ཡིན་ན། ཟླ་བ་མི་འཁོར་རམ།

ཕལ་ཆེར་མི་འཁོར་བ་འདྲ། ཁྱེད་ཀྱིས་ཅི་བསམས། མཆན་བུ་ཐོབས།

དཔའ་བོ་མིན།

གཡག་རྒོད་དར་མ་འདུལ་བའི་ཤེད་ཤུགས་དང༌།།

ལྕགས་མདོང་སྐེད་ནས་གཅོད་པའི་གྲི་ཡོད་ཀྱང༌།།

ཕ་རོལ་དགྲ་ལ་རྒོལ་དུས་མི་སྟོན་ན།།

བརྟུལ་ཕོད་ཅན་གྱི་དཔའ་བོ་ག་ལ་ཡིན།།



ནམ་མཁའི་ཁྱོན་ཀུན་འགེངས་པའི་ཤེས་ཡོན་དང༌།།

སྟོང་གསུམ་སྙན་པར་གྲགས་པའི་མིང་ལྡན་ཡང༌།།

འུ་ཐུག་ཉག་ཕྲའི་དུས་སུ་མི་ཕན་ན།།

བརྟུལ་ཕོད་ཅན་གྱི་དཔའ་བོ་ག་ལ་ཡིན།།



རི་རབ་ཁྱུར་མིད་བྱེད་པའི་སྙིང་སྟོབས་དང༌།།

སྤྱི་དོན་ཁོང་དུ་སྦྲུམ་པའི་བློ་ལྡན་ཡང༌།།

གཞུང་དང་མི་མང་དོན་དུ་མི་སྨན་ན།།

བརྟུལ་ཕོད་ཅན་གྱི་དཔའ་བོ་ག་ལ་ཡིན།།



རབ་དཀར་དར་ལ་འགྲན་པའི་ལྷག་བསམ་དང༌།།

དྲང་བདེན་ཁ་ནས་སྨྲ་བའི་ལྕེ་ལྡན་ཡང༌།།

མིང་འདོན་ཡིག་ཐོག་འགོད་པར་མི་ཕོད་ན།།

བརྟུལ་ཕོད་ཅན་གྱི་དཔའ་རྒོད་ག་ལ་ཡིན།།



ནོར་ལྡེ་ཚགས་པར་སྟེང་འགོད་ཟིན།

ཤོག་བུ་ཁྲ་ཁྲ། ? ཕྱེ་མ་ལེབ། ? ཅེམ་ཅེ་ལྷ་མོ། ?

དགོས་འདོད་ནོར་བུའི་འོད་ཀྱིས་ལྷ་ལམ་འགེངས།།
འགེངས་མེད་སྨྱུ་གུ་སྟེང་པས་མཛུབ་རྩེ་ནས།།
ནས་འབྲུ་ཐང་ལ་གཏོར་བའི་དོ་ཟླ་རུ།།
རུ་ངར་ཤོག་བུ་ཁྲ་ཁྲ་འདི་ལྟར་བཟོའོ།།

སྙན་གྲགས་ཀྱི་མིང་སྐམ་རང་བྱུང་གི་ཕུང་གཞི།།
འདོད་ཡོན་གྱི་ལོངས་སྤྱོད་རང་སྐྱེལ་གྱི་ཕུང་གཞི།།
གཉེན་ཉེ་ཡི་མཆེད་འཁོར་རང་སླུ་ཡི་ཕུང་གཞི།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

དམ་ཆོས་ཀྱི་སྣང་བ་ཉི་ཟེར་བཞིན་འཚེར་ཀྱང་།།
ཡོ་ལང་གི་ན་བུན་ཚང་ག་དེ་ཆེ་བས།།
དྲི་མེད་ཀྱི་བླ་མའི་མཇལ་ཁ་ཞིག་རག་ཆེད།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

རང་ལག་གི་སྨྱུ་གུ་ཕུང་སྐྱོར་གྱི་འཁར་བ།།
རང་ལུས་ཀྱི་གཟན་ཤམ་ཞེན་བྲལ་གྱི་སྐྱོ་གར།།
རང་སེམས་ཀྱི་འབའ་ཁུག་ལྟ་གྲུབ་ཀྱི་ཕག་ཚང་།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

དེང་དུས་ཀྱི་མི་གཤིས་མཐོ་སྒང་གི་དར་ལྕོགས།།
དེང་དུས་ཀྱི་འགྲིག་ལམ་ཐལ་རྡུལ་གྱི་རྭ་བ།།
དེང་དུས་ཀྱི་དཔལ་འབྱོར་མགོ་མེད་དམག་དཔུང་།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

ལྷ་ཆོས་ཀྱི་བྱིན་རླབས་སྙིང་དབུས་སུ་མེད་ན།།
སྔོ་ལྗང་གི་སྒོར་མོའི་ཁྲི་སྟེང་དུ་ཉལ་ཡང་།།
སྙིང་མེད་གྱི་ཤོག་བུ་ཁྲ་ཁྲ་ཞིག་སྟེང་དུ།།
ཕྱེ་ལེབ་ཞིག་བབ་དང་ཁྱད་པར་ནི་ཨེ་མཆིས།།

ལོ་ངོ་མང་པོའི་གོང་དུ་ཚོགས་ཐུན་ཞིག་གི་སྐབས་ཤོག་སྙིགས་ཤིག་སྟེང་བྲིས་པ་ད་ལན་འདིར་བཀོད།

སྡོམ་འཐག་ལ་མིག་ག་ཚོད་ཡོད་དམ།

༼སྡོམ་འཐག་ནི་འབུ་སྲིན་གཞན་དང་མི་འདྲ་བར་རྐང་ལག་བརྒྱད་ཡོད་ལ། འབུ་སྲིན་རྣམས་ཐག་པས་བསྡམས་པ་སོགས་བྱས་ནས་ཟ་བར་བྱེད་ཞིང་༼ཁྲག་གམ་བཅུད་འཇིབ་པ་༽ཡུལ་ལུང་དགའ་ཤེས་སུ་བྱིའུ་ཆུང་ཆུང་དེ་འདྲའང་ཟ་མཁན་ཡོད། བོད་ཀྱི་ཡུལ་ལུང་འགའ་ཤས་སུ་སྡོམ་འཐག་གི་མིང་ལ་རྒྱ་ཀ་ར་དང་། ཡང་ཁ་ཤས་སུ་འདྲེ་ཕོ་བ་ར་ཞེས་ཀྱང་འབོད་ཀྱི་ཡོད། སྡོམ་ཐག་ནི་སྡོམ་གྱི་སྐུད་པ་ཡིན། མིང་གི་རྣམ་གྲངས་ལ། བ་རྒྱ། བ་ཐག སྡོམ་སྐུད། སྡོམ་དྲ།༽

སྡོམ་འཐག་ལ་མིག་ག་ཚོད་ཡོད་དམ།
༼སྡོམ་འཐག་ཆེན་པོ་དེ་འདྲའི་གློག་བརྙན་གང་མང་འདོན་ཡོད་པ་དེ་ཚོ་འགའ་ཞིག་གི་ནང་སྡོམ་འཐག་གི་མིག་ནི་ཞེད་སྣང་ཚ་པོ་དེ་འདྲ་སྟོན་ཡོད་ནའང་དེ་དག་ནི་ཧོ་ལི་ཝུཌ་ཡི་རྟོག་བཟོ་ཙམ་ལས་དོན་དངོས་དེ་ལྟར་མིན།༽
༡༽ སྡོམ་འཐག་རིགས་འགའ་ཤས་ལ་མིག་དྲུག་དང་བཞི་དང་གཉིས་བྱས་པ་དེ་འདྲ་ཡོད་ཀྱང་སྡོམ་འཐག་ཕལ་མོ་ཆེར་མིག་བརྒྱད་ཡོད་ལ། ཁོང་ཚོའི་མིག་གི་གྲལ་སྒྲིག་སྟངས་ལས་ཚན་རིག་པ་ཚོས་སྡོམ་འཐག་དེ་རིགས་གང་ཡིན་ངོས་འཛིན་པར་ཡང་ཕན་ཐོགས་ཡོང་གི་ཡོད། དེས་ན་ཚན་རིག་མཁན་ཚོས་ཐག་ཉེ་ནས་སྡོམ་འཐག་གི་མིག་ལ་ལྟ་འདོད་ཡོང་ནས་ཐག་ཇི་ཉེ་ནས་ལྟ་བར་གྲ་སྒྲིག་བྱས་པ་རེད།

སྤྱིར་བཏང་སྡོམ་འཐག་གི་མགོ་བོའི་སྟེང་མིག་ཁ་ཤས་ཡོད་ནའང་མདུན་དུ་དེ་ལས་མང་བ་ཡོད། དེ་ལྟར་སྡོམ་འཐག་ལ་མིག་དེ་འདྲའི་མང་པོ་ཡོད་ནའང་ཡ་མཚན་པ་ཞིག་ལ་སྤྱིར་བཏང་སྡོམ་འཐག་ལ་མིག་གི་མཐོང་ཤུགས་ཡག་པོ་མེད། ཕལ་ཆེར་ཁོང་ཚོས་གཡས་གཡོན་དུ་འགུལ་བཞིན་པའི་སྣང་མུན་གྱི་དབྱིབས་ཙམ་རིག་གི་ཡོད་པ་ཡིན། སྡོམ་འཐག་གིས་རྔོན་རྒྱག་དུས་མིག་སྐྱོ་བོ་དེ་ལ་ཁྱད་དུ་འཕགས་པའི་གཡོ་འགུལ་ཚོར་ཤེས་དང་ཟས་ཚོར་ཤེས་ཀྱི་ནུས་པས་རོགས་རམ་བྱེད་ཀྱི་ཡོད།

སྡོམ་འཐག་གི་མིག་ནི་dragonflyའབུ་བླ་མ་མ་ནིའི་མིག་ནང་བཞིན་མིག་གཅིག་གི་ནང་མཐོང་ངོས་མང་པོ་ཡོད་པ་དེ་འདྲ་མིན་པར་སྤྱིར་བཏང་གི་མིག་མཐོང་ངོས་གཅིག་ཅན་དེ་འདྲ་ཡིན།
༢༽ དམིགས་བསལ་དཔག་འཆོང་སྡོམ་འཐག་jumping spiderགི་རིགས་ནི་མིག་གིས་ཧ་ཅང་ཡག་པོ་མཐོང་ཐུབ་ཀྱི་ཡོད། ཁོང་ཚོའི་མགོ་བོའི་མདུན་ཕྱོགས་སུ་མིག་ཧ་ཅང་ཆེན་པོ་དེ་འདྲ་ཡོད།

ར་ས་ཕོ་ཉས་དཔར་བླངས།

གོང་གི་འདྲ་དཔར་དེར་ཁྱེད་ཀྱི་ལྟས་ཚེ་དོ་སྣང་བྱ་དགོས་ས་གཉིས་ཡོད་པ།
༡ མིག་ནག་པོ་ཆེན་པོ་འདི་འདྲའི་གྲལ་ཡོད་པ།
༢ དཔར་རྒྱག་མཁན་ལ་ལྟ་བཞིན་ཡོད་པ།

དེ་གཉིས་ལ་འབྲེལ་བ་ཆེན་པོ་ཡོད། དཔག་འཆོང་སྡོམ་འཐག་གིས་མིག་ཆེན་པོ་དེ་ཚོས་དངོས་པོ་དཔེ་མང་པོ་མཐོང་ཐུབ་ཀྱི་ཡོད་ལ། དངོས་པོ་གང་ཞིག་འགུལ་བསྐྱོད་བྱས་པ་དང་མིག་དེ་ཚོ་བརྟག་ཞིབ་བྱེད་པར་བེད་སྤྱོད་བྱེད་ཀྱི་ཡོད། དེས་ཁོང་ཚོར་དཔར་རྒྱག་རྒྱུར་དཀའ་ངལ་བཟོ་ཡི་ཡོད། གང་ཡིན་ཟེར་ན། ཁོང་ཚོས་པར་ཆས་ཀྱི་ཤེལ་ཀོ་མཐོང་བ་དང་དེའི་སྟེང་འཆོང་སྡོད་ཀྱི་ཡོད། ཁོང་ཚོར་དཔར་ཞིག་རྒྱབ་པའི་རྗེས་སོ་སོའི་གདོང་པའམ་པར་ཆས་གང་རུང་གི་སྟེང་སྡོམ་འཐག་དེ་འཆོང་ཚར་བ་རེད།

སྡོམ་འཐག་དེ་རྒྱུན་ལྡན་ཞིག་མིན་པར་སྟོན་ཆེད་གཤམ་དུ་དཔག་འཆོང་སྡོམ་འཐག་གཞན་པ་ཞིག་གི་དཔར་བཀོད་ཡོད། སྡོམ་འཐག་དེར་མདུན་དུ་མིག་ཆེན་པོ་དེ་འདྲ་མཐོང་རྒྱུ་ཡོད་ལ། ད་ལན་སྟེང་ནས་དཔར་བཏབ་པས་སྡོམ་འཐག་དེར་མདུན་གྱི་མིག་བཞི་ཙམ་དུ་མ་ཟད་པ་ཤེས་ཐུབ་པ་ཡིན།

༣༽ མཇུག་ཏུ་སྡོམ་འཐག་ལ་མིང་གསར་པ་ཞིག་བཏགས་པ།

སྡོམ་འཐག་གི་མིང་གི་རྣམ་གྲངས། ལྟེ་བལ་ཅན། འཐག་མཁན། དྲ་བ་ཅན། སྤྲེའུ་འདྲ། བལ་ཅན། འབུ་སྡོམ། རྒྱ་ཀ་ར། འདྲེ་ཕོ་བ་ར་སོགས་སྔར་ནས་ཡོད་ལ་དེ་དག་སྟེང་། ད་ལན་ཁོ་བོས་མིང་གསར་པ་ཞིག་བཏགས་འདོད་པ་ནི་༼མིག་བརྒྱད་པ་༽ཞེས་པ་དེ་ཡིན། ཡང་རྐང་མིག་བརྒྱད་པ་ཞེས་ཀྱང་བཏགས་ཆོག

༸གོང་ས་མཆོག་དང་ཊེ་གྷར་ཝུཌ་Tiger wood།


ཊེ་གྷར་ཝུཌ་ཡིས་ཁོང་རང་ནང་ཆོས་ཀྱི་དམ་ཚིག་ལས་ལོག་ལམ་དུ་འགྲོ་བར་བརྗོད་པའི་སང་ཉིན་དེར་༸གོང་ས་མཆོག་གིས་རང་རང་སོ་སོས་ཚུལ་ཁྲིམས་སྲུང་བ་དེ་ནང་ཆོས་དཀྱིལ་ནས་རིན་ཐང་ཆེ་ཤོས་ཞིག་ཡིན་ཞེས་ཊེ་གྷར་ཝུཌ་ཡི་ཆགས་སྤྱོད་ཀྱི་མིང་རྗེས་སྐོར་ལ་གླེང་གནང་ཡོད།

དེ་ཡང་ལོ་སྔོན་མའི་སྤྱི་ཟླ་༡༡ཚེས་༢༧རེས་གཟའ་པ་སངས་ཀྱི་སྔ་དྲོའི་ཆུ་ཚོད་༢༌༣༠ཐོག་ཊེ་གྷར་ཝུཌ་ཡིས་རང་ཁྱིམ་གྱི་ཉེ་སར་མོ་ཊ་བརྡབ་སྐྱོན་ཤོར་བ་ལས་ཝུཌ་ཡི་ལོག་གཡེམ་གྱི་གནས་ཚུལ་མང་པོ་ཞིག་མི་མང་ཁྲོད་ཕྱིར་བསྒྲགས་བྱུང་བ་ལས། ཉེ་ཆར་ཊེ་གྷར་ཝུཌ་ཡིས་རང་གི་ནང་མི་དང་དགའ་མོས་བྱེད་མཁན་གྱི་ལྟད་མོ་བ། གྷོལྥ་golfརྩེད་མཁན་ཚོར་དགོངས་སེལ་ཞུས་ནས་ལོག་གཡེམ་གྱི་ལམ་བུ་དེ་དོར་ཡོད་འདུག་པ་དང་། གྷོལྥ་རྩེད་མགྲན་པ་དེས་རང་ཉིད་ཀྱི་ན་ཚ་༼ཆགས་སྤྱོད་༽ལ་ནང་ཆོས་ཀྱིས་ཚོད་འཛིན་བྱས་ནས་ཕན་ཐོགས་བྱུང་བ་དང་། དེ་ཡང་༸གོང་ས་མཆོག་ནས་བརྒྱུད་པ་ཡིན་ཞེས་བསྒྲགས་འདུག དེ་ཡང་ཝུཌ་ཡིས།

"ཁྱེད་ཀྱིས་དེར་ནང་ཆོས་ཟེར་རམ་ཡང་ན་ཆོས་ལུགས་གང་ཞིག་གི་མིང་བཏགས་ནའང་། སོ་སོས་ཚུལ་ཁྲིམས་སྲུང་རྒྱུ་དེ་གལ་ཆེ་ཤོས་རེད། དེ་ཡང་རྗེས་འབྲས་ལ་དྲན་ཤེས་རྟེན་པའི་ངང་ནས།" "ཕྱི་རོལ་གྱི་དངོས་པོ་དང་སོ་སོ་རང་ཉིད་བཅས་ལ་སྲེད་པའི་དབང་གིས་སྡུག་བསྔལ་བྱུང་བ་དང་། དོན་སྙིང་མེད་པའི་སྲུང་སྐྱོབ་འཚོལ་བ་ཡིན་པར་ནང་ཆོས་ཀྱི་སློབ་ཀྱི་འདུག དེས་ང་ལ་ཀུན་སློང་ངམ་རྣམ་རྟོག་ཐམས་ཅད་སྒོ་རྒྱག་རྒྱུ་བསླབ་བྱུང་།" ཞེས་བརྗོད་འདུག

འོན་ཀྱང་གསར་འགོད་པ་ཚོས་༸གོང་ས་མཆོག་ལ་དེའི་ཐད་བཀའ་དྲི་ཞུ་དུས་༸གོང་ས་མཆོག་གིས་ད་བར་ཊེ་གྷར་ཝུཌ་ཞེས་པ་ཐོས་མྱོང་མེད་གསུངས་འདུག་པ་དང་། ཡང་༸གོང་ས་མཆོག་གིས་རྩེད་རིགས་ཀྱི་ཐད་ལ་རྒྱུས་མངའ་མེད་པ་དེ་ངའི་ཞབས་འདྲེན་ཡིན་གསུངས་འདུག འོན་ཀྱང་གནས་ཚུལ་རྣམས་ཞུས་པའི་རྗེས་སུ་༸གོང་ས་མཆོག་གིས་"འདི་ལྟར་ལོག་གཡེམ་གྱི་ངོ་བོར་འགྱུར་ཟིན་པའི་རྗེས་སུ་ཆོས་ལུགས་ཚང་མར་བསམ་ཚུལ་གཅིག་པ་ཡོད།" "ནང་ཆོས་དང་ཆོས་ལུགས་གཞན་པ་ག་རེ་ལབ་ནའང་སོ་སོས་ཚུལ་ཁྲིམས་སྲུང་རྒྱུ་དེ་གལ་ཆེ་ཤོས་ཡིན།" "དེ་ཡང་དྲན་ཤེས་བཞིན་གྱིས་ཟིན་པའི་སྒོ་ནས་"ཞེས་ཁ་བསྐོང་མཛད་ནས་གསུངས་འདུག

ཊེ་གྷར་ཝུཌ་ནི་༡༩༧༥ ལོར་ཨ་མི་རི་ཀའི་ཀ་ལི་ཕོར་ནིཡ་californiaམངའ་ཁུངས་སུ་ཨ་མི་རི་ཀའི་དམག་ཟུར་ཝུཌ་woodཟེར་བ་ཞིག་དང་ཁོང་གི་མནའ་མ་ཐ་ཡེ་ལིན་ནས་ཡིན་པ་ཞིག་ལས་སྐྱེས་པ་དང་། ཊེ་གྷར་ཞེས་བསྡུས་མིང་དུ་ཕའི་གྲོགས་པོ་ཝི་ཏི་ནམ་དམག་མི་ཞིག་ཡོད་པ་དེ་ལས་བཏགས་འདུག ཕྱིས་སུ་གྷོལྥ་ཡག་པོ་རྩེད་པ་ལས་རྒྱལ་ཁ་ཆེན་པོ་ཐེངས་མ་༡༤་ཐམ་པ་ལེན་པས་ཁོ་རང་དུས་རབས་ཀྱི་རྩེད་འགྲན་པ་ཡག་ཤོས་དང་ལམ་ལྷོངས་ཆེ་ཤོས་དེ་ཆགས་ཡོད།

༸གོང་ས་མཆོག་ཊེ་གྷར་ཝུཌ་རང་ཉིད་བསྡད་སའི་མངའ་སྡེ་ཕོ་ལོ་རི་ཌ་floridaནང་དེ་རིང་རེས་གཟའ་ཟླ་བའི་ཉིན་ཆིབས་བསྒྱུར་གནང་གི་ཡོད་ནའང་། དེའི་ཞོགས་པ་གྷོལྥ་རྩེད་འགྲན་པ་ཨང་དང་པོ་ཊེ་གྷར་ཝུཌ་ཁོ་རང་མིས་སིས་སིབ་པི་mississippiམངའ་ཁོངས་སུ་sex rehabilitation clinic སྨན་ཁང་ལ་འགྲོ་དགོས་པས་རང་ཉིད་ཀྱིས་ཡང་བསྐྱར་ཉམས་སུ་ལེན་པའི་ཆོས་ལུགས་ཀྱི་དབུ་ཁྲིད་དང་མཇལ་ཐུབ་ཀྱི་མེད་པ་འདྲ་འདུག

གོང་གསལ་གནས་ཚུལ་རྣམས་དབྱིན་ཡིག་གི་གསར་ཤོག་དང་དྲ་ཚིགས་ཁག་ལས་བཏུས།

༸གོང་ས་མཆོག་དང་ཨོ་བྷ་མ་མཇལ་འབྲེལ།

རྒྱ་ནག་གི་ངོ་རྒོལ་གྱི་གནོད་ཤུགས་ལ་ཇི་མ་སྙམ་པར་ཨ་མི་རི་ཀའི་སྲིད་འཛིན་ཨོ་བྷ་མས་༸གོང་ས་མཆོག་དང་ཁ་སེང་རེས་གཟའ་ཕུར་བུའི་ཉིན་མཇའ་འབྲེལ་གནང་ཡོད།



༸གོང་ས་མཆོག་གིས་བསིལ་ལྷམ་བཞེས་ནས་ཨ་མི་རི་ཀའི་སྲིད་འཛིན་གྱི་ཕོ་བྲང་དཀར་པོའི་ནང་ཕེབས་པ་དེས་ཁོང་མི་དཀྱུས་མ་ཞིག་ཡིན་པ་མི་མཚོན་པར་ཁྱད་དུ་འཕགས་པའི་སྐྱེ་བོ་ཞིག་ཡིན་པར་ཤེས་ལྡན་པ་ཚོས་མཐོང་ཡོད་འདུག





༸གོང་ས་མཆོག་དང་སྲིད་འཛིན་ཨོ་བྷ་མ་མཇལ་འཕྲད་གནང་བའི་སྐབས་གསར་འགོད་པ་ཚང་མ་རྒྱང་རིང་དུ་ཕུད་ཡོད་འདུག







༸གོང་ས་མཆོག་གིས་ཁོང་གི་བོད་ལ་ཚད་མཐོའི་རང་སྐྱོང་བརྩོན་གྱི་ཡོད་པ་ལས་རང་བཙན་བརྩོན་གྱིས་མེད་གསུངས་ཡོད་ཀྱང་། པེ་ཅིང་གིས་ནོར་ཝེལ་ཞི་བདེ་གཟེངས་རྟགས་བཞེས་མཁན་ལ་འཇིགས་སྣང་ཅན་གྱི་ཁ་བྲལ་རིང་པ་རེད་ཞེས་ངོས་འཛིན་བྱེད་ཀྱི་ཡོད།

རྒྱ་ནག་གི་ཕྱི་སྲིད་མགྲིན་ཚབ་པ་མ་ཛ་སུས་ཨོ་བྷ་མས་༸གོང་ས་མཆོག་ལ་མཇལ་འཕྲད་བྱས་པ་དེས་དེ་སྔ་ཨ་མི་རི་ཀས་བོད་རྒྱ་ནག་གི་ཆ་ཤས་ཡིན་པ་དང་བོད་རང་བཙན་ལ་རྒྱབ་སྐྱོར་མེད་པའི་རྣམ་པ་ལ་གླེང་སློང་དང་རྒོལ་བ་རེད་ཞེས་ལབ་ཡོད།

ཨོ་བྷ་མས་བོད་ཀྱི་ཆོས་དང་རིག་གཞུང་། འགྲོ་བ་མིའི་སྲུང་སྐྱོབ་བཅས་ལ་རྒྱབ་སྐྱོར་ཤུགས་ཆེ་བྱ་རྒྱུ་ཡིན་པ་བརྗོད་འདུག

ད་ལན་༸གོང་ས་མཆོག་གིས་ཨ་རིའི་སྲིད་ཟུར་ཁི་ལི་ཌོན་གྱི་ལྕམ་ཧེ་ལེ་རི་དང་ཡང་མཇལ་འཕྲད་གནང་ཡོད་པ་དང་། ད་ལན་ཨ་རི་སྲིད་འཛིན་དང་མཇལ་འཕྲད་གནང་བ་དེ་སྲིད་དོན་གྱི་འབྲེལ་བའི་ཆ་ནས་ཡིན་འདུག

ལོ་གསར་ལ་བྲིས་པའི་སྙན་ཚིག ༼བཀྲ་ཤིས་བདེ་ལེགས།༽

རབ་ཡངས་གཤོག་ཟུང་མཁའ་རུ་བརྐྱངས་ནས་ངང་པ་ཁྱོ་ཤུག་བགྲོད་པའི་ཤུལ།།
ཉི་མ་དམར་པོའི་བཞིན་གྱི་དཀྱིལ་འཁོར་སྐྱོ་ཉམས་དུ་མས་ཁེངས་ནས་ནི།།
རྩེ་ཤིང་ནགས་ཀྱི་མགོ་སྤུ་ཟེང་བའི་རི་བོ་ཕ་གིའི་རྒྱབ་ཕྱོགས་སུ།།
མི་འདོད་ལས་ཀྱི་རླུང་བུས་དེད་དེ་ལོ་འདིའི་གྱེས་མཇལ་ཐ་མ་ཡིན།།

སྨག་རུམ་ཁྲོད་དུ་འོད་མདངས་ཉམས་མེད་ཆེམ་ཆེམ་སྐར་མའི་ཚོགས་འཁོར་འདི།།
མི་རིགས་ཆེད་དུ་ཟུངས་ཁྲག་ཟད་པའི་རྒྱལ་གཅེས་དཔའ་བོའི་རྣམ་ཤེས་འདྲ།།
ས་ཡ་དྲུག་གི་བདེན་དོན་རྩོད་པའི་མི་ཕམ་ལྕགས་ཀྱི་སྟག་རྒོད་དེས།།
བདེ་སྐྱིད་རང་དབང་སླར་གསོ་བྱེད་པར་སྨོན་སྨོན་བྱེད་སྙམ་འཕྱང་མོ་ཉུག།

ཁུ་སིམ་ལོ་མཐའི་མཚན་མོ་འདི་ལ་དབུགས་ཀྱི་རྒྱུ་བའི་བར་མཚམས་ན།།
རེ་སྨོན་ལྟོགས་པའི་སྟག་གིས་འདྲེད་པས་སྙིང་གི་འཕར་ལྡིང་ཇི་ཆེ་རེད།།
གཡོ་རྫུན་བཙན་ཤེད་འཕར་སྤྱང་དེ་ཚོ་རིང་སར་སྐྲོད་པའི་ཡིད་ཆེས་དང་།།
རྒྱལ་བའི་གསེར་ཁྲི་གངས་རྩེར་སྟེགས་པའི་རེ་འདུན་དེ་ཡིས་སྙིང་རུས་བཙུགས།།

སང་གི་ཐོ་རངས་སྐད་ཆེན་ཤར་ནས་སྐྱ་རེངས་དང་པོ་ཟིན་པ་ན།།
ལྕགས་སྟག་ངར་མའི་ལོ་ལ་ཆིབས་ནས་བོད་ཀྱི་རྩ་དོན་རྩོད་དུ་འགྲོ།
རིང་མིན་བློ་ལྡན་རི་བོང་སླེབས་དུས་གངས་ཅན་བོད་ཀྱི་ཞིང་ཁམས་སུ།།
གཞིས་བྱེས་མཉམ་འཛོམ་ཉི་གཞོན་འོག་ན་སྤྲོ་སྐྱིད་ངང་ནས་ལོ་གསར་ཆོག།

གྲྭ་ཆུང་ལོ་༡༢ཅན་གྱིས་ཀྱང་ལོ་གསར་མི་གཏོང་ཚུལ་བཤད་པ།

རེས་གཟའ་ཟླ་བའི་ཉིན་ངོས་རང་མཐོ་ལྡིང་དགོན་པར་འགྲོ་དུས་དགོན་པའི་འདུ་ཁང་སྒོ་རྒྱབ་འདུག་པ་དང་། ཟུར་གྱི་གྲྭ་ཤག་གི་བང་འཁྱམས་སུ་གྲྭ་ཆུང་ཞིག་བསྡད་འདུག ང་དང་ངའི་རོགས་པ་གཉིས་མཐོང་བ་དང་གྲྭ་ཕྲུག་དེས་ནང་རྟེན་མཇལ་བར་སླེབས་ཡིན་པས་ཟེར་བྱུང་བས་ངས་ཡིན་བྱས་པ་དང་། གྲྭ་ཕྲུག་དེས་མགྱོགས་མྱུར་ཐོག་བརྩེགས་གཉིས་པའི་སྟེང་རྒྱུགས་ཕྱིན་སོང་། དེ་ནས་གྲྭ་ཆུང་དེ་ལྡེ་མིག་ཞིག་ཁྱེར་ཡོང་ནས་རྒན་ལགས་ད་ལྟ་ཁ་ལག་མཆོད་ཀྱི་འདུག ཁྱེད་གཉིས་ཡར་ནང་ལོགས་ལ་སྒུག་སྡོད་ཟེར་ནས་འདུ་ཁང་གི་སྒོ་ཕྱེ་སོང་། འདུ་ཁང་ནང་དུ་འགྲོ་དུས་འདུ་ཁང་གི་ཆེ་ཆུང་ནི་གྲྭ་གྲངས་ལྔ་བཅུ་ཙམ་ཤོང་བ་ཞིག་འདུག་པ་དང་དབུས་སུ་༸རྒྱལ་བ་རིན་པོ་ཆེའི་བཞུགས་ཁྲི་ཞིག་ཁ་མར་སློག་ནས་འདུག ང་དང་ངའི་རོགས་པ་གཉིས་གྲལ་གཡས་གཡོན་གྱི་ཚོགས་གདན་སྟེང་བསྡད་ནས་ངས་གྲྭ་ཕྲུག་ཆུང་ཆུང་དེར་སྐད་ཆ་བཤད་མགོ་བཙུགས་པ་ཡིན། "བུ་ཁྱེད་ཀྱི་ནང་གང་དུ་ཡོད།" གྲྭ་ཕྲུག་དེས་"སིཀ་ཀིམ་ལ་sikkim"ལ་ཡོད་ཟེར། ངས་"རང་ལོ་ག་ཚོད་ཡིན་" "ལོ་བཅུ་གཉིས་ཡིན"ཞེས་ཁོས་ལན་བཏབ། དེ་ནས་ངའི་རོགས་པ་དེས་ཁོ་ལ་ལག་པ་གཡོན་ཕྱོགས་སུ་བཞུགས་ཁྲི་ཞིག་འདུག་པ་དེ་སུས་རེད་ཟེར་དྲིས་སོང་བས་གྲྭ་ཕྲུག་དེས་རྒན་གྱི་རེད་ཟེར། ལག་པ་གཡས་ཕྱོགས་སུ་ཁྲི་གཅིག་འདུག་པ་སུས་རེད་ཟེར་དུས་གྲྭ་ཕྲུག་དེས་འདི་ངས་ཤེས་ཀྱི་མེད། གང་ཡིན་ཟེར་ན་ང་འདིར་སླེབས་ན་ལོ་གསུམ་མ་གཏོགས་འགྲོ་གི་མེད་ཟེར། ངས་རོགས་པ་དེས་ཀུ་རེའི་ཚུལ་དུ་"ཨ་ནེ། ཁྱེད་ཚོ་དགོན་པར་ལོ་གསར་གཏོང་གི་མིན་ནམ། ང་ཚོའི་དགོན་པར་ལོ་གསར་རེད་འདུག་ད།"ལབ་སོང་བས། གྲྭ་ཕྲུག་དེས་"ང་ཚོ་ད་ལོ་ལོ་གསར་ཡོད་མ་རེད།" "ག་རེ་ཡིན་ནམ"ངས་དྲིས། གྲྭ་ཕྲུག་དེས་"གང་ཡིན་ཟེར་ན། ད་ལོ་བོད་ནང་རྒྱ་མིས་བོད་མི་མང་པོ་བསད་ཙང་ང་ཚོ་ལོ་གསར་གཏོང་གི་ཡོད་མ་རེད།"ཞེས་ལབ་སོང་བས། ངའི་རོགས་པ་དང་ང་གཉིས་ཧ་ལས་སོང་། གཞིས་གྲོང་ནང་གི་དགོན་པའི་གྲྭ་ཕྲུག་ཞིག་གིས་སྐད་ཆ་ཆེན་པོ་དེ་འདྲ་བཤད་དུས་ང་ནི་ཧང་སངས་ཤིང་ཡི་རང་ཤོར་སོང་། ང་ཚོ་གྲྭ་སའི་ནང་དུ་ནི་ལོ་གསར་མགོ་བཙུགས་པ་དང་མི་རྒན་པ་ཁ་ཤས་ཀྱིས་ཀྱང་གཞས་སྐད་ཆེན་པོ་དེའང་གཏོང་གི་འདུག་ལ་ད་དུང་ལོ་གཞོན་ཞིག་གིས་ང་ལ་ལོ་གསར་མི་གཏོང་ན་ཕན་ཐོགས་མེད་ཁར་སོ་སོ་གྱོང་རེད། བོད་ནང་མི་བསད་པར་བལྟ་རྒྱུ་མེད། ལོ་རྟག་པར་བསད་ཀྱི་ཡོད་རེད་ཟེར་གྱི་འདུག

མཐོ་ལྡིང་དགོན་པར་ཕྱིན་པ།


དེ་རིང་རེས་གཟའ་ཟླ་བའི་གུང་གསེང་གི་སྐབས་འཚོལ་ནས་མོན་གྷོ་གཞིས་ཆགས་ཀྱི་གཞིས་གྲོང་ལྔ་པར་ཡོད་པའི་མཐོ་ལྡིང་དགོན་པ་ཆེད་མངགས་མཇལ་དུ་ཕྱིན་པ་ཡིན། ད་བར་མོན་གྷོ་ས་གནས་དེའི་ཆུ་འཐུང་ནས་ལོ་ངོ་ ༢༤ འགྲོ་ཡི་ཡོད་ནའང་གཞིས་གྲོང་ལྔ་པའི་མཐོ་ལྡིང་དགོན་པར་འགྲོ་མ་མྱོང་བས་ད་ལེན་ཆེད་མངགས་འགྲོ་དོན་དེ་ཡིན།

མཐོ་ལྡིང་དགོན་པ་ནི་མོན་གྷོ་གཞིས་ཆགས་སུ་ཕྱི་ལོག་ནས་ཕེབས་མཁན་ཚོས་ཆོས་མཇལ་དུ་འགྲོ་སའི་དགོན་པ་ཡག་ཤོས་ཞིག་ཡིན། དགོན་པ་དེར་གྲྭ་གྲངས་མང་པོ་མེད་ནའང་། དེར་ནང་རྟེན་སྙིང་པ་དེ་འདྲ་མཇལ་ཁར་བཏང་ནས་ཆོས་ཕྱོགས་ཀྱི་འགྲེལ་བཤད་ཞེ་དྲག་རྒྱབ་ཀྱི་ཡོད་པས། དེར་ཕྱིན་པ་ནི་དགོན་པ་གང་ཞིག་ཏུ་རྟེན་སྐུ་གཟུགས་མཇལ་ཙམ་བྱས་ནས་ཡོང་བ་ལས་ལེགས་པ་ཡོད།



མཐོ་ལྡིང་དགོན་པའི་ངོ་སྤྲོད་མདོར་བསྡུས།
ཁོ་བོས་དགོན་པ་དེར་གནས་བཤད་མཁན་རྒན་ལགས་ཞིག་འདུག་པ་དེར་དགོན་པའི་ངོ་སྤྲོད་རགས་ཙམ་བཀའ་དྲི་ཞུས་པར། རྒན་ལགས་དེས་བརྗོད་དོན།


བོད་དུ་མཐོ་ལྡིང་དགོན་པ་རྒྱབ་ནས་ལོ་ཆིག་སྟོང་ཆིག་བརྒྱ་འགྲོ་ཡི་ཡོད་པ་དང་། དགོན་པ་དེ་ཕྱག་བཏབ་མཁན་ནི་ལོ་ཙཱ་བ་རིན་ཆེན་བཟང་པོ་སྐུ་ཕྲེང་དྲུག་པ་ཡིན་ཞིང་ཁོང་ནི་པི་ཏི་རྟ་དབང་དགོན་པ་དང་ལ་དྭགས་ཨ་ཆི་དགོན་པ་ཕྱག་བཏབ་མཁན་ཡང་ཡིན། ད་ལྟའི་བར་ལོ་ཙཱ་བ་རིན་ཆེན་བཟང་པོ་སྐུ་ཕྲེང་བཅུ་དགུ་ཕེབས་ཟིན་ཡོད་པ་དང་། བཅུ་དགུ་པ་ནི་ད་ལྟ་ལྡི་ལིར་བཞུགས་ཡོད་ཟེར།

མཐོ་ལྡིང་དགོན་པ་དེ་ཕྱག་བཏབ་ཚུལ་ཡང་མཚན་གང་གཅིག་ལ་ས་འདྲུས་པ་དང་ལྡིང་ཆ་རྒྱབ་པ་དང་རྒྱ་ཕིགས་ཕུབས་པ་དང་སྐུ་གཟུངས་ཐུགས་རྟེན་རབ་གནས་དང་བཅས་པ་གནང་པའི་བཤད་སྲོལ་ཡོད་ཟེར།



མཐོ་ལྡིང་ཟེར་དོན་ནི་ན་ལེནྜ་ནས་མགོན་པོ་གུར་མཐོ་ལྡིང་ལ་ཆོས་ཐོགས་ལ་ཕེབས་ནས་རི་ཞིག་གི་རྩེར་བབ་ནས་འདི་མཐོ་ལྡིང་མིན་ནམ་གསུངས་པས། དེར་མེང་ནམ་དགོན་པ་ཆགས་པ་ཡིན། དགོན་པ་དེ་ནི་མཐོ་ལྡིང་དགོན་པ་ནས་ཀི་ལོ་མི་ཊར་གཅིག་གཉིས་ས་ལ་ཡོད། དེ་ནས་དགོན་པོས་གནྡི་ལ་ཆིབས་ནས་མཐོ་པོར་ནམ་མཁའ་ལ་་ལྡིང ནས་མཐོ་ལྡིང་དགོན་པ་རྒྱག་ས་དེར་ཕེབས་པས་མཐོ་ལྡིང་དགོན་པ་ཞེས་བྱུང་བ་ཡིན་ཟེར། ཕྱི་ལོ་༡༩༥༩ལོར་དགོན་པའི་ནང་རྟེན་བོད་ནས་འདིར་ཁྱེར་ཡོང་མཁན་མི་༦༠ཡོད་ཀྱང་ད་ལྟ་ནི་ཚང་མ་འདས་ཚར་བ་རེད། ད་བར་འདི་ནས་ནང་རྟེན་ཚང་མ་རྐུ་ལ་མ་ཤོར་བ་དང་ཁ་མ་འཐོར་བར་བདག་གཉེར་བྱེད་ཡོད། ཆོལ་ཁ་གསུམ་གྱི་མི་སུ་ཡོང་ནའང་འགྲེལ་བཤད་དེ་ག་རྒྱག་གི་ཡོད། དུས་ཚོད་བྱུང་ན་འགྲེལ་བཤད་རྒྱས་པོ་དེ་འདྲའང་རྒྱག་གི་ཡོད་ཟེར། ད་ལྟ་འདིར་ནི་གྲྭ་གྲངས་ནི་བཅུ་གསུམ་ཙམ་ཡོད་པ་དང་། མཚན་ཉིད་དཔེ་ཆ་སློབ་གཉེར་བྱེད་རྒྱུ་མེད་རུང་རྒྱུན་ལྡན་ཚོགས་འཚོགས་པ་དང་། འདོན་ཁ་འཕྲད་སྦྱངས་པ་དང་ཞབས་བརྟན་འགྲོ་བ་སོགས་བྱེད་ཀྱི་ཡོད་ཟེར། ༼གོང་གསལ་འགྲེལ་བརྗོད་དེ་དག་དུང་དཀར་ཚིག་མཛོད་དང་མི་འདྲ་བ་འདུག་ཀྱང་། གནས་བཤད་པས་གང་བཤད་བཞིན་འདིར་བཀོད་པ་ཡིན།༽
མཐོ་ལྡིང་དགོན་པའི་ནང་རྟེན།
དགོན་པ་དེའི་ནང་རྟེན་དེ་ཚོ་ནི་ལོ་ཆིག་སྟོང་གཅིག་བརྒྱ་ལྷག་པ་ཤ་སྟག་ཡིན་ཟེར་གྱི་འདུག ནང་རྟེན་གྱི་ངོ་བོ་ལ་གླིང་སེང་ཆེན་རྒྱལ་པོའི་ཐུགས་རྟེན་ཡིན་ཟེར་བའི་ཞལ་ཐང་དང་། འབྲོང་གི་རྭ་ཅོ། སྲིན་མོའི་པགས་པ། ལྷ་བླ་མ་ཡེ་ཤེས་འོད་ཀྱི་དབུ་ཐོད་ཡིན་ཟེར་བ་དང་། དེ་བཞིན་རྟེན་སྐུ་འདྲ་མིན་སོགས་གང་མང་མཇལ་རྒྱུ་འདུག་པས། ཞིབ་རྒྱས་འདིར་བྲི་མ་ཁོམ་པས་རེ་ཞིག་དེ་ཙམ་ཡིན།

2010-05-14

དུས་འགྱུར་དུས་དེབ་དང་དེའི་ནང་གི་རྩོམ་ཡིག་གཅིག་ལ་རགས་ཙམ་དཔྱད་པ།

གྲོགས་པོ་ཞིག་བརྒྱུད་ནས་དུས་འགྱུར་དུས་དེབ་བཅུ་པ་ཞིག་གཡར་བྱུང་། ངས་དེ་སྔ་དུས་འགྱུར་དུས་དེབ་མཐོང་མ་མྱོང་བས་དུས་དེབ་གསར་པ་ཞིག་རགས་པ་དང་དགའ་ཚོར་ཆེན་པོས་བཀློག་པར་འགྲོ་དུས། ཏག་ཏག་ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ཞེས་པའི་རྩོམ་ཡིག་དེ་འཁེལ་འདུག ངས་རྩོམ་ཡིག་དེ་ཆ་ཚང་བཀླགས་པས་བྲི་འགྱུར་གྱི་རྩོམ་ཡིག་དེ་འབྲི་འདོད་བྱུང་།



༡ དུསའགྱུར་དུས་དེབ། ད་བར་འདོན་ཐེངས་བཅུ་བཏོན་ཡོད་ཚུལ་འདུག་པ་དང་། དེར་རྒྱ་ཡིག་དང་བོད་ཡིག་གཉིས་ཀའི་རྩོམ་ཡིག་འདུག

ལེགས་ཆ། དུས་དེབ་ཀྱི་ཡིག་གཟུགས་ཧི་གཟུགས་ཡིན་པས་སོ་སོའི་རྩོམ་ཡིག་ལ་ཡིག་ནོར་དང་ཆད་ལྷག་ཉུང་བའི་དགེ་མཚན་ཡོད་པ་དང་། དུས་དེབ་ཀྱི་རྒྱབ་མདུན་ནས་སྒྱུ་རྩལ་མཚོན་པ་དང་། ལོ་རེར་འདོན་ཐེངས་མང་པའི་དགེ་མཚན་འདུག

ཞན་ཆ། དེའི་ནང་དབྱིན་ཡིག་གི་རྩོམ་ཡིག་བྲི་སའི་ས་དམིགས་ཆད་འདུག་པ་དང་། ཁ་བྱང་དབྱིན་ཡིག་ཏུ་བྲིས་པའི་ནང་Changing Time ཞེས་བྲིས་འདུག་པ་དེ་Changing Timesབྲི་དགོས་འདུག་སྙམ། གང་ཡིན་ཟེར་ན་མང་ཚིག་དང་ཉུང་ཚིག་གི་འགྲོ་སྟངས་ཡོད།

༢ ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ཞེས་པའི་རྩོམ་ཡིག་ལ་རགས་ཙམ་དཔྱད་ན།
རྩོམ་ཡིག་དེ་ད་ལོ་འཇང་དགུན་ཆོས་སུ་མཐོང་བའི་མྱོང་ཚོར་དམར་རྗེན་ལྟ་བུར་བྲིས་འདུག་པ་ཡི་རང་གི་གནས་སུ་འདུག་མོད། རྩོམ་ཡིག་དེའི་ནང་དོན་གཉིས་ལ་ཁོ་བོས་རང་གི་འདོད་ཕྱོགས་བཤད་ན།



ཀ༽

རྩོམ་ཡིག་དེ་ནང་<<འགའ་ཤས་ཀྱིས་ཡིག་ཆའི་ཚིག་ཟིན་ཤོར་ན་སྡོམ་པ་ཤོར་ན་ཡང་དེ་ལས་ལྷག་པའི་འགྱོད་པ་ཞིག་སྐྱེ་ཨེ་འོང་སྙམ་པ་འདུག>>ཞེས་བྲིས་པར།
ངས་བྱས་ན། དམ་བཅའ་སྡོད་མཁན་དེས་སོ་སོའི་གྲྭ་ཚང་གི་ཡིག་ཆའི་ཚིག་ཟིན་མ་ཤོར་བར་ཟིན་དགོས་སྙམ། གཞན་དུ་ན། འཇང་དགུན་ཆོས་སྐབས་ལན་རྒྱག་མཁན་དེ་ཚོས་གང་དྲན་དྲན་ལབ་ནས་རྟགས་བསལ་གཏོང་རྒྱུ་ཁག་པོ་བྱེད་ཀྱི་རེད། གལ་ཏེ་རྗེ་ཡབ་སྲས་ཀྱི་གཞུང་ཚིག་ཟིན་དགོས་ཟེར་ན་ཁག་པོ་རེད། གང་ཡིན་ཟེར་ན་མཁས་པ་མི་འདྲ་བ་མང་པོའི་འདོད་པ་ཡིན་སྟབས་མཐའ་གཅིག་ཏུ་ཚིག་ཟིན་མཐུན་ཐབས་མེད། སོ་སོའི་ཡིག་ཆ་ནི་ཕལ་ཆེར་མཁས་པ་གཅིག་གིས་མཛད་པ་ཡིན་དུས་ཟིན་ན་ཟིན་ཐུབ་བསམས་པ་ཡོད་པ་ཡིན། འོན་ཀྱང་ཟིན་སྟངས་ནི་ལྐུགས་པ་ཨུ་ཚུགས་བྱས་མགོ་ལ་རྡོ་ཞུས་ནའང་གློད་ཀྱི་མིན་ཟེར་བ་ལྟ་བུ་མིན་པར་གཞུང་སྔ་ཕྱི་ཁས་ལེན་འགྲོ་སྟངས་དང་འདོད་ཚུལ་ཤེས་པའི་སྒོ་ནས་འགལ་མེད་ཀྱི་ལན་བཏབ་ནས་ཟིན་དགོས་སྙམ།

ཁ༽

རྩོམ་ཡིག་དེ་ནང་<<དཔེར་ན་སེ་ར་ལྟ་བུར་མཚོན་ན་ལོ་རེའི་རྩོད་རྒྱུགས་བརྒྱ་ཆའི་ཨང་རིམ་ལྟར་གྱིས་འཇང་དགུན་ཆོས་ལ་མངགས་ཀྱིན་ཡོད་པ་རེད། གལ་སྲིད་ཁྱེད་རང་འཇང་དགུན་ཆོས་ལ་ཁས་ཚར་ན་དགོངས་པ་ཞུ་རྒྱུ་ཡང་ཁག་པོ་ཡིན། ནད་པ་དང་ལས་དོན་དམིགས་གསལ་བ་མ་གཏོགས་ངེས་པར་འགྲོ་དགོས་པ་རེད། འོན་ཀྱང་ཁྱེད་རང་རྒྱུགས་སྤྲོད་ཀྱི་བརྒྱ་ཆ་མ་ལོན་ན་སོང་ན་ཉེས་ཆད་ཡོད་པ་རེད། འདི་ནི་ཧ་ཅང་ལེགས་པའི་དོན་དག་ཅིག་རེད། དེ་མིན་གདན་ས་གཞན་ཁག་ཅིག་གིས་འཛིན་གྲྭའི་ལོ་འཁོར་རྒྱུགས་སྤྲོད་ཀྱི་ཨང་རིམ་དང་པོ་དང་གཉིས་པ། གསུམ་པ་གསུམ་ངེས་པར་འགྲོ་དགོས་པ་རེད། གཞན་རང་རང་འགྲོ་འདོད་ཡོད་ཚེ་སོང་ན་འགྲིག་གི་ཡོད་པ་དང་མ་སོང་ཡང་མི་སྐྱོན། འདི་ནི་སྐྱོན་ཆ་ཆེན་པོ་ཞིག་རེད། >>ཞེས་བྲིས་པར།

ངས་བྱས་ན། ད་ལྟ་སེ་རས་ལག་བལྟར་བྱེད་བཞིན་པ་དེ་ཧ་ཅང་ལེགས་པའི་དོན་དག་ཅིག་དང་། གདན་ས་གཞན་གྱིས་བྱས་པ་དེ་སྐྱོན་ཆ་ཆེན་པོ་ཞིག་མ་རེད་སྙམ། གང་ཡིན་ཟེར་ན། ལོ་ངོ་དྲུག་བདུན་སྔོན་ངའི་ངོ་ཤེས་པའི་སྤྲུལ་སྐུ་ཞིག་འབྲས་སྤུངས་ལ་དང་བ་ཆེན་པོས་འཇང་དགུན་ཆོས་སུ་བསླབ་གཉེར་ལ་སླེབས་སོང་། བདུན་ཕྲག་གཅིག་ཙམ་གྱི་རྗེས་ཁོང་སེ་ར་ནས་དགེ་བསྐོས་ཀྱིས་ཁྱེད་བརྒྱ་ཆ་མི་ལངས་པས་ཚུར་ལོག་ཤོག དེ་མིན་ལས་སླ་པོར་བཞག་གི་མིན་ཟེར་ནས་ཕར་ལོག་དགོས་པ་བྱུང་སོང་། དེ་དུས་ངས་ཁོང་ལ་སྙིང་རྗེ་སོང་། སློབ་གཉེར་བྱ་རྒྱུར་ཡང་བཀག་འགོག་བྱེད་ཀྱི་འདུག་བསམས་བྱུང་། ཕྱོགས་གཞན་ནས་ཀྱང་འཇང་དགུན་ཆོས་ལ་འགྲོ་རྒྱུ་མ་ཁོམ་པས་གྲྭ་པ་ཁ་ཤས་ཀྱིས་ད་ལོ་དཔེ་ཆ་ཞེ་དྲག་ལྟ་མི་དགོས། རྒྱུགས་སྤྲོད་ཀྱང་ཡག་པོ་གཏོང་མི་ཉེན། འཇང་དགུན་ཆོས་ལ་འགྲོ་རྒྱུ་འཁེལ་ཡོང་ཟེར་ནས་དཔེ་ཆ་ལྟ་རྒྱུར་སྐྱོན་ཆ་ཆེན་པོ་ཤོར་ཉེན་ཡོད། ཡང་རིག་པ་སྐྱོ་བ་དེ་འདྲ། ད་ལོ་འཇང་དགུན་ཆོས་ལ་ཕྱིན་ནས་ཤུགས་རྒྱབ་ནས་རིགས་ལམ་ཆགས་པ་བྱས་དགོས་བསམས་ཀྱང་། རྒྱུགས་སྤྲོད་ལམ་འགྲོ་མ་རྒྱུགས་པའམ་རིག་པ་ཅུང་སྐྱོ་བས་བརྒྱ་ཆ་མ་ལོན་ནས་འཇང་དགུན་ཆོས་ཀྱི་གོ་བསྐལ་ཤོར་ནས་གཞར་ཡང་ཡར་རྒྱས་འགྲོ་མ་ཐུབ་པར་ལྷག་སོང་བ་ཡང་ཡོང་སྲིད་པ་ཡིན།

དེས་ན། འཇང་དགུན་ཆོས་འཚོགས་པའི་དམིགས་ཡུལ་ནི་གྲྭ་པ་མཁས་པ་རྐྱང་རྐྱང་འཛོམས་ནས་འགྲན་བསྡུར་བྱ་ས་ཞིག་མིན་པར། སློབ་གཉེར་ཡར་རྒྱས་ཡོང་རྒྱུ་དང་རིགས་ལམ་གྱི་རྣམ་དཔྱོད་འཕེལ་རྒྱུ་དེ་ཡིན་པར་སོང་། གདན་ས་གཞན་གྱི་བྱེད་ལུགས་དེ་ནི་སྐྱོན་ཆ་ཆེན་པོ་ཞིག་མིན་པར་ལེགས་ཆ་ཆེན་པོ་ཞིག་རེད་བསམས། ཨ་ཕོ་རང་གི་འཇོན་ན་དགའ་ལྡན་ཁྲི་ལ་བདག་པོ་མེད་ཟེར་བའི་དཔེ་ལྟར། སོ་སོའི་འཇོན་ན་འཇང་དགུན་ཆོས་ལ་གྲྭ་པ་སུ་ཡིན་ནའང་འགྲོ་ཆོག་ལ། དེ་ནི་དམངས་གཙོ་དང་རང་དབང་གི་རང་བཞིན་ལྡན་པ་ཞིག་ཀྱང་རེད་སྙམ། རིག་པ་ཅུང་སྐྱོ་བ་དེ་ཚོ་ཡང་འཇང་དགུན་ཆོས་ལ་ཕྱིན་ནས་ཚུར་ཡོང་དུས་སྔར་དང་མི་འདྲ་བ་རིགས་ལམ་ཡག་ཏུ་ཕྱིན་པ་དང་། རྩོད་ཤུགས་ཆེ་རུ་ཕྱིན་པ་དེ་འདྲའང་མངོན་སུམ་དུ་མཐོང་རྒྱུ་འདུག་པས། ཁོ་རིག་པ་སྐྱོ་བོ་དང་རྒྱུགས་སྤྲོད་བརྒྱ་ཆ་དམའ་བོ་རེད་ཞེས་བརྒྱལ་བའི་ལྒང་རྡོག་རྫིས་མ་བཏང་པར་གོ་སྐབས་སྤྲད་དེ་ཡར་རྒྱས་ཀྱི་ལམ་ལ་བཏང་པ་དེ་དངོས་གནས་ལེགས་ཆ་མ་རེད་དམ། ཡང་རྩོམ་ཡིག་དེའི་འཕྲོས་<འདིའི་སྐབས་སུ་རྟགས་གསལ་ཁྱབ་གསུམ་གྱིས་ལན་འདེབས་མི་ཤེས་མཁན་མང་བོ་འདུག་ལ། འདི་དག་གིས་གདན་སའི་མཚན་མཐོང་ལ་གནོད་གིན་ཡོད་པ་རེད།>ཞེས་བྲིས་འདུག་པས། གདན་ས་ཞིག་གི་ནང་འཛུལ་མ་ཐག་པ་ཞིག་ཡིན་ན་མ་གཏོགས་ལོ་གཉིས་གསུམ་མཚན་ཉིད་ཀྱི་དཔེ་ཆ་བལྟ་བའི་རྗེས་ད་དུང་རྟགས་བསལ་ཁྱབ་གསུམ་གྱི་ལན་མི་ཤེས་མཁན་དེ་འདྲ་རིག་མ་མྱོང་། གལ་ཏེ་དེ་འདྲ་ཡོད་ན་ཁོང་ཚོ་ད་དུང་འཇང་དགུན་སོགས་སུ་མ་བཏང་པར་བཞག་ན་རྗེས་མ་གདན་ས་ལོ་ངོ་ཉི་ཤུ་འགྲིམས་ཀྱང་རྟགས་བསལ་ཁྱབ་གསུམ་མི་ཤེས་མཁན་དེ་འདྲ་འཐོན་ཡོང་ཉེན་ཡོད་པས་དངོས་གནས་དེ་དུས་གདན་སའི་མཚན་སྙན་ལ་གནོད་ཀྱི་རེད་སྙམ།

ག༽

རང་གིས་འཇང་དགུན་ཆོས་ལ་མཐོང་བའི་མྱོང་ཚོར།

ངས་མ་གཞི་འཇང་དགུན་ཆོས་མ་མཐོང་བར་ལོ་ངོ་ལྔ་དྲུག་སོང་ཀྱང་། སྔོན་ཆད་ཐེངས་མ་དྲུག་བདུན་ཕྱིན་མྱོང་བས་འཇང་དགུན་ཆོས་ནི་དཔེ་མི་སྲིད་པའི་རིགས་ལམ་འཕེལ་ཁ་ཕྱེ་བའི་ཆོས་ཐོག་ཤིག་རེད། དེ་དུས་གྲྭ་པ་ཚོས་འཇང་དགུན་ཆོས་ལ་མ་འགྲོ་གོང་ནས་རྩོད་གཞུང་རྣམ་རྩ་དང་ཐར་ལམ་གསལ་བྱེད་གཉིས་ཀ་བློ་ལ་གཟུང་གི་ཡོད་པ་དང་། སོ་སོའི་གྲྭ་ས་ནས་ཀྱང་གང་འཚམས་རྩོད་པའི་རྗེས། འཇང་དགུན་ཆོས་ལ་འགྲོ་ཡི་ཡོད། འཇང་དགུན་ཆོས་སྐབས་སྔ་དྲོ་ཆོས་རར་རྩོད་པ་ཆུ་ཚོད་གཉིས་ལྷག་པ་འཚོགས་པ་དང་། དེ་ནས་ཉིན་གུང་དཔེ་ཁྲིད་དང་ཐོ་ཆོས་དམ་བཅའ་ལ་གཏོང་རྒྱུའི་རྟགས་བསལ་བཟོ་རྒྱུ། ཕྱི་དྲོ་ཚོགས་ཆེན་དུ་རྩོད་པ་དེ་ནས་དམ་བཅའ། དེ་ནས་མར་གྲོལ་ཙམ་བྱས་ནས་གྲྭ་ཚང་སོ་སོའི་རྩོད་པ་ཆུ་ཚོད་༡༢་ཙམ་བར་ཚོགས། དེ་དུས་བློ་ཁ་ཅུང་མཐོ་བ་དེ་ཚོས་གྲྭ་ཚང་གཞན་གྱི་རྩོད་པར་དམ་བཅའ་འཇོག་ཏུ་སོང་བ་སོགས་ཁྱད་ཆོས་དུ་མས་ཕྱུགས་ཡོད།
འོན་ཀྱང་རྩོམ་ཡིག་དེའི་ནང་གསལ་བ་བཞིན་གྲྭ་ཚང་ང་ཡིན་ཟེར་མཁན་དེ་འདྲ་ཐུག་དུས་མི་ཚོགས་ཆེན་པོས་ལྟད་མོ་བལྟ་བར་ཡོང་བ་དང་། ལན་རྒྱག་མཁན་གྱིས་ཀྱང་དམ་བཅའ་བརྟན་པོ་གཟུང་བ་དང་གཟབ་གཟབ་བྱས་ཀྱི་ཡོད་པ་དེ་དག་ནི་གདན་སའི་འགྲོ་སྟངས་ཤིག་ཡིན། འོན་ཀྱང་ངའི་མཐོང་ཚུལ་ལ། གྲྭ་པ་ཁ་ཤས་ཀྱིས་གཙོ་བོ་རྟགས་བསལ་ལ་མ་དམིགས་པར་ཕྱོགས་ལྷུང་དང་ཞེན་ཁོག་གི་བཟི་ནས་ཁྱེད་ཚོ་གཅིག་རེད་ཟེར་བ་དང་། ཡང་ལུང་དྲངས་དུས་མཁས་པ་དེ་དང་དེ་ཞེས་མཚན་གནས་ནས་མ་བརྗོད་པར་ཡིག་ཆའི་གསུངས་བ་པོ་ལ་ཟུར་ཟ་དང་མཐོང་ཆུང་གི་རྣམ་པ་བསྟན་པ་དང་། ཡང་། ལན་རྒྱག་མཁན་དེ་མི་ཤེས་པ་མ་རེད་ཡིག་ཆ་གསུངས་མཁན་ནོར་ཚར་བ་རེད་མདོག་དེ་འདྲ་བྱས་པ་དང་། ཡང་ལུང་ཚིག་མངོན་སུམ་དང་འགལ་བའི་ཡིག་ནོར་དེ་འདྲ་ཧ་གོ་བཞིན་དུ་དྲངས་པ་དང་། གཞན། གྲྭ་ཚང་དེ་དང་དེའི་ཁས་ལན་དུ་མེད་པའི་གྲྭ་ཚང་དེ་ཁུངས་ཀྱི་མཁས་པས་བྱས་པ་དེ་འདྲའི་གསུང་དྲངས་ནས་ཁ་རྡུང་བཏང་པ་སོགས་བྱས་པ་བྱུང་སོང་། དེ་འདྲ་བྱས་དུས་སྔ་ཕྱིའི་རྒོལ་བ་དང་ལྟད་མོ་བ་ཆ་ཚང་ཚ་པོ་ཆགས་ཀྱི་འདུག་པ་དེ་དག་ཅུང་ཟད་ངོ་གནོངས་དགོས་པ་ཡོང་གི་འདུག་ནའང་། དངོས་གནས་གྲྭ་པ་ནི་གྲྭ་པ་རང་ཡིན་པས་དེ་རིང་འཛིང་འགྲོ་འདྲ་ཞིག་ཡོད་ནའང་སང་ཉིན་ནས་སྣང་མེད་ངང་ཧ་ཧ་ཟེར་བཞིན་མཉམ་དུ་འགྲོགས་ཀྱི་ཡོད་པ་དང་། ད་དུང་ཕར་ལོག་འགྲོ་དུས་མདང་དགོང་འགལ་འདུ་བསྒྲིག་སའི་མཁས་པ་དེའི་གསུང་དེ་ཚོ་དད་པ་ཆེན་པོས་ཉོ་ནས་ལོག་ཕེབས་ཀྱིས་འདུག་པས། ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ནི་དོན་དངོས་མཁས་པ་མཛེས་པར་བྱེད་པའི་དོ་ར་རང་ཡིན་འདུག


ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ཞེས་རྩོམ་ཡིག་གཟིགས་ན་འདིར་བསྣུན་རོགས།

གངས་ཅན་བོད་ཀྱི་བྱ་རིགས་ངོས་གཟུང་བ།

ཡི་གེ་མ་དག་པ་དང་དོན་ནོར་སོང་བ་མང་དག་ཡོད་ན་ཐད་ཀར་བཀའ་སློབ་གནང་རོགས།





བོད་ཀྱི་བྱ་རིགས་མི་འདྲ་བ་༤༠ཐམ་པའི་མིང་དང་འགྲེལ་གཤམ་དུ་བཀོད་པ།

༡ ལྷ་བྱ་གོང་མོ། ༼རི་བོ་མཐོན་པོའི་སར་གནས་ལ། བྱ་དེའི་སྐད་རྣ་བ་ཐང་པོ་མེད་པ་སོགས་ཀྱིས་གོ་ན་རྣ་བ་ལ་ཕན་སྐད།༽
༢ ཁུ་བྱུག cuckoo ༼བྱ་དེས་སྐད་རྒྱབ་པས་རྩ་ཆུའི་དུག་རྣམས་སེལ།༽
༣ གཡེབ་བྱ། Shrike ༼བཤད་སྲོལ་ལ་ཁུ་བྱུག་གི་བློན་པོ་ཡིན་ཟེར། བྱ་དེའི་ལྟོ་བ་བསྟན་ན་ལོ་འདིར་ཟས་ལེགས་པ་དང་རྒྱབ་བསྟན་ན་གོས་ལེགས་པ་ཡོང་བའི་བཤད་སྲོལ་ཡོད།༽
༤ པིང་ཀྱུར་མ། eagle ༼བྱ་དེས་ཙི་ཙི་དང་སྦྲུལ་སྦལ་པ་སོགས་འཛིན་ནུས་ཞིང་། བཤད་སྲོལ་ལ་ཀླུའི་ཁ་གནོན་ཡིན་ཟེར། ༽
༥ བྱ་གླག Hawk ༼བྱ་དེའི་ལུག་གུ་དང་གླ་བ་སོགས་གསོད་ཐུབ། བྱ་དེའི་གླ་བ་ཤིང་གསེབ་ཏུ་བྲོས་སོང་ཚེ་ཁྱི་སྐད་རྒྱབ་ཟེར།༽
༦ བྱ་གག ༼ནགས་དང་པང་ལྗོངས་འདྲེས་མའི་བར་བསྡད།༽
༧ ཁྲ falcon ༼བྱ་དེ་ལ་བྱི་ཁྲ་དང་ཁྲ་ཆེན་པོ་སོགས་ཀྱི་དབྱེ་བ་ཡོད།༽
༨ འུག་པ། owl ༼སྲམ་གྱིས་ཉ་སྤྲད་ཁྱེར་ནས་འུག་པ་ལ་སྤྲད།༽
༩ བྱ་སྐྲ་སྐག ༼བྱ་དེའི་སྒྲོ་མདོག་ཕལ་ཆེར་དཀར་པོ་ཡིན། བྱ་དེའི་སྐད་རྒྱབ་ལ་ལྟད་བཟང་པོ་རྩིས། བྱ་དེ་ས་མཚམས་སོ་སོར་ཁྱོ་ཤུག་རེ་ལས་མེད། བྱ་དེས་རང་གི་ཕ་མ་གསོད་པར་གྲགས།༽
༡༠ སྲེག་པ། ༼བྱ་དེ་ཁྱུ་དང་བཅས་གནས་ཤིང་། རྩ་སོགས་ཀྱི་གསེབ་ཏུ་བསྡད།༽
༡༡ སྲིན་བྱ། ༼འུག་པ་དང་འདྲ་བ་གང་ཞིག་ལ་འུག་པ་ལས་ཆུང་པ་ཡོད། སྐད་སྣ་ཚོགས་རྒྱག་རྒྱུ་ཡོད།༽
༡༢ བྱ་རྒོད། vulture ༼བྱའི་ནང་ནས་གནམ་མཐོ་ཤོས་སུ་ཕུར་ཐུབ་མཁན་གཅིག་པུ་ཡིན། མིག་རྒྱང་ཤིན་ཏུ་རིང་པོ་མཐོང་། ཟས་སུ་སེམས་ཅན་ཤི་བའི་རོ་དང་རུས་པ་རྡོ་སོགས་ཟ་བ་ལས་སེམས་ཅན་མི་གསོད་པ་ཡིན།༽
༡༣ སེར་བྱ་ངང་པ། mandarin duck ༼མཚོའི་མཁར་བབ་ནས་བསྡད་ཞིང་། ཁྱུ་བྱས་ནས་མ་བསྡད་པ་ཡིན།༽
༡༤ དི་དི་ཀུ་ཀུ། mallee fowl ༼དགུན་ཟླ་བ་གསུམ་ཤིང་སྡོང་གི་ནང་དུ་ཉལ་བསྡད་པ་ཡིན།༽
༡༥ འཇོལ་མོ། ༼སྐད་ཤིན་ཏུ་སྙན་པོ་ཡོད་པའི་བྱིའུ་ཤིག་ཡིན། ཚོན་གཞི་མཐིང་ག་དང་ལྗང་གུའི་རིགས་གཉིས་ཡོད་ཀྱང་ལྗང་གུ་དེར་སྐད་དེ་ཙམ་སྙན་པོ་མེད།༽
༡༦ ཁང་བྱིའུ། sparrow ༼ཁྱོ་ཤུག་རེ་གཉིས་ཁང་པའི་ཀ་བརྡུང་བར་ཚང་བཅའ་ནས་བསྡད་ཞིང་། ཁྱུ་བྱས་ནས་ཡང་བསྡད་པ་ཡོད།༽
༡༧ ཁྱིམ་བྱ། ༼བྱ་དེ་ཡིན། མིས་གསོས་ནས་སྒོ་ང་དང་ཤ་ཟ་བ་དེ་ཡིན།༽
༡༨ ཁྭ་ཏའམ་བྱ་རོག crow ༼འདྲེ་བྱའི་རིགས་ཡིན། ལུས་པོ་ཕོག་རོན་ཙམ་ལ། སྐད་མི་སྙན་པ་ཞིག་ཡོད། མཚན་མོ་ཁྭ་ཏའི་སྐད་རྒྱག་ན་ལྟད་ངན་རྩིས།༽
༡༩ ཕོ་རོག ༼ལྷ་བྱའི་རིགས་དང་། གཟུགས་ཕུང་ཁྭ་ཏ་ལས་ཆེ་བ་དང་། རྐང་པ་སོགས་སུ་སྤུ་བཟང་པོ་ཡོད། གྷནྜིའི་སྐད་འདྲ་པོ་རྒྱབ། ཁྱུར་བྱས་ནས་མ་བསྡད་པ་ཡིན།༽
༢༠ ཀྱུང་ང་། ༼བྱ་དེའི་ཁ་མདོག་ནག་པོ་ནག་རྐྱང་ལ་རྐང་པ་དང་མཆུ་དམར་པོ་ཅན་ཞིག་ཡོད། ཁྱུ་བྱས་ནས་བསྡད་པ་ཡིན།༽
༢༡ པུ་ཤུད། ༼དམངས་ཁྲོད་དུ་བྱའི་དྲུང་ཡིག་རེད་ཟེར། མགོ་དང་མཆུ་སྡོམ་པའི་སྨྱུ་གུ་འདྲ་བ་ཡོད་པ་དང་། ས་ལ་ས་ཁྲ་འབྲི་བ་འདྲ་པོ་བྱས། ཚུར་བཟུང་ན་ལམ་སེང་གདོང་ལ་སྐྱག་པ་བཏོར་མཁན་ཞིག་ཡོད།༽
༢༢ བྱ་གོ་བོ། ༼བྱ་དེའི་མགོ་བོ་དཀར་པོ་དང་གཟུགས་པོ་དམར་སེར་ཡིན། ཟས་སུ་རྡོ་དང་རུས་པ་ཟ་ལ་བྲག་རིའི་གསེབ་ཏུ་གནས་ཤིང་། ཕྲུག་གུ་ཐོག་མར་སྐྱེ་དུས་ཁྱི་ཕྲུག་སྐྱེ་བ་ཡིན།༽
༢༣ གོ་ལིང་མིག་དམར། ༼རི་བྱ། སྐད་གོ་ལིང་ཞེས་རྒྱག་ཞིང་མིག་དམར་པོ་ཡིན། རི་མཐོ་སར་མ་གཏོགས་མེད།༽
༢༤ ཅ་ཁ་སྒྲོལ་མ། ༼བྱིའུ་དེ་ཐང་མཐིལ་དུ་ས་དོང་ཕུག་ནས་ཉལ་བར་བྱས། མིང་གི་རྣམ་གྲངས་ལ་ཅོང་ཁ་ཡང་ཟེར།༽
༢༥ གླང་རྫི། ༼ཆུ་བྱ། ཉིན་གང་མཚོ་དང་གཙང་པོའི་འགྲམ་དུ་ཉ་ཆེན་ཤ་སྟག་འགུག་ནས་བསྡད།༽
༢༦ བྱིའུ་རྡོ་ཉལ་མ། ༼བྱིའུ་དེས་རྡོའི་སྟེང་མཇུག་མ་རྡབ་ནས་ཨེ་ཉལ་བལྟས་པ་ཡིན་ཟེར།༽
༢༧ དཀར་རྩི། ༼བྱིའུ་འདམ་བགས་ཀྱི་ཁང་པ་བཟོ་མཁན། བྲག་དང་ཁང་པ་སྟེང་གནས།༽
༢༨ གཟི་དུག ༼ནགས་་དང་ཛ་རི་སོགས་སུ་གནས་པའི་བྱ་ཡིན། ལུས་ཀྱི་སྒྲོ་སྔོ་ཁྲ་དང་སྐད་རྒྱག་རྒྱུ་ཅང་མེད།༽
༢༩ ཁྲུང་ཁྲུང་། crane ༼དགུན་ཁ་བྱང་ལ་འགྲོ་བ་དང་། དབྱར་ཀ་མེ་ཏོག་ཡག་པོ་ཡོད་སའི་ཐང་དུ་སླེབས།༽
༣༠ ཆུ་སྐྱར། ༼དབྱར་དགུན་མེད་པར་ཆུ་གང་དུ་ཡོད་ས་དེར་འཁོར་བསྡད་པ་ཡིན།༽
༣༡ དོང་བབ། ༼བྱ་དེ་ནི་སྒལ་པ་སྔོན་པོ་དང་མགོ་རྩེར་སྒྲོའི་རྭ་ཅོ་སྔོན་པོ་ཡོད། གངས་རི་དང་ཛ་རི་མཚམས་སུ་ཡོད།༽
༣༢ དུར་བྱ། ༼བྱ་དེ་ནི་དུར་ཁྲོད་སོགས་ཀྱི་རུས་པ་ཟ་མཁན་མཆུ་སེར་པོ་ཅན་ཞིག་ཡོད།༽
༣༣ ཕུག་རོན། ༼བྲག་གི་གསེབ་ཏུ་བསྡད་ཤིང་། དགུན་ཁ་<སྤུ་རྣམས་བུད་ནས་>ཉལ་བསྡད་པ་ཡིན། ༽
༣༤ རི་རྫི་སྟག་དཀར། ༼ཉིན་རྒྱབ་ཆུ་ཚོད་གསུམ་པ་ཙམ་ལ། བཅུ་རྙེད་བཅུ་བརླག་ཞེས་སྐད་རྒྱབ་པ་ཡིན།༽
༣༥ སྟག་བྱིའུ། ༼མིག་ནག་ལ་དེའི་སྟེང་དཀར་པོ་ཡོད། མགོ་གཙུག་ཕུད་ལྗང་གུ་ཡོད།༽
༣༦ བེར་བྱིའུ། ༼ལུས་ཡོངས་རྫོགས་ལྗང་སེར་ཡིན།༽
༣༧ ཐང་བྱིའུ། ༼ཐང་ཤིང་དང་སྲོམ་མམ་ས་ལ་སོགས་ཀྱི་སྟེང་འཚོ་བའི་བྱིའུ་ལྗང་གུ་ཞིག་ཡིན།༽
༣༨ སྨྱུག་བྱིའུ། ༼སྨྱུག་མའི་གསེབ་བསྡད་པའི་བྱིའུ་སྔོན་པོ་དེ་འདྲ་ཡོད།༽

༣༩ འང་གུ། ༼ཕོག་རོན་དང་འདྲ་བ་ལ་གཟུགས་ཕུང་ཆེ་བ་དང་ཁང་པ་ཡོད་སར་ཡང་བསྡད།༽
༤༠ ནེ་ཙོ། ༼བྱ་དེ་ནི་ཤོག་པ་ལྗང་མདོག་དང་མཆུ་དམར་ཞིང་སྒུག་པ་ཡིན། འཛམ་གླིང་ནང་མི་སྐད་བཤད་ནུས་པའི་བྱ་གཉིས་ལས་མེད་པའི་གཅིག་ཡིན།༽


བོད་ཀྱི་བྱའི་མིང་རིགས་མི་འདྲ་བ་༤༠ཙམ་འདིར་བཀོད་ཡོད་ད་དུང་བྱ་རིགས་ཀྱི་མིང་ག་ཚོད་ལྷག་ཡོད་དོགས་བཞིན་གནས།


གཡེབ་བྱ།



སྤྱིར་བཏང་གི་བྱ་གླག



དམིགས་བསལ་བོད་ཀྱི་བྱ་གླག



བོད་ཀྱི་ཁྲ།



བྱ་དི་དི་ཀུ་ཀུ།

ལེགས་བཤད་དད་ཚུལ་མཛེས་པ་གསལ་བའི་རྒྱན་དང་། ལེགས་བཤད་སྙིང་པོའི་ཚིག་དོན་ལ་དཔྱད་པ་རྗེ་བཙུན་བླ་མ་དགྱེས་པའི་མཆོད་སྤྲིན་སོགས།

ད་ནངས་ངོས་རང་རེས་གཟའ་ཟླ་བའི་བདུན་རེའི་གུང་སེང་གི་ཉི་གཞོན་འོག་དབྱིན་ཡིག་གི་ཉིན་རེའི་ཚགས་པར་ལ་བལྟ་བཞིན་པའི་སྐབས། མཁས་དབང་དགེ་བཤེས་ཆེན་པོ་རྒན་དཔལ་ལྡན་གྲགས་པ་མཆོག་གིས་བདག་ལ་རྒན་ཉིད་ཀྱིས་འཇགས་རྩོམ་གནང་བའི་དཔེ་དེབ་གསར་པ་༼ལེགས་བཤད་དད་ཚུལ་མཛེས་པ་གསལ་བའི་རྒྱན་དང་། ལེགས་བཤད་སྙིང་པོའི་ཚིག་དོན་ལ་དཔྱད་པ་རྗེ་བཙུན་བླ་མ་དགྱེས་པའི་མཆོད་སྤྲིན།༽ཞེས་པ་དེའི་དཔར་མ་གཅིག་གནང་འདུག་པས། དགའ་ཚོར་ཆེན་པོས་དཔྲལ་བར་མཆོད་དེ་ཞལ་འཇལ་ཞུས་པས་ཡིད་ཀྱི་དང་བ་རབ་དུ་བརྟས་བྱུང་། དེ་ནས་འདིར་ཟིན་བྲིས་ཀྱི་ནང་དུ་དྲ་གྲོགས་ཚོར་ངོ་སྤྲོད་ཞིག་བྱ་འདུན་བསྐྱེད་པས་རེ་ཞིག་ངོ་སྤྲོད་མདོ་ཙམ་ཞུས་ན།


༡ དཔེ་དེབ་ཀྱི་མཚན།
༼ལེགས་བཤད་དད་ཚུལ་མཛེས་པ་གསལ་བའི་རྒྱན་དང་། ལེགས་བཤད་སྙིང་པོའི་ཚིག་དོན་ལ་དཔྱད་པ་རྗེ་བཙུན་བླ་མ་དགྱེས་པའི་མཆོད་སྤྲིན།༽
༢ ཁྱོན་བསྡོམས་ཤོག་ངོས། {༢༤༩}
༣ དེབ་ཀྱི་རིན་གོང་། ༼ད་ལྟ་མ་ཤེས།༽
༤ ནང་དོན།
ཕྱག་དཔེ་འདི་ནི་སྟབས་བདེ་ཡོང་སླད་དཔེ་ཆ་ལྔ་གཅིག་ཏུ་བསྡུས་པའི་ཕྱོགས་བསྒྲིགས་ལྟ་བུར་དཔར་དུ་སྐྲུན་འདུག དེ་ཡང་།
༡ ལེགས་བཤད་དད་ཚུལ་མཛེས་པ་གསལ་བའི་རྒྱན།
དེ་ནི་གཙོ་བོ་མངོན་རྟོགས་རྒྱན་གྱི་ཆེད་དུ་བྱ་བའི་གདུལ་བྱས་དད་པ་སྐྱེ་ཚུལ་ལ་བརྩམས་ནས་དད་པའི་རྣམ་གཞག་བརྗོད་པ་ཞིག་ཡིན་འདུག
༢ ལེགས་བཤད་སྙིང་པོའི་ཚིག་དོན་ལ་དཔྱད་པ་རྗེ་བཙུན་བླ་མ་དགྱེས་པའི་མཆོད་སྤྲིན།
དེ་ནི་རྗེ་ཙོང་ཁ་པ་བློ་བཟང་གྲགས་པའི་དཔལ་གྱི་མཛད་པའི་ལེགས་བཤད་ཀུན་གྱི་སྙིང་པོ་དྲང་ངེས་ཀྱི་སྐོར་ལ་དོགས་པ་དཔྱོད་པ་ཡིན་འདུག
༣ སྟོང་ཉིད་ཀྱི་དགག་བྱའི་སྐོར་ལ་དྭོགས་དཔྱོད་གནད་བསྡུས།
དེ་ནི་
༤ བདག་འཛིན་ཕྲ་རགས་སྐོར་དྭོགས་དཔྱོད་སྙིང་བསྡུས།
༥ ཚུལ་གསུམ་སྐོར་དྭོགས་དཔྱོད་གནད་བསྡུས།
དེ་ནི་རྗེས་དཔག་གི་བསྒྲུབ་བྱ་རྟོགས་པའི་ཐབས་ཚུལ་གསུམ་གྱི་རིགས་པ་འགྲོ་བཤད་པ་ཚད་མའི་སྐོར་ཡིན་འདུག

༥ རྩོམ་པ་པོ་ངོ་སྤྲོད།

དགེ་བའི་བཤེས་གཉེན་ཆེན་པོ་དཔལ་ལྡན་གྲགས་པ་མཆོག་ནི་སྤྱི་ལོ་༡༩༣༣ཟླ་བ་དྲུག་པའི་ཚེས་༤ཉིན་ཏྲེ་ཧོར་བྲག་མགོའི་ཡུལ་དུ་འཁྲུངས། དགུང་ལོ་༡༣་ཐོག་རང་དགོན་དགའ་ལྡན་རབ་བརྟན་རྣམ་རྒྱལ་གླིང་དུ་ཆོས་བཞུགས་དང་དགུང་༡༨་ལ་ལྷ་སར་ཕེབས་ནས་འབྲས་སྤུངས་བློ་གསལ་གླིང་དུ་ཚོགས་བཞུགས་ཀྱིས་ནང་དོན་རིག་པ་ལ་སློབ་གཉེར་གནང་།

དགེ་བའི་བཤེས་གཉེན་ཆེན་པོ་བློ་བཟང་དོན་གྲུབ་གཙོ་བོར་གྱུར་པའི་ཚུལ་ཁང་བླ་མ་རིན་པོ་ཆེ་དང་། ཏྲེ་ཧོར་དགེ་བཤེས་བསོད་ནམས་མགོན་པོ། ཤག་སྐོར་མཁན་རིན་པོ་ཉི་མ་རྒྱལ་མཚན། ཚུལ་ཁང་མཁན་ཟུར་རིན་པོ་ཆེ་ཡེ་ཤེས་ཐུབ་བསྟན། ཏྲེ་ཧོར་མཁན་ཟུར་རིན་པོ་ཆེ་བློ་བཟང་ཉི་མ་བཅས་བློ་གསལ་གླིང་གི་མཁས་དབང་དུ་མ་ཡོངས་འཛིན་དུ་བསྟེན་ཅིང་། སྤྱི་ལོ་༡༩༥༩ལོར་རྒྱ་གར་དུ་བྲོས་བྱོལ་དུ་ཕེབས་ནས་སྤྱི་ལོ་༡༩༧༣ ལ་ཝ་ཎ་མཐོ་སློབ་དུ་ཨཱ་ཅརྱའི་རྒྱུགས་སྤྲོད་དང་། སྤྱི་ལོ་༡༩༧༥ ལོར་དགེ་བཤེས་ལྷ་རམས་པའི་གྲྭ་སྐོར་དམ་འཇོག་མཛད་པ་དང་། བར་སྐབས་ཤིག་ཏུ་ལྡི་ལི་བོད་ཁང་དུའང་ཕྱག་ལས་གནང་ཡོད་ལ་དེ་ནས་༸གོང་ས་མཆོག་གི་བཀའ་དགོངས་གཞིར་བཟུང་ད་བར་གདན་ས་ཆེན་པོར་དཔེ་ཁྲིད་མཛད་པའི་འཕྲིན་ལས་ཀྱི་པད་མོ་བཞེད་པས་སྐལ་ལྡན་རྣམ་དཔྱོད་ཅན་གྱི་གདུལ་བྱའི་བུང་བ་མཐའ་ཡས་པ་སྐྱོང་བཞིན་ཡོད་པ་ལགས་སོ།།

༦ བརྩམས་ཆོས་གཞན། ༡ ལེགས་བཤད་དད་པའི་མཛེས་རྒྱན། ༢ དམ་ཆོས་སྣང་བའི་སྒྲོན་མེ། ༣ ལེགས་བཤད་ལུང་རིགས་དགའ་ཚལ་བཅས་བཞུགས་ཡོད།

ཁེར་རྐྱང་གི་རྒྱལ་མཚན།


ཁེར་རྐྱང་དུ་རྒྱལ་མཚན་དང་ལྷན་དུ་འགྲེང་པ། ར་ས་ཕོ་ཉས་དཔར།



ངས་ལེགས་པར་བསམ་ན།
ང་ནི་ཁེར་རྐྱང་གི་འདུ་ཁང་སྟེང་གི་རྒྱལ་མཚན་དེ་དང་འདྲ།

རྒྱུན་དུ་ཞོགས་ཀའི་ཉི་འཆར་ལ་བལྟ་བཞིན།
མ་འོངས་པར་རེ་སྒུག་གི་སྔ་འདང་རྒྱབ།
སུས་ཀྱང་སྙིང་ཁུངས་ནས་ཁ་ཏ་བྱེད་མཁན་མེད་ལ།
རླུང་འཚུབ་དང་ཆར་བརྡུང་གི་བརྙས་བཅོས་ཟེགས།

མིང་འདོགས་ལ་རྒྱལ་མཚན་ཡིན་ཀྱང་།
དོན་དངོས་རང་དབང་དང་སྤྱི་ཚོགས་མེད་པའི་ཁེར་མཚན་ཞིག་ཡིན།
རྒྱུན་དུ་འདུ་ཁང་གི་ཡང་རྩེ་ཁོ་ནར།
ཐག་རིང་གི་མཛེས་ལྗོངས་ལ་བལྟ་བཞིན་ཡོད་ཀྱང་།
འགྲོ་ཐབས་ཟད།

ཕུག་རོན་དང་ཁྭ་ཏས་སྐྱག་གཅིན་གྱིས་མགོ་བོ་བསྣན་ཡང་།
སུ་ཞིག་ལ་འགན་འཁྲི་མེད། ཡིན་ནའང་།
ངའི་ཕྱོགས་བཞིར་ཆུ་སྲིན་གྱི་ཁ་བཞི་ཡོད་པ་དེར།
སྐད་རྒྱག་དབང་ཞིག་མེད་ནའང་། རྒྱུན་དུ།
སྐེ་འོག་གི་དྲིལ་བུ་ཆུང་ཆུང་དེ་ཚོར།
"རང་དབང"དང་"རང་དབང་"
ལོབ་རོགས་ཟེར་ཀྱང་། ད་ཆ།


དྲིལ་བུ་དེ་ཚོ་ཡང་། སྤྲེའུ་ཚོས་ཁྱེར་ནས་བྱི་བ་ལ་སྤྲད།
བྱི་བས་བྱི་ལའི་སྐེ་ལ་བཏགས་པས།

ད་ཆར་རང་སྐྱོབ་ཀྱི་ནུས་པ་ལས།
རང་དབང་གི་འཚོལ་སྙེགས་མེད་ཐལ།

ཨ་ཙི། ཅི་མ་རུང། འདུ་ཁང་གི་མཐོ་ལྒང་སྟེང་།
འཕྲད་ཐབས་བྲལ་བའི་རོགས་པ་དང་ལྷན་དུ།
ཉི་འཆར་ལ་འདང་རེ་རྒྱག་བཞིན།
ལོ་གསར་གྱི་མདུན་དུ་རྒྱུགས།

༡ ་ ༢ ་ ༣།

ར་ས་ཕོ་ཉས་འདྲ་པར་ལ་བལྟས་ནས་ཐད་ཀར་བྲིས།

དག་པ་རིན་པོ་ཆེར་བརྟན་བཞུགས་འབུལ་བ།

འདི་ཟླའི་ཚེས་༡༩ནས་བཟུང་འབྲས་སྤུངས་བློ་གསལ་གླིང་གི་འདུ་ཁང་ཡང་སྟེང་དུ་སེར་སྨད་མཁན་ཟུར་དག་པ་ཁྲི་སྤྲུལ་རིན་པོ་ཆེས་བཀའ་ཆོས་གནང་རྒྱུ་དབུ་འཛུགས་ཡོད་པ་དང་། ད་ལྟའི་ཆར་ཚེ་དཔག་ལྷ་དགུའི་དབང་དང་། བ་རི་བརྒྱ་རྩ། ལྷོ་བྲག་སྙན་བརྒྱུད་ཀྱི་རྗེས་གནང་རྣམས་ལེགས་པ་གནང་ཟིན་ནས་ད་རིང་སྔ་དྲོ་ཆུ་ཚོད་༧ ནས་དབུ་འཛུགས་ཀྱི་ཉིན་གུང་ཆུ་ཚོད་༡༢།༣༠བར་དངོས་སློབ་རྣམས་ནས་རིན་པོ་ཆེར་བརྟན་བཞུགས་འབུལ་ཡོད། སང་ཉིན་ནས་རིམ་པས་ད་དུང་ཡང་བཀའ་དབང་གནང་རྒྱུ་ཡིན་ཞིང་། རིན་པོ་ཆེ་མཆོག་ཀྱིས་ལོ་གཉིས་ཀྱི་གོང་ནས་འདི་གར་རིན་འབྱུང་བརྒྱ་རྩ་སོགས་དབང་ལུང་མན་ངག་གི་བརྒྱུད་པ་རྣམས་སྩོལ་བཞིན་ཡོད་པ་རེད།

ལོ་༤༨རྗེས་སུ་གདོང་དེབ་བམ་ཕེ་སེ་བྷུཀ་facebookབརྒྱུད་མཉམ་འཛོམས་བྱུང་བ།

སྤྱི་ཚོགས་ཀྱི་དྲ་རྒྱ་གདོང་དེབ་ཕེ་སེ་བྷུཀ་བྱ་བ་བརྒྱུད་ནས་ལོ་ངོ་༤༨ཉེ་བ་ཐུག་འཕྲད་མ་བྱུང་བའི་བུ་མོ་ཞིག་རང་གི་ཕ་དང་བསྐྱར་འཕྲད་བྱུང་ཡོད་པ་རེད།

གཅུང་མོ་ཀིམ་དང་ཕ་ཏོ་ནི་དང་ཧྥ་རེན་སཻ་སེ་མོ་རང་བཅས་མཉམ་འཛོམས་ཀྱི་འདྲ་དཔར།

རང་ལོ་༥༡་ལོ་སོན་པ་ཧྥ་རེན་སཻ་སེ་་་་སིམྥ་སོན་Frances Simpsonཟེར་བ་ཤེ་རོབ་ཤེ་རི་Shropshireནས་ཡིན་པ་ཞིག་བདུན་ཕྲག་སྔོན་མའི་ནང་རང་ལོ་གསུམ་གྱི་སྐབས་ཕ་མ་ཁ་བྲལ་གྱིས་ད་བར་མ་ཐུག་པའི་རང་གི་ཕ་དངོས་སུ་མཐོང་ཡོད། མོས་རང་གི་ཕའི་མིང་བརྗེས་པ་མ་ཤེས་པར་ལོ་ངོ་༣༣གྱི་རིང་འབད་བརྩོན་ཆེན་པོ་གང་སར་བཙལ་ཀྱང་རྙེད་མེད་པ་རེད།
འོན་ཀྱང་ད་ལན་ཧྥ་རེན་སཻ་སེའི་གྲོགས་པོ་ཞིག་གིས་མོའི་མི་བརྒྱུད་ལ་ཉམས་ཞིབ་བྱས་པ་ལས་ཁོང་མེ་ལི་ཉིས་བརྒྱའི་༢༠༠བར་ཐག་ལས་མེད་པའི་པོལ་ལེ་Pooleརྒྱལ་ཁབ་ཀྱི་ནང་ཡོད་པ་ཤེས་པ་དང་། ཧྥ་རེན་སཻ་སེ་མོ་རང་ལ་ཕ་གཅིག་པའི་གཅུང་མོ་ཀིམ་་་་མེཀ་ནའུ་ཊོན་Kim Macnautonཟེར་བ་dailymail.co.ukཉིན་རེའི་གསར་འཕྲིན་གསར་འགོད་པ་ཞིག་ཡོད་པ་ཧ་གོ་བས། ཧྥ་རེན་སཻ་སེས་གདོང་དེབ་ཕེ་སེ་བྷུཀ་དྲ་རྒྱའི་ནང་ཀིམ་བཙལ་ནས་འཕྲིན་དེ་འདྲ་ཞིག་བཏང་།

"འདིས་ཁྱེད་རང་ཧོན་འཐོར་དུ་འཇུག་མདོག་ཁ་པོ་རེད། ངའི་བསམ་པར་ཁྱེད་རང་ངའི་གཅུང་མོ་རེད་ཤག"

སྟབས་ལེགས་པ་ཞིག་ལ་ཧྥ་རེན་སཻ་སེའི་འཕྲིན་དེ་ཀིམ་ལ་འབྱོར་བའི་སྐབས་ལོ་ངོ་༧༢་ལ་སོན་པའི་ཁོང་ཚོའི་ཕ་ཏོ་ནི་་་མེཀ་ནའུ་ཊོན་Tony Macnautonབུ་མོ་ཀིམ་༼ལོ་༡༩༽གྱི་རྒྱབ་དེ་ཁར་ཡོད་པས་ཁོང་ཚོ་ཕན་ཚུན་དངོས་འབྲེལ་སྤུན་མཆེད་ཡིན་མིན་བགྲོ་གླེང་གིས་མཐར་སྤུན་མཆེད་ཡིན་པ་ཤེས་འཕྲལ་ཕན་ཚུན་ཁ་པར་ཨང་ཀི་སྤྲོད་རེས་ཀྱིས། མཐར་ལོ་ངོ་༤༨་རྗེས་ཀྱི་ཧྥ་རེན་སཻ་སེས་རང་གི་ཕ་ལ་སྐད་ཆ་དང་པོ་དེ་བཤད་ཡོད།

དེ་ནས་ཧྥ་རེན་སཻ་སེས་པོལ་ནང་འགྲུལ་བཞུད་ཀྱིས་བདུན་ཕྲག་སྔོན་མའི་རེས་ས་པ་སངས་ཀྱི་ཉིན་རང་གི་ཕ་དང་གཅུང་མོ་ཐོག་མར་ཐུག་ཡོད་པ་རེད།

ཧྥ་རེན་སཻ་སེས་ ༼དེ་དུས་མོ་རང་ཟླ་བའི་ནང་སླེབས་པ་ལྟ་བུ་དང་། འབྲེལ་བརྗོད་བྱེད་མ་ཐུབ་པའི་ཚོར་བ་སླེབས་བྱུང་། དཔེ་མི་སྲིད་པ་བྱུང་། ལོ་འདི་དག་གི་མཐར་མར་ང་རང་གི་པཱ་ལགས་ཚུར་རྙེད་བྱུང་།༽ ཅེས་ལབ་ཡོད།

ཁྱི་ནི་བོད་ཀྱི་སྲོག་ཆགས་ཡིན། ༼ཁྱིའི་མིང་འདོགས་ཚུལ།༽


ནོ་བོ་རུ། ར་ས་ཕོ་ཉས་དཔར་བླངས།

དེང་སང་འཛམ་གླིང་ནང་རིན་གོང་མཐོ་ཤོས་ཀྱི་ཁྱི་ནི་བོད་ཀྱི་ཁྱི་ཆགས་ཡོད་པས། སྔ་མོ་ཁང་པའི་སྒོ་སར་ཐལ་བའི་ནང་བཏགས་ནས་བཞག་པའི་ཁྱི་དེ་ཚོ་དེང་སང་ཁྱིམ་གྱི་བུག་ཏུ་བཞག་ནས་སྦྱིན་བདག་གིས་ཉིན་མཚན་མེད་པར་བསྐོར་བ་བྱས་དགོས་པ་འདྲ་པོ་ཆགས་ཡོད། ༼རྒྱ་མི་ཚོས་དང་ཐོག་བོད་ཀྱི་ཁྱི་དེ་ཚོ་གང་ཐུབ་བསད་ནས་ཟ་ཞིང་། ད་ཆ་ཡང་དངུལ་གང་ཐུབ་སྤྲད་ནས་ཉོ་བ་དེ་འདྲ་ཡ་མཚན་ཨང་། ཁྱི་ཡག་པོ་ཡོད་ན་རྒྱ་སྒོར་ཁྲི་ཉིས་བརྒྱ་ཡང་སྤྲོད་ཀྱི་ཡོད་པ་འདྲ།༽ཁྱི་ནི་བོད་སྲིད་པ་ཆགས་དུས་ནས་ཡོད་པར་སེམས་ཤིང་། བོད་ཀྱི་ལོ་རྒྱུས་དང་དམངས་སྒྲུང་སོགས་སུ་ཁྱིའི་བརྗོད་པ་མང་བ་དང་། ད་ཆ་འཛམ་གླིང་ནང་བོད་ཀྱི་ཁྱི་ལས་རིན་གོང་མཐོ་བ་མེད་དུས། ཁྱི་ནི་བོད་ཀྱི་སྲོག་ཆགས་ཡིན་ཞེས་བརྗོད་ནའང་ཆོག་འདུག

སྤྱི་བཏང་བོད་ཀྱི་ཁྱིའི་རིགས་ལ། ཤ་ཁྱི། བེའུ་ཁྱི། ཧྭ་པ། རྒྱ་བོ་མིག་བཞི། པ་ས། པུ་ར། འབའ་ཡོ། ཨབ་སོག འདོགས་ཁྱི། ཚང་ཁྱི། རྒྱ་ལི། ལ་བོ། སོགས་ཡོད།
ཁྱིའི་མིང་འདོགས་ཚུལ་ལའང་། སྤྱིར་བཏང་མིའི་མིང་དང་མཐུན་པ་བསམ་འགྲུབ་དང་སྒྲོལ་མ་ཟེར་བ་སོགས་ཡོད་ཀྱང་དམིགས་བསལ་གྱི་ཁྱིའི་མིང་འདོགས་ཚུལ་ལ།
༡ འབའ་ལུ།
༢ སེང་ཕྲུག།
༣ སྦོ་ལོ།
༤ དམར་རིལ།
༥ དང་དཀར།
༦ དོམ་ཕྲུག
༧ དོམ་ནག
༨ བྲང་དཀར།
༩ འབར་མོ།
༡༠ དཀར་ཕྲུག
༡༡ རྒྱ་སྟག
༡༢ རྒྱ་རོག
༡༣ རྒྱ་འབྲུག
༡༤ ཨོ་དགའ།
༡༥ རྒྱ་དགེ
༡༦ ཁྲ་དགེ
༡༧ དམར་དགེ
༡༨ གྲུམ་ཕྲུག་་་་་་་་་་་་་་་་་་སོགས་ཡོད་འདུག ད་དུང་ཁྱིའི་མིང་འདོགས་ཚུལ་མི་འདྲ་བ་ཡོད་ན་གསུངས་རོགས།

འབུ་འདིའི་མིང་ལ་"ཏྲི་"ཟེར་རམ།



འབུ་འདི་ནི་ང་རང་དང་ཆུང་ཆུང་སྒང་ནས་ད་བར་གྲོགས་པོ་བསྒྲིགས་ནས་དཔེ་དེབ་ཀྱི་བར་བསྡད་པ་ཡིན། ངའི་འབུ་འདིའི་རིགས་ཀྱི་མིང་ད་བར་ཤེས་ཀྱི་མེད་ལ། ཤེས་འདོད་ཀྱང་བྱས་མྱོང་མེད། འོན་ཀྱང་མཚམས་རེ་ངས་ཡུན་རིང་མ་བལྟས་པའི་དཔེ་དེབ་དེ་འདྲ་ཁ་ཕྱེ་དུས་ཁོང་ཚོ་ནི་དེར་ཐོག་མར་སླེབས་བསྡད་ཀྱིས། ངས་ཁོང་ཚོ་ནི་དཔེ་ཆ་ལ་ཤི་འཐམ་རོ་འཐམ་བྱེད་མཁན་ཞིག་དང་རྒྱུན་དུ་ང་དང་འདྲེས་འདྲིས་ཆེ་བའི་གྲོགས་པོ་ཞིག་ངོས་འཛིན་བྱེད་ཀྱི་ཡོད། མཚམས་རེ་ངའི་ཁོང་ཚོ་མཐོང་དུས་ང་རང་ཡང་ཁོང་ཚོ་དང་འདྲ་པོ་ཞིག་རེད་དྲན་གྱི་འདུག ངའི་ད་བར་ཁོང་ཚོ་ལ་སྙན་ངག་ཞིག་བྲི་འདོད་ཀྱང་འབུ་དེའི་མིང་མ་ཤེས་བཏབ་ད་བར་ལུས་སོང་། ད་ལན་ཆེད་མངགས་འབུ་དེའི་མིང་དྲིས་དུས། འབུ་དེའི་མིང་ལ་"ཏྲི་"རེད་ཟེར།

ཉིན་མཚན་ཀུན་ཏུ་དཔེ་ཆ་དག་གི་ནང་།།
མགོ་བོ་བརྒྱུས་ནས་མི་ཚེ་བསྐྱལ་བ་ལས།།
ནང་དུ་སེམས་ལ་ཡར་རྒྱས་མ་བཏང་ན།།
གང་ཟག་དེ་ནི་འབུ་སྲིན་ཏྲི་དང་མཚུངས།།

འབུ་འདིའི་མིང་ལ་"ཏྲི་"ཟེར་རམ།

འབུ་འདི་ནི་ང་རང་དང་ཆུང་ཆུང་སྒང་ནས་ད་བར་གྲོགས་པོ་བསྒྲིགས་ནས་དཔེ་དེབ་ཀྱི་བར་བསྡད་པ་ཡིན། ངའི་འབུ་འདིའི་རིགས་ཀྱི་མིང་ད་བར་ཤེས་ཀྱི་མེད་ལ། ཤེས་འདོད་ཀྱང་བྱས་མྱོང་མེད། འོན་ཀྱང་མཚམས་རེ་ངས་ཡུན་རིང་མ་བལྟས་པའི་དཔེ་དེབ་དེ་འདྲ་ཁ་ཕྱེ་དུས་ཁོང་ཚོ་ནི་དེར་ཐོག་མར་སླེབས་བསྡད་ཀྱིས། ངས་ཁོང་ཚོ་ནི་དཔེ་ཆ་ལ་ཤི་འཐམ་རོ་འཐམ་བྱེད་མཁན་ཞིག་དང་རྒྱུན་དུ་ང་དང་འདྲེས་འདྲིས་ཆེ་བའི་གྲོགས་པོ་ཞིག་ངོས་འཛིན་བྱེད་ཀྱི་ཡོད། མཚམས་རེ་ངའི་ཁོང་ཚོ་མཐོང་དུས་ང་རང་ཡང་ཁོང་ཚོ་དང་འདྲ་པོ་ཞིག་རེད་དྲན་གྱི་འདུག ངའི་ད་བར་ཁོང་ཚོ་ལ་སྙན་ངག་ཞིག་བྲི་འདོད་ཀྱང་འབུ་དེའི་མིང་མ་ཤེས་བཏབ་ད་བར་ལུས་སོང་། ད་ལན་ཆེད་མངགས་འབུ་དེའི་མིང་དྲིས་དུས། འབུ་དེའི་མིང་ལ་"ཏྲི་"རེད་ཟེར།

ཉིན་མཚན་ཀུན་ཏུ་དཔེ་ཆ་དག་གི་ནང་།།
མགོ་བོ་བརྒྱུས་ནས་མི་ཚེ་བསྐྱལ་བ་ལས།།
ནང་དུ་སེམས་ལ་ཡར་རྒྱས་མ་བཏང་ན།།
གང་ཟག་དེ་ནི་འབུ་སྲིན་ཏྲི་དང་མཚུངས།།

བྱེ་མའི་ནང་གསེར་ཡོད་པའི་དཔེ་ལྟར་བོད་ཀྱི་ཡུལ་སྐད་ནང་ཐ་སྙད་ཀྱི་ཕ་ལམ་ཡོད།

དེང་སང་གྱི་སྤྱི་ཚོགས་འདིར་བོད་ཀྱི་ས་ཁུལ་གང་ས་ནས་མི་མང་འདུ་འཛོམས་ཡོང་བས་མི་སོ་སོའི་ཕ་ཡུལ་གྱི་ཡུལ་སྐད་བོད་སྤྱིའི་སྐད་ཡིག་དང་མཉམ་གསེས་བྱེད་ཀྱི་ཡོད་པར། རྣམ་དཔྱོད་དང་ལྷག་བསམ་ལྡན་པའི་སྐྱེས་བུ་ཁག་གཅིག་གིས་སྐྱོན་བརྗོད་བྱེད་ཀྱིན་ཡོད། སྤྱིར་བཏང་བོད་ཀྱི་ཡུལ་སྐད་བོད་སྤྱིའི་སྐད་ལ་མཉམ་གསེས་བྱས་པས་བོད་ཀྱི་སྐད་ཡིག་བསྒྱུར་འགྲོ་བ་དང་། ཚང་མས་གོ་རྟོགས་མི་ཐུབ་པར་འགྱུར་བ་སོགས་སྐྱོན་ཆ་ཇི་སྙད་ཅིག་ཡོད་པར་ཁོ་བོ་ཡང་འདོད་ཀྱིན་ཡོད་མོད། འོན་ཀྱང་ང་ཚོས་ཡུལ་སྐད་ཡིན་ནོ་ཅོག་ལ་ཁྱད་གསོད་མ་བྱས་པར་ཡུལ་སྐད་ཀྱི་གསེབ་ན་བརྟག་དཔྱད་བྱས་ན་ཕ་ལམ་དང་འདྲ་བའི་བོད་ཀྱི་ཐ་སྙད་དེ་འདྲ་རྙེད་སྲིད་སྙམ།

དེ་ཡང་དེང་སང་ང་ཚོས་རི་དྭགས་དང་བྱ་རིགས། འབུ་སྲིན་སོགས་དང་། ཤིང་འབྲས། ཤིང་སྡོང་། ཐ་ན་རྩ་ཡན་ཆད་མཐོང་དུས་ལམ་སེང་"འདིའི་མིང་ལ་དབྱིན་སྐད་ལ་དེ་འདྲ་ཞིག་ཟེར། བོད་སྐད་ནང་ད་ལྟ་མེད་པས་གསར་པ་ཞིག་བཏགས་ན་་་་འོ་རེད་རྩ་འཆོང་ལྟ་བུ་ཟེར་དགོས།" ཞེས་གྷྲ་སེ་ཤོབ་པར་grasshopperལ་ཨ་ཚག་ཚག་པ་ཟེར་བ་མ་ཤེས་པར་སྒྲ་ཐད་བསྒྱུར་གྱིས་རྩ་འཆོང་ཞེས་བཏགས་དགོས་པ་སོགས་ཡོང་བ་ཡིན། འདི་འདྲ་ཡིན་དུས་དེང་སང་ཡོངས་གྲགས་བོད་སྐད་ནང་མིང་འདི་ཡིན་མེད་པ་ཡུལ་སྐད་དུ་མིང་ཡོད་པ་དེ་འདྲ་ཡོད་ན་ཡུལ་སྐད་རེད་ཅེས་མ་དོར་བར་''དངོས་པོ་དེ་འདྲ་ལ་ངེད་ཚོ་བོད་རང་གིས་སྔར་ནས་མིང་བཏགས་ཡོད་འདུག་"ཞེས་ཕ་ལམ་རྙེད་པ་ལྟ་བུའི་དགའ་ཚོར་གྱིས་ཁྱབ་བསྒྲགས་བཏང་ནས་་བདག་སྲུང་བྱེད་དགོས། དཔེར་ན་སེ་ཁུའི་རེལ་squirrelལ་ཡུལ་ལུང་འགའ་ཞིག་ཏུ་ཐང་ལི་ཟེར་བ་དང་། ཁ་ཤས་སུ་ཐོ་ཐག་ཁ་ལི་༼དག་ཆ་མི་ཤེས་༽ཟེར་བ་དང་། ཁ་ཤས་སུ་ཤིང་ཙིག་ཟེར་བ་ལྟ་བུ་ཡིན།

ཀར་ཤ་པ་ཎ།



གོང་གི་དེ་མ་ཤ་ཀ་ཡིན་མིན་མ་ངེས་ཀྱང་སྤྱི་ལོའི་སྔོན་དུས་ཀྱི་ལོ་ངོ་༦༠༠གོང་རྒྱ་གར་དང་རྒྱ་ནག་གྷྲེ་སེ་སོགས་སུ་བེད་སྤྱོད་བྱེད་པའི་དོང་ཙེ་ཡིན།


སྤྱི་ལོའི་དུས་རབས་དང་པོ་གཉིས་ནང་གི་རྒྱ་གར་ཤར་ཕྱོགས་ཀྱི་ཀར་ཤ་པ་ཎ།


༡ ཀར་ཤ་པ་ཎ་ལ། མཚན་ཉིད་པ་དང་བཏགས་པ་བ་གཉིས་ཡོད།


ཀར་ཤ་པ་ཎ་མཚན་ཉིད་པའམ་ངོ་མ་ནི། རྒྱལ་པོ་རྨ་བྱ་བའི་ཁྲིམས་ལུགས་ཀྱིས་བྱས་པའི་དངུལ་ལས་གྲུབ་པའི་དོང་རྩེའི་རྣམ་པ་འདྲ་བའི་རི་མོ་ཅན་ཞིག་སྟེ། ལུང་ལས། དོང་ཙེ་ལྟ་བུའོ་ཞེས་དང་། རྒྱལ་པོ་རྨ་བྱ་བའི་ཁྲིམས་ལུགས་ལས་བྱུང་བ་ཞེས་སོ།།
ཀར་ཤ་པ་ཎ་བཏགས་པ་བ་ནི།
ཀར་ཤ་པ་ཎ་མཚན་ཉིད་པ་དེ་དང་རིན་ཐང་མཉམ་པའི་འགྲོན་བུ་དང་ཇ་དང་སྣམ་བུ་དང་། ཡང་ལྕགས་དང་ཟངས་ལི་སོགས་ལས་བྱས་པའི་དངོས་པོ་རྣམས་སོ།།

༢ ཀར་ཤ་པ་ཎའི་རིན་ཐང་ནི།
འགྲོན་བུ་བརྒྱད་ཅུ་ལ་མ་ཤ་ཀའམ་པ་ཎ་གཅིག་ཡིན། པ་ཎ་བཅུ་དྲུག་ལ་ཀར་ཤ་པ་ཎ་གཅིག་ཡིན། དེས་ན་འགྲོན་བུ་ཆིག་སྟོང་ཉིས་བརྒྱ་བརྒྱད་ཅུ་༡༢༨༠ལ་ཀར་ཤ་པ་ན་གཅིག་ཡིན་པས། རྐུ་ཕམ་སྐྱེ་བའི་རིན་ཐང་གི་ཚད་ལ་འགྲོན་བུ་སུམ་བརྒྱ་ཅུ་ཡིན་ནོ། འོན་ཀྱང་ཡུལ་དུས་ཀྱི་དབང་གིས་པ་ན་ལྔ་སྟེ་འགྲོན་བུ་བཞི་བརྒྱའི་རིན་ཐང་ལ་འཇོག་པའང་ཡོད་དོ།།
དེ་ཡང་འདུལ་བ་ཀཱ་རི་ཀ་ལས།
ཀར་ཤ་པ་ཎའི་བཞི་ཆ་བརྐུས།།
དེ་བརྐུས་ཚུལ་ཁྲིམས་ཞིག་པར་འགྱུར།།

མདོར་ན་ཀར་ཤ་པ་ན་ནི་འགྲོན་བུ་བརྒྱད་ཅུའི་རིན་ཐང་ཅན་གྱི་པ་ཤག་གམ། སྔོན་དུས་ཚོང་རྒྱག་པའི་སྐབས་སུ་བེད་སྤྱད་གཏོང་རྒྱུའི་དངུལ་གྱི་ཚོད་དེ་ཡིན་ནོ།།

ཕྱི་དང་ནང་གི་ཚན་རིག། ༡

དུས་སྐབས་དང་མཐུན་པའི་ནང་ཆོས་དང་ཚན་རིག་དཔྱད་བསྡུར་བྱེད་པའི་དགོས་པ་དང་བྱ་ཐབས།



༡ ཚན་རིག་ཀྱི་ངོ་བོ་དང་དགོས་པ།
ཚན་རིག་ནི་ྋགོང་ས་མཆོག་གིས་གསུངས་པ་བཞིན་གཙོ་བོ་གཟུགས་ཅན་དང་འཛམ་གླིང་འདིའི་ཐད་བརྟག་ཞིབ་བྱས་པའི་སློབ་ཚན་ཞིག་ཡིན། དེ་ཡང་གཟུགས་ཅན་གྱི་དངོས་པོ་མཐའ་དག་ལ་བགྲངས་རྩིས་ཀྱིས་དཔྱད་པ་བྱས་པ་ལས་བསྒྲུབ་བྱ་ཞིག་གྲུབ་པར་འཇོག་པ་ཡིན། དེ་ལྟ་བུའི་དཔྱད་པ་བྱས་སྟོབས་ཀྱིས་དངོས་པོའི་གནས་ཚོད་གང་ཞིག་ཤེས་པ་དང༌། དེས་འཛམ་གླིང་འདིའི་སྟེང་གི་མི་མང་ལ་མཁོ་བ་གང་ཞིག་བཟོ་ཐུབ་མིན་སོགས་བསམ་བློ་བཏང་བ་ཡིན་པས། ཚན་རིག་དགོས་པ་ནི་འཛམ་གླིང་འདིའི་མི་ཚོའི་འདོད་པ་བསྐང་རྒྱུ་དང༌། དཀའ་ངལ་རགས་པ་དེ་ཚོ་བསལ་ནས་སྟབས་བདེ་རུ་གཏོང་དེ་རྒྱུ་ཡིན།

༢ ནང་ཆོས་ཀྱི་ངོ་བོ་དང་དགོས་པ།
ནང་ཆོས་ནི་ཕྱིའི་གཟུགས་ཅན་གྱི་གནས་ཚོད་ལ་གཙོ་བོ་མི་དཔྱད་པར་ནང་སེམས་ཀྱི་འཛིན་སྟངས་ལ་དཔྱད་ནས། དེ་ལྟར་འཛིན་པ་ནི་ལོག་པར་ཤེས་པའམ་འཁྲུལ་བ་ཡིན། འདི་ལྟར་ཤེས་པ་ནི་ཡང་དག་པར་ཤེས་པ་ཡིན་པས་མ་འཁྲུལ་བ་ཡིན་ན། བློ་འཁྲུལ་བའི་བཟུང་བ་ལྟར་འཛིན་ཅིང་ཞེན་པ་ལས་ལས་བཟང་ངན་སྣ་ཚོགས་བསགས་པ་ལས་འབྲས་བུ་འཁོར་བ་སྡུག་བསྔལ་གྱི་རྒྱ་མཚོ་ཆེན་མོར་ཡང་སྐྱེ་ཡང་ཤི་སྟེ་རྒྱུན་ཆད་མེད་པར་འཁོར། བློ་མ་འཁྲུལ་བའི་བཟུང་བ་ལྟར་འཛིན་ཅིང་བསྒོམས་པ་ལས་དེ་དག་ལྡོག་ནས་ལས་ཉོན་གྱི་སྐྱེ་མཆི་བྲལ་བའི་ཐར་པ་མྱང་ངན་ལས་འདས་པ་ཐོབ་པས། དེ་ལྟར་ཐར་པ་མྱང་ངན་ལས་འདས་པ་ཐོབ་བྱེད་དེ་ལ་ནང་ཆོས་དང༌། དེ་ལྟར་ཐོབ་པ་ལ་བློ་མ་འཁྲུལ་བའི་འཛིན་སྟངས་གཏན་ལ་ཕབ་བྱེད་ཀྱི་རིགས་པའི་ལམ་ལུགས་ལ་ནང་པའི་གྲུབ་མཐའ་བརྗོད་པ་ཡིན། དེས་ན་ནང་ཆོས་ཀྱི་དགོས་པ་ནི་སྣོད་ཀྱི་འཇིག་རྟེན་འཛམ་གླིང་འདི་དང་བཅུད་ཀྱི་འགྲོ་བ་མི་ཙམ་དུ་མ་ཟད་པའི་འགྲོ་བ་སྲོག་དང་ལྡན་ཚད་ཀྱི་གཏན་གྱི་འདུན་མ་བསྒྲུབ་རྒྱུ་ཡིན་ཞིང༌། དེ་ཡང་གནས་སྐབས་ཚེ་ཕྱི་མ་དུད་འགྲོ་དང་ཡེ་དྭགས་ལྟ་བུ་ངན་འགྲོར་མི་ལྟུང་བར་བདེ་འགྲོ་ལྷ་མིའི་སྐྱེ་བ་བརྒྱུད་ནས་མཐར་ཐར་དང་ཐམས་ཅད་མཁྱེན་པ་ཐོབ་པར་བྱ་རྒྱུ་ཡིན།

༣ ཚན་རིག་དང་ནང་ཆོས་ཀྱི་མཐུན་ས།
ནང་ཆོས་དང་ཚན་རིག་གཉིས་ཀྱི་མཐུན་ས་ཆེ་ཤོས་ནི། གཉིས་ཀའི་ལུང་ཙམ་གྱི་རྗེས་སུ་མ་འབྲངས་པར་མ་འཆོལ་བའི་རིགས་པའི་ལམ་ནས་དངོས་པོའི་གནས་སྟངས་གཏན་ལ་ཕབ་དགོས་པར་འདོད་པ་དེ་ཡིན་ཞིང༌། དེ་ཡང་ནང་པ་སངས་རྒྱས་པར་མཚོན་ན་དངོས་པོའི་གནས་སྟངས་འདོད་ཚུལ་མི་འདྲ་བའི་རྐྱེན་གྱི་རྩ་བའི་གྲུབ་མཐའ་བཞི་དང་ནང་གསེས་ཀྱི་གྲུབ་མཐའ་རྣམས་བྱུང་བ་ཡིན། དེ་བཞིན་ནང་པའི་རྡུལ་ཕྲན་ཆ་མེད་འགོག་པ་དང་ཚན་རིག་པས་ཆེ་ཤེལ་གྱི་མི་འདང་བས་རྡུལ་ཕྲན་གྱི་ཆུང་མཐའ་ད་དུང་བརྗོད་མི་ཐུབ་པར་བཤད་པ་རྣམས་མཐུན་ལ། ལྷག་པར་དེང་དུས་ཁོན་ཏོམ་(Quantum physics)ཚན་རིག་སྨྲ་བ་དང་ནང་པའི་བར་དངོས་པོ་མཐའ་དག་བརྟེན་ནས་འབྱུང་བར་འདོད་ཚུལ་བའི་ཚུལ་ལ་མཐུན་པོ་བྱུང་བ་ཡིན།

༤ ཚན་རིག་དང་ནང་ཆོས་ཀྱི་མི་མཐུན་ས།
ཚན་རིག་དང་ནང་ཆོས་གཉིས་ཀྱི་མི་མཐུན་ས་ནི། སྐྱེ་བ་སྔ་ཕྱི་དང༌། ཉོན་མོངས་གཏན་ཟད་ཀྱི་ཐར་པ། ལས། རྣམ་པར་ཤེས་པ་སོགས་ཚན་རིག་པས་མ་འདོད་ཅིང༌། ཡང་འགྲོ་བ་རྣམས་ཕ་མའི་གཟུགས་ཙམ་ལས་སྐྱེ་བ། ཀླད་པའི་ཆ་ཤས་ཀྱི་ཤེས་པ། དངོས་པོ་ཀུན་ཐོག་མཐའ་གཟུགས་ཅན་ལ་ཐུག་པ་སོགས་ནང་པ་སངས་རྒྱས་པས་མི་འདོད་པ་དང། གཉིས་ཀས་སྲོག་ཡོད་མེད་ཀྱི་འཇོག་མཚམས་ལ་མི་མཐུན་པར་སེམས།

ནེ་ཙོའི་ལོ་རྒྱུས་དྲན་པའི་དཔར།

དེ་རིང་གི་ཉིན་གུང་ཟ་མ་ཟོས་པའི་རྗེས་སྒེའུ་ཁུང་ནས་བལྟ་དུས་ཆུ་གཞོང་གི་ནང་བྱིའུ་འཇོལ་མོ་ཁྱོ་ཤུག་ཞིག་དང་བྱིའུ་མིང་མ་ཤེས་པ་ནེ་ཙོ་འདྲ་བའི་ཁྱོ་ཤུག་ཞིག་གི་ཆུ་འཐུང་བཞིན། སྐབས་རེ་ཆུ་གཞོང་ན་འཛུལ་ནས་ཆུ་བརྒལ་བ་ཡང་བྱེད་བཞིན་འདུག་པར་གཤམ་གྱི་དཔར་དེ་བླངས་པ་དང་སྦྲགས་དེ་འདྲ་ཞིག་དྲན་སོང་།



རྒན་བགྲེས་སྲོང་ཞིག་གིས་དེ་སྔོན་ང་ལ་ལོ་རྒྱུས་གསུངས་གསལ།
སྔོན་མ་༸རྒྱལ་བ་སྐུ་གོང་མའི་སྐབས་༸་རྒྱལ་བ་རིན་པོ་ཆེར་ཀོང་ཡུལ་ནས་ཡིན་པའི་ནེ་ཙོ་ཞིག་ཡོད། ༸རྒྱལ་བ་རིན་པོ་ཆེ་དགོངས་པ་མ་རྫོགས་ཙམ་གོང་ལ་ནེ་ཙོ་དེས་༸རྒྱལ་བ་རིན་པོ་ཆེར་ཀོང་ཡུལ་དུ་གུང་སེང་འགྲོ་རྒྱུའི་དགོངས་པ་ཞུས་པས། ༸རྒྱལ་བ་རིན་པོ་ཆེས་རིང་མིན་ཟླ་བ་གཅིག་གི་ནང་ཚུན་ཡར་ལོག་ཡོང་དགོས་གསུངས་ནས་དགོངས་པ་གནང་སྟེ་ནེ་ཙོ་དེ་ཀོང་ཡུལ་དུ་བཏང་གནང་པ་རེད། དེ་ནས་ཟླ་བ་གཅིག་ལྷག་ཙམ་རྗེས་༸རྒྱལ་བ་རིན་པོ་ཆེ་དགོངས་པ་རྫོགས་པས་ཨ་དྲུང་ཞིག་ཀོང་ཡུལ་དུ་ལན་བྱས་པར་འགྲོ་དུས་ཀོང་པོའི་ནགས་གསེབ་ནས་་་ཝེ་ཨ་དྲུང་ལགས། ཞེས་འབོད་པས་ཨ་དྲུང་དེས་ཕར་བལྟ་ཚུར་བལྟ་བྱས་པས་མི་གཅིག་ཀྱང་མ་མཐོང་བས་འགྲོ་གྲབས་བྱེད་དུས། ཡང་་ཨ་དྲུང་ལགས་ཞེས་འབོད་པས། ཨ་དྲུང་དེས་སུ་ཡིན་དྲིས་དུས། ང་ནོར་བུ་གླིང་ཁ་ནས་ཡིན། ༸རྒྱལ་བ་རིན་པོ་ཆེ་སྐུ་ཁམས་གང་འདྲ་འདུག་ཞེས་ཚུར་དྲིས་པས། ཨ་དྲུང་དེས་ནོར་བུ་གླིང་ཁའི་སྐུ་ངོ་འདྲ་ཞིག་རེད་བསམས་ནས། ༸རྒྱལ་བ་རིན་པོ་ཆེ་དགོངས་རྫོགས་ཀྱི་གནས་ཚུལ་བརྗོད་པས། ཨ་ཁ་་་ང་ལོག་རྒྱུ་ཕྱིས་དྲག་སོང་། ཞེས་ལབ་པས། ཨ་དྲུང་གིས་ཁྱེད་སྐུ་ངོ་སུ་ཞུ་མཁན་དེ་ཡིན་ནམ་ཞེས་བསྐྱར་དུ་དྲིས་དུས། ཤིང་སྡོང་རྩེ་ནས་ནེ་ཙོ་ཞིག་གིས་ང་ནོར་བུ་གླིང་ངའི་ནེ་ཙོ་ཡིན། ༸རྒྱལ་བ་རིན་པོ་ཆེས་གུང་སེང་ལ་བཏང་གནང་བྱུང་ལབ་པས། ཨ་དྲུང་དེ་ཧང་སངས་པ་རེད་གསུངས།

(HAITI) ཧྱེ་ཏི་སྤྱི་མཐུན་རྒྱལ་ཁབ་ངོ་སྤྲོད།


ཧྱེ་ཏི་སྤྱི་མཐུན་རྒྱལ་ཁབ་ནི་ཀེ་རིབ་བྷེན་(Caribbean)༼རྒྱ་མཚོ་ངོགས་ཀྱི་༽རྒྱལ་ཁབ་ཡིན། ༼ལྷོ་བྱང་གི་ཨ་མི་རི་ཀའི་གླིང་ཆེན་གཉིས་ཀྱི་བར་གྱི་རྒྱ་མཚོ་ངོགས་སུ་མཚོ་གླིང་གི་ཚུལ་དུ་ཡོད༽



ཧྱེ་ཏིའི་ཁོར་ཡུག་གྱི་རྒྱ་ཁྱོན་ལ་ཀི་ལོ་མི་ཊར་༢༧་༧༥༡ཙམ་ཡོད་ཅིང་མི་རིགས་བརྒྱ་ཆ་༩༥ནག་པོ་ཡིན་པ་དང་མི་འབོར་གྲངས་ས་ཡ་བཅུ་ལྷག་10,033,000ཡོད་འདུག
ཧྱེ་ཏིའི་རྒྱལ་སའི་མིང་ལ་པོརཊ་ཨུ་པི་རིན་སེ་(port au prince)བརྗོད་ཀྱི་ཡོད།
ཧྱེ་ཏི་སྐད་ཡིག་ནི་ཧྱེ་ཤན་ཀརེ་ཨོལ་haitian Creoli༼ཧྱེ་ཏི་རང་སྐད་༽དང་ཧྥ་རན་སིའི་སྐད་བེད་སྤྱོད་བྱེད་ཀྱི་ཡོད།
ཧྱེ་ཏི་ལོ་རྒྱུས་ནི་ལ་ཏིན་ཨ་མི་རི་ཀའི་(Latin America)ནང་རང་བཙན་ཐོབ་པའི་རྒྱལ་ཁབ་དང་པོ་དང་། མི་རིགས་ནག་པོས་སྣེ་འཁྲིད་པའི་རྒྱལ་ཁབ་ཀུན་གྱི་ནང་ནས་རང་དབང་གི་དཔོན་པོའི་གོ་གནས་སྤྲོད་མཁན་དང་པོ་ཡིན་ཞིང་
སྤྱི་ལོ་༡༨༠༤ལོར་ཧྥ་རན་སི་འོག་ནས་རང་བཙན་རགས་ཡོད་པ་རེད།



སྤྱི་ལོ་༢༠༡༠ཟླ་བ་༡ཚེས་༡༢ཉིན་ཧྱེ་ཏི་རྒྱལ་ས་པོརཊ་ཨུ་པི་རིན་སེ་ལ་ས་ཡོག་ཤུགས་ཚད་༧་༠རྒྱབ་པས་མི་གྲངས་སྟོང་ཕྲག་བཅུ་ལྷག་པ་ཤི་བ་དང་རྒྱལ་ཁབ་ལ་ཕམ་ཉེས་ཆེན་པོ་བཏང་ཡོད་པ་མ་ཟད་ཐ་ན་རྒྱལ་པོའི་ཕོ་བྲང་ཚུན་ཞིག་ཡོད།


ཨ་ཚག་ཚག་པ། CRICKET ཆ་ག་བ།

ཟླ་བ་གཅིག་ཙམ་སྔོན་གྲོང་ཁྱེར་ནས་རྒྱ་སེ་མེ་ཏོག་དམར་པོ་དང་སེར་པོ་ཞིག་ཉོས་ནས་བཏབ་བཞག་ཡོད། ད་ནངས་ཞོགས་པ་ངས་ཁ་སེང་ནས་བཞད་གྲབས་ཡོད་པའི་རྒྱ་སེ་དམར་པོའི་ཐེའུ་དེར་བལྟ་དུས་ཁེ་ཉིན་གྱི་འབུ་ཆུང་ཆུང་གཉིས་ཡོད་པ་དེ་ཆེན་པོ་ཆགས་འདུག་ཅིང་རང་གཟུགས་རྐྱང་གང་ཙམ་གསལ་པོར་འཐོན་འདུག་པས། ངས་ལམ་སེང་དཔར་ཆས་ལེན་ནས་གཤམ་གྱི་དཔར་དེ་དག་བླངས་པ་ཡིན།

གོང་གསལ་དཔར་གྱི་ནང་གི་འབུ་སྲིན་དེ་དག་ཅི་ཡིན་དང་མིང་ལ་བོད་སྐད་དང་དབྱིན་སྐད་དུ་གང་ཟེར་ཤེས་འདོད་ཡོད་དམ། འབུ་སྲིན་དེའི་མིང་ལ་དབྱིན་སྐད་དུ་ཀཊི་ཌིཌ་་་ནྱཾཕ་Katydid Nymphཟེར་ཞིང་། བྷུ་ཤེ་ཀྲིཀ་ཀེཊ་(bush criket)ཡང་ཟེར།
ཀཊི་ཌིཌ་ཞེས་པ་འབུ་སྲིན་དེའི་དར་མའི་མིང་དང་ནྱཾཕ་ཞེས་པ་འབུ་སྲིན་དེ་རིགས་བྱིས་པའི་སྐབས་ཀྱི་མིང་ཡིན་པས་དེ་ལྟར་བརྗོད་པ་ཡིན།
འབུ་སྲིན་དེའི་མིང་ལ་བོད་སྐད་དུ་"རྩ་ལྡུམ་གྱི་ཨ་ཚག་ཚག་པ"འམ་རྩ་ལྡུམ་གྱི་ཆ་ག་པ་བརྗོད་ཆོག་པ་ཡིན། ཡང་ན་རྩ་ལྡུམ་གྱི་ཆ་ག་པའི་བྱིས་པ་ཞེས་བརྗོད།


ཨ་ཚག་ཚག་པ་ཞེས་པ་གཙོ་བོ་ཀྲིཀ་ཀེཊ་༼ཀརི་ཀེ་ཊ་༽cricketཞེས་པ་རྒྱ་ནག་གིས་བྱིས་པ་ཚོས་སྨྱུག་སྡོང་ནང་བླུགས་ནས་གསོ་ཉར་བྱས་པའི་འབུ། སྐད་ཙེར་ཙེར་ཟེ་རྒྱག་མཁན་རྐང་ལག་དྲུག་དང་ཚོར་རྭ་གཉིས་ཡོད་མཁན་དེ་ལ་ཟེར་བ་འདྲ་ཡང་། དོན་ལ་དབྱིན་སྐད་ནང་གི་ཀྲིཀ་ཀེཊ་༼ཀརི་ཀེ་ཊ་༽cricketཞེས་པ་དང་། གྷྲ་སེ་་་་ཤོབ་པར་(grasshopper)ཞེས་པ་དང་། ཀཊི་ཌིཌ་(Katydid)ཞེས་པ་གསུམ་ག་ལ་ཁྱབ་པའི་སྤྱི་མིང་ལ་གོ་ཆོག་སྙམ།


༢༠༡༠།༡།༡༨ཉིན་སྤེལ།

མགོ་ནད་ཀྱིས་ཟིན་བྲིས་་་་་་་་་་་་་་་་་་་་་་་་་་་་་་་་

ཉ་ཤ་བརྔོས་མ་ཟ་བའི་འདུན་པ་དང་།


མོག་ཐུག་ཚ་བོ་འཐུང་བའི་འདོད་པ་ཡང་།


མགོ་ནད་ཁྱི་ཡིས་ཁྱེར་ཏེ་མེད་པས་ན།


ཟིན་བྲིས་སྤེལ་ཐབས་རེ་ཞིག་ཡོད་རེ་སྐན།

དཔྱད་ཞིབ་པས་འདེམས་པའི་གློག་བརྙན་བྱ་དགའ།

གློག་བརྙན་འཁྲབ་ཁྲིད་པ་ཇེམ་སེ་་་ཀ་མེ་རོན་(James Cameron)གྱི་ངོས་སུམ་(3D)གློག་བརྙན་དཔའ་བོའི་སྒྲུང་གཏམ་ཨཕ་ཏར་(Avater)ཞེས་པ་དེ་དང་ཁུའི་ཊིན་་་ཏ་རན་ཊི་ནོའི་(Quentin Tarantino)གློག་བརྙན་ཨིངྒ་ལོ་རིའུསེ་་་བྷ་སེ་ཏྲེཌ་(Inglorius Basterds)ཞེས་པ་གཉིས་ཀྱིས་༢༠༡༠ལོའི་དཔྱད་ཞིབ་པས་འདེམས་པའི་གློག་བརྙན་བྱ་དགའ་(Critic's Choice Movie Awards)མང་ཆེ་བ་ལེན་ཕྱིན་སོང་ཞེས་ལོན་ཌོན་ནས་PTIགསར་འགྱུར་སྤེལ་འདུག

དེ་ཡང་རེས་ས་པ་སངས་ཀྱི་ཉིན་བྱ་དགའི་ཆུན་པོ་འཆང་བའི་ཧོ་ལི་འུ་ཌིའི་འདུ་འཛོམས་ཐོག་ཀ་མེ་རོན་གྱི་གློག་བརྙན་གྱིས་མཚན་མོའི་འཕྲུལ་ལས་བྱ་དགའ་ཚང་མ་དང་འཁྲུག་འཛིང་གློག་བརྙན་ཡག་ཤོས་ཀྱི་བྱ་དགའ་དང་བཅས་པ་དྲུག་ལེན་པ་དང་།

བོད་ནང་ལོ་བདུན་གྱི་གཙོ་འཁྲབ་པ་(hero)བྷྲཊ་པིཊ་(brad pitt)གྱིས་འཁྲབ་པའི་གློག་བརྙན་ཨིངྒ་ལོ་རིའུསེ་་་བྷ་སེ་ཏྲེཌ་ཞེས་པས་དཔར་ངོས་ངོ་མའི་གློག་བརྙནཡག་ཤོས་དང་། ཆ་སྙོམ་གྱི་འཁྲབ་སྟངས་ཡག་ཤོས་དང་། གཙོ་འཁྲབ་པའི་ལས་རོགས་འཁྲབ་མཁན་༼སྐུ་ཞབས་ཀི་རི་སེ་ཏོཕ་་་ཝལྫེ་ལ་(christoph waltz)༽ཡག་ཤོས་བཅས་ཀྱི་བྱ་དགའ་གསུམ་ཐོབ་ཡོད་འདུག
ཡང་། ཀཐེ་ཡེན་་་བྷི་ཇེ་ལོའུ་(kathryn bigelow)འཁྲབ་ཁྲིད་བྱེད་པའི་དམག་གི་ངར་སློང་གློག་བརྙན་དཱ་་་ཧྲནྟ་་་ལོག་ཀར་(The Hurt Locker)ཞེས་པ་དེར་གྲུབ་འབྲས་ཀྱི་བྱ་དགའ་ཆེ་ཤོས་འཁྲབ་ཁྲིད་པ་ཡག་ཤོས་དང་དཔར་ཡག་ཤོས་ཀྱི་བྱ་དགའ་ཐོབ་ཡོད་པ་དང་། གློག་བརྙན་འཁྲབ་མཁན་སན་དྷ་ར་་བྷལ་ལོཀ་(sandra bullock)དང་མེར་ལེ་་་སེ་ཊིབ་(merly streep)གཉིས་ལ་རིམ་པ་བཞིན་དཱ་་བི་ལེནྜ་་སེྱ་ཌེ་(The Blind Side)ཞེས་པ་དང་ཇུ་ལི་དང་ཇུ་ལྱི་(Julie & Julia)ཞེས་པའི་གློག་བརྙན་གཉིས་བརྒྱུད་ནས་མཛངས་མ་འཁྲབ་མཁན་ཡག་ཤོས་ཀྱི་བྱ་དགའ་ཐོབ་འདུག

2010.1.17ཉིན་སྤེལ།

ད་ལྟ་ཉི་མ་གཟའ་ཡིས་འཛིན་བཞིན་པ།

དེ་རིང་གྱི་ཉིན་ཉི་ཟླ་ལྷན་དུ་རོལ་བས་གཞིས་བྱེས་མཉམ་འཛོམ་གྱི་ཉིན་མོ་དྲན་བྱུང་



དཔར་པ།༼ར་ས་ཕོ་ཉ།༽
ས་གནས།༼མོན་གྷོ་ཌི།༽
དུས་ཚིགས། ༼Today, January 15, 2010, 1:34:52 PM༽


སླར་ཡང་ཉི་འཛིན་དང་འབྲེལ་བའི་སྐོར་གླེང་བ།

ཉི་འཛིན་ནི་སྲོལ་རྒྱུན་བཤད་ལུགས་ལྟར་ན། ར་ཧུ་ལའམ་སྒྲ་བཅན་ཟེར་པའི་བདུད་མགོ་ལས་ལུས་པ་མེད་པ་ཞིག་ཡོད་པ་དེས་ཉི་མ་དང་ཟླ་བའི་དཀྱིལ་འཁོར་ཟ་བཞིན་ཡོད་པར་བཤད། དུས་རྒྱུན་ཆོས་སྐད་དུའང་སྒྲ་བཅན་གྱི་མགོ་དང་ཆི་གུའི་ལུས་ཞེས་གྲགས་པ་ལྟར་ཡིན། སྒྲ་བཅན་ནི་ཕྱི་རོལ་པའི་རིག་བྱེད་ཀྱི་གཏམ་རྒྱུད་དང་མཐུན་པར་གླེང་བ་ཞིག་ཡིན་འདུག།

དེང་དུས་ཚན་རིག་པས་བཤད་ལུགས་ལྟར་ན། དུས་ཀྱི་འཁོར་བསྐྱོད་ཀྱིས་ཟླ་བའི་དཀྱིལ་འཁོར་དེ་འཛམ་བུ་གླིང་དང་ཉི་མའི་བར་འཚང་ནས་ཉི་མའི་གཟུགས་འགེབ་པ་ལས་ཉི་མ་གཟའ་འཛིན་དེ་བྱུང་བ་ཡིན་པ་དང་། ཟླ་བ་གཟའ་འཛིན་ཡང་ཟླ་བ་དང་ཉི་མའི་བར་དུ་འཛམ་བུ་གླིང་འཛུད་པས་འཛམ་བུ་གླིང་གི་སྒྲིབ་ནག་ཟླ་བ་ལ་ཕོག་པ་ལས་བྱུང་བར་བཤད། དེ་ནི་ཉི་འཛིན་དང་ཟླ་འཛིན་ཚང་མ་གནམ་གང་གི་ཉིན་མཚན་དུ་བྱུང་བ་དང་མཐུན་པ་ཡིན།


དོགས་གཅོད། ཚན་རིག་དང་སྲོལ་རྒྱུན་གྱིས་བཤད་པ་དེ་ལྟར་རྒྱག་བཞིན་ཡོད་ནའང་། དཔར་ཆས་ཀྱི་ནང་ཡག་པོར་བལྟ་སྐབས་༼འདྲ་པར་གསུམ་པ་དེ་ལྟར་༽ཉི་མའི་འོད་ཟེར་གྱི་དཀྱིལ་དུ་ཟླ་བ་ཚེས་པ་འདྲ་བའི་གྲིབ་ནག་ཞིག་མཐོང་གི་འདུག་པ་དེ་ཇི་ལྟར་བྱས་པ་ཡིན་ནམ།



ཉི་འཛིན་ལ་དཔར་ཇི་ལྟར་རྒྱག་ཡོད་པ།

ཉི་མ་གཟའ་འཛིན་ལ་པར་རྒྱག་རྒྱུ་ནི་དཔར་ཆས་དམིགས་བསལ་ཅན་ཞིག་ཡོད་ན་མ་གཏོགས་དཀའ་བ་ཞིག་རེད་འདུག དེ་ཡང་དང་ཐོག་རང་ཉིད་ཀྱི་མིག་ལ་མ་གནོད་པའི་ཆེད་མིག་ཤེལ་ནག་པོ་ཞིག་དྲ་སྒྲིག་དགོས་འདུག དེ་ནས་དཔར་ཆས་འཁྱེར་ནས་དཔར་རྒྱག་པར་བརྩོན་དུས་ཉི་མའི་འོད་ཟེར་གྱིས་དཔར་ཆས་འགེབས་ནས་ཉི་མའི་དབྱིབས་ཧ་ཅང་མཐོང་དཀའ་བ་རེད་འདུག དཔར་ཆས་ནང་ཡག་པོར་བསྒྲིགས་རྗེས་གཞི་ནས་༼གོང་དུ་བཀོད་པ་དེ་འདྲ་༽ཉི་མའི་དབྱིབས་ཞིག་མཐོང་ནའང་དཀྱིལ་དུ་ཟླ་བའི་གྲིབ་ནག་འདྲ་བ་མངོན་པ་དང་། དཔར་རྒྱག་དུས་ཉི་མའི་འོད་མ་གཏོགས་མི་ཐེབས། ཡིན་ནའང་། དུས་ཚོད་ཐུང་ཐུང་ཞིག་ནང་ངས་ཚོད་ལྟ་གང་འཚམ་བྱས་མཐར། རང་གི་དཔར་ཆས་ལ་མིག་ཤེལ་འདྲ་མིན་མང་པོ་གཡོགས་ནས་གོང་གི་འདྲ་པར་དང་པོ་གཉིས་པོ་དེ་རྒྱབ་པ་ཡིན།

དོན་འགྲུབ་རྒྱལ་དང་ར་ས་ཕོ་ཉས་གླེང་བ།

ད༽
ཀྲུང་གོ་གསར་པའི་རྒྱལ་ཁབ།།
མཁའ་ལ་ཉི་མ་ཤར་འདྲ།།
རྒྱ་བོད་མི་རིགས་མཐུན་སྒྲིལ།།
ས་ལ་པད་མོ་རྒྱས་འདྲ།།
ར༽
ཀྲུང་གོ་སྲིད་གཞུང་ངན་པ།།
མཁའ་ལ་ཐོ་བ་མེ་འབར།།
རྒྱ་བོད་མི་མང་ཚང་མའི།།
སྒལ་པ་འཚིག་རིལ་བཏང་བྱུང་།།


ད༽
ཏང་གི་ཉི་འོད་མེད་ན།།
པད་མོ་ཇི་ལྟར་བཞད་པ།།
རྒྱ་བོད་མཐུན་སྒྲིལ་མེད་ན།།
ཟེའུ་འབྲུ་ཇི་ལྟར་རྒྱས་ཨེ།།
ར༽
ཏང་གི་ཉི་མ་མེད་ཀྱང་།།
པད་མོ་སྔར་ནས་བཞད་ཡོད།།
བོད་རྒྱ་མཐུན་སྒྲིལ་ཆོག་ཀྱང་།།
ཟེའུ་འབྲུའི་གཡོ་རྒྱུ་མི་དགོས།།


ད༽
མི་རིགས་རང་སྐྱོང་བྱས་པས།།
མཐུན་སྒྲིལ་མེ་ཏོག་ཤར་བྱུང་།།
འདྲ་མཉམ་དྲི་བསུང་འཐུལ་བས།།
མཛའ་མཐུན་བུང་བ་འཁོར་བྱུང་།།
ར༽
མི་རིགས་རང་སྐྱོང་ཟེར་ནས།།
ཆོལ་གསུམ་སྤུན་ཟླ་གཏོར་བྱུང་།།
འདྲ་མཉམ་དྲི་བསུང་འཐུལ་རྒྱུ།།
མ་འབད་ལས་ཀྱིས་གྲུབ་ཡོང་།།


ད༽
མུ་མེད་ཐང་སྟོང་ཐོག་ལ།།
པ་ཏྲའི་རི་མོ་ཇི་བཞིན།།
གཞུང་ལམ་དྲ་བ་བསྣོལ་བས།།
རྒྱ་བོད་འགྲིམ་འགྲུལ་དར་སོང་།།
ར༽
མུ་མེད་བོད་ཀྱི་ཡུལ་ལ།།
གྱིག་གི་སྦུ་ག་འདྲ་བའི།།
གཞུང་ལམ་ཁག་མང་བཟོས་ནས།།
རིན་དངོས་རྒྱུ་ནོར་རྐུས་སོང་།།


ད༽
ལོ་ཁྲིར་གཉིད་དུ་ཡུར་བའི།།
གཏེར་གྱི་སྒོ་མོ་ཕྱེས་པས།།
གངས་ཅན་བཟོ་ལས་ཐོན་སྐྱེད།།
ཡར་ངོའི་ཟླ་ལྟར་འཕེལ་སོང་།།
ར༽
ཁྲི་ལོར་གཏེར་དུ་སྦྲུམ་པའི།།
རིན་ཆེན་རྐུ་རྒྱུར་བྲེལ་ནས།།
གངས་ཅན་བཟོ་ལས་ཡར་རྒྱས།།
བྱིའུའི་གཅིན་པ་འདྲ་བྱུང་།།


ད༽
ཞིང་ས་གྲུ་བཞིའི་ཐོག་ལ།།
འཕྲུལ་གྱི་ལྕགས་གླང་བཏང་བས།།
སྟོན་ཐོག་གྲོ་ནས་སྲན་གསུམ།།
རི་བོའི་གཏོས་དང་མཉམ་སོང་།།
ར༽
ཞིང་ཁ་ལེབ་མོའི་ལྒང་ལ།།
འཕྲུལ་ཆས་ཊཀ་ཊར་གཏོང་བར།།
ཧ་ལས་ཧོན་འཐོར་བྱས་པ།།
ལྐུགས་རྟགས་རི་དང་མཉམ་སོང་།།


ད༽
མཐའ་ཡས་སྤང་ལྗོངས་སྔོན་མོ།།
རྫས་འགྱུར་ལུད་ཀྱིས་གསོས་པས།།
སྒོ་ཕྱུགས་རྟ་ནོར་ལུག་གསུམ།།
ལ་ཐང་མེད་པར་ཁེངས་སོང་།།
ར༽
མཐའ་ཡས་ཞིང་ཁ་སྔོན་མོར།།
རྫས་འགྱུར་ལུད་ཀྱིས་བསླུས་ནས།།
ལོ་གསུམ་ལོ་བཞིའི་རྗེས་ལ།།
སྟོན་ཐོག་བརྔ་རིན་མི་འདུག།


ད༽
གོས་ཆེན་དར་གྱི་ཟ་འོག།
འཇམ་པོ་མི་འདུག་མ་གསུངས།།
བྷོ་ཊའི་སྨན་ཤར་བུ་མོ།།
ཟ་འོག་རི་མོར་ཞེན་སོང་།།
ར༽
གོས་ཆེན་ཟ་འོག་ཟེར་བས།།
སྔར་ནས་ད་བར་བསླུས་བྱུང་།།
བྷོ་ཊའི་སྨན་ཤར་བུ་མོར།།
ད་ཆ་ཟ་འོག་མི་དགོས།།


ད༽
ཁ་བཏགས་དཀར་པོའི་ཐོག་ཏུ།།
རི་མོ་མི་འདུག་མ་གསུངས།།
ཁ་བ་ཅན་པའི་བསམ་པ།།
ཁ་བཏགས་ལས་ཀྱང་དཀར་བ།།
ར༽
ཁ་བཏགས་དཀར་ཐག་ཆོད་ནས།།
རི་མོ་གང་འབྲི་སོང་ཙང་།།
ཤར་གྱི་འདྲེ་ལག་ནག་པོས།།
ས་བཀྲ་གང་འདོད་བྲིས་སོང་།།


ད༽
ཇ་ནག་ཁུ་བའི་ནང་དུ།།
འོ་མ་མི་འདུག་མ་གསུངས།།
རྒྱ་རིགས་བུ་མོའི་མཆུ་སྒྲོས།།
འོ་མ་ལས་ཀྱང་ཞིམ་པ།།
ར༽
རྒྱ་རིགས་བུ་མོའི་མཆུ་ཏོ།།
རེག་དུག་ནད་ཀྱི་རྩ་བ།།
དེ་ལས་འོ་མ་མེད་ཀྱང་།།
ཇ་དྭངས་འཐུང་ན་བདེ་བ།།

མཆན།

ཊཀ་ཊར་ནི་ཞིང་རྨོ་བྱེད་ཀྱི་མོ་ཏ་འཁོར་ལོ་ཆེན་པོ་ཅན།

རེག་དུག་ནི་འཁྲིག་སྤྱོད་བྱས་པ་སོགས་ལས་བགོས་པའི་ཨེ་ཛེ་(HIV)ནད་དེ་མགྱོགས་མྱུར་འཆི་བ་ལས་ཐར་ཐབས་མེད་པ་ཞིག

གླུ་ཡི་མཆོད་པ། ༤༽

ངའི་ཚེ་སྲོག་གི་ཚེ་སྲོག་ལགས།


ངས་རྒྱུན་དུ་རང་གི་ལུས་པོ་དྭངས་གཙང་དུ་ཉར་ཐབས་བྱེད་པར་ཤེས་པས། ངའི་ཡན་ལག་ཐམས་ཅད་ཀྱི་སྟེང་དུ་རང་གི་གསོན་ཤུགས་ཀྱིས་རེག་པར་བྱེད།

ངས་རྒྱུན་ལྡན་དུ་རྫུན་པའི་ཆོས་ཀུན་རང་གི་བསམ་ངོ་ལས་ཕྱི་རོལ་དུ་སྤྱུགས་ཐབས་བྱེད་པར་ཤེས་པས། ཁྱེད་ཀྱིས་ངའི་སེམས་ནང་དྲང་བདེན་གྱི་འབྲས་བུའི་འོད་ཟེར་བྲིས་པར་བྱེད།

ངས་རྒྱུན་ལྡན་དུ་སྙིང་ཁོངས་སུ་སྡུག་འདྲེ་དག་ཕུད་ནས་བརྩེ་དུང་གི་མེ་ཏོག་འཇོག་ཐབས་བྱེད་པར་ཤེས་པས། ཁྱོད་ཀྱིས་རིངས་པར་ངའི་སྙིང་གི་མཆོད་རྟེན་གྱི་སྦུག་ཏུ་རྐུབ་སྟེགས་སྟེང་བཞུགས།

འདི་ནི་ངས་ཁྱེད་ཉིད་ངའི་སྤྱོད་པའི་ནང་དུ་ཞུགས་པར་འབད་བརྩོན་བྱེད་པར་ཤེས་པས་ནི། ངའི་སྤྱོད་པ་ལ་ཁྱོད་ཀྱི་ནུས་པས་སྟོབས་ཤུགས་བསྐྲུན་པ་ཡིན།

སྐྱབས་འགྲོའི་བསླབ་བྱ་དང༌། ཞར་ལ་སྐྱབས་ཡུལ་དཀོན་མཆོག་གསུམ་ངོས་བཟུང་བ།

དང་པོ་སྐྱབས་འགྲོའི་བསླབ་བྱ་ལ། སོ་སོའི་བསླབ་བྱ་དང་ཐུན་མོང་གི་བསླབ་བྱ་གཉིས་ཡོད་པ་ལས།

༡༽སྐྱབས་གསུམ་སོ་སོའི་བསླབ་བྱ་ལ་དཀོན་མཆོག་གསུམ་སོ་སོ་ལ་སྐྱབས་སུ་འགྲོ་བས་བསླབ་བྱ་གསུམ་ལས།

༡ སངས་རྒྱས་ལ་སྐྱབས་སུ་སོང་བས་ནི། དགག་ཕྱོགས་ནས་འཇིག་རྟེན་པའི་ལྷ་དབང་ཕྱུག་དང་ཚངས་པ་དང་རྒྱལ་བཙན་ཀླུ་ལ་སོགས་པར་སྐྱབས་སུ་འགྲོ་བར་མི་བྱེད་པ་དང༌། སྒྲུབ་ཕྱོགས་ནས་སངས་རྒྱས་ཀྱི་སྐུ་གཟུགས་འདམ་བག་དང་ཤིང་དང་རྡོ་སོགས་གང་ཞིག་ལས་བྱས་པ་དང༌། བཟོ་ལྟ་ངན་པ་ལྟ་བུ་དང་ཆག་ཧྲུལ་དུ་གྱུར་པ་ལྟ་བུ་ཅི་འདྲ་ཞིག་ཡིན་ཡང་སངས་རྒྱས་དངོས་ཀྱི་འདུ་ཤེས་སམ་ཆ་འཇོག་བྱེད་དགོས་པ་ཡིན།

༢ ཆོས་ལ་སྐྱབས་སུ་སོང་བས་ནི། དགག་ཕྱོགས་ནས་སེམས་ཅན་ལ་གནོད་འཚེ་མི་བྱེད་པ་སྟེ། སྲོག་ལྡན་གང་ཞིག་ལ་སྲོག་གཅོད་པ་དང་བརྡུང་བརྡེག་བྱེད་པ་བལྟ་ཞོག ཐ་ན་བོང་བུར་འཁེལ་ལྕི་མོ་འགེལ་བ་ཚུན་བྱ་མི་རུང་བ་དང༌། སྒྲུབ་ཕྱོགས་ནས་བྱུང་ན་ཆོས་ཀྱི་ཡི་གེ་ན་གཅིག་དང་མ་བྱུང་ན་ཆོས་ཚིག་བཞི་ཡན་ཆད་ལའང་ཆོས་དཀོན་མཆོག་དངོས་ལྟར་གུས་པ་བྱ་དགོས་པ་སྟེ། ཆོས་ཚིག་བཞི་ཡན་ཡོད་པ་ས་མཐིལ་དུ་འཇོག་པ་དང་མི་གཙང་སར་འཇོག་པ་དང༌། ལྷམ་སོགས་དང་ལྷན་དུ་འཇོག་པའམ་འཁུར་བ་དང་ལུས་ཀྱིས་འགོམ་ཡུག་རྒྱག་པ་སོགས་མ་གུས་པ་སྤང་པར་བྱེད་པའོ།།

༣ དགེ་འདུན་ལ་སྐྱབས་སུ་སོང་བས་ནི། དགག་ཕྱོགས་ནས་གྲོགས་མུ་སྟེགས་པ་དང་མི་འགྲོགས་པ་སྟེ། དཀོན་མཆོག་དང་ལས་འབྲས་ལ་ཡིད་ཆེས་མེད་ཅིང་སྐུར་འདེབས་བྱེད་པ་དེ་དག་དང་འགྲོགས་པར་མི་བྱེད་ལ། སྒྲུབ་ཕྱོགས་ནས་དགེ་འདུན་ནམ་རབ་བྱུང་གི་གོས་གྱོན་པའི་རྟགས་ཙམ་འཛིན་པ་ལའང་མི་གུས་པ་མི་བྱ་ཞིང༌། དགེ་འདུན་པའི་ན་བཟའ་དམར་སེར་ཙམ་ས་ལ་ལྷུང་བ་ལའང་གུས་པར་བྱས་ནས་ས་གཙང་སར་སྐྱེལ་བ་སོགས་བྱེད་དགོས་པའོ།།

༢༽ཐུན་མོང་གི་བསླབ་བྱ་ནི། ༡ དཀོན་མཆོག་གསུམ་གྱི་ཡོན་ཏན་དྲན་པའི་སྒོ་ནས་ཡང་ཡང་སྐྱབས་སུ་འགྲོ་བ་དང༌། ༢ དཀའ་དྲིན་དྲན་པའི་སྒོ་ནས་ཁ་ལག་དང་ཇ་སོགས་ཀྱི་ཕུད་ཀྱིས་མཆོད་པ་འབུལ་བ་དང༌། ༣ གཞན་ལ་དཀོན་མཆོག་གི་ཡོན་ཏན་བརྗོད་པ་སོགས་ཀྱིས་སྐྱབས་འགྲོ་ལ་འགོད་པ་དང༌། ༤ སྐྱབས་འགྲོའི་ཕན་ཡོན་དྲན་པའི་སྒོ་ནས་ཉིན་མཚན་ལན་དྲུག་ཏུ་སྐྱབས་འགྲོ་བྱེད་པ་དང༌། ༥ བྱ་བ་གང་ཞིག་བྱེད་ཀྱང་དཀོན་མཆོག་ལ་བློ་བཀལ་ནས་བྱེད་པ་དང༌། ༦ ཐ་ན་བཞད་གད་ཙམ་གྱི་ཕྱིར་དུ་ཡང་སྐྱབས་འགྲོ་མི་གཏོང་བ་སྟེ། དེ་ཡང་སྲོག་གི་དོན་དུ་སྐྱབས་འགྲོ་མི་གཏོང་བ་མ་ཚད། ཕན་ཚུན་གད་མོ་སློང་དུས་ཀྱང་སྐྱབས་འགྲོ་མི་གཏོང་བ་སྟེ། མནའ་སྐྱེལ་བ་ཚུན་དུའང་དཀོན་མཆོག་མི་གཏོང་བར་བྱེད་པའོ།།

གཉིས་པ་ཞར་ལ་སྐྱབས་ཡུལ་དཀོན་མཆོག་གསུམ་ངོས་བཟུང་བ་ནི།

༡ སངས་རྒྱས་དཀོན་མཆོག་ནི། རང་གཞན་གྱི་དོན་གཉིས་མཐར་ཕྱིན་པའི་སྐབས་གནས་མཐར་ཐུག་སྟེ། སྐྱོན་ཀུན་ཟད་དང་ཡོན་ཏན་ཀུན་ལྡན་གྱི་བདག་ཅག་གི་སྟོན་པ་ལྟ་བུ་ཡིན།

༢ ཆོས་དཀོན་མཆོག་ནི། འགོག་བདེན་དང་ལམ་བདེན་གང་རུང་གིས་བསྡུས་པའི་འཕགས་པའི་རྒྱུད་ཀྱི་ཡོན་ཏན་ཏེ། དེ་ཡང་འཕགས་པའི་གང་ཟག་གི་རྒྱུད་ཀྱི་ཉོན་མོངས་སོགས་སྤང་བྱ་སྤངས་པའི་བྲལ་བའམ་ཡོན་ཏན་དེ་འགོག་བདེན་དང༌། ཉོན་མོངས་སོགས་སྤང་བྱ་དེ་དག་སྤོང་བྱེད་སྟོང་ཉིད་མངོན་སུམ་དུ་རྟོགས་པའི་ཤེས་རབ་ལྟ་བུའི་མཁྱེན་པའི་ཡོན་ཏན་དེ་ལམ་བདེན་ཡིན། གསུང་རབ་ཡན་ལག་བཅུ་གཉིས་ལྟ་བུ་སངས་རྒྱས་ཀྱི་གསུང་རྣམས་བརྡར་བཏགས་པའི་ཆོས་དཀོན་མཆོག་ཡིན་ཀྱང་ཆོས་དཀོན་མཆོག་དངོས་མ་ཡིན།

༣ དགེ་འདུན་དཀོན་མཆོག་ནི། རིག་གྲོལ་གྱི་ཡོན་ཏན་བརྒྱད་པོ་གང་རུང་དང་ལྡན་པའི་འཕགས་པའི་གང་ཟག་སྟེ། མདོར་ན་འཕགས་པའི་གང་ཟག་ཉིད་དགེ་འདུན་དཀོན་མཆོག་ཡིན། དེ་ཡང་ལམ་ལ་སློབ་པའི་ཚེ་དང་པོར་ཚོགས་ལམ་དང༌། དེ་ནས་སྦྱོར་ལམ་གྱི་རྟོགས་པ་སྐྱེས་ཅིང༌། དེ་ནས་མཐོང་ལམ་གྱི་རྟོགས་པ་ནམ་སྐྱེ་བ་ན་སྟོང་ཉིད་མངོན་སུམ་དུ་རྟོགས་པ་དང་འཕགས་པའི་གང་ཟག་ཏུ་འགྱུར་པ་ཡིན།

སོ་སྐྱེ་སྟེ་འཕགས་པ་མིན་པའི་དགེ་སློང་གི་སྡོམ་ལྡན་བཞི་ཚང་བའིསྡེ་ལྟ་བུ་བརྡར་བཏགས་པའི་དགེ་འདུན་དཀོན་མཆོག་ཡིན་ཀྱང་དགེ་འདུན་དཀོན་མཆོག་དངོས་མ་ཡིན། འོན་ཀྱང་བརྡར་བཏགས་པའི་ཆོས་དང་དགེ་འདུན་ལ་ཆོས་དང་དགེ་འདུན་དཀོན་མཆོག་དངོས་ཀྱི་འདུ་ཤེས་དགོས་པ་བསླབ་བྱའི་ཐད་དུ་བཤད་ཟིན་པ་ལྟར་རོ།།

ར་ས་ཕོ་ཉས་༢༠༡༠།༡།༡༢ཉིན་བྲིས།

ཟླ་བའི་ལྷ་མོ་དང་ཨ་ཁུ་རི་བོང༌། ༡

༡༽

༄༅། །སྔོན་ཟླ་བའི་དཀྱིལ་འཁོར་གྱི་ནང་ཟླ་བའི་ལྷ་མོ་ཞེས་པ་སྐུ་གཟུགས་སྡེམ་སྡེམ་དཁྱུག་པ་བཞིན་རས་མཚར་དུ་ངར་བ། བལྟས་པ་ཙམ་གྱིས་སྐྱེ་བོ་ཀུན་གྱི་ཡིད་དབང་འགུག་ནུས་པ་ཞིག་ཡོད། ལྷ་མོ་ཁོང་ལ་གཅེས་པའི་བུ་ཕྲུག་ལྟ་བུ་བྱམས་སྐྱོང་དང་བརྩེ་དུང་བཅང་ས་ནི་རི་བོང་གཅིག་རང་ཡོད་པ་དེ་ཡིན། རྒྱུན་དུ་ཟླ་བའི་ལྷ་མོ་བཅམ་བཅམ་དང་སྦྲགས་ཟླ་བའི་སྐྱེས་ཚལ་དུ་ཕེབས་དུས་མི་ཡུལ་ལ་ཡང་ཡང་གཟིགས་ཀྱི་ཡོད། ཉིན་ཅིག་ཟླ་བའི་ལྷ་མོས་ཟླ་བའི་སྐྱེས་ཚལ་ནས་མི་ཡུལ་དུ་གཟིགས་པའི་སྐབས་པང་དུ་ཡོད་པའི་རི་བོང་གི་མིག་ནས་མིག་ཆུའི་ཐིགས་པ་རེ་གཉིས་བྱུང་སྟེ་ཟླ་བའི་ལྷ་མོའི་ཞབས་སོར་གྱི་སྟེང་དུ་བབ་པས། ཟླ་བའི་ལྷ་མོས་རི་བོང་དེ་བྲག་རྡོ་ཆུང་ཆུང་ཞིག་སྒང་བཞག་ནས།
ཚུར་ལ་གསོན་དང་ཁོག་པའི་སྙིང་འདྲ་བ།།
བློ་ལྡན་རི་བོང་གཞོན་ནུ་ཅི་བྱས་སམ།།
དམར་ཆུང་མིག་ནས་མཆི་མ་གཏོང་བ་དེར།།
སེམས་ལ་སྡུག་བསྔལ་ཡོད་པར་ཐེ་མི་ཚོམ།།ཞེས་གླུར་བླངས་པས།
རི་བོང་གིས།
བདག་ལ་བྱམས་སྐྱོང་གནང་བའི་ལྷ་མོ་ལགས།།
ཁྱོད་སར་ཡུན་གཅིག་བསྡད་པས་སྡུག་ཀུན་ཞི།།
འོན་ཀྱང་འཛམ་བུ་གླིང་གི་ས་དེ་ན།།
ཉམ་ཐག་ལྟོགས་གྲིས་ཤི་བར་ང་མ་བཟོད། །ཞེས་ལན་འདེབས་པར། ཟླ་བའི་ལྷ་མོ་ཡིད་མ་ཆེས་པར།
རྣ་བ་ལེགས་པར་གཏོད་དང་གཅེས་ཕྲུག་ལགས།།
མ་གི་འཛམ་བུ་གླིང་ན་འབྲུ་ཡིས་ཁེངས།།
ཤ་མར་ཐུད་སོགས་སྤྱད་ནས་མི་རྣམས་རྒྱག།
ད་དུང་སྣ་ཡི་བུག་ཁ་དག་ཏུ་ཡང༌།།
དུ་ཐལ་འཐེན་བཞིན་འདུག་པ་མ་མཐོང་ངམ།།ཞེས་གསུངས་ནས་མགོ་ལ་བྱུར་བྱུར་བྱས། རི་བོང་གིས་ཐལ་མོ་སྦྱར་ནས།
ཀུན་གཟིགས་ལྷ་མོ་ཁྱེད་ཀྱི་གསུངས་བདེན་ཀྱང༌།།
རྩེ་ཤིང་ལོ་འདབ་སྒྲིབ་པའི་ནགས་ཚལ་དུ།།
ཉམ་ཆུང་ཝ་དང་ཁྱི་སྤྱང་བྱི་ལ་སོགས།།
ལྟོགས་པའི་སྡུག་བསྔལ་དམྱལ་བའི་མཐིལ་ལ་འགྲན།།བརྗོད་ནས་ངུས་པས། ལྷ་མོས་ཀྱང་རི་བོང་གི་སེམས་པ་ལ་ཤ་ཚ་ཞིང༌། རི་བོང་གི་འདོད་དོན་རྟོགས་ཕྱིར།
རིང་ནས་འདྲིས་པའི་གཅེས་ཕྲུག་རི་བོང་ལགས།།
བདག་ལ་མ་གསང་དྲང་པོའི་གཏམ་གསུངས་ཤིག།
མ་གི་གླིང་ན་ལྟོགས་པས་མནར་བ་ལ།
ཁྱེད་ཀྱིས་ཐབས་གང་ཞིག་གིས་ཐར་བར་བསམ།།ཞེས་དྲིས་དུས། རི་བོང་གིས།
ཐུགས་འཚབ་མ་གནང་བདག་གི་ལྷ་མོ་ལགས།།
ཡིད་འོང་སེམས་ཅན་འདི་བདག་དོན་དུ་ནི།།
བདག་གི་ལུས་དང་སྲོག་ཀྱང་གཏོང་བ་ལ།།
སོམ་ཉི་མེད་པས་ད་ལྟ་ཉིད་དུ་འགྲོའོ།།ཞེས་ཟླ་བའི་དཀྱིལ་འཁོར་ནས་འཛམ་བུ་གླིང་དུ་འཆོང་གྲབས་བྱས་པས། ཟླ་བའི་ལྷ་མོས་མ་བཟོད་པར་རི་བོང་བཟུང་སྟེ།
ང་ཡི་གཅེས་ཕྲུག་ལོ་ལོ་ཚུར་ལ་གསོན།།
ང་གཉིས་བྲལ་ན་དེ་ཡི་སྡུག་བསྔལ་ནི།།
ལྟོགས་གྲིར་ཤི་བས་འཆར་ཡང་ག་ལ་ཕོད།།
དེ་ཕྱིར་འདི་ན་བཞུགས་ཤིག་ངའི་གཅེས་ཕྲུག།ཞེས་བརྗོད་པས་རི་བོང་ཡང་རེ་ཞིག་ཁ་སྐྱེངས།

༼མུ་འགོད།༽

དུག་སྦྲང་། Mosquito

དུག་སྦྲང་ནི་རྒྱུན་ལྡན་འཕུར་འགྲོ་བའི་འབུ་སྲིན་ཆུང་ཆུང་ཞིག་ཡིན། འཕུར་བའི་ཚེ་ཁྲུང་ཁྲུང་དང་ཆི་རོ་ནོ་མེ་ཌཡེ་པའི་སྦྲང་བུ་ལྟ་བུར་འགྲོ། དུག་སྦྲང་ནི་གནས་སྐབས་བཞི་བརྒྱུད་ནས་འགྲོ་བ་སྟེ། དང་པོ་སྒོ་ང་དང་། དེ་ཕྱེ་བ་ལས་ལར་བlarva། དེ་བསྒྱུར་ནས་པུ་པpupa། དེ་ནས་དར་མ་སྟེ་དུང་སྦྲང་ཆ་ཚང་བ་གྲུབ་པ་བཅས་ཡིན། དུག་སྦྲང་མོ་ཚོས་ཆུའི་ནང་དུག་སྦྲང་གི་སྒོ་ང་གཏོང་གི་ཡོད་ལ། དེ་ཡང་ཚྭ་ཆུའི་འདམ་སྙོག་དང་། མཚེའུ། འདམ་རྫིང་། རྩེ་ཤིང་སྟེང་གི་དཁྱིལ་ཆུ། གྱིག་གི་ཆུ་གཞོང་ནང་གི་ཆུ་སོགས་ཀྱི་ནང་ཡིན། དུག་སྦྲང་གི་གནས་སྐབས་དང་པོ་གསུམ་པོའི་རིང་ཞག་པོ་ལྔ་ནས་བཅུའི་བར་ཆུའི་ནང་འཚོ་བར་བྱེད་ཀྱི་ཡོད་ཅིང་། དེའི་ཚེའི་ནམ་རྒྱུན་ཡོང་གྲགས་ཀྱི་དུག་སྦྲང་གཤོག་པ་ཅན་དེའི་གཟུགས་སུ་གྲུབ་མེད། དུག་སྦྲང་མོའི་ནང་མང་མཐར་ཟླ་བ་གཅིག་ཙམ་འཚོ་ཐུབ་པ་ཡོད་ཀྱང་། རང་བཞིན་ལྟར་མང་ཆེ་བ་བདུན་ཕྲག་རེ་གཉིས་ལས་བསྡད་ཐུབ་ཀྱི་མེད། དུག་སྦྲང་ལ་མཆུ་ཏོ་རིང་པོ་སྤུ་འདྲ་པོ་ཞིག་ཡོད་པ་དེས་སེམས་ཅན་དང་རྩེ་ཤིང་གི་ཤུན་པའམ་ལྤགས་པར་ཕུག་ཐུབ་ཀྱི་ཡོད། དུག་སྦྲང་ནི་སྤྱིར་ཁུ་བྱུག་༼མེ་ཏོག་སོགས་ཀྱི་བཅུད༽necterདང་རྩེ་ཤིང་གི་ཁུ་བ་འཐུང་མཁན་ཞིག་ཡིན་ནའང་། དམིགས་བསལ་དུག་སྦྲང་མོ་ཚོས་རང་གི་སྒོ་ང་གཏོང་རྒྱུའི་ཆེད་དུ་སེམས་ཅན་གྱི་ཁྲག་འཐུང་དགོས་ཀྱི་ཡོད།
དུག་སྦྲང་ནི་ཝིཀ་ཊར་vectorཏེ་ནད་འབུ་སོགས་ཕར་ཚུར་ཁྱེར་འགྲོ་མཁན་ཡིན་པས། དུག་སྦྲང་གིས་སོ་རྒྱབ་པ་ལས་མ་ལ་རིཡ་malariaསོགས་ཀྱི་ན་ཚ་བགོས་ཉེན་ཡོད་པ་ཡིན། འོན་ཀྱང་དེང་སང་ཉེན་ཆེ་བའི་ནད་རིགས་རེག་དུག་གམ་ཨེཌ་ཛེ་HIVཞེས་པ་དེ་དུག་སྦྲང་བརྒྱུད་བགོས་མི་ཐུབ་པ་ཡིན་འདུག།

༢༠༡༠།༡།༡༠ཉིན་བྲིས་ཤིང་སྤེལ།

གྲོགས་པོ་ཞིག་ལ་སྤྲིངས་པ། ཀ་བཤད།

ཀ་ཡེ་གསོན་དང་གྲོགས་པོ་གྷ་ཇེ་ནི།
ཁ་ཞེ་གཉིས་མེད་གྲོགས་པོ་ཡིན་ན་ནི།
ག་ཡང་ཡི་གེ་གཅིག་ཀྱང་གཏོང་ངེས་ནའང་།
ང་ལ་ད་རུང་མི་སླེབས་སེམས་པ་སྐྱོ།

ཅ་ཅོ་དབྱིན་སྐད་འདྲེ་མོ་དེའི་ཆེད།
ཆ་འཇོག་གྲོགས་པོ་ཚང་མ་བློས་བཏང་ན།
ཇ་ཆང་ཁམ་བུ་གང་གི་ཆེད་དུ་ནི།
ཉ་ཤ་ལུག་ཤ་བཏང་དང་ཁྱད་པར་ཅི།

ཏ་ལའི་བླ་མའི་བཀའ་ཡིས་མ་བསྐུལ་ཞིང་།
ཐ་མལ་དབུལ་པོ་དག་གིས་མ་གསོལ་བར།
ད་ལྟ་དབྱིན་ཇིའི་ཡུལ་དུ་འཁྱམས་པ་འདི།
ན་གཞོན་གཤོག་རྩལ་ངོམ་པའི་ཚུལ་རེད་དམ།

པ་ལགས་དམ་པའི་རེ་བཞག་མ་ཤོར་བར།
ཕ་རོལ་མགོ་སེར་ཚོ་དང་ཐག་རིང་བྱོས།
བ་ལྒང་བཞིན་དུ་དབྱིན་སྐད་རྒྱབ་དྲག་ན།
མ་གིའི་རྫབ་དོང་ནང་དུ་ཟགས་ཡོང་ང་།

ཙ་རྟགས་ཙམ་གྱི་གྲོགས་པོའི་ལ་རྒྱ་ཞིག
ཚྭ་འབུམ་བཞིན་དུ་ཁྱེད་ལ་ཨེ་ཡོད་བསམ།
ཛ་དྲག་གཤེན་རྗེའི་འཕྲང་སྒོར་སླེབས་མེད་ན།
ཝ་ལེར་ངེད་ལ་བརྡ་ཞིག་བྱེད་དགོས་ངེས།

ཞྭ་མོ་ལྷགས་པས་ཁུར་འདྲའི་གྲོགས་པོ་ཁྱེད།
ཟ་འོག་ལོན་ཌོན་གྲོང་དུ་སླེབས་པའི་ཚེ།
འ་ཅག་གྲོགས་པོ་ཚང་མ་བརྗེད་སོང་ན།
ཡ་ཡུག་བསྒྲིལ་ནས་ཚུར་ལ་ལོག་མ་ཡོང་།

ར་ཅོ་ཅན་གྱི་རྒྱབ་ནས་ཕུགས་པ་ལས།
ལ་ལུང་འདི་ན་ལན་གཅིག་ཚུར་འོང་ཚེ།
ཤ་ཕྱེད་རུས་ཕྱེད་བཟོས་པར་མ་གྱུར་ན།
ས་སྟེང་འདི་ན་ར་ས་ཕོ་ཉ་མེད།

ཧ་ཧ་ཞེད་སྣང་མ་བྱོས་གྲོགས་པོ་ལགས།
ཨ་ཙི་དུས་ཚོད་བྱུང་ན་ཁ་པར་ཐོངས།
ཧ་ཅང་རིན་གོང་ཆེན་པོ་ཡིན་འདུག་ན།
ཨ་དྲུང་ལག་ཏུ་ཨང་ཀི་སྐུར་ཤོག་དང་།

མཆན། བ་ལྒང་དང་ཚྭ་འབུམ་ཞེས་པ་མི་གཉིས་ཀྱི་མིང་ཡིན།

ས་གླང་མགོ་༢༥ཉིན་བྲིས་ཤིང་སྤེལ།

ལག་ཐོགས་ཁ་པར་གྱིས་དྲན་ཤེས་འཕེལ་རྒྱས་གཏོང་བ།

སྔོན་གྱི་མཚན་རིག་པ་ཚོས་ལག་ཐོགས་ཁ་པར་སོགས་འཕྲུལ་ཆས་ཀྱི་དངོས་པོ་ཆུང་ཆུང་དེ་ཚོ་བེད་སྤྱོད་ཆེ་ན་ཀླད་པའི་སྐྲེན་ནད་བཟོ་ཉེན་ཡོད་པ་གསར་རྙེད་བྱུང་བ་ལས་ལྡོག་ཏེ། དེང་སང་ཨ་མི་རི་ཀའི་མཚན་རིག་པ་ཚོས་ལག་ཐོགས་ཁ་པར་བརྒྱུད་སྐད་ཆ་ཤོད་པ་དེས་སྤྱིར་བཏང་དྲན་ཤེས་འཕེལ་རྒྱས་བྱེད་ཀྱི་ཡོད་པ་དང་ཨལ་ཛེ་མིར་alzheimerཞེས་པའི་ནད་རིགས་དེ་ཡང་འགོག་ཐུབ་ཀྱི་ཡོད་ཚུལ་བརྗོད་ཡོད་པ་རེད།

འདི་ཡང་འཕྲུལ་ཆས་ལས་འཐོན་པའི་ར་ཌིཡ་ཤེན་radiationཞེས་པའི་འོད་ཟེར་གྱིས་ཀླད་པ་ལ་ཕན་འབྲས་ཐོགས་པོ་ཡོད་པ་དང་། ཨལ་ཛེ་མིར་གྱི་ཞེས་པའི་ནད་ཀྱི་ནུས་པ་ཡང་ཕྱིར་ལྡོག་ཐུབ་ཀྱི་ཡོད་པའི་ཨ་མི་རི་ཀའི་གྲོས་འདོན་བྱས་པ་བཞིན། ཨ་མི་རི་ཀའི་ལྷོ་ཕོ་ལོ་རི་ཌའི་Floridaསློབ་གྲྭ་ཆེན་མོའི་ནང་ཙི་ཙི་ཞིག་ལ་ཉམས་ཞིབ་བྱས་པ་ལས་དེ་ལྟ་བུའི་ཤེས་བྱ་གསར་པ་དེ་ཤེས་ཡོད་རེད།

༢༠༡༠ཟླ་བ་༡་ཚེས་༨ཉིན།

སྐྱབས་འགྲོའི་རྣམ་གཞག

༡ སྐྱབས་འགྲོའི་ངོ་བོ་ནི། འཁོར་བ་སྡུག་བསྔལ་གྱི་རྒྱ་མཚོ་ཆེན་པོར་འཇིགས་ནས་དེ་ལས་སྐྱོབ་པའི་ནུས་པ་དཀོན་མཆོག་གསུམ་ལ་ཡོད་པར་ཡིད་ཆེས་ནས་བློས་ལིང་འགེལ་བྱས་པའོ།། དེ་ཡང་རྒྱུད་ལ་སྐྱབས་འགྲོ་རྣམ་དག་ཞིག་འོང་མིན་ནི་སྐྱབས་འགྲོའི་རྒྱུ་རྣམ་དག་ཡོད་མིན་ལ་རག་ལུས་པས་དེ་ལ།

༢ སྐྱབས་འགྲོའི་རྒྱུ་ནི། རང་སྤྱིར་འཁོར་བ་དང་བྱེ་བྲག་ངན་སོང་གི་སྡུག་བསྔལ་ལ་སྐྲག་པའི་འཇིགས་པ་དང༌། རང་གིས་བློས་འགེལ་ན་དེ་ལས་སྐྱོབ་པའི་ནུས་པ་དཀོན་མཆོག་གསུམ་ལ་ཡོད་པར་ཡིད་ཆེས་པའི་དད་པའོ། །ཐེག་ཆེན་ཐུན་མོང་མིན་པའི་སྐྱབས་འགྲོ་ལ་དེ་དག་གི་སྟེང་གཞན་སྡུག་བསྔལ་བ་ལ་སྙིང་བརྩེ་བའི་སྙིང་རྗེ་དང་གསུམ་རྒྱུར་དགོས་པའོ།།
གལ་ཏེ་འཇིགས་པ་དང་དད་པ་སྙིང་རྗེ་གསུམ་གྱིས་རྒྱུ་བྱས་པ་ལས་སྐྱབས་སུ་འགྲོ་ན། ཡུལ་གང་ལ་སྐྱབས་སུ་འགྲོ་བར་འོས་པ་དང་མི་འོས་པ་གང་ཡིན་ཞེ་ན།

༣ སྐྱབས་སུ་འོས་པའི་ཡུལ་ནི། སྐྱབས་འགྲོ་བདུན་ཅུ་པ་ལས།
སངས་རྒྱས་ཆོས་དང་དགེ་འདུན་ནི།།
ཐར་པ་འདོད་པ་རྣམས་ཀྱི་སྐྱབས།།

ཞེས་གསུངས་པ་ལྟར་སྒྲིབ་གཉིས་བག་ཆགས་དང་བཅས་པ་སྤངས་པའི་སངས་རྒྱས་དང༌། སྒྲིབ་པ་ཅི་རིགས་སྤངས་པའི་འཕགས་རྒྱུད་ཀྱི་བྲལ་བ་འགོག་བདེན་དང་དེའི་རྒྱུ་ལམ་བདེན་ཏེ་ཆོས་དང༌། དེ་གཉིས་གང་རུང་རྒྱུད་ལ་མངའ་བའི་འཕགས་པའི་གང་ཟག་གི་དགེ་འདུན་ཏེ་དཀོན་མཆོག་གསུམ་འབའ་ཞིག་གོ། །
གཞན་བརྒྱ་བྱིན་དང་ཚངས་པ་དབང་ཕྱུག་སོགས་དང༌། དེ་བཞིན་འཇིག་རྟེན་པའི་ཆོས་སྐྱོང་བ་རྒྱལ་བཙན་སོགས་སྐྱབས་སུ་འོས་པ་མིན།
དེང་སང་མི་སྐྱ་མང་པོས་གདན་ས་ཁག་གི་འདུ་ཁང་དུ་ཡོད་པའི་སངས་རྒྱས་དང་བྱང་སེམས་ཀྱི་སྐུ་འདྲ་དེ་ཚོར་ཆོས་མཇལ་ཞུ་བ་དང་གསོལ་བ་འདེབས་པར་མ་ཕྱིན་པར། ཉིན་ལྟར་མགོན་པོ་ཁང་དུ་འཇིག་རྟེན་པའི་སྲུང་མ་ཚོར་ཕྱག་འཚལ་ཞིང་མཇལ་དར་ཕུལ་ནས་སྐྱབས་གནས་འཇིག་རྟེན་པའི་རྒྱལ་བཙན་ཚོར་བཅོལ་བ་འདྲ་བྱས་པ་དེ་ལས་ཐབས་སྡུག་པ་མེད་དེ། རྒྱལ་བཙན་སོགས་ནི་རང་ཉིད་ཀྱང་ངན་སོང་གི་སྡུག་བསྔལ་སོགས་ལ་འཇིགས་པ་ཡིན་པས་སྐྱབས་སུ་མི་འོས་ཤིང༌། དེ་དག་ལ་མཁྱེན་བརྩེ་ནུས་གསུམ་གྱི་ཡོན་ཏན་མེད་དང༌། ཕལ་ཆེར་ཡི་དྭགས་དང་དུད་འགྲོའི་རིགས་སུ་གཏོགས་པ་ཡིན་པས་རང་རེ་མི་ལས་རྟེན་དམའ་བ་ཡིན་ལ། དེ་དག་ནི་ཁྲལ་གྱི་དོན་ཆུང་ངུ་ལའང་ཕན་ལས་གནོད་ཚབས་ཆེ་བས་མི་བསླུ་བ་མིན་ནོ།།
སངས་རྒྱས་ལྟ་བུ་ནི་རང་འཇིགས་པ་ཐ་དག་ལས་གྲོལ་བ་དང༌། གཞན་འཇིགས་པ་ལས་གྲོལ་མཁས་པ་དང༌། སེམས་ཅན་ཀུན་ལ་ཐུགས་རྗེ་ཆེན་པོ་ཉེ་རིང་མེད་པར་འཇུག་པ་དང༌། རང་ལ་ཕན་བཏགས་མ་བཏགས་ཐམས་ཅད་ཀྱི་དོན་མཛད་པ་སྟེ་རྒྱུ་མཚན་བཞིས་སྐྱབས་སུ་འོས་པ་ཡིན།
འོ་ན་སྐྱབས་སུ་འགྲོ་བའི་ཡུལ་འདི་ལྟ་བུ་ལ་རྒྱུ་དེ་ལྟ་བུ་ལས་སྐྱབས་སུ་འགྲོ་དགོས་ན། སྐྱབས་སུ་འགྲོ་བའི་ཚུལ་ཇི་ལྟ་བུ་སྙམ་ན།

༤ སྐྱབས་སུ་སོང་བའི་ཚུལ་ནི། ཡོན་ཏན་ཤེས་པའི་སྒོ་ནས་སྐྱབས་སུ་སོང་བ་དང༌། ཁྱད་པར་ཤེས་པའི་སྒོ་ནས་སྐྱབས་སུ་སོང་བ་དང༌། ཁས་བླངས་པའི་སྒོ་ནས་སྐྱབས་སུ་སོང་བ་དང༌། གཞན་དུ་མི་སྨྲ་བའི་སྒོ་ནས་སྐྱབས་སུ་སོང་བ་སྟེ་བཞི་ཡོད་པ་ལས། འདིར་དང་པོའི་ཚུལ་མདོ་ཙམ་བརྗོད་ན།
ཡོན་ཏན་ཤེས་པའིསྒོ་ནས་སྐྱབས་སུ་སོང་བ་ནི། དེ་ཡང་།

སངས་རྒྱས་ཀྱི་ཡོན་ཏན་ལ་མཚན་དཔེ་བཅུ་གཉིས་ཀྱིས་སྤྲས་པ་ལྟ་བུ་སྐུའི་ཡོན་ཏན་དང༌། གསུང་དབྱངས་ཡན་ལག་དྲུག་ཅུ་དང༌། ཁམས་གསུམ་གྱིས་སེམས་ཅན་ཐམས་ཅད་ཀྱིས་དུས་གཅིག་ཏུ་དྲི་བ་དུ་ཞུས་ཀྱང་གསུང་གཅིག་གིས་སེམས་ཅན་སོ་སོའི་དྲི་བའི་ལན་བཀྱོན་པ་ལྟ་བུ་གསུང་གི་ཡོན་ཏན་དང༌། ཐུགས་ཤེས་བྱ་ཐམས་ཅད་ལ་ཆགས་ཐོགས་མི་མངའ་བར་ལག་མཐིལ་དུ་སྐྱུ་རུ་ར་བཞག་པ་ལྟར་གཟིགས་པ་དང་འགྲོ་བ་རྣམས་ལས་ཉོན་གྱིས་བཅིངས་པ་བཞིན་དུ་སངས་རྒྱས་ཀྱི་ཐུགས་སྙིང་རྗེ་ཆེན་པོས་བཅིངས་པ་ལྟ་བུ་ཐུགས་ཀྱི་ཡོན་ཏན་དང༌། སངས་རྒྱས་ཀྱི་སྐུ་གསུང་ཐུགས་ཀྱི་འཕྲིན་ལས་ནི་ཆུ་རྩའི་ཟིལ་པ་ནང་ཚུན་གྱི་ཟླ་བའི་གཟུགས་བརྙན་ལྟར་འབད་པ་མེད་པར་ལྷུན་གྱིས་གྲུབ་པ་དང༌། རྒྱུན་ཆད་པའམ་འཛད་པ་མེད་པར་གནས་པ་ནི་འཕྲིན་ལས་ཀྱི་ཡོན་ཏན་དང༌།
ཆོས་ཀྱི་ཡོན་ཏན་གོང་སྨོས་ཀྱི་ཡོན་ཏན་དང་ལྡན་པའི་སངས་རྒྱས་དེ་ཆོས་སྐྱོན་སྤངས་པ་འགོག་བདེན་དང་ཡོན་ཏན་སྒྲུབ་པ་ལམ་བདེན་མངོན་དུ་བྱས་པ་ལས་བྱུང་བ་དང༌།
དགེ་འདུན་གྱི་ཡོན་ཏན་གོང་སྨོས་ཀྱི་ཆོས་དེ་ཉིད་ཚུལ་བཞིན་དུ་བསྒྲུབ་པ་དང༌། ངག་གིས་ཆོས་སྨྲ་བ་དང༌། ལུས་ཀྱིས་ཆོས་སྤྱོད་པ་དང༌། ཡིད་ཀྱིས་ཆོས་ཀྱི་དོན་སེམས་པ་སོགས་དང༌། ཡང་བྱང་ཆུབ་ཀྱི་ཆོས་མཐུན་ཐོབ་པ་དང་བདེན་པ་མཐོང་བ་དང་ངན་འགྲོར་སྐྱེ་བའི་ས་བོན་ཟད་པ་སོགས་ཡོན་ཏན་མཐའ་ཡས་པ་ཡོད་པ་དག་དྲན་པར་བྱས་ནས་སྐྱབས་སུ་འགྲོ་བའོ།།
དེ་ལྟ་བུའི་སྐྱབས་འགྲོ་བྱེད་པ་ལ་དགོས་པ་ཨེ་ཡོད་སྙམ་དུ་དོགས་ན། དེ་ལྟར་སྐྱབས་འགྲོ་བྱས་པས་སྐྱབས་འགྲོའི་ཕན་ཡོན་ཐོབ་པའི་དགོས་པ་དང་ལྡན་ཏེ།

༥ སྐྱབས་འགྲོའི་ཕན་ཡོན་ནི། ནང་པ་སངས་རྒྱས་པའི་གྲལ་དུ་ཚུད་པ་དང༌། སྡོམ་པ་ཐམས་ཅད་ཀྱི་རྟེན་དུ་འགྱུར་བ་དང༌། ལས་ཀྱི་སྒྲིབ་པ་སྲབ་པར་འགྱུར་བ་དང༌། ཚོགས་རྒྱ་ཆེན་པོ་བསོག་པ་དང༌། བར་ཆད་ཀྱིས་མི་ཚུགས་པ་དང༌། བསམ་པའི་དོན་གྲུབ་པ་དང༌། གནས་སྐབས་ངན་འགྲོར་མི་ལྟུང་ཞིང་མཐར་སངས་རྒྱས་ཐོབ་པ་རྣམས་ཡིན་ཏེ། སྐྱབས་འགྲོ་བདུན་ཅུ་པ་ལས།
དགེ་བསྙེན་གསུམ་ལ་སྐྱབས་འགྲོ་བ།།
དེ་ནི་སྡོམ་བརྒྱད་རྩ་བ་ཡིན།།ཞེས་དང༌།
གང་དག་སངས་རྒྱས་སྐྱབས་སོང་བ།།
དེ་དག་ངན་འགྲོར་འགྲོ་མི་འགྱུར།།ཞེས་དང༌།
ཕར་ཕྱིན་བསྡུས་པ་ལས་ཀྱང༌།
སྐྱབས་སོང་བསོད་ནམས་གཟུགས་ཡིན་ན།།
སྟོང་གསུམ་དེ་ཡང་སྣོད་དུ་ཆུང༌།།ཞེས་སོགས་གསུངས་པས་སོ།།

ར་ས་ཕོ་ཉས་༢༠༡༠ཟླ་བ་༡་ཚེས་༧་ཉིན་བྲིས།

དེ་རིང་གི་ཟིན་ཐོ།

གཉིད་ཀྱི་བུ་མོས་མགོ་བོར་བུམ་པ་རེ་བཞག་ནས།།

སྐྱ་རེངས་བུ་ཆུང་སྐད་ཅིག་བཙའ་འདོད་ཞིག་བྱས་ཀྱང་།།

རྐང་དྲུག་བུང་བ་གཞོན་ནུ་བློ་གསར་ཚོའི་དབྱངས་ཀྱིས།།

ཕྱག་དཔེ་སྐྱོར་སྦྱངས་གནངས་པས་རྨོངས་གཉིད་ལས་སད་སོང་།།

ནར་ནར་དཔེ་ཆ་བལྟ་བའི་འདུན་པ་དག་ཡོད་ཀྱང་།།

ཟང་ཟིང་ལེ་ལོའི་གྲོགས་པོས་ཨུ་ཚུགས་ཀྱིས་བསྐུལ་ཏེ།།

ཞིམ་ཞིམ་ཐུག་པ་འཐུང་སར་ཟ་ཁང་དུ་ཁྲིད་ནས།།

དཀོན་དཀོན་དེ་རིང་ཉིན་མོའི་མཇུག་རྩེ་དེར་བསྐྱལ་བྱུང་།།

སྐྱ་ལེབ་རྩངས་པ་སྒལ་ལེབ་ཁྲེལ་བགད་འགའ་བྱེད་བཞིན།།

སྐྱག་ནག་རྩེ་མོ་དཀར་པོ་ཆུ་ཚོད་སྟེང་བཏང་པས།།

དེ་རིང་ཉིན་མ་གང་པོ་མུན་ནག་ཏུ་འདས་ཀྱང་།།

ཐ་མར་དཀར་ཆོས་ཏོག་ཙམ་བསྒྲུབ་རྒྱུ་ཞིག་གོ་ནས།།

ཕག་ཚང་འདྲ་བའི་ཤག་དེར་བསྡད་ས་ཞིག་བཟོས་ནས།།

སྲས་མོ་འདྲ་བའི་ཉ་ཚོར་ཁ་ལག་ཞིག་སྤྲད་ནས།།

སྣབས་ཕྱིས་འདྲ་བའི་ཉིན་ཐོར་ཟིན་བྲིས་འདི་རྒྱབ་ནས།།

སངས་རྒྱས་འདྲ་བའི་ཕྱག་དཔེར་ཞལ་མཇལ་ཞིག་ཞུ་དགོས།།

བི་རི་དང་མོན་གྷོ་གཞིས་ཆགས་གྲོགས་གྲབས་ཡོད་པ།

༈ ད་ནངས་དང་ཁ་སེང་སྔ་དྲོ་ཆུ་ཚོད་༡༠ནས་ཉིན་རྒྱབ་བར་ངོས་རང་མོན་གྷོ་གཞིས་གྲོང་གསུམ་པར་བསྡད་པ་ཡིན། མོན་གྷོ་གཞིས་གྲོང་གསུམ་པ་ནི་མོན་གྷོ་གཞིས་ཆགས་ཀྱི་ལྟེ་བ་ལྟ་བུ་ཡིན་ཏེ། དེར་འབྲས་སྤུངས་ས་སྐྱ་གཞིས་གྲོང་༦། ༧། ༨། བཅས་ནས་མར་ཕེབས་མཁན་དང་། བཙུན་དགོན་གཞིས་གྲོང་༥། ༤། ༩བཅས་ནས་ཚུར་ཕེབས་མཁན་དང། ཡང་དགའ་ལྡན་སྙིང་མ་གཞིས་གྲོང་༡། བཅས་ནས་ཡར་ཕེབས་མཁན་སོགས་མདོར་ན་མོན་གྷོ་ས་གནས་ཀྱི་བོད་མི་ཚང་མ་རང་ཤུགས་བསྡུ་འཛོམས་བྱ་ས་དེ་ཡིན། དེང་སང་གནམ་གཤིས་ཧ་ཅང་ཚ་གྲང་སྙོམས་པས་གཞིས་གྲོང་གསུམ་པའི་ཇ་ཁང་དེ་ཚོའི་སྒོ་འགྲམ་ཀྱི་རྐུབ་སྟེགས་སྟེང་ཇ་ཕོར་པ་གང་འཐུང་ཞོར་སུམ་མདོ་ཁའི་འགྲོན་པོ་ཚོར་བལྟས་བསྡད་ན་བག་ཕེབས་པ་ཞིག་འདུག ཡིན་ནའང་མཁྲིས་སུ་ཡོད་པའི་སྤོ་བོ་དེའི་དུ་བ་ངེད་ཀྱི་ངོ་གདོང་ལ་ཕོགས་དུས་དབང་མེད་དུ་གློ་རྒྱག་བྱུང་བ་དང་བསྡད་མ་འདོད་པའི་སྣང་བ་ཞིག་སྟེར། སྤྱིར་མོན་གྷོ་གཞིས་ཆགས་དེ་ཉམ་ཆུང་དང་ཡ་རབས་ལྡན་པ་ཞིག་ཡོད་ནའང་། ཁོར་ཡུག་གི་རྐྱེན་པས་བོད་མི་མང་པོ་ཞིག་གིས་རང་དང་སྤྱི་ཚོགས་ཀྱི་བདེ་འཇགས་ལ་མ་བསམ་པར་སྤྱོད་པ་འཆལ་ཏེ། རྫས་ངན་ནམ་དུག་རྫས་ལས་གྲུབ་པའི་སྐྱག་པ་སེ་ཊར་starམ་དྷུ་maduཁན་ནེ་khanne པན་pan༼ངས་དེ་དག་ལ་སྐྱག་པ་ལབ་ཀྱི་ཡོད།༽སོགས་འཛེམ་དོགས་མེད་པར་སྤྱོད་ཀྱི་ཡོད་པ་ནི་ངས་བཤད་ག་ལ་དགོས། ཡིན་ནའང་དེང་སང་དེའི་སྟེང་བོད་མི་ཚོས་ཐ་མག་ལ་དབྱིངས་བཞུགས་ཡོང་གི་འདུག་པ། ལོ་ཤས་སྔོན་ནས་མོན་གྷོ་གཞིས་ཆགས་ཀྱི་རླང་འཁོར་གཏོང་མཁན་ཁ་ཤས་ཀྱིས་ཐ་མག་རེ་འཐེན་བཞིན་འགྲུལ་མི་འགུག་བསྡད་ཀྱི་ཡོད་པ་ནས། ད་ཆ་མི་རྒན་སྤོ་བོ་དེ་ཚོའང་བི་རི་༓འདྲ་ཞིག་འཐུང་ག་བྱེད་ཀྱི་འདུག དེ་ཡང་མི་གཅིག་གིས་འཐུང་ནའང་དེ་འདྲ་རེད་མོད། དེ་འདྲ་མིན་པར་འཐུང་མཁན་མང་པོ་འདུག་སྟེ་དེ་རིང་ངའི་མིག་གི་མཐོང་སར་སྤོ་བོ་གཉིས་གསུམ་རུབ་ནས་བི་རི་ཁ་ཤས་འཐུང་སོང་ལ། ཁ་སང་ཡང་ཚོང་པ་ཁ་ཤས་ཀྱིས་འཐུང་ཁ་བྱེད་ཀྱི་འདུག དར་མ་ཚོའི་སྟོད་ཐུང་གི་པ་ཀི་ནང་བལྟས་ནའང་བི་རི་ཡི་ཆག་པ་མཐོང་ཡོང་གི་འདུག ངས་གཞིས་ཆགས་དེའི་མི་ཚོའི་བྱེད་སྟངས་དང་སྤྱོད་པ་ཁ་ཤས་ཁྱད་མཚར་གནང་གི་འདུག དཔེར་ན། དེང་སང་འཕྲོད་བསྟེན་དང་ཁོར་ཡུག་སྲུབ་སྐྱོབ་ཀྱི་ལས་འགུལ་ཡིན་ཟེར་ནས་ཚོང་ཁང་ཟ་ཁང་སོགས་སུ་འགྱིག་ཤོག་མཐོང་རྒྱུ་མེད་པ་བཟོས་ཡོད་པ་མ་གཞི་བྱ་བ་བཟང་པོ་ཞིག་ཡིན་མོད་ཀྱང་། མིའི་ཀུན་སྤྱོད་སྲུང་སྐྱོབ་ཐད་སློབ་གསོ་དང་སྒྲིག་ཁྲིམས་བཟོ་མཁན་ཕལ་ཆེར་མི་འདུག་པས། འགྱིག་ཤོག་བཙང་མ་བཟོས་པའི་དམིགས་ཡུལ་ནི་མིག་ངོར་མཛེས་སོ་བྱས་པ་ལས་དོན་དངོས་ཁོར་ཡུག་སྲུང་སྐྱོབ་ཏུ་རེ་བ་ཨེ་ཡིན་སྙམ། སྤྱིར་བཏང་འགྱིག་ཤོག་གང་བྱུང་གཡུགས་པས་བ་ཕྱུགས་ཤི་བ་དང་ཞིང་ཁ་བཙོག་པ་ཆགས་སོགས་ཡོང་གི་ཡོད་ནའང་། དུག་རྫས་དང་ཐ་མག་ལ་དོ་དམ་མ་བྱས་ན་མི་ཤི་བ་དང་གཞིས་ཆགས་བཙོག་པ་ཆགས་ཡོང་གི་འདུག་གོ།

གསེར་མིག་ཅན།

མཛའ་བརྩེའི་རྒྱན་གྱིས་ཕན་ཚུན་ཉམས་དགའ་བ།
མི་མཐུན་ལས་དང་མ་འབྲེལ་རྟག་ཏུ་རྩེན།
ཁ་ཟས་ཐན་ཐུན་རེ་ཡི་ཆེད་དུ་ཡང།
ལེགས་གཟོའི་ཚུལ་དུ་ཆུའི་ཁར་ཡང་ཡང་ཕྱོགས།

གསེར་ལྗང་བཙོ་མར་དོ་བའི་བཀྲག་མདངས་ཅན།
ལྡེམ་ལྡེམ་ལུས་ཀྱིས་ལྷ་མོའི་ཁེངས་པ་བསྙིལ།
རྩུབ་བྲལ་བཟང་པོའི་གཤིས་ཀྱིས་མཛེས་པ་དེ།
པད་མའི་བཞིན་ལ་མིག་གིས་སྤྲས་པ་བཞིན།

འབུར་འབུར་ཝུ་བ་གཏོར་བའི་ཤེལ་སྒྲོམ་ནང་།
དཁྱུག་དཁྱུག་མཇུག་མ་གསུམ་ལྡན་གསེར་མིག་ཅན།
བསིལ་བསིལ་དྭངས་གཙང་ཆུ་ནང་དལ་མེད་དུ།
འཁོར་འཁོར་སེམས་ཀྱི་མཐིལ་དུ་ཟུག་རྔུ་བྱིན།

མཐའ་ཡས་འཛམ་གླིང་ས་ཡི་གླིང་ཆེན་པོར།
ཉུལ་བའི་གོ་སྐལ་ཚེ་འདིར་ཁྱེད་བསྐལ་ཡང་།
རྣམ་རྟོག་རི་དྭགས་སྟོང་གིས་རབ་བསྡུར་བའི།
མྱང་ངམ་སེམས་ཀྱི་ཐང་ན་གང་དགར་རྒྱུ།

ཨ་མ་དྲན་མ།

ཚེ་སྔོན་ལས་དང་སྨོན་ལམ།
ངན་པའི་འབྲས་བུ་སྨིན་པས།
ངེད་ཅག་མ་བུ་གཉིས་པོ།
མ་ཤི་གསོན་བྲལ་བྱུང་སོང་།

བརྩེ་བའི་ཨ་མའི་བཞིན་རས།
དབང་ཕྱོགས་རི་བོའི་རྩེ་མོར།
ག་དུས་མཇལ་ཡོང་སྙམ་ནས།
བུ་ང་འགུག་ནས་བསྡད་ཡོད།

ལྕང་སྡོང་ལྒང་ལ་བྱིའུ་ཚོའི།
མ་བུ་མཉམ་འཛོམས་མཐོང་དུས།
ང་ཡི་ཨ་མའི་བཞིན་རས།
རང་དབང་མེད་པར་དྲན་གིས།

མིག་ནས་མིག་ཆུ་མང་པོ།
གཏོང་དགོས་བསམས་པ་མེད་ཀྱང་།
ཨ་མའི་འཛུམ་མདངས་འཆར་དུས།
འཛད་རྒྱུ་མེད་པ་ཤོར་སོང་།

སྐྱབས་ཅིག་ཡིད་བཞིན་ནོར་བུའི།
ཐུགས་རྗེ་ཉག་གཅིག་བརྟེན་ནས།
དྲིན་ཆེན་ཨ་མའི་བཞིན་རས།
འཇལ་བའི་སྨོན་ལམ་འདེབས་ཡོད།
༢༠༠༣་ལོར།

དབྱངས་ཅན་ལྷ་མོ། ༼སྙན་ངག་དཔེ་གསར།༽

མཁའ་དབྱིངས་སུ་ཟླ་བ།
མཚོ་ནང་དུ་པད་མ།
གདོང་དཀྱིལ་དུ་འདྲེན་བྱེད།
ཡིན་ནའང་། ལྷ་མི་ཐ་དག་གི་དབུས་ན་ཁྱོད་ཉིད་དེ།
དབྱངས་ཅན་ལྷ་མོ། ཤིན་ཏུ་མཛེས།
ངས་བར་མཚམས་མེད་པར་། ཡིད་ཤེས་ཀྱིས་གཡོ་བ་མེད་པར། མིག་ཟུང་ལ་ཕྱེ་འཛུམ་མེད་པར།
རྩེ་གཅིག་ཏུ། དབང་མེད་དུ། ཁྱོད་ལ་བལྟས།

ནགས་ཚལ་དུ་ཁུ་བྱུག་སྔོན་མོ།
ལྷ་གནས་སུ་དྲི་ཟའི་རྒྱལ་པོ།
ས་འདི་ན་ལཱ་ཏ་མང་གྷེ་ཤ
ཡིན་ནའང་། ས་གསུམ་གྱི་སྟེང་འོག་གང་དུའང་ཁྱོད་ཉིད་དེ།
དབྱངས་ཅན་ལྷ་མོ། ཤིན་ཏུ་སྙན།
ངས་ཉེ་རིང་མེད་པར། ཡིད་ཤེས་ཀྱིས་གཡེང་བ་མེད་པར། རྣ་བ་འགུལ་སྐྱོད་མེད་པར།
རྩེ་གཅིག་ཏུ། དབང་མེད་དུ། ཁྱོད་ལ་ཉན།

རྩེ་གཅིག་དབང་མེད་མིག་གིས་ཁྱོད་ལ་བལྟ།
རྩེ་གཅིག་དབང་མེད་རྣ་བས་ཁྱོད་ལ་ཉན།
རབ་མཛེས་དབྱངས་ཅན་ལྷ་མོའི་བཞིན་དཀྱིལ་དང་།
རབ་སྙན་དབྱངས་ཅན་ལྷ་མོའི་གླུ་དབྱངས་ལ།
དོན་ངོ་མ།
ཨ་ཕོ་ང་།
དགའ་ལེ་རེད།
ངུ་ལེ་རེད།
མོས་ལེ་རེད།
བསམ་པ་ཤོར་ནས།
གླུ་ལེན་ནི་རེད་ཀོ

"སི་པན་ཁ་ཚ་པོ་"

ད་གན་ང་རང་ཁ་ལག་ཟ་དུས་སི་པན་རིལ་རིལ་གཅིག་ཟས་པས་ཁ་ཞེ་དྲག་འཚིག་སོང་བས་ཆུ་ཡང་འགྱིག་དམ་གང་ཙམ་འཐུངས་པ་ཡིན། ཧུད། ད་རུང་ཡང་ཁ་འཚིག་གི་འདུག་མོད། ད་གིན་ང་རང་སི་པན་གྱིས་ཁ་འཚིག་ནས་ཆུ་འཐུང་བའི་སྐབས་སུ་དོགས་པ་ཞིག་ཟ་སོང་བ་འདིར་འགོད་པ་ལ།

སི་པན་གྱི་ཚ་བ་དེ་དོན་ལྔའི་ནང་ནས་རོ་རེད་དམ་རེག་བྱ་རེད།

༡་རོ་ཡིན་ན། ལུས་སྟེང་གི་རྨ་ཁ་སོགས་ལ་སི་པན་འབྱུག་དུས་ཚ་དགོས་དོན་ཅི་ཡིན། དཔེར་ན། ང་ཚོའི་རྨའི་སྟེང་སྐྱུར་འབྱུགས་ན་སྐྱུར་པོ་ཚོར་གྱི་མི་འདུག་ག ཡང་ལྕེ་ལབ་ལ་རེག་པས་ཚོར་བ་ཙམ་རྒྱུ་མཚན་གྱིས་རོ་ཡིན་ན་ལྕགས་དམར་པོ་དེ་ཚོའི་ཚ་བ་ཡང་རོ་རེད་དམ། ཡང་རོ་ཡིན་ན་སི་པན་གྱིས་ཁ་ཚ་དུས་ཆུ་སོགས་གྲང་མོ་མ་གཏོགས་ཆུ་ཚ་པོ་བཏུང་ན་མི་ཕན་པར་གནོད་དོན་ཅི་ཡིན། ཡང་རོ་ཡིན་ན་ཁ་སྐད་དུ་ཡང་"སི་པན་ཁ་ཚ་བོ་"བརྗོད་པ་མ་གཏོགས་ལྕེ་ཚ་པོ་མི་ལབ་དོན་གང་ཡིན།

༢ རེག་བྱ་ཡིན་ན། མངོན་པའི་གཞུང་ལས་རོ་ལ་དྲུག་ཏུ་ཕྱེ་ཞིང་དེའི་ནང་ཚ་བ་དང་ལན་ཚྭ་བ་གཉིས་གསུངས་པ་སོ་སོའི་ངོས་འཛིན་གང་ཡིན། ཡང་རེག་བྱ་ཡིན་ན་རྨ་ཁ་མེད་པའི་ལུས་ཀྱི་ཆ་ཤས་ལག་པ་ལྟ་བུའི་ལུས་ཤེས་ཀྱིས་མི་མྱོང་བའི་རྒྱུ་མཚན་གང་། ཡང་རེག་བྱ་ཡིན་ན་མེའི་རེག་བྱ་ཡིན་དགོས་པས་སི་པན་མང་པོས་གང་ཞིག་བསྲེགས་པར་བྱེད་ནུས་སམ།

༣ གཉིས་ཀ་ཡིན་ན། གྲང་མོ་ཡང་རོ་དང་རེག་བྱ་གཉིས་ཀ་རེད་དམ།

ཕྱི་ལོ་2010ལགས། རེ་བ་བཅངས་ཡོད།

ད་རིང་ནི་ཉིས་སྟོང་དགུ་ལོའི་ཆེས་ཐ་མཇུག་གི་ཉིན་ཞག་ཡིན་ལ། མི་མང་པོ་ཞིག་གིས་་ཉིས་སྟོང་བཅུའི་ལོ་ལ་དགའ་བསུ་ཞུས་པའམ་ཉིས་སྟོང་དགུ་ལས་མཐར་བའི་དགའ་སྐྱིད་གཏོང་བ་གང་ཡིན་ཆ་མ་འཚལ་བའི་སྤྲོ་སྐྱིད་ཀྱི་བྱེད་སྒོ་གོ་བསྒྲིགས་བྱས་ཡོད་མོད། ངོས་རང་ལ་ཆ་བཞག་ན་དེ་རིང་ནི་དགའ་འོས་པ་དང་བཀྲ་ཤིས་པའི་ཉིན་མོ་ཞིག་ཏུ་གཏན་ནས་མ་སྣང་། ངས་ཉིས་སྟོང་དགུའི་ལོ་འདིར་ཕྱི་མིག་ཞིག་བལྟ་སྐབས་ཆོས་དང་འཇིག་རྟེན་གང་ཡང་མིན་པའི་འཚོ་བའི་ནང་ཟང་ཟིང་གི་འདུ་དགོད་ཁྲོད་ཧ་ཅང་ཐང་ཡང་ཆད་པ་བྱུང་སོང་ལ། སྐབས་རེ་སོ་སོས་ཀྱང་ཉི་མ་ལ་རྩེར་འབུད་མ་ཐུབ་པར་འཁྱམས་གཉིད་ཀྱི་སྤྱོད་པ་ལ་འགྲོ་དགོས་པ་ཡང་བྱུང་སོང་།

འོན་ཀྱང་དེའི་རིང་རང་ཉིད་ལ་བདེ་སྡུག་གི་ཚོར་བ་ཇི་འདྲ་ཞིག་བསྐྱེད་ཀྱང་དྭངས་གཙང་ལྷད་མེད་ཞིག་མིན་པར་དངངས་སྐྲག་དང་རེ་འདུན་གྱི་ལྕིད་ཀྱིས་གནོན་པ། རང་ཉིད་ཀྱི་ལུས་རྟེན་འདིར་སྤུན་ཟླ་དང་བྲལ་འདུང་གིས་མནར་བའི་སྡུག་བསྔལ་དང་། ཅེ་སྤྱང་གི་འབར་མོའི་འོག་དངོས་ཤུགས་བརྒྱུད་པས་འཇིགས་སྣང་གི་དངངས་སྐྲག་དང་། ལོ་ཟླས་འགྱུར་འགྲོས་མགྱོགས་པས་ཕྱི་དྲོ་རང་ཁྱིམ་གྱི་སྒོ་ཁར་སླེབས་ཐུབ་བམ་སྙམ་པའི་རེ་དོགས་ཀྱིས་ཁྲག་རྩ་ཡང་ཡང་འགགས་པས་འཇིག་རྟེན་འདི་ཕྱི་གང་ཞིག་བསམས་ཀྱང་སེམས་ཁོངས་ནས་དགའ་ཡོང་བ་ཞིག་ད་བར་མ་བྱུང་བ་ཡིན།

༢༠༡༠་ལགས།

ངས་ཁྱེད་ལ་རེ་བ་བཅངས་ཡོད།

ཡིན་ནའང་།

ངས་ཁྱེད་ལ་དགའ་བསུ་ཞུ་གི་མིན།

འོན་ཀྱང་།

ངས་ཁྱེད་ཀྱི་ལོ་མཇུག་ལ་སྙིང་ཁོངས་ནས་དགའ་བ་ཞིག་སྲིད་ན་སྙམ་བསྡད་ཡོད།

༢༠༡༠་ལགས།

ཤེས་བྱའི་ལང་ཚོ།

༼ད་རིང་ངས་ཁ་ཉིན་ཁས་ལེན་པ་བཞིན་དཔེ་ཚོང་ཁང་དེར་ཕྱིན་ཀྱང་། སྒོ་རྒྱབ་བཞག་ཡོད་པར་སོང་རེ་ཞིག་ཤག་ཏུ་ལོག་ཕྱིན་པ་ཡིན། དཔེ་དེབ་དེ་བལྟ་འདོད་ཀྱི་འདུན་པས་མ་བཟོད་པར་ཡང་དཔེ་མཛོད་ཁང་ལ་ཁ་པར་ཞིག་བཏང་། "རྒན་ལགས། དེ་རིང་དཔེ་མཛོད་གུང་སེང་རེད་པས།" "མ་རེད་མ་རེད།" "འོ་ན་དཔེ་ཚོང་ཁང་སྒོ་རྒྱབ་འདུག་ག" "མ་རེད་ད་ལྟ་རང་སྒོ་ཕྱེ་ཀ་ཕྱིན་སོང་"ཟེར། དེ་ནས་ངས་རང་གི་དགེ་ཕྲུག་ཞིག་བླུ་བར་བཏང་པ་ལས་ད་ཆ་ལག་ཏུ་ཐོབ་བྱུང་།༽

དཔེ་དེབ་འདི་ནི་མཁས་དབང་འབྲས་བློ་གླིང་ཕ་ར་དགེ་སློང་རྣམ་རྒྱལ་དབང་ཆེན་གྱིས་རྫོགས་པར་བརྩམས་ཏེ་ཕྱི་ལོ་༢༠༠༩ཟླ་བ་༡༡་ཚེས་༩་ཉིན་གླེང་བརྗོད་མཛད་འདུག་པ་དང་ད་ཆ་བློ་གླིང་དཔེ་མཛོད་ནས་དཔར་དུ་སྐྲུན་འདུག

དཔེ་དེབ་འདི་ནི་དེང་སང་བཙན་བྱོལ་ནང་འཐོན་པའི་དེབ་གསར་མཐའ་དག་ལས་ཕུལ་དུ་ཕྱིན་པ་ལྟ་བུ་ཞིག་འདུག་པ་འདི་ལྟར།

༡༽ནང་བརྗོད་བྱའི་ཐད་ནས་བཤད་ན།
ཚན་རིག་ཕྱོགས་ནས་རྡུལ་ཕྲན་སྐོར་དང་། འོད་མདངས་ཀྱི་སྐོར་དང་། གློག་གི་ཤུགས་ངར་གྱི་སྐོར་དང་། ནུས་ཤུགས་ཀྱི་སྐོར་དང་། ཚ་དྲོད་དང་ནུས་པའི་སྐོར་དང་། རླབས་ཀྱི་རྣམ་གཞག་དང་། སྐྱེས་རྡུལ་ཕྲ་མོའི་སྐོར་དང་། ཀླད་པའི་སྐོར་དང་། འཇིག་རྟེན་གྱི་ཁམས་ཀྱི་སྐོར་དང་། ཚན་རིག་གསར་པ་ཆ་ཚད་ངེས་ཅན་དངོས་ཁམས་རིག་པ་quantum physicsསྐོར་སོགས་ཀྱང་འདུག་ཅིང་།
ནང་ཆོས་ཀྱི་ཕྱོགས་ནས་བཅོམ་ལྡན་འདས་ཀྱི་གསུང་རབ་ཀྱི་སྙིང་དོན། སངས་རྒྱས་ཀྱི་དགོངས་པ་འཚོལ་ཚུལ། གཞུང་ཆེན་སློབ་སྦྱོང་གི་གཞི་རྩ་བློ་རྟགས་བསྡུས་གསུམ་ངོ་སྤྲོད། ཡུལ་གྱི་རྣམ་གཞག ཡུལ་ཅན་གྱི་རྣམ་གཞག ལུས་སེམས་ཕྲ་རགས་སྐོར། སངས་རྒྱས་ཀྱི་འཇིག་རྟེན་གྱི་ཁམས་ཀྱི་བཀོད་པ་འདྲ་མིན་གསུང་ཚུལ། སེམས་སེམས་བྱུང་གིས་ཡུལ་ལ་བྱ་བ་བྱས་ཚུལ་སོགས་མདོར་ན་ནང་ཆོས་ཀྱི་གནད་རྣམས་ལག་འཐིལ་གྱི་སྐྱུ་རུ་ར་བཞིན་དུ་བཀོད་འདུག


༢༽ རྗོད་བྱེད་ཀྱི་ཡི་གེ་སོགས་ཀྱི་ངོས་ནས་བཤད་ན། ཚིག་སྦྱོར་ཕུན་གསུམ་ཚོགས་པས་གོ་བདེ་བ་མ་ཟད། ཚན་རིག་ཀྱི་བཤད་པའི་སྐབས་ཡི་གེ་རྐྱང་པ་མིན་པར་ནང་དོན་གསལ་བཤད་ཀྱི་རི་མོ་བཅས་གོ་བདེ་པོ་དང་རྭ་འཕྲོད་པོ་ཞེ་དྲག་འདུག

༣༽ དེབ་ཀྱི་རྒྱུ་ཆ་དང་རིན་གོང་གི་ཐད་ནས་བཤད་ནའང་། ཤོག་བུ་ཁ་དོག་དཀར་ཞིང་སྤུད་ཀ་ལེགས་པ་བཏང་འདུག་པ་དང་། རིན་གོང་ཡང་མཐོ་པོ་དེ་ཙམ་མིན་པར་སྒོར་༡༥༠་ཙམ་རེད་འདུག

རྩོམ་པ་པོའི་ཆེ་བ་ཞིབ་ཕྲ་འདིར་ཞུ་དགོས་པར་གནང་ཡང་། གང་གི་མཛད་པ་ཁོ་བོས་ཀྱང་ཇི་བཞིན་ཞུ་བ་རེ་ཞིག་བསྐལ་བས་ད་འདིར་ཁོ་བོས་གང་ཐོས་ཞིག་མདོ་རྩམ་ཞུས་ན།

ཁོང་ནི་སྐུ་ན་ཆུང་ངུའི་སྐབས་སུ་བོད་དུ་གདན་ས་ཆེན་པོ་འབྲས་སྤུངས་སུ་ཞུགས་ནས་བློ་གསལ་གླིང་གྲྭ་ཚང་དུ་སློབ་གཉེར་རྫོགས་པར་མཛད། ༼ད་བར་དགེ་བཤེས་ཀྱི་དམ་འཇོག་མཛད་མེད་པས་ཁོང་གི་མཚན་འབྲི་དུས་དགེ་སློང་ཞེས་བཀྱོན་གྱི་འདུག༽ཕྱིས་རྒྱ་གར་དུ་བྲོས་བྱོལ་གྱིས་སྦག་ས་ཆོས་སྒར་དུ་ཕེབས། དེར་གཞན་ལ་ཕྱག་དཔེ་སློབ་ཁྲིད་ཀྱང་གནང་། དེ་ནས་མོན་གྷོར་ཕེབས་ཤིང་ཞུགས། དེ་ནས་ཕྱིས་སྐབས་ཅིག་རིང་ལོ་ངོ་མང་པོ་ཞིག་དབྱིན་ཡུལ་དུ་ཞུགས། དེ་ནས་ཆེད་མངགས་གདན་ས་ཆེན་པོ་འབྲས་སྤུངས་ཀྱི་ཡ་གལ་བློ་གླིང་གྲྭ་ཚང་དུ་ཕེབས་ནས་ད་བར་མདོ་སྔགས་ཀྱི་དཔེ་ཁྲིད་གནང་མུས་ཐོག་དངོས་སློབ་ཕུལ་དུ་བྱུང་བ་བརྒྱ་ཕྲག་འབྱུང་བཞིན་པ་བཅས་སོ།། བརྩམས་ཆོས་ལ། འདུལ་མཛོད་ཀྱི་འགྲེལ་པ་པོད་བཞི། དབུ་མའི་འགྲེལ་པ་པོད་གཅིག ཕར་ཕྱིན་གྱི་འགྲེལ་པ་པོད་གཅིག དེ་བཞིན་སེམས་དང་ཚན་རིག་གྱི་སྐོར་སོགས་མང་དུ་མཆིས།

བྱི་ལ་དོམ་དམར་དང་རེ་ཀོན། raccoon

༡ Red Panda ༼བྱི་ལ་དོམ་དམར།༽


༢ Raccoon ༼རེ་ཀོན།༽



གོང་གི་དཔར་དང་པོའི་ནང་ཡོད་པའི་སེམས་ཅན་དེ་ནི་བོད་གཞུང་ཤེས་རིག་ལས་ཁང་གི་དེབ་ནང་བྱི་ལ་དོམ་ཁྲའམ་དབྱིན་སྐད་དུ་red panda༼བྱི་ལ་དོམ་དམར་༽ཞེས་པ་དེ་ཡིན། སེམས་ཅན་དེ་ནི་ཞི་མིའི་རིགས་སུ་གཏོགས་པ་འདྲ་ཞིང་བོད་དང་འབྲུག་ཧི་མ་ལ་ཡ་བཅས་སུ་འཚོ་སྡོད་བྱེད་ཀྱི་ཡོད། ཟས་སུ་སྨྱུག་མ་དང་བྱ་དང་སྒོ་ང་འབུ་སྲིན་སོགས་ཟོས།

དཔར་ཨང་གཉིས་པའི་ནང་ཡོད་པའི་སེམས་ཅན་དེ་ནི་དབྱིན་སྐད་དུ་raccoonརེ་ཀོན་
འབོད་པའི་སྲོག་ཆགས་ཤིག་སྟེ། བྱང་ཨ་མི་རི་ཀའི་གླིང་ཆེན་ནང་འཚོ་གནས་བྱེད་ཀྱི་ཡོད་པ་དང་། ཟས་སུ་མང་ཆེ་བ་འབུ་སྲིན་དང་དེ་ནས་སྔོ་དང་མི་ཟས། དེ་མིན་སེམས་ཅན་སྒལ་ཚིགས་ཅན་༼ཉ་དང་བྱ་སོགས་༽དེ་འདྲའང་སྤྱད།

དོགས་པ།
༡༽ སེམས་ཅན་དང་པོ་དེར་བྱི་ལ་དོམ་ཁྲའམ་བྱི་ལ་དོམ་དམར་ལབ་ནི་འགྲིགས་སམ། དོམ་ནི་རེད་མི་འདུག་ལ་དོམ་དང་འདྲ་པོ་ཡང་མི་འདུག
༢༽ སེམས་ཅན་དེར་བོད་སྐད་དུ་མི་གསར་པ་ཞིག་བཏགས་དགོས་སམ། རེ་ཀོན་དེ་ག་ལབ་པས་ཆོག གལ་ཏེ་གསར་པ་བཏགས་ན་གང་བཏགས་དགོས།
༣༽ སེམས་ཅན་དེ་གཉིས་གཅིག་པ་ཨེ་ཡིན།