2011-12-04

ཁ་སང་རྒྱུད་སྨད་དུ་འབྱོར་བ།

ལོ་ངོ་དྲུག་བདུན་ཞིག་གི་རྗེས་གཞི་ནས་རྒྱུད་སྨད་གྲྭ་ཚང་དུ་ཐེངས་གཅིག་སླེབས་སོང་། ངས་གཞིས་གྲོང་ནས་གོམ་པ་རྒྱབ་ནས་རྒྱུད་སྨད་གྲྭ་ཚང་ཕྱོགས་སུ་བསྐྱོད་དུས་སྔར་དང་མི་འདྲ་བར་རྒྱལ་སྒོ་ཆེན་པོ་ཞིག་དང་། ཤེལ་དམ་གྱི་ཆག་རོ་བཙུགས་པའི་ལྕགས་རིའི་ཕྲེང་བ་མཐའ་མི་མངོན་པ་མཐོང་བྱུང་། 

1 fort of gyumey monastery


སྔོ་དམར་ཤེལ་གྱི་རྒྱན་པའི།། 
ལྕགས་རི་ར་བའི་སྐོར་བའི།། 
བདེ་ཆེན་ཆོས་ཀྱི་འབྱུང་གནས།། 
དཔལ་ལྡན་སྨད་རྒྱུད་གྲྭ་ཚང་།། 

ཧུན་སུར་གྱི་ཐལ་བའི་ཁྲོད་དུ་ལྷག་པའི་མེ་ཏོག་སེར་པོ། 2 yellow flower in hunsur
ཐལ་འཚུབ་སྟོང་གི་དབུས་ན།། 
སྐྱོ་ཉམས་རིང་དུ་དོར་ནས།། 
དགའ་བསུའི་འཛུམ་མདངས་བཀྲ་བའི།།
རབ་རྒྱས་གླིང་གི་མེ་ཏོག། 

སང་མནངས་སྒོ་འབྱེད་མཛད་སྒོར་ཉེ་བའི་གངས་ཅན་རིག་གནས་སློབ་གྲྭ 3 new school of gyumey (tibetan lecture school)
སྒོ་འབྱེད་མེ་ཏོག་འཐོར་བ་ཡི།།
རྟེན་འབྲེལ་ཉིན་མོར་སྒུག་འདྲ་བ།།
གངས་ཅན་རིག་པའི་གནས་བཟང་པོ།།
སློབ་པའི་གྲྭ་འདི་ཅིས་མི་མཛེས།།

འཚོལ།

འཚོལ་བཞིན། འཚོལ་བཞིན། ང་གཉིས་མ་གཏོགས་པ་་་ སུས་ཀྱང་མི་ཤེས་པའི་ཆེད་དུ་་ ཁྱོད་ཀྱི་ལམ་བུ་འཚོལ་ཞིག་་ མཚན་མོའི་བྱིའུ་་་་། རྒྱ་མཚོ། དང་ང་། མཐོ་སར་བལྟས། རྭ་བའི་སྒང་དང་། གྲུའི་དར་ལྕོག་གི་སྒང་གི་་ ནམ་མཁར་དམིགས་ཡུལ་འཚོལ། ཅིའི་ཕྱིར་་་། དེས་ང་རང་ཁེར་རྐྱང་དུ་་ ཁྱེད་རང་འཚོལ་མཁན་དེ་འཚོལ་བར་བྱེད་པའི་ སྤྲིན་གྱིས་འཁྲིགས་པའི་ནམ་མཁར་བརླགས། ཡང་ན། བུམ་པ་གཅིག་འདས་པས་་ མཚོན་སྔོན་པོ་གྱུར་རམ། ངས་ཤེས་མ་སོང་། འོ་ཛི། ངས་རང་བྱུང་དང་ང་ཚོ་་་ ཐ་དད་དུ་སེམས་པ་བཞིན་དུ་་་ ཉི་མ་དང་ཟླ་བས་་་ མཁའ་དབྱིངས་སུ་དཀོན་མཆོག་འཚོལ་བ་བཀོད་སྒྲིག་བྱས་་་ ང་ཚོས་གཞས་དང་གྲོ་འཁྲབ། བདེ་སྐྱིད། ནམ་མཁར་ཁེར་རྐྱང་དུ་བྱ་ཡིས་འཕུར་བཞིན་་ ངས་་་་་་བར་དུ་་། རྟག་ཏུ་ཡར་འདྲེན་བྱེད་པ་འཚོལ། ང་ངུ་བའི་བར་དུ། ངུ། དཱ་་་གཞན་གྱི་མཐར་ཐུག་གི་བདེ་བར་འབོད་པ་དེ་ལས་ རྒྱང་རིང་དུ་འཕུར་ཤིག དཱ་་ནམ་མཁའ་ལ་གཅིག་པུར་བལྟས་ནས་ངུ་ཞིག དེར་ཁྱོད་དང་ང་ལྷན་དུ་ཁུ་སིམ་མེར་འཆི་ངེས། གསོལ་བ་འདེབས། གསོལ་བ་འདེབས། གསོལ་བ་འདེབས། དམ་པ། དམ་པ། དམ་པ། ཁྲ་ཚོམ་ཚོམ་གྱི་སྟོང་གསུམ་དང་། དངུལ་མདངས་ཅན་གྱི་གངས་རི། རྒྱུད་སྐར་གྱི་མཛེས་རྒྱན་བརྒྱུད་ དུས་ཚོད་སྒྲིམ་ཞིང་། ང་ཚོ་འཁོར། ང་དང་ནམ་མཁའ་གཉིས་ཆ་ཁེར་རྐྱང་དུ་མེད། ངེད་ཅག་ལ་དཀོན་མཆོག་རྙེད་སོང་། ག་པར་ཡིན་ནའང་། ནམ་མཁའ་ནི་ཁེར་རྐྱང་དུ་ཡུན་རིང་མེད། ང་ཚོ་ནི་གཅིག་ཡིན། ང་ཚོ་ནི་ཆོས་ཐམས་ཅད་དང་གཅིག་ཏུ་ཡོད། ངེད་ཅག་ལ་བདེ་བ་དང་ལྷན་དུ་་ འཚོ་བ་དང་གཅེས་སུ་འཇུག་རོགས་ བདེ་སྐྱིད་ཀྱི་མཐའ་མར། ཞི་བདེར་ ཞི་འཇམ་གྱི་མཇུག་ཏུ་་ བསྟོད་བསྔགས་ཀྱི་ མཐར་ཐུག་གི་སྨོན་ལམ་དུ་ དེ་ལྟར་རོ།། ༢༠༡༡ ལོའི་ཟླ་བ་༡༡ པའི་ཚེས་༢༤ ཞོགས་པ་པུ་ནའི་གནམ་ཐང་དུ་བསྒྱུར་འཕྲོར་ལུས་པ་ཟླ་བ་༡༢ ཚེས་༡ ཉིན་ལྡི་ལི་གནམ་ཐང་དུ་རྫོགས་པར་བྱས།

2011-11-19

I like to write poem

I am beging to write a poem,
I like to poem,
but i don't know how to do this.
please tell me. my dear heart.

every second I feel i am alive,
like to say what i feel, but
how I write these feelings,
even don't know how to write a poem

birds are flying, water are falling, leafs are flying,
this is not poem even I am not poetry I know it.
this is poem my feelings on paper,
this is poem who feels read it.

OH! this is not poem, but you can think in poem.

2011-11-12

༸གོང་ས་སྐྱབས་མགོན་ཆེན་པོའི་མཛད་རྗེས་མདོ་ཙམ་བརྗོད་པ་ནོར་བུའི་ཕྲེང་བ།

༡༽ གསེར་ཁྲི་མངའ་སྲོལ། ༼༡༩༤༠༽

གྲུ་འཛིན་གཉིས་པའི་གཞལ་ཡས་ཁང་།།

པོ་ཏ་ལ་ཡི་ཚོམས་ཆེན་དུ།།

མི་འཇིགས་གདོང་ལྔས་སྟེགས་པའི་ཁྲིར།།

བསྟན་འཛིན་རྒྱ་མཚོ་བརྟན་པར་བཞུགས།།




དེ་ཚེ་རྒྱལ་ཚབ་རྭ་སྒྲེང་ཞེས།།

ཡོངས་སུ་གྲགས་དེས་སྐུ་གསུང་ཐུགས།།

རྟེན་དུ་མཎྜལ་བལྟར་ཕུལ་བས།།

རྟེན་འབྲེལ་སྒོ་འཕར་ཡངས་པོར་འབྱེད།།





ཚུལ་ལྡན་མང་དུ་ཐོས་པ་དང་།།

ཤེས་འཇོན་དཔལ་གྱིས་མཛེས་པ་ཡི།།

བླ་སྤྲུལ་གཞུང་ཞབས་དད་ལྡན་ཀུན།།

གང་དེ་མཇལ་ལ་རྣམ་པར་འཚང་།།




རྟ་བདུན་དབང་པོ་བཞེད་པ་ཡིས།།

འདབ་བརྒྱའི་ཚོགས་ཀུན་ཁ་འབྱེད་ལྟར།།

གང་དེ་གསེར་ཁྲིེར་མངའ་གསོལ་བས།།

ཁ་བའི་ལྗོངས་ཀུན་དགའ་སྟོན་འཕེལ།།




༢༽ ཆབ་སྲིད་ཀྱི་འགན་ཡོངས་སུ་བཞེད་པ། ༼༡༩༥༠༽

ཤར་ཕྱོགས་རྒྱ་དམར་ཀླ་ཀློའི་དཔུང་གིས་ཆབ་མདོ་བཙན་བཟུང་བྱས་པ་ན།།

སྲིད་སྐྱོང་བཀའ་ཤག་ལས་བྱེད་མཐའ་དག་འཇིགས་ཤིང་སྐྲག་ནས་རྩེ་གཅིག་ཏུ།།

གངས་ཅན་མགོན་པོར་ཆོས་སྲིད་གཉིས་ཀྱི་ཐུགས་འགན་མཐའ་དག་ཕུལ་བ་ན།།

མགོན་པོ་གང་དེ་དགུང་ན་ཕྲ་ཡང་ཞུམ་པ་མེད་པར་དགྱེས་བཞེས་མཛད།།




རྣམ་དཔྱོད་བློ་ཡི་ཅོད་པཎ་འཆང་བའི་མཁས་པ་དག་ནི་སྨོས་ཅི་འཚལ།།

དམར་པོའི་ལྟ་བས་ཡོངས་སུ་བརླན་པའི་རྒྱ་དཔོན་མའོས་ཀྱང་གང་ཉིད་ཀྱིས།།

བོད་མིའི་ཆོས་སྲིད་ཡོངས་ཀྱི་མཛད་འགན་འཁོར་ལོ་ཕྱག་ཏུ་བསྣམས་པ་ལ།།

བཀྲ་ཤིས་སྨོན་ཚིག་རང་དབང་མེད་པར་ལྡི་ལིའི་གཞུང་ཚབ་བརྒྱུད་ནས་ཤོར།།




དེ་མ་ཐག་ལ་མགོན་པོ་གང་གིས་བྱམས་བརྩེའི་ལམ་དང་མི་འགལ་བར།།

ཆབ་མདོར་སླེབས་པའི་རྒྱ་དཔོན་དག་ལ་རྒྱ་བོད་མཛའ་འབྲེལ་བཀའ་འཕྲིན་གནང་།།

དེ་ནས་ད་བར་བྱམས་བརྩེ་ལམ་ནས་བོད་དོན་བདེན་མཐའ་བསལ་བ་ལ།།

རྟག་ཏུ་བརྩོན་པའི་སྙིང་རུས་དེ་ཡིས་སྲིད་ཞི་ཁེངས་པ་མཐའ་དག་བསྙིལ།།




༣༽ གྲོས་མཐུན་དོན་ཚན་བཅུ་བདུན། ༼༡༩༥༡ ནས ༡༩༥༩༽

རྒྱ་བོད་འབྲེལ་བའི་ཞི་མོལ་གྱི་ཟམ་པ་ན།།

དོན་ཚན་བཅུ་བདུན་ཕ་བོང་དག་བཙན་གྱིས་བཞག།

པེ་ཅིང་ཡུལ་དུ་དམ་ཕྲུག་ཀྱང་རྫུན་བཟོ་བྱས།།

དེ་འདྲའི་རྒྱ་ཡི་ངན་གཡོ་རྣམས་མཐོང་བ་ན།།




ཁ་བའི་ལྗོངས་ཀྱི་ཉམ་ཆུང་གི་བོད་མི་རྣམས།།

མ་བགྲོས་སེམས་མཐུན་པོ་ཏ་ལའི་མདུན་ཐང་དུ།།

དྲག་སྤྱོད་བརྡུང་བརྡེག་སྡུག་རྩུབ་ཀྱི་ལས་ལས་གཞན།།

ཁྲིམས་མཐུན་སྒེར་ལངས་ངོ་རྒོལ་གྱི་ལམ་བུར་ཞུགས།།




འོན་ཀྱང་རྒྱ་དམར་བཙན་པོ་ཡིས་བོད་དམངས་ལ།།

སྙིང་རྗེ་མེད་པར་དྲག་སྤྱོད་ཀྱིས་རྒོལ་བས་ན།།

རྒྱལ་དབང་འཁོར་བཅས་བཙན་བྱོལ་དུ་ཕེབས་ནས་ནི།།

དོན་ཚན་བཅུ་བདུན་བཙན་ཤད་དུ་གསལ་བར་བསྒྲགས།།




༤༽ རྒྱ་ནག་ཏུ་ཆིབས་བསྒྱུར་བསྐྱངས་པ། ༼༡༩༥༤༽

ཉི་ཟླ་ཟུང་གཅིག་བོད་འབངས་བདེ་དོན་དུ།།

དགོངས་ཏེ་ཙི་ནའི་ཡུལ་དུ་དང་པོར་གཤེགས།།

འོན་ཀྱང་སྒྲ་གཅན་མའོ་ཡི་ཆོ་འཕྲུལ་ལས།།

བོད་འབངས་དོན་འབྲས་རེ་ཞིག་མོག་པོར་བྱས།།




༥༽ སྐྱབས་བཅོལ་དུ་ཕེབས་པ། ༼༡༩༥༩། ༣། ༡༧།༽

ཞི་བདེའི་འབྱུང་གནས་ཕོ་བྲང་པོ་ཏ་ལར།།

ཀླ་ཀློའི་དམང་གིས་རྒོལ་བར་བརྩམས་པ་ན།།

མ་འོངས་སྔོན་གཟིགས་གང་དེས་འཁོར་དང་བཅས།།

རང་དབང་འཕགས་པའི་ཡུལ་དུ་བྱོལ་བར་མཛད།།




མཁས་པའི་མཆོག་གྱུར་པཎ་ཆེན་ནེ་རུ་ཡིས།།

དགའ་མགུས་བསུ་ཞིང་ཐུགས་གསོའི་མཚམས་འདྲི་ཞུས།།

རྒྱ་གར་གྲོས་ཚོགས་འོག་མར་བོད་དམངས་ལ།།

མཛའ་བརྩེའི་མདུད་རྒྱ་བསྐྱིལ་བའི་དོན་གསུམ་གྲགས།།




མགོན་པོ་མཆོག་དེས་བོད་མིའི་ཤེས་ཡོན་ཆེད།།

མ་སུ་རི་སོགས་བོད་མིའི་གཞིས་སྒར་དུ།།

སློབ་གླིང་གསར་འཛུགས་བོད་ཕྲུག་ཁྲི་ཕྲག་ལ།།

ཤེས་ཡོན་ལོ་ཏོག་འདེབས་པའི་གོ་སྐལ་སྩལ།།




བོད་ཀྱི་ཐུན་མིན་རིག་གཞུང་གཞན་དག་དང་།།

མ་འདྲེས་ཚུགས་པོར་གནས་ཕྱིར་རྒྱ་གར་གཞུང་།།

དེ་བཞིན་མངའ་སྡེ་ཁག་གིས་མཐུན་འགྱུར་ལས།།

སྦེལ་ཀོབ་མོན་གྷོ་སོགས་སུ་གཞིས་ཆགས་ཚུགས།།




དེ་བཞིན་ཁ་བའི་ལྗོངས་ཀྱི་འཕགས་པའི་ནོར།།

བསླབ་པ་གསུམ་དང་སྡེ་སྣོད་གསུམ་གྱི་ཆོས།།

འཛིན་ཅིང་སྤེལ་ལ་རིས་མེད་དགེ་འདུན་སྡེ།།

མཁའ་ལ་སྐར་མའི་ཚོགས་ལྟར་རྣམ་པར་སྐྲུན།།




༦༽ གྲགས་ཅན་མི་སྣ་དང་མཇའ་འཕྲད།

ཞི་བའི་ལམ་ནས་མི་རིགས་བདེན་མཐའ།།

རྩོད་པའི་གྲགས་ཅན་མེན་ཌ་ལ་དང་།།

བྱམས་བརྩེའི་ཡུམ་ཆེན་ཊེ་རེ་ས་སོགས།།

སེམས་དཔའ་རྣམས་དང་ངོ་མཇལ་བསྐྱངས་ཤིང་།།




པཎ་ཆེན་ནེ་རུ་ཨ་རིའི་སྲིད་འཛིན།།

རིམ་བྱོན་རྣམས་དང་མཇར་མན་ཨིཊ་ལི།།

ཧྥ་རན་སི་ཡི་སྲིད་འཛིན་དག་དང་།།

ཁེ་ན་ཌ་ཡི་སྲིད་བློན་སོགས་ཀྱང་།།




ཁྱད་པར་ཨེ་ཇེབ་ཡི་ཤུ་ཧིན་དྷུ།།

ཁ་ཆེ་སོགས་ཀྱི་ཆོས་ལུགས་མི་སྣ།།

མཇལ་འཕྲད་བསྐྱངས་པས་མགོན་པོ་ཁྱེད་ནི།།

དམིགས་མེད་འགྲོ་བ་མཉམ་པར་བརྩེ་བ།།




དེས་ན་བསམ་སྦྱོར་ངན་པའི་གོང་བུ།།

མའོ་ཙེ་ཏུང་དངཏེང་ཞའོ་ཕེང་སོགས།།

ཉམ་ཐག་འགྲོ་བ་འདི་འདྲའི་རིགས་ལའང་།།

ཁྱེད་ཀྱིས་དབྱེར་མེད་བརྩེ་བས་གཟིགས་སོ།།




༧༽ བཙན་བྱོལ་བོད་གཞུང་བཙུགས་པ། ༼༡༩༦༠༽

ཤར་ཕྱོགས་རླུང་གིས་དེད་པའི་བདེན་པའི་བུ་ཆུང་།།

མི་འཇིགས་སྤོབས་པ་བརྟས་པས་ས་མཐའ་འདིར་ཡང་།།

འབྱུང་འགྱུར་ས་ཡ་དྲུག་གི་བདེ་དོན་བསམས་ནས།།

གདོང་དམར་བོད་མིའི་གཞུང་གི་རྩ་བ་བཙུགས་སོ།།




༨༽ ཞི་བའི་གྲོས་འཆར་དོན་ཚན་ལྔ། ༼༡༩༨༧༽

མཁྱེན་པའི་སྤྱན་ཡངས་མགོན་པོ་གང་གིས་བོད་ལྗོངས་རང་དབང་སླར་གསོའི་ཆེད།།

ཞི་བའི་གྲོས་མོལ་ལན་མང་མཛད་པར་རྒྱ་ནག་གཞུང་ནས་བོད་དོན་དེ།།

སྐུ་སྒེར་དོན་དུ་འཁྱོག་བཤད་བྱས་པས་གང་གི་ཐུགས་སྟོབས་ཆེར་བསྐྱེད་ནས།།

ཨ་མི་རི་ཀའི་གྲོས་ཚོགས་དབུས་སུ་དོན་ཚན་ལྔ་ཡི་གྲོས་འཆར་བསྒྲགས།།




ཁ་བའི་ལྗོངས་སུ་ཞི་བདེ་ལྷིང་འཇགས་༡རྒྱ་མི་འབོར་འདྲེན་མཚམས་འཇོག་དང་༢།།

བོད་མིར་དམངས་གཙོའི་རང་དབང་བརྩི་བཀུར་༣ཁོར་ཡུག་སྲུང་སྐྱོབ་རྡུལ་མཚོན་འགོག༤།

བོད་མིའི་མ་འོངས་གནས་བབ་དོན་དུ་ཞི་བའི་གྲོལ་མོལ་འགོ་འཛུགས་བཅས༥།།

བདེན་པ་ལྔ་ཡི་འོད་སྣང་འདི་ཡིས་རྒྱལ་ཁབ་མང་པོའི་གྲོས་འཆར་སྐྲུན།།




༩༽ ནོར་སྦེལ་ཞི་བདེའི་གཟེངས་རྟགས། ༼༡༩༨༩༽

རང་དོན་ཁྲག་གིས་མྱོས་པའི་འཛམ་བུ་གླིང་འདི་ན།།

རང་གཞན་མཐའ་དག་དགེ་བ་ཞི་བདེ་རུ་བསམས་ནས།།

རང་ཡུལ་བཙན་པོས་སྡུག་རྩུབ་དྲག་སྤྱོད་ཀྱིས་འཕྲོག་ཀྱང་།།

རང་དབང་འཐབ་རྩོད་ཞི་བ་འབའ་ཞིག་གིས་བརྩོན་པས།།




ཤེས་ལྡན་ཀུན་གྱིས་སྐྱབས་བཅོལ་མང་དག་ཞིག་མཆིས་ཀྱང་།།

ཤེས་རབ་མཆོག་གྱུར་དྲག་ལན་ཞི་བ་ཡིས་འཇལ་བའི།།

སྐྱེས་མཆོག་དེ་ནི་ཡིད་བཞིན་ནོར་བུ་རང་མཐོང་ནས།།

སྐྱེས་འགྲོ་རྣམས་ཀྱིས་ཞི་བའི་དེད་དཔོན་དུ་བཀུར་ཏོ།།




༡༠༽ གསེར་གྱི་གཟེངས་རྟགས། ༼༢༠༠༧༽

སྟོབས་འབྱོར་དྲག་པོའི་དཔུང་གིས་རབ་ཕྱུག་པའི།།

ཨ་མི་རི་ཀའི་ཤེས་ལྡན་གྲོས་པའི་ཚོགས།།

ཆེ་མཐོའི་ཞི་བའི་མི་སྣའི་གཟེངས་རྟགས་གསེར།།

བསྟན་འཛིན་རྒྱ་མཚོའི་ཕྱག་ཏུ་ཕུལ་བས་ཤིས།།




༡༡༽ ཆབ་སྲིད་ཀྱི་ཕྱག་ལས་ནས་བགྲོས་ཡོལ་བཞེས་པ། ༼༢༠༡༡༽

མ་འོངས་མདུན་ན་གཟིགས་པའི་སྤྱན་དཀྱུས་དེ་རིང་བས།།

རྒྱ་དམར་དཔུང་ལ་དོ་བའི་མང་གཙོ་ཡི་ལུགས་བཟང་།།

སྲ་བརྟན་རང་སྐྱ་འཕེར་བའི་གོམས་སྟབས་དེ་བསྒྱུར་ཕྱིར།།

གང་ཁྱེད་ཆབ་སྲིད་ཁྲི་ལས་ངལ་གསོ་ཡི་དབུགས་དབྱུང་།།




༡༢༽ མང་གཙོའི་ལམ་བཟང་སྐྲུན་པའི་བརྒྱུད་རིམ།

ད་ལྟའི་ཆར་ཨེ་ཇེབ་དང་ལེ་བྷི་ཡ་སོགས་ཀྱི་ནང་མི་མང་སྟོང་ཚོ་བརྒལ་བའི་མང་གཙོའི་ཆེད་དུ་རང་སྲོག་བློས་བཏང་གིས་འཐབ་རྩོད་ལ་ངལ་བ་རྟེན་བཞིན་ཡོད་ནའང་ཡུལ་གྲུ་དེ་དག་གིས་སྲིད་འཛིན་པ་དེ་དག་གིས་མི་མང་གི་སྟེང་དྲག་སྤྱོད་ཀྱིས་རང་གི་དབང་འཛིན་སྲུང་སྐྱོབ་བྱེད་པའི་ངང་ཚུལ་དེ་ལས་ལྡོག་ཏེ་༸གོང་ས་མཆོག་གིས་ནི་མི་མང་གིས་དབང་ཚད་ཡོངས་སུ་རྫོགས་པ་ཡར་འཕུལ་བཞིན་ཡོད་ནའང་མགོན་པོ་གང་གིས་དགོས་པ་ཆེར་གཟིགས་ཀྱིས་མང་གཙོ་རང་དབང་ཡོངས་སུ་རྫོགས་པ་མི་མང་ལ་མར་གསོལ་སྩོལ་མཛད་པ་ནི་ཟུར་གནས་རྣམས་ཀྱི་སྙིང་དབུས་སུ་མཛེས་ཤོས་མཛད་རྗེས་ཤིག་ཡིན་པས་དེའི་ཚུལ་ནི།

༡༩༥༩ ལོར་བོད་ས་ཡོངས་སུ་རྫོགས་པ་རྒྱ་དམར་གྱིས་བཙན་བཟུང་བྱས་པ་ལས་༸གོང་ས་མཆོག་འཁོར་དང་བཅས་པ་བཙན་བྱོལ་དུ་ཕེབས་རྗེས།

༡༩༦༠ ལོར་མིང་མང་གི་སྤྱི་འཐུས་འདེམས་པའི་ལམ་སྲོལ་གསར་འཛུགས་སོགས་གནང་བ་དང་།

༡༩༦༣ ལོར་མང་གཙོ་ལམ་སྲོལ་གྱི་འགྲོ་ལུགས་དང་མཐུན་པའི་གཞུང་ཞབས་བཀོད་སྒྲིག་དང་རྩ་ཁྲིམས་རྒྱས་པ་ཞིག་ཀྱང་གསལ་བསྒྲགས་གནང་།

༡༩༧༠ ལོར་བོད་མི་གཞིས་ཆགས་ཆེ་ཆུང་ལ་དཔག་པའི་ཚོགས་ཞུགས་འཐུས་མིས་གཞུང་གི་ལས་དོན་ལ་ལྟ་སྐུལ་གྲོས་འདོན་བྱེད་པའི་ལམ་སྲོལ་གསར་འཛུགས་པ་དང་།

༡༩༩༠ ལོར་བཀའ་བློན་རྣམ་ཀྱང་མི་མང་གིས་འོས་འདེམས་བྱས་པའི་སྤྱི་འཐུས་ཚོས་ཐད་ཀར་འདེམས་རྒྱུ་དང་སྤྱི་འཐུས་ཀྱི་གྲངས་ཚད་ཀྱང་མང་དུ་བཏང་ཞིང་།

༡༩༩༢ ལོར་མ་འོངས་བོད་ཀྱི་ཆབ་སྲིད་ལམ་སྟོན་དང་རྩ་ཁྲིམས་སྙིང་དོན་ཕྱོགས་སྒྲིག་ཡོངས་གྲགས་བྱས་པ་དང་།

༢༠༠༠ ལོར་མི་མང་གིས་ཐད་ཀར་བཀའ་ཁྲི་འདེམས་རྒྱུ་དང་།

༢༠༡༡ ལོར་རང་ཉིད་ཀྱི་ཆབ་སྲིད་ཀྱི་ལས་འགན་མཐའ་དག་མི་མང་གིས་འོས་འདེམས་བྱས་པའི་བཀའ་ཁྲི་གནང་བའི་མང་གཙོ་མཛད་བཟང་གིས་ས་སྟེང་འོད་སྣང་གིས་ཁྱབ་པས། འཛམ་གླིང་ཡུལ་གྲུ་གང་སའི་དཔྱོད་ལྡན་གྱི་སྐྱེ་བོ་རྣམས་ཡིད་རབ་ཏུ་རངས་ནས་མགོན་པོ་གང་གི་མཛད་རྗེས་ལ་བསྟོད་བསྔགས་ཀྱི་རླབས་ཕྲེང་ལྷག་པར་གཡོ་བཞིན་མཆིས་ནའང་། མང་གཙོ་ལ་འཇིགས་ཤིང་འཇིགས་སྐུལ་གྱི་འཚོ་བའི་སྲིད་དབང་སྒེར་སྤྱོད་པ་རྒྱ་ནག་གཙོས་དམར་ཕྱོགས་པ་རྣམས་ནི་ངང་སྐྲག་གི་བ་ཀློང་རབ་ཏུ་འཁྲུགས་པ་ནི་ཉི་མའི་འོད་ཟེར་ལ་འབྱུང་པོའི་བྱ་རྣམས་སྡང་བ་བཞིན་དུ་ཤིན་ཏུ་ཉམ་ང་བའོ།།




སྐུ་ཡི་མཛད་རྗེས་བསམ་གྱིས་མི་ཁྱབ་པས།།

སྐུ་འདྲ་བཞིན་དུ་འབྲི་བར་ག་ལ་ནུས།།

སྐུ་ཡི་ཐུགས་དྲིན་དྲན་པར་བྱེད་པ་དང་།།

སྐུ་ཚེ་བརྟན་ཕྱིར་ཚིག་གི་སྦྱོར་འདི་བྱས།།




ཤཀྱའི་དགེ་སློང་བསྟན་འཛིན་ཕུན་ཚོགས་སམ། མིང་གཞན་ར་ས་ཕོ་ཉར་འབོད་པས།

2011-10-11

རྐང་སྤོལ་གཞས།

གཞས་ཚིག ར་ས་ཕོ་ཉ།

སོ་ཡ། གཅིག་གཉིས་གསུམ།
རྩེད་མོ་བ་ཚང་མ་རྒྱུགས་ཤར་གློད།

སྔོ་ལྗང་གི་སྤང་གི་སྟེང་ལ།
ཡིད་འོང་གི་སྤོ་ལོ་གཅིག་པུ།
ཕན་ཚུན་དུ་འཕྲོག་རེ་བྱས་པའི།
རྐང་སྤོལ་གྱི་རྩེད་མོ་སྐྱིད་པ།

ལྟད་མོ་བ་ཚང་མས་ཐལ་མོ་འརྡབ།
རང་རང་དགའ་མོས་ཀྱི་ཕྱོགས་ལ་འབོད།
སྤོ་ལོ་ཐེངས་གཅིག་སྒོ་ནང་བླུགས་པའི་རེ་བ་བྱས།

2011-07-08

མེ་ཏོག་འགའི་མིང་།

དྷེ་ར་དྷུན་དུ་བསྐྱོད་པའི་སྐབས་བོད་ཡིག་དེབ་ཞིག་གི་ནང་མཐོང་བའི་མེ་ཏོག་འགའི་མིང་།

1 སྐལ་བཟང་མེ་ཏོག Aster
2 ཧེ་དར། geranium
3 གུར་གུམ། Mary Gold
4 སྟག་མ། Rhododendron
5 ཤོག་བུ་མེ་ཏོག Corn Flower
6 དྲེས་མ། Lily
7 རྒྱ་སེ། Rose
8 ཧོ་སྤྲིན། Hydrangea
9 ཡང་བྱུན། Dahlia

མཆན། གུར་གུམ་མེ་ཏོག་གི་མིང་དེ་ནོར་བ་འདྲ། གུར་གུམ་ལ་calendula དང་། སེར་ཆེན་ལ། mari gold ཡིན་སྙམ།

2011-06-15

ཆོས་ཉན་པའི་ཚུལ།

༡༽ ཆོས་ཉན་པ་ལ་དང་པོ་ཆོས་ཐོས་པའི་ཕན་ཡོན་བསམ་དགོས་པས་ཆོས་ཉན་པའི་ཕན་ཡོན་ནི།
རང་གིས་མི་ཤེས་པ་དེ་ནོར་འཁྲུལ་ཚང་མ་འབྱུང་ས་ཡིན་པར་ཐོས་པ་ལས་ཤེས་ཏེ། མི་ཤེས་པ་ལས་ལས་བཟང་ངན་འབྱུང་བ་དང་། མི་ཤེས་པ་དེ་མེད་པ་ཆགས་པ་ན་འཁོར་བ་ལས་ཐར་བ་སོགས་ཐོས་པ་ལས་ཤེས་པའི་ཕྱིར། དེ་ལྟར་ཤེས་པ་ལ་བརྟེན་ནས་སྡིག་པ་མ་བསགས་པ་དང་དགེ་བ་གྲུབ་སོགས་བྱེད་པ་འབྱུང་སྟེ། ཐོས་པའི་ཚོམས་ལས།
ཐོས་པས་ཆོས་རྣམས་ཤེས་པར་འགྱུར།།
ཐོས་པས་སྡིག་ལས་ལྡོག་པར་བྱེད།། ཅེས་གསུངས། དེ་བཞིན་དུ་སྐྱེ་རབས་སོ་གཅིག་པ་ལས་ཀྱང་། ཤེས་རབ་སྐྱེ་ཞིང་གཏི་མུག་མེད་པར་འགྱུར།།
རང་གི་ཤས་ཀྱང་དེ་ནི་ཉོ་བར་རིགས།། ཞེས་ཐོས་པ་ལ་བརྟེན་ནས་དཀོན་མཆོག་གི་ཡོན་ཏན་དང་བདེན་བཞིའི་གནས་ལུགས་སོགས་ཤེས་པ་སྟེ། ཐོས་པ་ལས་བླང་བྱ་དང་དོར་བྱ་གང་ཡིན་ལེགས་པར་ཤེས་པས་མི་ཤེས་པ་གཏི་མུག་བྱ་བའི་ཉོན་མོངས་མེད་པར་འགྱུར་བར་སོང་། རང་གི་ལུས་ཀྱི་ཤ་བཅད་ནས་གཞན་ལ་བཙོང་པས་ཀྱང་ཐོས་པ་ཉོ་བར་རིགས་པར་གསུངས་པ་དང་།
ཡང་ཐོས་པ་ནི། མི་ཤེས་པའི་མུན་པ་སེལ་བའི་སྒྲོན་མེ་དང་། རྐུ་མས་ཁྱེར་བར་མི་ནུས་པའི་ནོར་དང་། རྨོངས་པའི་དགྲ་འཇོམས་པའི་མཚན་ཆ་དང་། རང་ལ་ཕན་པ་སྒྲུབ་པའི་མན་ངག་སྟོན་པའི་ཆོས་གྲོགས་དང་། འགྱུར་བ་མེད་པའི་མཛའ་བོ་དང་། གནོད་པ་མེད་པའི་སྨན་དང་། དཔལ་དང་གྲགས་པའི་གཏེར་དང་། ཡ་རབས་རྣམས་ཐུག་དུས་སྐྱེས་ཀྱི་མཆོག་ཏེ་རྔན་པ་ཡག་ཤོས་ལྟ་བུ་ཡིན་པར་ཡང་གསུངས།
གཞན་ཡང་། ང་ཚོས་འཇིག་རྟེན་འདི་ན་དཀོན་པར་རྩིས་པའི་རྡོ་རྗེ་ཕ་ལམ་སོགས་རིན་པོ་ཆེ་གང་དག་ལས་ཀྱང་སངས་རྒྱས་ཀྱི་གསུང་རབ་ཐོས་པ་ནི་ཆེས་དཀོན་པ་ཡིན་ཏེ། སངས་རྒྱས་འབྱུང་བ་ཤིན་ཏུ་དཀོན་པས་དེའི་གསུང་རབ་དཀོན་པ་ཉིད་ཡིན་པའི་ཕྱིར། དེས་ན། ད་ལྟ་སངས་རྒྱས་བཅོམ་ལྡན་འདས་བྱོན་ནས་ལོ་ཉིས་སྟོང་ལྷག་ལས་སོང་མེད་དུས་འདིར་སངས་རྒྱས་ཀྱི་གསུང་ལ་ཐོས་པ་མ་བྱས་ན། དེའི་རྗེས་ཀྱི་སངས་རྒྱས་འབྱུང་བར་ལོ་གྲངས་བགྲངས་ལས་འདས་ཅིང་། དེའི་ཚེ་ཡང་སོ་སོ་རང་ཉིད་མི་ལུས་ཐོབ་པའི་འདེང་ཚོད་གང་ཡང་མེད་ལ། ཅི་སྟེ་མིར་སྐྱེ་བའི་དབང་དུ་བྱས་ཀྱང་སངས་རྒྱས་གང་ན་འབྱུང་བའི་ཡུལ་དེར་སྐྱེ་བར་མ་ངེས་པས་ད་ལྟ་ལྟ་བུའི་གོ་སྐབས་དེ་འདྲ་ཤིན་ཏུ་རྙེད་པར་དཀའ་བ་བསམ་མོ།།

༢ དེ་ལྟ་ཆོས་ཉན་པའི་ཕན་ཡོན་བསམ་པའི་རྗེས་ཆོས་དང་ཆོས་སྨྲ་བ་ལ་གུས་པ་ཇི་ལྟར་བྱ་བ་ནི།

དེ་ཡང་ཆོས་སྨྲ་བ་ལ་གུས་པའི་སྒོ་ནས་ཆོས་ཉན་པ་དགོས་ཀྱི། དེ་ལ་འཕྱ་ལེ་བྱེད་པ་སོགས་ཀྱིས་ཆོས་ཉན་མི་རུང་བ་ཡིན། དེ་བཞིན་དུ་ཆོས་ཉན་པའི་དུས་ཀྱང་ཆོས་སྟོན་པ་པོ་ཐུགས་བདེ་བ་དང་། བྲེལ་བ་མེད་པའི་དུས་སུ་ཉན་པ་དང་། ཆོས་སྟོན་པ་པོ་ལ་ཕྱག་འཚལ་བ་སོགས་ཀྱི་བཀུར་སྟི་བྱེད་པ་དང་། ཀླན་ཀ་མི་ཚོལ་བ་དང་། ཆོས་དེ་དེ་འདྲ་ཙམ་ཞིག་རེད་སྙམ་པ་དང་ཆོས་སྟོན་པ་པོ་དེར་ཧ་ལས་རྒྱུ་ཅང་མེད་ལྟ་བུ་ཁྱད་གསོད་མི་བྱེད་པ་དང་། དེ་བཞིན་དུ་ཆོས་སྟོན་པ་པོ་དེ་ཚུལ་ཁྲིམས་ཉམས་པ་དང་། རིགས་དམའ་བ་དང་། མདོག་ཉེས་པ་ཡིན་པས་བདག་གིས་དེ་ལས་མི་ཉན་ནོ་སྙམ་པ་དོར་བ་དགོས།
ས་ཡི་སྙིང་པོའི་མདོ་ལས།
གཅིག་ཏུ་དད་ཅིང་གུས་པས་ཆོས་མཉན་གྱི།།
དེ་ལ་འཕྱ་ཞིང་སྐུར་བར་མི་བྱའོ།། ཞེས་སོགས་དང་།
སྐྱེ་རབས་ལས་ཀྱང་།
ནད་པས་སྨན་པའི་ཚིག་ཉན་བཞིན།།
རིམ་གྲོ་བསྐྱེད་དེ་ཆོས་ཉན་ཅིག། ཞེས་གསུངས།

༣ དངོས་གཞི་ཆོས་ཇི་ལྟར་ཉན་པའི་ཚུལ་ནི།
སྤྱིར་ཆོས་ཉན་པ་ལ་འགལ་རྐྱེན་སྣོད་ཀྱི་སྐྱོན་གསུམ་དང་བྲལ་བ་དང་། མཐུན་རྐྱེན་འདུ་ཤེས་དྲུག་བསྟེན་པ་དགོས་པས། དང་པོ་སྣོད་ཀྱི་སྐྱོན་གསུམ་དང་བྲལ་བ་ནི།
༡ སོ་སོ་རང་ཉིད་ཆོས་ཉན་སར་བསྡད་ཀྱང་སྣོད་ཆས་ཁ་སྦུབ་པ་ནང་བཞིན་ཆོས་ཨམ་ཆོག་གིས་ཡག་པོ་མ་ཉན་པ་དེ་འདྲ་མི་བྱེད་པ་དང་།
༢ རང་ཉིད་ཀྱིས་ཡག་པོ་ཉན་ཀྱང་སྣོད་ཆས་བཙོག་པ་ནང་བཞིན་རང་ཉིད་མཁས་འདོད་དང་། ཆོས་དང་ཆོས་སྨྲ་བ་ལ་དགག་པ་སོགས་བྱེད་དགོས་སྙམ་པ་ལྟ་བུ་བསམ་བློ་ལ་སྐྱོན་ཞུགས་པ་དེ་འདྲ་མི་བྱེད་པ།
༣ གོང་གི་སྐྱོན་གཉིས་ཀ་མེད་ཀྱང་སྣོད་ཆས་རྐུབ་རྡོལ་བ་ནང་བཞིན་ཆོས་ཉན་ཚར་བ་དང་ཡང་ཡང་མ་བསམ་པར་སྣང་མེད་དུ་བརྗེད་དུ་འཇུག་པར་མི་བྱེད་པའོ།།
མཐུན་རྐྱེན་འདུ་ཤེས་དྲུག་ནི། (འདུ་ཤེས་ཟེར་ན་དེ་དེའོ་སྙམ་པའི་བསམ་བློ་ཡིན)
༡ རང་ཉིད་འདོད་ཆགས་དང་ཁོང་ཁྲོ་སོགས་ཉོན་མོངས་པས་དུས་རྟག་ཏུ་ན་བའི་ནད་པ་ཡིན་པའི་འདུ་ཤེས་བསྟེན་པ་དང་།
༢ རང་ཉིད་ཀྱི་ནད་གཞི་དྲག་པོ་དེ་སེལ་བར་བྱེད་མཁན་ཆོས་སྟོན་པ་པོ་ལ་སྨན་པའི་འདུ་ཤེས་བསྟེན་པ་དང་།
༣ ནད་དེ་དངོས་སུ་མེད་པ་བཟོ་བྱེད་དེས་སྟོན་པའི་ཆོས་ལ་སྨན་གྱི་འདུ་ཤེས་བསྟེན་པ་དང་།
༤ དེས་ཇི་ལྟར་བསྟན་པ་ཉམས་སུ་བླང་བ་ནད་གསོ་བར་བྱེད་པ་དང་འདྲ་བས་ནད་འཚོ་བའི་འདུ་ཤེས་བསྟེན་པ་དང་།
༥ དེ་བཞིན་གཤེགས་པ་སངས་རྒྱས་རྣམས་ལ་སྐྱེས་བུ་དམ་པའི་འདུ་ཤེས་བསྟེན་པ་དང་།
༦ ཆོས་འདི་ལྟ་བུ་ཉན་པ་ལ་བརྟེན་ནས་སངས་རྒྱས་ཀྱི་བསྟན་པ་རྒྱུན་རིང་དུ་གནས་ན་ཅི་མི་རུང་སྙམ་པའི་འདུ་ཤེས་བསྟེན་པ་དགོས་སོ།།

ལྷག་པར་ཆོས་ཉན་པའི་དུས་སུ་རང་གི་རྒྱུད་ལ་མ་སྦྱར་བར་སྔོན་འདས་པའི་དུས་ཀྱི་མི་ལ་ལ་ཞིག་གི་ལོ་རྒྱུས་ཉན་པ་ལྟ་བུ་མ་བྱས་པར། ཆོས་དེ་ཉིད་མེ་ལོང་གི་ཤེལ་རྐོ་འདྲ་པོར་བསམ་བློ་བཏང་ནས་རང་གི་སེམས་རྒྱུད་ཀྱི་སྐྱོན་དེ་ཚོ་ཆོས་ཀྱི་མེ་ལོང་ནང་ནས་མཐོང་བར་བྱས་ནས་རང་རྒྱུད་ཀྱི་ཉོན་མོངས་པའི་སྐྱོན་རྣམས་བསལ་དགོས་པ་ཡིན།
མདོར་ན། ཆོས་ཉན་པའི་ཚེ་ངས་ལྷ་དང་མི་བཅས་པའི་སེམས་ཅན་ཚང་མའི་ཆེད་དུ་སངས་རྒྱས་ཀྱི་གོ་འཕང་ཐོབ་པར་བྱེད་དགོས། དེ་ལྟར་བྱེད་པ་ལ་དེའི་ཐབས་ཤེས་ཀྱི་རྒྱུ་གང་ཡིན་ཧ་གོ་དགོས། དེ་ཧ་གོ་ལ་ཆོས་ཉན་དགོས་པ་ཡིན་ཙང་ཆོས་ལེགས་པར་ཉན་པར་བྱའོ་བསམས་ནས་ཆོས་ཉན་དགོས་པ་ཡིན།

ར་ས་བསྟན་ཕུན་དཔལ་གྱིས་སྤྱི་༢༠༡༡ ས་ག་ཟླ་བའི་ཚེས་༡༥ ཉིན་བྱེས་ཀྱི་འབྲས་སྤུངས་དགོན་གྱི་རང་ཤག་ནས་བྲིས།
ས་

2011-04-27

ལྕུག་ཕྲན་སྟེང་གི་བྱིའུ་ཆུང་། འདྲ་པར།




ནམ་འཇིག་ངེས་པ་མེད་པའི་ལྕུག་ཕྲན་གྱི་སྟེང་།
ཚེ་སྲོག་ལ་བདོའི་རླུང་བུས་དལ་བུ་གཡོ་དུས།
ངས་འུ་ཐུག་པའི་ཡིད་ཆད་ཀྱི་རེ་བ་ཡོངས་རྫོགས།
ཁྱེད་ལ་བཅོལ་ཡོད། གཤོག་པ་ལགས།

ནམ་མཁའ་ལ་ཕ་མཐའ་མེད་ཀྱི་ཀྱང་།
ངའི་གཤོག་པའི་བགྲོད་ཤུགས་ལ་ཚད་ཞིག་ཡོད་དུས།
བདེ་སྐྱིད་དང་རང་དབང་ཇི་ལྟར་བསམས་ཀྱང་།
བརྗེད་མི་སྲིད་པའི་ངའི་འདུན་ལམ་དེ།
ཟམ་ཆད་ཀྱི་ཆུ་ཕ་རོལ་གྱི་ལྡུམ་ར་དང་འདྲ་ཡང་།
ངས་འུ་ཐུག་པའི་ཡིད་ཆད་ཀྱི་རེ་བ་ཡོངས་རྫོགས།
ཁྱེད་ལ་བཅོལ་ཡོད། གཤོག་པ་ལགས།

གཤོག་པ་ལགས། ཁྱེད་ཀྱིས་ངའི་རེ་བ་དེ།
རླུང་རྩིའི་ནང་ཆུད་ཟོས་སུ་མ་བཏང་བར།
ཡངས་ཤིང་ཐོག་རེག་བྲལ་བའི་ནམ་མཁར་བསྐྱེལ་ན་བསམས།
ཅི་སྟེ། ང་རྒས་པའི་དུས། ཁྱེད་ཀྱིས་ཁོ་བོར་ཇི་ཙམ་སྲིད་ཞུ་སྒྲུབ་ཀྱང་།
ངས་དེ་དུས་སུ། གཅིག་པུ་བྱ་ཐུབ་པ་ནི། སྨིག་མ་ཟེང་ཟེང་ངང་།
ལག་གཉིས་ཐལ་མོ་སྦྱར་ནས་སྨོན་ཚིག་འདོན་པ་ལས།
ཅི་ཞིག་ཐུབ། ཁྱེད་ཀྱིས་བྱ་བསམ་ན། ད་ལྟ་བྱོས།
གཤོག་པ་ལགས། ནམ་མཁར་བསྐྱོད།
ཆུ་ཕ་རོལ་ན།

2011-04-16

ཁོང་ཁྲོ་ལངས་པ།

ད་བར་ཡུན་རིང་ཁོང་ཁྲོ་མ་ཟ་ཞིང་སྐབས་རེ་སེམས་སུ་ཁོང་ཁྲོ་ཟ་རྒྱུ་བརྗེས་པ་འདྲ་པོ་ཆགས་སོང་། འོན་ཀྱང་ཁ་ཉིན་ཟླ་བ་༤ ཚེས་༡༥ ཉིན་སྐད་ཆ་བཤད་ཕྱོགས་ཞིག་གིས་ཁོ་བོ་ཁོང་ཁྲོ་ཞེ་དྲག་ཟ་བྱུང་བས་སོ་སོས་སོ་སོར་ངོ་ཚ་ཡང་སྐྱེད་དགོས་པ་འདྲ་པོ་ཆགས་སོང་། དེའི་ཚེ་ང་རང་སེམས་མར་གནན་ནས་ཁོང་ཁྲོ་ཟ་དགོས་པའི་རྒྱུ་མཚན་བསམ་བློ་གཏོང་ཐབས་བྱེད་ཀྱང་རེ་ཞིག་རྒྱུ་མཚན་གང་ཡང་དྲན་གྱིས་མི་འདུག ངའི་སེམས་སུ་ཞེ་ལྡང་ལྟ་བུའི་སྡིག་པ་མེད་པ་དང་། དེས་དགེ་རྩ་རླབས་པོ་ཆེ་འཇོམས་ཀྱི་ཡོད་པ་ཡིད་ལ་དྲན་ནའང་ད་དུང་ཁོང་ཁྲོ་ཞི་རོགས་བྱེད་ཀྱི་མི་འདུག དེ་ནས་ངས་ལྷོད་ལྷོད་བྱས་རྐུབ་ས་སྟེང་ལ་བཞག་དཔེ་ཆ་ཁ་ཕྱེ་ནས་ཀློག་པས་རིམ་པའི་ཁོང་ཁྲོ་ཞི་སོང་བས་དགའ་ཚོར་བྱུང་། དེ་ནས་ང་ཡང་བསྐྱར་ཁོང་ཁྲོ་སྐྱེས་པའི་རྒྱུ་མཚན་བསམས། འོ་རེད། ཁོང་ཁྲོ་དེ་ནི་རྒྱུ་མཚན་མང་པོ་ལས་སྐྱེས་འདུག རྒྱུའི་གཙོ་བོ་ནི་བདག་འཛིན་ཡིན་པ་སྨོས་མེད་ཐོག དམིགས་བསལ་གྱི་རྒྱུ་ནི་ཁོང་ཁྲོ་སྐྱེ་གཞི་རྒྱུ་མཚན་མང་པོ་ཉིན་མ་མང་པོའི་སྔོན་ནས་བསགས་འདུག་པ་དེ་རེད་ཤག་ལ། དེ་ཡང་རྒྱུ་མཚན་ལ་རྒྱབ་བརྟེན་ཡོད་པར་སོང་ཁོང་ཁྲོ་ཞི་དཀའ་བ་ཞིག་སྐྱེས་འདུག ངས་རེ་བར་ད་ནས་ཡུན་རིང་བར་ཁོ་བོར་ཁོང་ཁྲོ་མི་སྐྱེ་བའི་རེ་བ་བྱེད་ཀྱི་ཡོད་པས་ཟིན་བྲིས་དེ་བྲིས་པ་ཡིན། ད་རྗེས་མ་ཁོང་ཁྲོ་ཟ་ན་འདིར་ལམ་སེང་ཟིན་བྲིས་སྤེལ་གྱི་ཡིན། བཟོད་པའི་ཕ་རོལ་ཕྱིན་པར་བྱིན་གྱིས་རློབས།།

2011-04-02

ཉི་མའི་ཁྱིམ་རྒྱུད།

ང་ཚོས་ད་ལྟ་མིག་གིས་རིག་པ་དང་ལུས་ཀྱིས་དྲོད་འོད་ཚོར་བཞིན་པའི་ཉི་མ་དེའི་མཐར་འཁོར་ནས་བསྡད་མཁན་གཟའ་སྐར་བརྒྱད་ཡོད་པ་ཡིན། དེ་ཡང་། དབུས་སུ་ཉི་མ་དང་། དེ་ནས་རིམ་བཞིན་ ༡ གཟའ་སྐར་ལྷག་པ་དང་། ༢ པ་སངས། ༣ འཛམ་བུ་གླིང་། ༤ གཟའ་སྐར་མིག་དམར། ༥ ཕུར་བུ། ༦ སྤེན་པ། ༧ རྒྱུ་སྐར་རྣམ་རྒྱལ་དང་། ༨ མཚོ་རྒྱལ་བཅས་ཡིན། འགའ་རེས་རྒྱུ་སྐར་གཤིན་རྒྱལ་རྩིས་ནས་དགུར་འདོད་པ་ཡང་ཡོད།

༡ གཟའ་སྐར་ལྷག་པ་ནི་ཉི་མ་དང་ཐག་ཉེ་ཤོས་སུ་གནས་ཡོད་པ་དང་། དེས་ཞག་པོ་༨༨ ནང་ཉི་མར་བསྐོར་བ་རེ་རྒྱག་ཐུབ་པས་ཉི་མར་བསྐོར་མཁན་མགྱོགས་ཤོས་དེ་ཡིན།

༢ གཟའ་སྐར་པ་སངས་ནི་ལྷག་པའི་རྗེས་ཀྱི་ཉི་མ་དང་ཉེ་ཤོས་ཀྱི་རྒྱུ་སྐར་དེ་ཡིན་ལ། གཟའ་སྐར་དེ་ནི་རྒྱུ་སྐར་དེ་དག་ལས་འོད་མདངས་ཆེ་ཤོས་དེ་ཡིན།

༣ འཛམ་བུ་གླིང་ནི་ད་ལྟའི་ཆར་མཐོང་ཆོས་སུ་གྱུར་པའི་རྒྱུ་སྐར་དེ་དག་གི་ཁྲོད་ནས་ཡིད་དུ་འོང་ཤོས་དེ་ཡིན་པ་དང་། རྒྱ་ཁྱོན་བརྒྱ་ཆ་༧༡ ཙམ་མཚོས་ཁེབས་ནས་ཡོད་ཅིང་། ཉི་མ་དང་ཐག་རིང་ཐུང་རེན་པས་མཁའ་རླུང་གཙང་ལ་སྲོག་ཆགས་ཐམས་ཅད་བདེ་བར་གནས་ཐུབ་པའི་ཉི་མའི་ཁྱིམ་རྒྱུད་ཀྱི་རྒྱུ་སྐར་གཅིག་པུ་དེ་ཡིན།

༤ གཟའ་སྐར་མིག་དམར་ནི་ཉི་མའི་འོད་མདངས་གང་འཚམ་ཕོག་སའི་རྒྱུ་སྐར་ཞིག་ཡིན་ནའང་། ད་ལྟའི་བར་འཕྲུལ་ཆས་ཀྱིས་དེའི་ས་རྡོ་དག་ལ་བརྟག་དཔྱད་བྱས་པ་ལས་དེར་སྲོག་ཆགས་གྲུབ་པའི་རྫས་ཆ་ཡོད་པར་ཤེས་པ་ཙམ་ལས་དངོས་སུ་སྲོག་ཆགས་རྙེད་མེད། རྒྱུ་སྐར་དེར་བྲག་རྡོ་དང་རྫ་སོགས་ལྕགས་རྫས་ཀྱིས་ཕྱུག་པས་སྤྲིན་པ་ཚང་མ་དམར་པོར་གྱུར་པས་རྒྱུ་སྐར་དེར་རྒྱུ་སྐར་དམར་པོ་ཞེས་ཀྱང་བརྗོད་པ་ཡིན། དེ་ཡན་གྱི་རྒྱུ་སྐར་རྣམས་ལ་ཉི་མའི་ཁྱིམ་རྒྱུད་ཀྱི་རྒྱུ་སྐར་ནང་མ་ཞེས་བྱ་ཞིང་འོག་གི་རྒྱུ་སྐར་ཕྱི་མ་བཞི་ལས་ཆུང་བ་ཡོད་པ་ཡིན།

༥ གཟའ་སྐར་ཕུར་བུ་ནི་ཉི་མའི་ཁྱིམ་རྒྱུད་ཀྱི་རྒྱུ་སྐར་དཀྱིལ་ནས་ཆེ་ཤོས་དེ་ཡིན་ལ། རྒྱུ་སྐར་དེ་ནི་སྤྲིན་པ་རྒྱ་སྨུག་དང་སེར་པོ་དང་དཀར་པོ་བཅས་ཀྱིས་དཁྲིགས་ནས་རྒྱུགས་ཞིང་ཡོད་པས་རྟག་ཏུ་ཁ་དོག་ལ་འགྱུར་བ་བྱུང་གིན་ཡོད།

༦ གཟའ་སྐར་སྤེན་པ་ནི་ཕུར་བུ་ཕུད་པའི་རྒྱུ་སྐར་དེ་དག་ལས་ཆེ་ཤོས་ཡིན་ལ། སྤྱིར་བཏང་གཟའ་སྐར་ཕུར་བུར་ཁོར་ཞགས་ཙམ་ཡོད་ཀྱང་། གཟའ་སྐར་སྤེན་པ་ནི་ཁོར་ཞགས་རིམ་པ་བདུན་གྱིས་འཁོར་ནས་ཡོད་པ་དང་། དེ་སྔ་ཚན་རིག་པའི་ཁོར་ཞགས་དེ་ནི་རྒྱུ་སྐར་གཞན་འཐོར་བའི་རོ་རྡོའམ་སྙིགས་མ་དེ་འདྲས་བྱས་པར་སེམས་ཀྱི་ཡོད་ཀྱང་ཉེ་དུས་ཁོར་ཞགས་དེ་ནི་སྐར་མ་དུ་བ་མཇུག་རིང་གིས་བྱས་པར་བརྗོད་ཀྱི་ཡོད།

༧ རྒྱུ་སྐར་རྣམ་རྒྱལ་ནི་ཉི་མའི་ཁྱིམ་རྒྱུད་ཀྱི་ནང་གི་བདུན་པ་དང་། ཕྱི་རོལ་དུ་སྤྲིན་པ་ལྗང་གུ་དེ་འདྲས་བཏུམས་ནས་ཡོད་པ་ཡིན།

༨ རྒྱུ་སྐར་མཚོ་རྒྱལ་ནི་ཉི་མའི་ཁྱིམ་རྒྱུད་ནང་གི་རྒྱུ་སྐར་མཐའ་མ་དེ་ཆགས་ཡོད་པས་ཉི་མ་དང་ཐག་རིང་ཤོས་སུ་ཡོད་སྟབས། ང་ཚོས་རྒྱང་ཤེལ་མ་སྤྱད་པར་མཐོང་མི་ཐུབ་པ་ཡིན། དམིགས་བསལ་ནི་རྒྱུ་སྐར་དེར་རྟག་ཏུ་རླུང་འཚུབ་ཆེན་པོས་རྒྱུགས་པ་དང་དེའི་རླུང་བུའི་མགྱོགས་ཚད་ནི་ཚོུད་གཅིག་གི་ནང་མེ་ལེ་༡༢༤༣ འགྲོ་ཐུབ་པ་དེ་ཡིན།

གོང་གསལ་རྒྱུ་སྐར་དེ་དག་ལ་རང་འཁོར་ཟླ་བ་ཡོད་མེད་དང་། ཡོད་པ་ལའང་མང་ཉུང་གི་ཁྱད་པར་ཡོད་དེ། འཛམ་བུ་གླིང་ལ་ཟླ་བ་གཅིག་དང་། མིག་དམར་ལ་ཟླ་བ་གཉིས། སྤེན་པ་ལ་ཟླ་བ་ཉེར་བཞི། ཕུར་བུར་ཟླ་བ་རེ་གསུམ་བཅས་ཡོད་པ་ཡིན།

2011-04-01

སྤྲ།

སྤྲ་ནི་ལུས་པོ་སྤྲེའུ་དང་འདྲ་བ་ལ་ལག་མཐིལ་དང་ངོ་མདོང་ནག་པོ་ཡིན་པ་དང་རྔ་མ་ཧ་ཅང་རིང་པོ་ཡོད་ལ་སྤུ་མདོག་སྐྱ་བོ་དང་སེར་པོ་དེ་འདྲའང་ཡོད་པ་ཡིན། རང་གཤིས་སྤྲེའུ་ལས་ཞེ་དྲག་གི་ཡ་རབས་དང་སེམས་པ་ཆུང་བ་ཡོད། ཟས་སུ་གཙོ་བོ་རྩེ་ཤིང་གི་ལོ་མ་དང་ས་བོན་དང་ཤིང་ཏོག་སྤྱོད་ཅིང་། སེམས་ཅན་དེ་ནི་མནའ་རབས་ཀྱི་སྲོག་ཆགས་ཀྱི་གྲལ་དུ་གཏོགས་པ་ཡིན། དབྱིན་སྐད་ལ་དེའི་མིང་ལ། Langur ཟེར་ཞིང་། དབྱིན་བོད་ཚིག་མཛོད་གསར་མར་Baboon ལ་སྤྲ་ཞེས་བསྒྱུར་འདུག་ཀྱང་འཐད་པར་མི་སེམས།

2011-03-31

ཐོན་མི་སམ་བྷོཊ།

ང་ཚོ་བོད་གངས་ཅན་ཀྱི་ལྗོངས་སུ་དབྱངས་གསལ་གྱི་ཡི་གེའི་སྲོལ་ཐོག་མར་གཏོད་པ་པོ་སློབ་དཔོན་ཐུ་མི་སམ་བྷོཊ་ནི།

སྤྱི་ལོའི་དུས་རབས་བདུན་པའི་༼༦༡༧༽ནང་ཐོན་ལུག་ར་ཁ་བར་བློན་པོ་ཐོན་མི་ཨ་ནུ་ར་ག་ཏ་བྱ་བའི་སྲས་སུ་འཁྲུངས། ཆོས་འབྱུང་ཁ་ཤས་སུ་ཡུལ་དང་ཡབ་ཀྱི་མཚན་མི་འདྲ་བ་ཡང་བྱུང༌། ཐོན་མི་སམ་བྷོཊ་ཞེས་པའི་དོན་ནི་ཐོན་མི་རིགས་རུས་ཀྱི་མིང་དང་སམ་བྷོཊ་བོད་ཡང་དག་པའམ་ཀུན་ཏུ་བཟང་པོ་ཞེས་པའི་དོན་ཡིན། སྤྱི་ལོ་༦༢༩ས་མོ་གླང་གི་ལོར་ཆོས་རྒྱལ་སྲོང་བཙན་སྒམ་པོ་དགུང་བཅུ་གསུམ་དུ་ཕེབས་པའི་ཚེ། རྒྱལ་སྲིད་སྐྱོང་བའི་སྲིད་ཀྱི་འཁོར་ལོ་འཛིན་པའི་དགའ་སྟོན་གྱི་མཛད་སྒོར་མཐའ་བཞིའི་རྒྱལ་པོའི་དཔྱ་དང་སྐྱེས་འབུལ་བ་ལ། སྐྱེས་སུ་འདི་ལྟར་བྱུང་ཞེས་ཡིག་ལན་གཏོང་བ་ལ་བོད་རང་ལ་ཡི་གེ་མེད་པས་ལན་རྣམས་རྒྱལ་ཁམས་དེ་དག་གི་ཡི་གེ་རང་དུ་བྲིས་དགོས་པ་བྱུང་བར་བརྟེན། ཆོས་རྒྱལ་གྱིས་བོད་ཀྱི་རྒྱལ་ཁམས་ཆོས་བཞིན་སྐྱོང་བར་ཡི་གེ་ངེས་པར་དུ་དགོས་པར་གཟིགས་ནས་བློན་པོ་བློ་གསལ་བ་དུ་མ་བཏང་ཀྱང་ཡི་གེ་སློབ་མི་ཐུབ། དེ་ནས་ཆོས་རྒྱལ་གྱིས་བློན་པོ་ཐོན་མི་ཨ་ནུའི་བུ་སམ་བྷོཊ་བྱ་བ་མཁས་མཛངས་བློ་གྲོས་དང་ལྡན་པ་ཐོན་མི་སམ་བྷོཊར་བཀའ་མངགས་མཛད་པ་བཞིན་དེས་བཀའ་སྤྱི་བོར་བླངས་བཞིན་ཡི་གེ་སློབ་པའི་རྟེན་དུ་གསེར་ཕྱེ་བྲེ་གང་བསྣམས་ནས་༼༦༣༣༽རྒྱ་གར་དུ་བྱོན། དེའི་ཚེ་ཐོན་མི་དགུང་ལོ་བཅོ་ལྡ་ཡིན་པ་དང་གཡོག་འཁོར་བཅུ་ཡོད་པ་བོད་མཁས་པས་གསུངས། ཐོན་མི་བལ་ཡུལ་རྒྱུད་རྒྱ་གར་དུ་ཕེབས་ཟིན་པ་དང་དེའི་ཚེ་སྒྲ་དང་ཡི་གེར་མཁས་པ་བྲམ་ཟེ་ལི་བྱིན་ཡིན་པ་གསན་པས། གསེར་རྣམས་ཕུལ་ནས་བྲམ་ཟེ་ལི་བྱིན་སློབ་དཔོན་དུ་བསྟེན་ཅིང་ཡིག་རིགས་དུ་མ་ལ་མཁས་པར་སྦྱངས། དེ་ནས་བྲམ་ཟེས་བཀའ་བཞིན་པཎ་ཊི་ཏ་ལྷ་རིག་པའི་སེངྒེ་བསྟེན་ནས་སྒྲ་དང་ཚད་མ། རྒྱལ་པོའི་ལུགས་ཀྱི་བསྟན་བཅོས། སྤྱན་རས་གཟིགས་ཀྱི་མདོ་རྒྱུད་ཉེར་གཅིག་དང་བཅས་པ་སྦྱངས། ༼ཆོས་འབྱུང་འགའ་ཞིག་ཏུ་ལི་བྱིན་དང་ལྷ་རིག་པའི་སེང་གེ་གཅིག་ཏུ་གསུངས།༽ དེ་ལྟར་ཐོན་མི་རྒྱ་གར་དུ་ལོ་བདུན་གྱི་བར་བཞུགས་ནས་ཕྱིར་བོད་དུ་ལོག་པའི་ཚེ། སྒྲ་རིག་པའི་བསྟན་བཅོས་དག་དང༌། འདུས་པ་རིན་པོ་ཆེའི་ཏོག ཟ་མ་ཏོག་བཀོད་པ། སྤྱན་རས་གཟིགས་ཀྱི་མདོ་རྒྱུད་ཉེར་གཅིག དགེ་བ་བཅུའི་མདོ་ལ་སོགས་པ་གདན་དྲངས་པ་དང༌། རྒྱ་གར་རྒྱལ་པོའི་བོད་ཀྱི་ཆོས་རྒྱལ་སྲོང་བཙན་སྒམ་པོར་སྐྱེས་ལེན་བསྐུར་བའི་མདོ་སྡེ་དཀོན་མཆོག་སྤྲིན། དམ་ཆོས་པད་དཀར། གཙུག་ཏོར་དྲི་མེད་ཀྱིགཟུངས། ནོར་བུ་ཀཻ་ཏུ་སྟེ་འོད་ཟེར་ཅན་ཞིག་བསྐུར་རྣམས་བསྣམས་ནས་བྱོན། དེ་ནས་ཆོས་རྒྱལ་གྱིས་དགའ་སྟོན་མཛད་ཅིང་ཆོས་རྒྱལ་རང་ཉིད་ཀྱིས་ཀྱང་ལོ་གསུམ་གྱི་བར་མཚམས་བཅད་ཀྱིས་སྐུ་མཁར་ཕ་བོང་ཁའི་མ་རུར་བཞུགས་ཀྱི་ཡི་གེ་སྦྱངས་ཤིང༌། བློན་འབངས་དག་ལ་ཡང་སྦྱོང་དུ་གཅུགས་པས་བོད་གངས་ཅན་གྱི་ལྗོངས་སུ་ཡི་གེ་གསར་རྙེད་དང་དར་ཁྱབ་བྱུང༌། ཐོན་མི་དེ་བོད་ཕྲུག་མཛངས་མི་བདུན་གྱི་བཞི་པར་བགྲངས་པ་ཡིན་མོད་ཀྱང༌། དེ་དག་གཞན་ལས་ལྷག་པ་བོད་ལོང་བའི་གླིང་དུ་ཡི་གེའི་མིག་བྱིན་པར་བྱེད་པོ་ཡིན་པས་གཞན་ལས་བཀའ་དྲིན་ལྷག་པ་ཡིན། ཐོན་མི་བོད་ཡིག་དང་པོ་གཏན་ཕེབས་གནང་སྐབས་རྒྱ་གར་གྱི་ཡི་གེ་ནང་བོད་སྐད་ལ་ཉེ་བར་མི་མཁོ་བ་མང་དུ་ཡོད་པ་རྣམས་བོར་བ་དང༌། བོད་ཀྱི་རང་སྐད་ལ་མཁོ་བ་རྒྱ་གར་ཡི་གེའི་ནང་མེད་པ་འགའ་ཤས་ཡོད་པ་བརྣན་ནས་བོད་ཡིག་གསལ་བྱེད་སུམ་ཅུ་དང་དབྱངས་ཡིག་བཞིར་གཏན་ལ་ཕབ། དེ་ཡང་རྒྱ་གར་ཡི་གེ་ལྔ་བཅུ་ལས་དབྱངས་ཡིག་ཨཱ་ཨིའ་ཨཱུ་རྀ་རཱྀ་ལྀ་ལཱྀ་ཨཻ་ཨཽ་ཨཾ་ཨཿརྣམས་དང༌། གསལ་བྱེད་འཐུག་པོ་ལྔ་དང་ལོག་པ་ལྔ་མཐའི་ཀྵ་ཡིག་བཅས་ཉེར་གཉིས་དོར་བས་ཉེར་བརྒྱད་ལྷག་པའི་སྟེང་ཅ་ཆ་ཇ་དང་ཞ་ཟ་འ་སྟེ་དྲུག་བསྣན་པས་བོད་ཡིག་ལ་དབྱངས་དང་གསལ་བྱེད་སོ་བཞི་བྱུང་བ་ཡིན། ༼དགེ་ཆོས་ཀྱི་གསེར་ཐང་དུ་ཙ་ཚ་ཛ་ཞ་ཟ་འ་གསར་དུ་བསྣོན་པ་དང༌། དེ་ཡང་གསར་དུ་བཟོ་སྐབས་ཅ་སོགས་དང་མ་ནོར་བའི་ཆེད་ཙ་བཏགས་སོགས་བྱུང་བ་དང༌། དེ་ཡང་ལེགས་སྦྱར་ལ་ཙ་སོགས་ཡོད་པར་སོང་མ་དཔེའི་ཡི་གེ་ཡང་ལེགས་སྦྱར་གྱི་ཡི་གེ་མིན་པར་གྷུཔ་ཏའི་ཡི་གེ་ཡིན་གསུངས་འདུག འོན་ཀྱང་ཚེ་བརྟན་ཞབས་དྲུང་གིས་ལེགས་སྦྱར་གྱི་ཡི་གེ་ལའང་ཙ་རྟགས་སོགས་ཡོད་པས། སློབ་དཔོན་གྱི་ཙ་རྟགས་སོགས་ཕྱིས་ནས་ཅ་ཆ་སོགས་བཟོས་པར་བཤད་ན་ལེགས་པར་གསུངས།༽ ཡི་གེ་དེ་དག་ལ་བུ་དང་མའི་ཡི་གེ་དང༌། ཤིན་ཏུ་གཅེས་པའི་ཡི་གེ་དང༌། རྐང་པ་ཅན་གྱི་ཡི་གེ། སྲོག་དང་རྐྱེན་གྱི་ཡི་གེ་སོགས་ཡོད། ཐོན་མིའི་བརྩམས་ཆོས་ལ་རྒྱ་གར་གྱི་སྒྲ་མདོ་ཆེན་པོ་བརྒྱད་ཡོད་པ་དང་གྲངས་མཚུངས་པར་སྒྲ་རིག་པའི་བསྟན་བཅོས་བརྒྱད་ཡོད་པ་ལས། སུམ་ཅུ་པ་དང་རྟགས་འཇུག་གཉིས་མ་གཏོགས་གཞན་རྣམས་ནུབ་ནས་ད་ཆ་མེད་པ་ཡིན། དེ་ཡང་སློབ་དཔོན་གྱིས་བོད་ཀྱི་ཡིག་གཟུགས་ཐོག་མར་བཟོ་བའི་དུས། ལནྙཛ་ལྷའི་ཡི་གེ་ལས་དཔེ་བྱས་ནས་དབུ་ཅན། ཝ་རྟུ་ཀླུ་ཡི་ཡི་གེ་ལས་དཔེ་བྱས་ནས་དབུ་མེད། ནཱ་ག་ར་མིའི་ཡི་གེ་ལས་དཔེ་བྱས་ནས་ལན་ཝར་གྱི་འབྲི་ཚེགས་ལས་སྟབས་བདེར་བྱས་ཞེས་མཁས་པ་རྣམས་ལ་གྲགས། ཐོན་མིའི་གདུང་རྒྱུད་ཕྱི་མ་ཇི་ལྟར་ཡིན་པ་ནི། ཐོན་མིའི་སྲས་མཧཱ་ས་ཏྭ་ནས། གོང་མ་གྲགས་པ་འབྱུང་གནས་བར་མི་རབས་བཅུ་གསུམ་བྱུང་ཞིང༌། དེས་ཡར་རྒྱབ་དཔོན་ཆེན་དང་གོང་དཀར་གྱི་རྫོང་དཔོན་གོ་གནས་གཉིས་ཀ་བཟུང༌། སྐུ་ཚེ་སྨད་ལ་རབ་ཏུ་བྱུང་སྟེ་གོང་དཀར་རྡོ་རྗེ་གདན་ཞེས་པའི་ཆོས་སྡེ་བཏབ། འདི་ནས་བཟུང་དབོན་སྲས་རྣམས་ལ་སྡེ་པ་ཡར་རྒྱབ་པ་ཞེས་གྲགས་ཞིང༌། ྋགོང་ས་ལྔ་པ་ཆེན་པོའི་དུས་ཡར་རྒྱབ་སྡེ་པ་རྣམ་རྒྱལ་སྐུ་མཆེད་ཅེས་གྲགས་སོ།།

2011-03-27

རང་ལུས་ཡལ་བར་མ་དོར།

རྟག་ཏུ་སེམས་ཅན་དོན་དུ་རང་གི་ལུས།།
ཡལ་བར་མ་དོར་རྗེ་བཙུན་བླ་མ་ལགས།།
ཁྱེད་ཀྱི་སྐུ་ཁམས་བདེ་བར་གནས་པ་ཡང་།།
གཞན་ཅི་མ་ཡིན་སེམས་ཅན་དོན་དག་ལགས།།

རྟག་ཏུ་ཕྲུག་གུའི་དོན་དུ་རང་གི་ལུས།།
ཡལ་བར་མ་དོར་དྲིན་ཆེན་ཨ་མ་ལགས།།
ཁྱེད་ཀྱི་སྐུ་གཟུགས་བདེ་ཐང་ཡོང་བ་ཡང་།།
གཞན་ཅི་མ་ཡིན་ཕྲུག་གུ་རེ་མདུན་ལགས།།

རྟག་ཏུ་བུང་བའི་དོན་དུ་རང་གི་ལུས།།
ཡལ་བར་མ་དོར་མཛེས་ལྡན་པད་མ་ལགས།།
ཁྱེད་ཀྱི་སྐུ་མདངས་གང་རྒྱས་འབྱུང་བ་ཡང་།།
གཞན་ཅི་མ་ཡིན་བུང་བའི་འཚོ་བ་ཡིན།།

རྟག་ཏུ་རང་གི་དོན་དུ་རང་གི་ལུས།།
ཡལ་བར་མ་དོར་ཉམ་ཐག་འགྲོ་བ་རྣམས།།
སོ་སོའི་གཟུགས་པོ་བདེ་བར་འཚོ་བ་ཡང་།།
གཞན་ཅི་མ་ཡིན་རང་དོན་དང་པོ་ཡིན།།

2011-03-24

ཧོ་ལི། རྒྱ་གར་གྱི་ཧིན་དྷུའི་དུས་ཆེན་ཞིག

ར་ས་ཕོ་ཉ།
ཁ་སང་དེ་རིང་ནི་རྒྱ་གར་བྱང་བརྒྱུད་གཙོ་བྱས་པའི་རྒྱ་གར་གྱི་གྲོང་པ་གྲོང་ཁྱེར་གང་སར་ཧོ་ལིའི་དུས་སྟོན་འཚོགས་ནས་ལམ་ཁར་བསྐྱོད་པའི་མི་ཚོར་ཚོན་བཀྲ་བསྐུས་པར་བྱེད་པ་མཐོང་བས། ཁོ་བོ་གཙོས་པའི་བོད་མི་མང་པོ་ཞིག་ལ་ཧོ་ལི་ཟེར་བ་དེ་ག་རེ་ཡིན་ནམ་སྙམ་པའི་དོགས་པ་སྐྱེས་ཡོད་པ་གོར་མ་ཆག དེས་ན་ཁོ་བོས་ཧོ་ལིའི་སྐོར་གྱི་ཡི་གེ་ཏོག་ཙམ་བལྟས་པ་ལས་དེའི་སྐོར་མདོ་ཙམ་འབྲི་བ་ལ། ཧོ་ལིའི་དུས་སྟོན་གྱི་རྣམ་པ་ནི་ཁོ་བའི་བླངས་པའི་འདྲ་དཔར་ནང་གསལ་ལྟར། ཚོན་ཁྲ་བླུགས་པའི་ཆུ་དང་རྒུ་ལླ་gulalཞེས་པའི་རང་བྱུང་གི་ཚོན་ཁྲའི་ཕྱེ་མ་དག་གིས་མི་ལ་གཏོར་བར་བྱེད་ཅིང་། དེའི་ཉིན་གྱི་སྔ་དགོང་དུ་ཆོས་ཕྱོགས་ཀྱི་ཆོ་ག་དེ་འདྲ་འདོན་པ་དང་མེ་བཏང་བ་ཡང་བྱེད་ཀྱི་འདུག དུས་སྟོན་དེ་ནི་ཕལ་ཆེར་ལོ་ལྟར་སྤྱི་ཟླ་གསུམ་པའི་འགོ་སྟོད་དུ་འཁེལ་གྱི་ཡོད་ལ་མི་མང་ཚོས་བཀྲག་མདངས་ལྡན་པའི་ཚོན་ཁྲ་དེ་དག་གིས་བདེ་བ་དང་ཚེ་དང་ནུས་མཐུ་རྣམས་མཚོན་པར་ཡིད་ཆེས་བྱེད་ཀྱི་ཡོད། འདི་ག་རྒྱ་གར་ལྷོ་ཕྱོགས་སུ་བོད་མི་རྒན་རབས་ཚོས་ཧོ་ལིའི་དུས་སྟོན་དེ་བྱས་པའི་རྗེས་ཚ་བ་ཏོག་ཙམ་ཆུང་དུ་འགྲོ་བའི་འགྲེལ་བརྗོད་ཡང་བྱེད་ཀྱི་འདུག
ཧོ་ལི་དུས་སྟོན་དེར་ལོ་རྒྱུས་ཀྱི་བྱུང་བ་མང་དག་ཡོད་འདུག་ཀྱང་གྲགས་ཆེ་བ་ཧོ་ལི་དང་པོ་བྱུང་ཚུལ་གྱི་སྐོར་དེ་བརྗོད་ན། བཤད་རྒྱུན་ལ་གནའ་སྔ་མོ་ཞིག་ཧི་རན་ཡ་ཀ་སི་པུ་ཞེས་པའི་བདུད་རྒྱལ་ཞིག་ཡོད་པ་དེར་པྲ་ར་ལ་དྷ་ཞེས་པའི་རྒྱལ་སྲས་ཞིག་ཡོད། རྒྱལ་སྲས་དེ་ནི་རྟག་ཏུ་ལྷ་ལ་མཆོད་པར་བྱེད་པ་ལ་སོགས་པའི་དམ་པའི་སྤྱོད་ལ་དགའ་བར་སོང་། རྒྱལ་པོ་གདུག་པ་ཅན་དེ་ཡིད་མ་རངས་པར་རང་གི་གཅུང་མོ་ཧོ་ལི་ཀ་བྱ་བ་མེ་འཚིག་པར་མི་ནུས་པའི་བདུད་མོ་ཞིག་ཡོད་པ་དེར་རྒྱལ་སྲས་གསོད་པའི་བཀའ་བཏང་། བདུད་མོས་རྒྱལ་པོའི་བཀའ་བཞིན་རྒྱལ་སྲས་བཟུང་ནས་མེ་ཐབ་གྱི་ནང་དུ་འཛུལ་ནས་གསོད་པར་བརྩམས་ཀྱང་རྒྱལ་སྲས་མ་ཚིག་པར་བདུད་མོ་མོ་རང་ཚིག་ནས་རང་ལུས་ཐལ་བར་གྱུར། འོན་ཀྱང་རྒྱལ་སྲས་ཀྱི་ཨ་ནི་བདུད་མོ་དེས་མ་ཤི་གོང་དུ་རྒྱལ་སྲས་ལ་དགོངས་སེལ་ཞུས་པ་དང་རྒྱལ་སྲས་ཀྱིས་ཀྱང་དགོངས་པ་དྭངས་པར་བཞེས་ནས་ལོ་ལྟར་མོའི་མིང་དེ་དྲན་རྒྱུའི་ཆེད་དུ་ཧོ་ལི་ཞེས་པའི་དུས་སྟོན་དེ་བཙུགས་པར་གྲགས། ཡང་ལོ་རྒྱུས་གཞན་ཞིག་ཏུ་དུས་སྟོན་དེ་ནི་ཧིན་དྷུའི་ལྷ་ནག་པོ་སྟེ་ཀ་རི་ཤི་ན་དང་ར་དྷ་གཉིས་ཀྱི་རྫོགས་མཐའ་མེད་པའི་བརྩེ་རྡུང་གི་སྐོར་ནས་འགྲེལ་བརྗོད་ཡང་བྱེད་ཀྱི་ཡོད་འདུག་པ་བཅས་སོ།།

2011-03-20

ཟླ་བའི་མཆོག་ཏུ་གྲགས་པ།

དེ་རིང་ཁོ་བོས་བླངས་པའི་གོང་གསལ་ཟླ་བའི་འདྲ་དཔར་དེ་མཐོང་ཚེ། ཁྱེད་ཀྱི་སེམས་སུ་ཨ་ཙི་ཁ་སང་ཚེས་བཅོ་ལྔའི་ཟླ་བ་དེ་ཇི་འདྲའི་ཆེན་པོ་ཡོད་དམ་སྙམ་སྲིད། དེ་ལྟར་སེམས་པ་ནི་དངོས་པོའི་གནས་ཚུལ་དང་མཐུན་པ་ཞིག་སྟེ་ཁ་སང་གི་ཟླ་བ་དང་དེ་ནི་གཞན་དང་མི་འདྲ་བ་ཞིག་ཡོད་པ་ཡིན།
སྤྱི་ལོ་༢༠༡༡ ཟླ་བ་༣ པའི་ཚེས་༡༩ སྟེ། ཁ་སང་ཆོ་འཕྲུལ་དུས་ཆེན་གྱི་མཚན་མོར་ཤར་བའི་ཟླ་བ་དེ་ནི་ཟླ་བའི་མཆོག་ཏུ་གྲགས་ཤིང་། དེ་ནི་སྤྱི་ལོ་༡༩༩༣ ལོ་ནས་བཟུང་ད་བར་ལོ་ངོ་༡༨ རིང་ཤར་བའི་ཟླ་བ་ཆེ་ཤོས་སྟེ། འཛམ་གླིང་དང་བར་ཐག་མེ་ལི་༢༢༡་༥༦༥ ཙམ་ལས་མེད་པའི་ཉེ་འཁྲིས་སུ་སླེབས་པའི་ཟླ་བ་དེ་ཡིན། དེ་འདྲའི་ཟླ་བ་ཆེན་པོ་ཞིག་ང་ཚོའི་འཛམ་གླིང་དེར་སྤྱི་ལོ་༢༠༢༩ བར་འཆར་རྒྱུ་མེད་པ་རེད་འདུག

2011-03-18

སྦྲུམ་མ་མཆི་རྐྱེན་རྒྱ་གར་གྱི་སྨན་པ་ཕྱིར་ཕུད་བྱས་པ།

ཟླ་བ་སྔོན་མའི་ནང་བུད་མེད་སྦྲུམ་མ་༡༨ མཆི་རྐྱེན་དང་འབྲེལ་བའི་འོག་རྒྱ་གར་རཱ་ཇེ་སེ་ཏན་Rajestan གྱི་མངའ་སྡེའི་དཔོན་པོ་ཚོས། ནད་པར་སྣང་མེད་བྱས་པ་དང་ཚུལ་མིན་གྱི་སྨན་ཉོས་པའི་ཉེས་མིང་འོག སྨན་པ་མཐོ་གྲལ་གསུམ་སྨན་ཁང་ནས་ཕྱིར་ཕུད་བཏང་ཡོད།
དེ་ཡང་། ཇོ་དྷེ་པུར་Jodhpur གྲོང་ཁྱེར་གྱི་སྨན་ཁང་གཉིས་ཀྱི་ནང་སྨན་པས་IV fluids ཞེས་པའི་གནམ་ཁབ་རྒྱབ་པ་ལས་བུད་མེད་དེ་དག་སྔ་ལམ་དུ་སོང་ཡོད་པ་དང། བརྟགས་དཔྱད་ཁང་ནས་བརྟགས་དཔྱད་བྱས་པ་ལས་Local ཉེས་འཁྲིས་སུ་བཟོས་པའི་ IV fluids ཞེས་པའི་སྨན་ཆུ་དེ་དག་ནི་སྐྱོན་ཤོར་ཟིན་པ་ཡིན་པའི་ཐག་གཅོད་བྱས་འདུག དཔོན་རིགས་ཚོས་བུད་མེད་དེ་དག་ལ་གནམ་ཁབ་རྒྱབ་པའི་རྗེས་རྨ་ཁ་ནས་ཁྲག་ཚད་མེད་པ་འདོན་ནས་ཤི་བ་བརྗོད། རྒྱ་གར་ནང་ལོ་ལྟར་བུད་མེད་སྦྲུམ་མ་ཁྲི་ཁྲག་མང་པོར་སྲོག་སྐྱོན་འབྱུང་གི་ཡོད་པས་རྒྱ་གར་གྱི་མ་ཕྱོགས་ཀྱི་མཆི་སྐྱོན་གྱི་ཐོ་ནི་འཛམ་གླིང་ནང་མཐོ་ཤོས་སུ་སླེབས་ཀྱི་ཡོད།

2011-03-12

བོད་ཡིག་ཚིག་མཛོད་གཉེན་ཆས་དང་བོད་ཡིག་ཁ་པར།


ཉེ་དུས་གསར་དུ་འཐོན་པའི་ཀུ་ཤུའི་རྟགས་ཅན་ཁ་པར་སོགས་ཀྱི་ཚིག་མཛོད་དང་འབྲེལ་ནས་བོད་ཡིག་སྤྱད་ནུས་པའི་ཁ་པར་གཉེན་ཆས་ཀྱི་སྐོར་གླེང་བ།

ཉེ་དུས་ཨམ་ནེའི་སྤྲུལ་སྐུས་ཐུགས་ཁུར་བཞེས་པའི་འབྲས་བུར་གྲགས་པའི་ཚིག་མཛོད་གཉེན་ཆས་ཀུ་ཤུ་རྟགས་ཅན་གྱི་ཁ་པར་དང་ཨ་ཡེ་པེེཊ་དང་ཨ་ཡེ་ཏ་ཆེ་ནང་དུ་སྤྱད་ནུས་པ་ཞིག་འཐོན་ཡོད་པ་ཤེས་ཕྲལ། ལམ་སེང་ཨ་ཡེ་པེཊ་བརྒྱུད་ནས་ཚིག་མཛོད་དེ་ཕབ་བཅུགས་བྱས་པ་ཡིན། ཚིག་མཛོད་དེའི་མིང་ལ་ཕུར་པ་ཞེས་བཏགས་འདུག་པས་ང་ཚོས་ཁ་པར་སོགས་དྲ་རྒྱར་འཐུད་རྗེས་apps store ཏེ་གཉེན་ཆས་ཚོང་ཁང་ཞེས་པའི་སྡེ་ཚན་དེ་ནང་འཛུལ་ནས་phurba བྲིས་ནས་འཚོལ་ན། གོང་གསལ་ཚིག་མཛོད་གཉེན་ཆས་དེ་བདེ་བླག་རྙེད་ཐུབ་ཅིང་གཉེན་ཆས་ཕབ་ལེན་བྱས་པར་སོ་སོའི་ཐོ་འགོད་གསང་ཚིག་སོགས་ཡོད་དགོས་པ་ཡིན།

ཚིག་མཛོད་དེར་ལེགས་པའི་ཆ་ནི།
༡ རིན་མེད་ཐོག་ཕབ་ལེན་ཐུབ་པ།
༢ བོད་རྒྱ་ཚིག་མཛོད་ཆེན་མོ་ཡོད་པ།
༣ བོད་ཡིག་དབྱིན་ཇི་དང་དབྱིན་ཇི་བོད་ཡིག་གཉིས་ཆར་བསྒྱུར་ཐུབ་པ།

ཚིག་མཛོད་དེར་མི་ལེགས་པའི་ཆ་ནི།
༡ བོད་ཡིག་འགའ་ཞིག་དབྱིན་ཡིག་ཏུ་བསྒྱུར་དུ་ནང་དོན་ཏག་ཏག་མེད་པ།
༢ ཚིག་མཛོད་ཁུངས་ལྡན་མིན་པ་དེ་འདྲ་བླུགས་པ།

ཚིག་མཛོད་དེར་ཕྱིས་སུ་བཀང་དགོས་པའི་ཆ་ནི།
༡ དུང་དཀར་ཚིག་མཛོད་དང་ནང་དོན་རིག་པའི་ཚིག་མཛོད་དེ་འདྲ་བླུགས་དགོས་པ།
༢ ཤེས་རིག་ནས་བཏོན་པའི་དབྱིན་བོད་ཚིག་མཛོད་གསར་མ་བླུགས་དགོས་པ།
༣ དག་ཡིག་གསར་སྒྲིག་བླུགས་དགོས་པ།
༤ བོད་ཀྱི་སུམ་དག་གི་འགྲོ་སྟངས་བླུགས་དགོས་པ།

དེ་དང་ཕྱོགས་མཚུངས་ཁ་པར་དང་འབྲེལ་བའི་བོད་ཡིག་གཉེན་ཆས་ཀྱི་སྐོར་ཏོག་ཙམ་གླེང་ན། ཟླ་ཤས་སྔོན་ནས་ཀུ་ཤུ་རྟགས་ཅན་གྱི་བཟོ་གྲྭས་བོད་ཡིག་གཉེན་ཆས་བཟོས་པ་དེ་ནས་བོད་ཡིག་སྤྱད་མཁན་མང་དུ་ཕྱིན་པ་དང་དོ་སྣང་ཅན་མང་དུ་ཕྱིན་པ་ནི་སྨོས་མེད་ཡིན་ནའང་། ཡར་རྒྱས་མུ་འཐུད་གཏོང་དགོས་པར་སོང་ང་ཚོས་དེ་ཙམ་གྱིས་ཕྱོགས་ཤས་མ་བྱས་པར་ད་དུང་ཁ་པར་དང་འབྲེལ་བའི་བོད་ཡིག་གཉེས་ཆས་མང་པོ་བཟོ་སྐྲུན་ཐུབ་ན་མི་རིགས་དང་རིག་གཞུང་ལ་ཕན་འབྲས་ཆེ་བར་མཐོང་། སྤྱིར་བཏང་ཀུ་ཤུ་རྟགས་ཅན་གྱི་ཁ་པར་སོགས་ཀྱི་ནང་བོད་ཡིག་བཟོ་སྐྲུན་ཐུབ་པ་ནི་ཆེད་མངགས་འོས་པ་ཞིག་ཡིན་ནའང་། ཀུ་ཤུ་རྟགས་ཅན་གྱི་དངོས་པོ་དེ་ཚོ་ནི་ཧ་ཅང་གི་རིན་གོང་ཆེན་པོ་ཡིན་པར་བརྟེན་མི་མང་པོ་བེད་སྤྱད་མི་ཐུབ་པས་དེ་ཚོད་ཕན་འབྲས་ཆུང་བ་ཡིན་ན། དེ་ལས་རིན་གོང་ཁེ་བ་དང་ཁྱབ་འཕེལ་ཆེ་བའི་ཨེན་ཊོ་ཝཊེ་Android གཉེན་ཆས་དང་ནོ་ཁེ་ཡའི་Nokia གཉེན་ཆས་ Symbian དང་ལྒི་ཁུང་རྟགས་ཅན་གཉེན་ཆས་སོགས་ཀྱི་ནང་དུ་བོད་ཡིག་སྤྱད་ཐུབ་པ་བཟོ་སྐྲུན་ཐུབ་ན་གཏན་གཏན་ད་ལྟའི་དེ་ལས་བརྒྱ་གྱུར་གྱི་ཕན་འབྲས་ཆེ་བ་ཡོང་སྲིད་པ་འདུག་ན། ད་ལྟ་བོད་ཡིག་གཉེན་ཆས་བཟོ་སྐྲུན་ཤེས་པ་ཚོས་རང་གི་ཡོན་ཏན་སྦས་སྐུང་མ་བྱས་པར་བོད་རིགས་གཞན་དང་སློབ་སྟོན་དང་། ཅུང་ཟད་ཤེས་པ་ཚང་མས་མཉམ་རུབ་ཀྱིས་བེད་འབུངས་བྱས་ན། རིང་མིན་དེང་རབས་ཀྱི་ལམ་བུར་བསྐྱོད་བཞིན་པའི་མི་རབས་གསར་པ་དེས་བོད་ཡིག་ལག་པས་བྲིས། བོད་སྐད་ལྕེ་ཡིས་རྒྱག བོད་ཟས་ཁ་ལ་ཟས། བོད་ཞེན་སེམས་ལ་བཅངས། བོད་ཆས་ལུས་པ་གྱོན་པའི་རེ་འདུན་དེ་གྲུབ་ལ་ཉེ།

2011-03-04

ནང་དོན་རྟག་ཏུ་ལྗང་གུར་གནས་པར་ཤོག


འདི་ནི་ངས་བླངས་པའི་དཔར་གསར་ཤོས་ཤིག་ཡིན། འདིས་ཁྱེད་རྣམ་པར་ལོ་གསར་ལ་འཚམས་འདྲི་མཚོན་ཐུབ་པའི་རྟེན་འབྲེལ་ཞུ།

2011-01-20

གླེན་པ་གཉིས།


སྔོན་ལུང་པ་ཞིག་ལ་རྡོ་རྗེ་དང་ཀུན་དགའ་ཟེར་བའི་གྲོགས་པོ་གླེན་པ་གཉིས་ཡོད། རྡོ་རྗེ་ནི་སེམས་ནང་གི་སྐད་ཆ་ཁ་ནས་བཤད་མ་ཐུབ་པར་བསྒོམ་ནས་རྟག་ཏུ་བློ་བུག་དོག་ནས་སྡོད་མཁན་ཞིག་དང་། ཀུན་དགའ་ནི་རྩེད་མོ་གླེན་རྟགས་ཚ་པོ་དེ་འདྲ་རྩེ་བར་དགའ་མཁན་ཞིག་ཡིན།

ཉིན་ཞིག་ཀུན་དགས་རྡོ་རྗེ་ལ་མཚར་གཏམ་ཐེབས་ཆག་ཞིག་བཤད་ཀྱང་རྡོ་རྗེས་གད་མོ་མ་བགད་པར་བརྟེན། ཀུན་དགས་རྡོ་རྗེ་བགད་ཆེད་ཨི་ཙི་གུ་ལུ་བླངས་པས། རྡོ་རྗེ་དགས་མོ་ཤོར་ཀྱང་ད་དུང་མུ་འཐུད་བླངས་པས་རྡོ་རྗེ་ཤི་གྲབས་བྱས། འོན་ཀྱང་དེའི་མོད་ལ་ཁང་པའི་ཕྱི་རོལ་ནས་ཁྱིས་ཟུག་པ་ལས་རེ་ཞིག་ཀུན་དགས་ཨི་ཙི་གུ་ལུ་བླང་རྒྱུ་བཞག་ནས་བལྟ་བར་སོང་།

ཉིན་ཞིག་ཁོང་གཉིས་ཆུ་བརྒལ་བར་མཚོ་ཞིག་གི་འགྲམ་དུ་སོང་། ཀུན་དགས་ཆུ་རྐྱལ་ཡག་པོ་ཤེས་ཀྱང་རྡོ་རྗེ་ཡག་པོ་ཤེས་ཀྱི་མེད། དེར་ཁོང་གཉིས་ཆུ་རྩེད་རྩེས་ནས་ལུས་པོ་ཡོངས་རྫོགས་ནུབ་ཙམ་གྱི་ཆུ་དཀྱིལ་དུ་སླེབས་དུས། ཀུན་དགས་རྩེད་མོ་རྩེས་ནས་རྡོ་རྗེ་ཆུའི་ནང་མར་ཡུན་རིང་སྣུབས་པས་རྡོ་རྗེ་ཤི་གྲབས་བྱས། འོན་ཀྱང་སྟབས་ལེགས་ནས་མཚོའི་གྲམས་སུ་ཤྭ་བ་ཞིག་ཆུ་འཐུང་སར་སླེབས་པ་ཀུན་དགས་མཐོང་ནས་བལྟ་བར་ཕྱིན། གོང་གསལ་རྩེད་མོ་གླེན་རྟགས་ཚ་པོ་དེ་གཉིས་རྩེ་དུས་རྡོ་རྗེས་རང་ཉིད་ཤི་གྲབས་བྱེད་ཚུལ་ཀུན་དགའ་ལ་ཚིག་གཅིག་མ་ལབ་ཀྱང་སེམས་སུ་བཟོད་མི་ཤེས་པའི་འཇིགས་སྣང་དང་ཁོང་ཁྲོ་ཟ།

ཡང་ཉིན་ཞིག་ཁོང་གཉིས་རྟ་གཞོན་ནས་ཕྱིན། ཀུན་དགའ་ནི་རྟ་བཞོན་རྒྱུར་དགའ་ཞིང་བཞོན་མཁས་ལ་རྡོ་རྗེ་ནི་དེ་ལས་ལྡོག་སྟེ་རྟ་བཞོན་རྒྱུར་སྐྲག་ཅིང་བཞོན་ཡང་ཡག་པོ་ཤེས་ཀྱི་མེད། རྡོ་རྗེས་རྟ་བཞོན་ནས་སྔོན་ལ་ཕྱིན། ཀུན་དགས་དེའི་མཇུག་དེ་གར་ཕྱིན། ཀུན་དགས་རྡོ་རྗེ་རྟ་བཞོན་རྒྱུར་སྐྲག་གི་ཡོད་པ་ཤེས་ཀྱི་ཡོད་པས་རྩེད་མོ་རྩེས་ནས་རྡོ་རྗེའི་རྟ་ལ་རྟ་ལྕག་ཞུས། རྡོ་རྗེའི་རྟ་རྒྱུགས་ཕྱིན་པས་རྡོ་རྗེ་ཞེད་ཐག་ཆོད་ནས་མ་བྱས་དང་ཟེར་ཀྱང་ཀུན་དགས་མ་ཉན་པར་ད་དུང་རྡོ་རྗེའི་རྟའི་མཇུག་ཏུ་རྒྱུགས་ཕྱིན་ནས་རྟ་ལྕག་ཞུས་པས། རྡོ་རྗེས་ཁོང་ཁྲོང་ཟ་ནས་སྐེད་པ་ནས་གྲི་བཏོན་ནས་ཙུག་གུར་སྡོད་དང་ཟེར་ནས་མིག་གིས་མ་བལྟས་པར་གྲི་བརྒྱབ་གཡུག་བྱས་པས། རྒྱབ་ནས་རྟ་ལྕག་ཞུ་བར་འོང་ཀུན་དགའི་སྐེ་ལ་ཕོག་ནས་དེ་མུར་ཀུན་དགའ་ས་ལ་བརྒྱལ།
ཡུན་རིང་མི་འགོར་བར། ཀུན་དགའ་སྲོག་དང་བྲལ། རྡོ་རྗེ་གྲོགས་པོ་དང་བྲལ། ཁྲིམས་ཁང་གི་ལག་ལྕག་གྱང་དང་བྲལ། བཙོན་ཁང་ཐོ་དེབ་༢༣༤ སྨྱུ་གུ་དང་བྲལ། ཁོ་བོའི་རྩོམ་སྒྲུང་བརྗོད་བྱ་དང་བྲལ།

ལེགས་བཤད།
རང་ཚོད་རང་གི་མ་བཟུང་།།
རང་གཏམ་གཞན་ལ་མ་བཤད།།
གླེན་རྟགས་ཁོ་ན་བྱེད་ན།།
གླེན་པ་གྲོགས་དང་བྲལ་ཡོང་།།

2011-01-13

Virus? ཝི་རསེ་བྱ་བ་དེ་གང་ཡིན་ནམ།


《༡》
ཝི་རསེ་འམ་གཉེན་སྲིན་ནི་ཆེས་ཆུང་བའི་སྐྱེ་དངོས་ཕྲ་མོ་ཞིག་ཡིན་ཞིང་དེ་ནི་གློག་རྡུལ་གྱི་ཆེ་ཤེལ་ལ་མ་བསྟེན་པར་མཐོང་མི་ནུས་པའི་ཆོས་ཤིག་ཡིན། འཛམ་གླིང་ནང་གི་ཆུ་དང་རླུང་གིས་མཚོན་པའི་དངོས་པོ་མཐའ་དག་གི་སྟེང་དུ་ཝི་རསེ་རྙེད་རྒྱུ་ཡོད།

《༢》
ཝི་རསེ་ནི་བྷེཀ་ཊི་རི་ཡ་bacteria སྟེ་ཕྲ་སྲིན་དག་དང་མི་འདྲ་བར་རང་ངོས་ནས་བསྐྱར་སྐྲུན་བྱ་རྒྱུའི་ནུས་པ་མེད་ཅིང་། ཁོང་ཚོས་གཉེན་ཁ་རྒྱས་པའམ་ནད་རིགས་འགོ་ཟིན་པའི་cell སྲེལ་ཏེ་སྦུབས་ཕྲན་ཚོའི་DNAཌི་ཨེན་ཨེ་སྟེང་ཕྱིན་ནས་དེ་དག་ཝི་རསེ་མང་པོ་བསྐྱར་སྐྲུན་བྱེད་ཆེད་དུ་སྤྱོད་ཀྱི་ཡོད།

《༣》
ཁྱེད་ཀྱི་ལུས་པོས་ནད་རིགས་འགོག་བྱེད་ཀྱི་མ་ལག་immune system སྤྱད་ནས་ཝི་རསེ་ཡིས་ནད་འགོ་བའི་སྤྱོད་པ་དེར་འཐབ་མོ་བྱེད་ཀྱི་ཡོད།

《༤》
ཝི་རསེ་ཡིས་སྤྱིར་བཏང་གི་འཆམ་པ་དང་། influenza ཨིན་ཕུལེན་ཛ་ཞེས་པའི་ཚ་བའི་རིམས་ནད་དང་། HIV/AIDS ཨེ་ཛེ་འམ་རེག་དུག་ཞེས་པ་ལ་སོགས་པའི་ན་ཚ་དང་ནད་རིམས་དེ་དག་གི་རྒྱུ་རྐྱེན་བྱེད་ཀྱི་ཡོད།

2011-01-12

ལས་ཀ་འཚོལ་བ།


ཉིན་ཞིག་བུ་ཉིན་བསྐྱལ་གཅན་གཟན་ཁང་ཞིག་ཏུ་ལས་ཀ་འཚོལ་བར་ཕྱིན་པ་རེད། སྐབས་དེར་ལས་མི་བསྡུ་མཁན་དེས་བུ་ཉིན་བསྐྱལ་ལ་བྱ་རིགས་ཤིག་གི་འདྲ་པར་བསྟན་ནས། ཁྱེད་ཀྱིས་བྱ་དེའི་མིང་ག་རེ་ཡིན་མིན་ཤེས་སམ་ཞེས་དྲི་བ་བཏང་། བུ་ཉིན་བསྐྱལ་གྱིས་པར་དེར་ཡག་པོར་བལྟས་རྗེས་་ཧ་གོ་མ་སོང་ལབ། ལས་མི་བསྡུ་མཁན་དེས་་་ཁྱེད་རང་རྒྱུགས་ཚད་ལོན་མ་སོང་བས་ལས་ཀ་གལ་གནད་ཅན་རག་ཡག་ཡོད་མ་རེད། འོན་ཀྱང་ལས་ཀ་གཞན་ཞིག་སྤྲད་ཆོག ཤོད་དང་། ཁྱོད་ཀྱི་མིང་ག་རེ་རེད། ཅེས་དྲིས་པར་བུ་ཉིན་བསྐྱལ་གྱིས་ཨམ་སྦ་ནང་ནས་ཁོ་རང་གི་པར་ཞིག་སྟོན་ནས་་་་དཱ་ཁྱེད་ཀྱིས་པར་ལ་བལྟས་ནས་ངའི་མིང་ག་རེ་ཡིན་ཤེས་པ་བྱོས་དང་་ལབ་པས། ལས་མི་བསྡུ་མཁན་དེ་རེ་ཞིག་ཁ་སྐྱེངས་པོ་བྱུང་བ་རེད།

ཐོག་རྩེག་བཞི་པ། སྐྱ་རེངས། མཚན་གང་ཡི་གེ་བྲིས་ནས་བསྐྱལ།

ཨེ་ལེན་གྷིན་སེ་བྷྲག་གིས་བརྩམས། ར་ས་ཕོ་ཉས་བསྒྱུར།

སུམ་མདོའི་སྟེང་གི་ངའི་ལྒེའུ་ཁུང་གི་ཕྱི་རོལ་དུ་ཕུག་རོན་ཚོས་ཡི་ཤུའི་ཆོས་ཁང་གི་ཟངས་ཀྱི་ཐོག་ཁེབས་ལྒང་གཤོག་པ་འདབ་འདབ་བྱེད།
བྱ་ཞིག་གིས་ཀུ་རུ་ཁའི་སྟེང་འབབ་ནས་རྒྱལ་སའི་སྔོ་སྐྱའི་ཆུ་འཛིན་ལ་བརྟག་ཞིབ་བྱེད།

ལ་རི་་རི་ཝརསེ་larry rivers ཡིས་སྔ་དྲོ་ཚོུད་༡༠ པར་སླེབས་ནས་ངའི་འདྲ་བརྙན་འཁྱེར་འགྲོ

ངས་ཁྱེད་ཀྱི་འདྲ་བརྙན་འཁྱེར་འགྲོ ཕོག་རོན་ལགས།
ངས་ཁྱོད་འདིར་བྲི་ཡི་ཡོད། སྐྱ་རེངས་ལགས།
ངས་ཁྱེད་ཀྱི་དུ་ཁུང་བརྟན་པོ་བཟོ་ཡི་ཡོད། གཞུང་ལམ་གྱི་འགྲུལ་འཁོར་ལགས།

ཨོ་ཧོ་སོམས་དང་། ད་ཁྱེད་ཀྱིས་རྟག་ཏུ་དེ་མཚུངས་གཅིག་གི་སྟེང་སེམས་དགོས།