རྐང་སྤོལ་གཞས།

གཞས་ཚིག ར་ས་ཕོ་ཉ།

སོ་ཡ། གཅིག་གཉིས་གསུམ།
རྩེད་མོ་བ་ཚང་མ་རྒྱུགས་ཤར་གློད།

སྔོ་ལྗང་གི་སྤང་གི་སྟེང་ལ།
ཡིད་འོང་གི་སྤོ་ལོ་གཅིག་པུ།
ཕན་ཚུན་དུ་འཕྲོག་རེ་བྱས་པའི།
རྐང་སྤོལ་གྱི་རྩེད་མོ་སྐྱིད་པ།

ལྟད་མོ་བ་ཚང་མས་ཐལ་མོ་འརྡབ།
རང་རང་དགའ་མོས་ཀྱི་ཕྱོགས་ལ་འབོད།
སྤོ་ལོ་ཐེངས་གཅིག་སྒོ་ནང་བླུགས་པའི་རེ་བ་བྱས།

ཨ་མ་དྲན་མ།

ཚེ་སྔོན་ལས་དང་སྨོན་ལམ།
ངན་པའི་འབྲས་བུ་སྨིན་པས།
ངེད་ཅག་མ་བུ་གཉིས་པོ།
མ་ཤི་གསོན་བྲལ་བྱུང་སོང་།

བརྩེ་བའི་ཨ་མའི་བཞིན་རས།
དབང་ཕྱོགས་རི་བོའི་རྩེ་མོར།
ག་དུས་མཇལ་ཡོང་སྙམ་ནས།
བུ་ང་འགུག་ནས་བསྡད་ཡོད།

ལྕང་སྡོང་ལྒང་ལ་བྱིའུ་ཚོའི།
མ་བུ་མཉམ་འཛོམས་མཐོང་དུས།
ང་ཡི་ཨ་མའི་བཞིན་རས།
རང་དབང་མེད་པར་དྲན་གིས།

མིག་ནས་མིག་ཆུ་མང་པོ།
གཏོང་དགོས་བསམས་པ་མེད་ཀྱང་།
ཨ་མའི་འཛུམ་མདངས་འཆར་དུས།
འཛད་རྒྱུ་མེད་པ་ཤོར་སོང་།

སྐྱབས་ཅིག་ཡིད་བཞིན་ནོར་བུའི།
ཐུགས་རྗེ་ཉག་གཅིག་བརྟེན་ནས།
དྲིན་ཆེན་ཨ་མའི་བཞིན་རས།
འཇལ་བའི་སྨོན་ལམ་འདེབས་ཡོད།
༢༠༠༣་ལོར།

ཨ་མ་ལགས།

ཟླ་དགུ་ཞག་བཅུ་ཁོག་ཏུ་ཁྱེར་བ་ང་ཡི་ཨ་མ་ཡིན།
མ་མཐོང་གོང་ནས་བརྩེ་བ་བཅངས་པ་ང་ཡི་ཨ་མ་ཡིན།
སྙིང་དང་འདྲ་བ་གཅེས་སྤྲད་བྱེད་པོ་ང་ཡི་ཨ་མ་ཡིན།
ཁྱོད་ཡང་ཡང་དྲན་ནོ་ང་ཡི་ཨ་མ་ལགས།

ཟླ་དགུ་ཞག་བཅུ་སྤང་ཏུ་ཁྱེར་བ་ང་ཡི་ཨ་མ་ཡིན།
སྙིང་བཅུད་ལྡན་པའི་ནུ་ཞོ་བྱིན་པོ་ང་ཡི་ཨ་མ་ཡིན།
ཉིན་མཚན་མེད་པ་ལྟ་སྲུང་བྱེད་པོ་ང་ཡི་ཨ་མ་ཡིན།
ཁྱོད་ཡང་ཡང་དྲན་ནོ་ང་ཡི་ཨ་མ་ལགས།

ཟླ་དགུ་ཞག་བཅུ་རྒྱབ་ཏུ་ཁྱེར་བ་ང་ཡི་ཨ་མ་ཡིན།
དགོན་པ་གང་སར་མཆོད་མཇལ་ཁྲིད་པོ་ང་ཡི་ཨ་མ་ཡིན།
བླ་མ་གང་སར་བྱིན་རླབས་ཞུ་བོ་ང་ཡི་ཨ་མ་ཡིན།
ཁྱོད་ཡང་ཡང་དྲན་ནོ་ང་ཡི་ཨ་མ་ལགས།

ཟླ་ཞག་ངེས་མེད་རྟག་ཏུ་དྲན་པ་ང་ཡི་ཨ་མ་ཡིན།
སྨོན་ལམ་ཡོད་ཚད་ང་ལ་འདེབས་པ་ང་ཡི་ཨ་མ་ཡིན།
མིག་ཆུ་ཡོད་ཚད་ང་ལ་གཏོང་བ་ང་ཡི་ཨ་མ་ཡིན།
ཁྱོད་ཡང་ཡང་དྲན་ནོ་ང་ཡི་ཨ་མ་ལགས།

གྲོགས་པོ་བཟང་པོའི་ཚུལ་དུ་ཡོད་པ་ང་ཡི་ཨ་མ་ཡིན།
དགེ་རྒན་བཟང་པོའི་ཚུལ་དུ་ཡོད་པ་ང་ཡི་ཨ་མ་ཡིན།
དགྲ་བོ་དམར་པོའི་ཚུལ་དུ་ཡོད་པའང་ང་ཡི་ཨ་མ་ཡིན།
མདོར་ན་སེམས་ཅན་ཐམས་ཅད་ཨ་མ་ཡིན།