2011-04-16

ཁོང་ཁྲོ་ལངས་པ།

ད་བར་ཡུན་རིང་ཁོང་ཁྲོ་མ་ཟ་ཞིང་སྐབས་རེ་སེམས་སུ་ཁོང་ཁྲོ་ཟ་རྒྱུ་བརྗེས་པ་འདྲ་པོ་ཆགས་སོང་། འོན་ཀྱང་ཁ་ཉིན་ཟླ་བ་༤ ཚེས་༡༥ ཉིན་སྐད་ཆ་བཤད་ཕྱོགས་ཞིག་གིས་ཁོ་བོ་ཁོང་ཁྲོ་ཞེ་དྲག་ཟ་བྱུང་བས་སོ་སོས་སོ་སོར་ངོ་ཚ་ཡང་སྐྱེད་དགོས་པ་འདྲ་པོ་ཆགས་སོང་། དེའི་ཚེ་ང་རང་སེམས་མར་གནན་ནས་ཁོང་ཁྲོ་ཟ་དགོས་པའི་རྒྱུ་མཚན་བསམ་བློ་གཏོང་ཐབས་བྱེད་ཀྱང་རེ་ཞིག་རྒྱུ་མཚན་གང་ཡང་དྲན་གྱིས་མི་འདུག ངའི་སེམས་སུ་ཞེ་ལྡང་ལྟ་བུའི་སྡིག་པ་མེད་པ་དང་། དེས་དགེ་རྩ་རླབས་པོ་ཆེ་འཇོམས་ཀྱི་ཡོད་པ་ཡིད་ལ་དྲན་ནའང་ད་དུང་ཁོང་ཁྲོ་ཞི་རོགས་བྱེད་ཀྱི་མི་འདུག དེ་ནས་ངས་ལྷོད་ལྷོད་བྱས་རྐུབ་ས་སྟེང་ལ་བཞག་དཔེ་ཆ་ཁ་ཕྱེ་ནས་ཀློག་པས་རིམ་པའི་ཁོང་ཁྲོ་ཞི་སོང་བས་དགའ་ཚོར་བྱུང་། དེ་ནས་ང་ཡང་བསྐྱར་ཁོང་ཁྲོ་སྐྱེས་པའི་རྒྱུ་མཚན་བསམས། འོ་རེད། ཁོང་ཁྲོ་དེ་ནི་རྒྱུ་མཚན་མང་པོ་ལས་སྐྱེས་འདུག རྒྱུའི་གཙོ་བོ་ནི་བདག་འཛིན་ཡིན་པ་སྨོས་མེད་ཐོག དམིགས་བསལ་གྱི་རྒྱུ་ནི་ཁོང་ཁྲོ་སྐྱེ་གཞི་རྒྱུ་མཚན་མང་པོ་ཉིན་མ་མང་པོའི་སྔོན་ནས་བསགས་འདུག་པ་དེ་རེད་ཤག་ལ། དེ་ཡང་རྒྱུ་མཚན་ལ་རྒྱབ་བརྟེན་ཡོད་པར་སོང་ཁོང་ཁྲོ་ཞི་དཀའ་བ་ཞིག་སྐྱེས་འདུག ངས་རེ་བར་ད་ནས་ཡུན་རིང་བར་ཁོ་བོར་ཁོང་ཁྲོ་མི་སྐྱེ་བའི་རེ་བ་བྱེད་ཀྱི་ཡོད་པས་ཟིན་བྲིས་དེ་བྲིས་པ་ཡིན། ད་རྗེས་མ་ཁོང་ཁྲོ་ཟ་ན་འདིར་ལམ་སེང་ཟིན་བྲིས་སྤེལ་གྱི་ཡིན། བཟོད་པའི་ཕ་རོལ་ཕྱིན་པར་བྱིན་གྱིས་རློབས།།

No comments:

Post a Comment

བསམ་འཆར་གང་མང་གནང་ན་དགའ་བསུ་ཡོད།