རང་ལུས་ཡལ་བར་མ་དོར།

རྟག་ཏུ་སེམས་ཅན་དོན་དུ་རང་གི་ལུས།།
ཡལ་བར་མ་དོར་རྗེ་བཙུན་བླ་མ་ལགས།།
ཁྱེད་ཀྱི་སྐུ་ཁམས་བདེ་བར་གནས་པ་ཡང་།།
གཞན་ཅི་མ་ཡིན་སེམས་ཅན་དོན་དག་ལགས།།

རྟག་ཏུ་ཕྲུག་གུའི་དོན་དུ་རང་གི་ལུས།།
ཡལ་བར་མ་དོར་དྲིན་ཆེན་ཨ་མ་ལགས།།
ཁྱེད་ཀྱི་སྐུ་གཟུགས་བདེ་ཐང་ཡོང་བ་ཡང་།།
གཞན་ཅི་མ་ཡིན་ཕྲུག་གུ་རེ་མདུན་ལགས།།

རྟག་ཏུ་བུང་བའི་དོན་དུ་རང་གི་ལུས།།
ཡལ་བར་མ་དོར་མཛེས་ལྡན་པད་མ་ལགས།།
ཁྱེད་ཀྱི་སྐུ་མདངས་གང་རྒྱས་འབྱུང་བ་ཡང་།།
གཞན་ཅི་མ་ཡིན་བུང་བའི་འཚོ་བ་ཡིན།།

རྟག་ཏུ་རང་གི་དོན་དུ་རང་གི་ལུས།།
ཡལ་བར་མ་དོར་ཉམ་ཐག་འགྲོ་བ་རྣམས།།
སོ་སོའི་གཟུགས་པོ་བདེ་བར་འཚོ་བ་ཡང་།།
གཞན་ཅི་མ་ཡིན་རང་དོན་དང་པོ་ཡིན།།