བོད་ཡིག་ཚིག་མཛོད་གཉེན་ཆས་དང་བོད་ཡིག་ཁ་པར།

ཉེ་དུས་གསར་དུ་འཐོན་པའི་ཀུ་ཤུའི་རྟགས་ཅན་ཁ་པར་སོགས་ཀྱི་ཚིག་མཛོད་དང་འབྲེལ་ནས་བོད་ཡིག་སྤྱད་ནུས་པའི་ཁ་པར་གཉེན་ཆས་ཀྱི་སྐོར་གླེང་བ།

ཉེ་དུས་ཨམ་ནེའི་སྤྲུལ་སྐུས་ཐུགས་ཁུར་བཞེས་པའི་འབྲས་བུར་གྲགས་པའི་ཚིག་མཛོད་གཉེན་ཆས་ཀུ་ཤུ་རྟགས་ཅན་གྱི་ཁ་པར་དང་ཨ་ཡེ་པེེཊ་དང་ཨ་ཡེ་ཏ་ཆེ་ནང་དུ་སྤྱད་ནུས་པ་ཞིག་འཐོན་ཡོད་པ་ཤེས་ཕྲལ། ལམ་སེང་ཨ་ཡེ་པེཊ་བརྒྱུད་ནས་ཚིག་མཛོད་དེ་ཕབ་བཅུགས་བྱས་པ་ཡིན། ཚིག་མཛོད་དེའི་མིང་ལ་ཕུར་པ་ཞེས་བཏགས་འདུག་པས་ང་ཚོས་ཁ་པར་སོགས་དྲ་རྒྱར་འཐུད་རྗེས་apps store ཏེ་གཉེན་ཆས་ཚོང་ཁང་ཞེས་པའི་སྡེ་ཚན་དེ་ནང་འཛུལ་ནས་phurba བྲིས་ནས་འཚོལ་ན། གོང་གསལ་ཚིག་མཛོད་གཉེན་ཆས་དེ་བདེ་བླག་རྙེད་ཐུབ་ཅིང་གཉེན་ཆས་ཕབ་ལེན་བྱས་པར་སོ་སོའི་ཐོ་འགོད་གསང་ཚིག་སོགས་ཡོད་དགོས་པ་ཡིན།

ཚིག་མཛོད་དེར་ལེགས་པའི་ཆ་ནི།
༡ རིན་མེད་ཐོག་ཕབ་ལེན་ཐུབ་པ།
༢ བོད་རྒྱ་ཚིག་མཛོད་ཆེན་མོ་ཡོད་པ།
༣ བོད་ཡིག་དབྱིན་ཇི་དང་དབྱིན་ཇི་བོད་ཡིག་གཉིས་ཆར་བསྒྱུར་ཐུབ་པ།

ཚིག་མཛོད་དེར་མི་ལེགས་པའི་ཆ་ནི།
༡ བོད་ཡིག་འགའ་ཞིག་དབྱིན་ཡིག་ཏུ་བསྒྱུར་དུ་ནང་དོན་ཏག་ཏག་མེད་པ།
༢ ཚིག་མཛོད་ཁུངས་ལྡན་མིན་པ་དེ་འདྲ་བླུགས་པ།

ཚིག་མཛོད་དེར་ཕྱིས་སུ་བཀང་དགོས་པའི་ཆ་ནི།
༡ དུང་དཀར་ཚིག་མཛོད་དང་ནང་དོན་རིག་པའི་ཚིག་མཛོད་དེ་འདྲ་བླུགས་དགོས་པ།
༢ ཤེས་རིག་ནས་བཏོན་པའི་དབྱིན་བོད་ཚིག་མཛོད་གསར་མ་བླུགས་དགོས་པ།
༣ དག་ཡིག་གསར་སྒྲིག་བླུགས་དགོས་པ།
༤ བོད་ཀྱི་སུམ་དག་གི་འགྲོ་སྟངས་བླུགས་དགོས་པ།

དེ་དང་ཕྱོགས་མཚུངས་ཁ་པར་དང་འབྲེལ་བའི་བོད་ཡིག་གཉེན་ཆས་ཀྱི་སྐོར་ཏོག་ཙམ་གླེང་ན། ཟླ་ཤས་སྔོན་ནས་ཀུ་ཤུ་རྟགས་ཅན་གྱི་བཟོ་གྲྭས་བོད་ཡིག་གཉེན་ཆས་བཟོས་པ་དེ་ནས་བོད་ཡིག་སྤྱད་མཁན་མང་དུ་ཕྱིན་པ་དང་དོ་སྣང་ཅན་མང་དུ་ཕྱིན་པ་ནི་སྨོས་མེད་ཡིན་ནའང་། ཡར་རྒྱས་མུ་འཐུད་གཏོང་དགོས་པར་སོང་ང་ཚོས་དེ་ཙམ་གྱིས་ཕྱོགས་ཤས་མ་བྱས་པར་ད་དུང་ཁ་པར་དང་འབྲེལ་བའི་བོད་ཡིག་གཉེས་ཆས་མང་པོ་བཟོ་སྐྲུན་ཐུབ་ན་མི་རིགས་དང་རིག་གཞུང་ལ་ཕན་འབྲས་ཆེ་བར་མཐོང་། སྤྱིར་བཏང་ཀུ་ཤུ་རྟགས་ཅན་གྱི་ཁ་པར་སོགས་ཀྱི་ནང་བོད་ཡིག་བཟོ་སྐྲུན་ཐུབ་པ་ནི་ཆེད་མངགས་འོས་པ་ཞིག་ཡིན་ནའང་། ཀུ་ཤུ་རྟགས་ཅན་གྱི་དངོས་པོ་དེ་ཚོ་ནི་ཧ་ཅང་གི་རིན་གོང་ཆེན་པོ་ཡིན་པར་བརྟེན་མི་མང་པོ་བེད་སྤྱད་མི་ཐུབ་པས་དེ་ཚོད་ཕན་འབྲས་ཆུང་བ་ཡིན་ན། དེ་ལས་རིན་གོང་ཁེ་བ་དང་ཁྱབ་འཕེལ་ཆེ་བའི་ཨེན་ཊོ་ཝཊེ་Android གཉེན་ཆས་དང་ནོ་ཁེ་ཡའི་Nokia གཉེན་ཆས་ Symbian དང་ལྒི་ཁུང་རྟགས་ཅན་གཉེན་ཆས་སོགས་ཀྱི་ནང་དུ་བོད་ཡིག་སྤྱད་ཐུབ་པ་བཟོ་སྐྲུན་ཐུབ་ན་གཏན་གཏན་ད་ལྟའི་དེ་ལས་བརྒྱ་གྱུར་གྱི་ཕན་འབྲས་ཆེ་བ་ཡོང་སྲིད་པ་འདུག་ན། ད་ལྟ་བོད་ཡིག་གཉེན་ཆས་བཟོ་སྐྲུན་ཤེས་པ་ཚོས་རང་གི་ཡོན་ཏན་སྦས་སྐུང་མ་བྱས་པར་བོད་རིགས་གཞན་དང་སློབ་སྟོན་དང་། ཅུང་ཟད་ཤེས་པ་ཚང་མས་མཉམ་རུབ་ཀྱིས་བེད་འབུངས་བྱས་ན། རིང་མིན་དེང་རབས་ཀྱི་ལམ་བུར་བསྐྱོད་བཞིན་པའི་མི་རབས་གསར་པ་དེས་བོད་ཡིག་ལག་པས་བྲིས། བོད་སྐད་ལྕེ་ཡིས་རྒྱག བོད་ཟས་ཁ་ལ་ཟས། བོད་ཞེན་སེམས་ལ་བཅངས། བོད་ཆས་ལུས་པ་གྱོན་པའི་རེ་འདུན་དེ་གྲུབ་ལ་ཉེ།

སྐད་ཀྱི་ཟུར་ཆགས་ཞེས་པ།

སྐད་ཀྱི་ཟུར་ཆག་པ་དཔེར་ན་མོ་ཊ་ཟེར་ན་དབྱིན་སྐད་མོ་ཊོར་གྱི་ཟུར་ཆག་པ་དང་། ནེ་ལེ་ཟེར་ན་ལེགས་སྦྱར་གྱི་སྐད་ནེའུ་ལ་ཡི་ཟུར་ཆག་པ་དང་། དེ་བཞིན་དུ་འཇུར་ཏ་དང་དུ་ཀཱུ་ལ་སོགས་རྒྱ་གར་གྱི་སྐད་ཟུར་ཆག་པ་ཡིན་ཏུ་ཆུག་ཀྱང་། དངོས་དོན་གྱི་རྒྱུ་མཚན་གང་ཡང་མེད་པར་སྐད་གདངས་འདྲ་ཆོས་ཙམ་འཐད་གྲུབ་ཏུ་བྱས་ནས་དེ་དང་དེའི་སྐད་ཀྱི་ཟུར་ཆག་པར་ཁ་ཅིག་འདོད་པ་ནི་རིགས་པ་མིན་པར་སེམས་ཏེ། སྔོན་དུས་བོད་སྐད་དུ་མེད་པ་ཞིག་ཡུལ་ལུང་གཞན་ནས་བོད་དུ་དར་བ་ལས་དེ་དང་དེའི་མིང་གི་སྐད་ཟུར་ཆག་པ་དང་། ཡང་ཡུལ་གཞན་གྱི་གཞུང་ལུགས་བོད་དུ་བསྒྱུར་སྐབས་སྐད་ཀྱི་ཟུར་ཆག་ནས་བྱུང་བ་དེ་འདྲ་ལས། དེ་དང་དེའི་ཡུལ་གྱི་དངོས་པོ་དེའི་མིང་བོད་སྐད་དང་བརྗོད་པ་འདྲ་བ་ཙམ་གྱིས་སྐད་ཀྱི་ཟུར་ཆག་པར་མི་རིགས་ཏེ། འཛམ་གླིང་འདི་ན་སྐད་རིགས་ཇི་སྙད་ཅིག་ཡོད་པ་དེ་དག་གི་ནང་དུ་བོད་སྐད་དང་འདྲ་ཆོས་མཐུན་པ་གང་མང་ཡོད་པ་མཐོང་བའི་ཕྱིར། དཔེར་ན་ཉི་ཧོང་གི་གྲངས་གནས་དེ་ཚོ་བོད་སྐད་དང་འདྲ་བ་དང་། ཕ་དང་མ་ཟེར་བ་དེ་ཚོ་ཡུལ་ལུང་ཕལ་མོ་ཆེ་འདྲ་བ་དང་། ཡང་མི་ཞེས་པ་དེ་དབྱིན་སྐད་མེན་manཟེར་བ་དང་འདྲ་བ་སོགས་སོ།།

གལ་ཏེ་བོད་ཀྱི་མིང་ཚིག་འདི་དང་འདི། སྐད་རིགས་དེ་དང་དེ་ནས་ཟུར་ཆག་པ་ཡིན་པར་བརྗོད་འདོད་ན། ཐོག་མར་སྐད་རིགས་དེ་དང་དེ་ནས་ཟུར་ཆག་སྟངས་བརྗོད་དགོས་ལ། དེ་འདྲ་བརྗོད་རྒྱུ་མེད་ན་གཞུང་འདི་དང་འདི་ནས་གསུངས་འདུག་ཅེས་ཁུངས་དགོས་པ་ལས། བབ་ཅོལ་དུ་སྐད་གདངས་དང་འཇུག་ཡུལ་འདྲ་མཚུངས་སུ་ཡོད་པ་གཉིས་ཁུར་ཡོང་ནས་དེ་དེའི་སྐད་ཀྱི་ཟུར་ཆག་པ་རེད་ཟེར་ན་སྙིང་པོ་མ་མཐོང་ཞིང་། དེ་བས་རྒྱ་མིས་ང་ཚོར་ཧམ་པ་བཤད་ཀྱི་འདུག བྱས་ཙང་ང་ཚོས་ཀྱང་ཧམ་པ་བཤད་ཀྱི་ཡིན་ཟེར་ན་ངོ་ཚ་བས་གནས་ལས་མི་འདའ་སྙམ།

དེས་ན་ཕྱིས་སུ་ང་ཚོའི་ཕ་མེས་ཀྱི་བོད་སྐད་ཆེ་ཕྲ་གང་ཞིག་ཡིན་རུང་དེ་དང་དེ་ཡུལ་གཞན་གྱི་སྐད་ཀྱི་ཟུར་ཆག་པ་ཡིན་པ་བརྗོད་འདོད་ན་རྒྱུ་མཚན་ཁུངས་དང་བཅས་པར་བརྗོད་དགོས་པ་ལས་དེ་མིན་འདྲ་ཆོས་ཙམ་རྒྱུ་མཚན་དུ་བྱས་ན་རེ་ཞིག་ངོས་ལན་ཞུ་ཐབས་མེད།

དུས་འགྱུར་དུས་དེབ་དང་དེའི་ནང་གི་རྩོམ་ཡིག་གཅིག་ལ་རགས་ཙམ་དཔྱད་པ།

གྲོགས་པོ་ཞིག་བརྒྱུད་ནས་དུས་འགྱུར་དུས་དེབ་བཅུ་པ་ཞིག་གཡར་བྱུང་། ངས་དེ་སྔ་དུས་འགྱུར་དུས་དེབ་མཐོང་མ་མྱོང་བས་དུས་དེབ་གསར་པ་ཞིག་རགས་པ་དང་དགའ་ཚོར་ཆེན་པོས་བཀློག་པར་འགྲོ་དུས། ཏག་ཏག་ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ཞེས་པའི་རྩོམ་ཡིག་དེ་འཁེལ་འདུག ངས་རྩོམ་ཡིག་དེ་ཆ་ཚང་བཀླགས་པས་བྲི་འགྱུར་གྱི་རྩོམ་ཡིག་དེ་འབྲི་འདོད་བྱུང་།



༡ དུསའགྱུར་དུས་དེབ། ད་བར་འདོན་ཐེངས་བཅུ་བཏོན་ཡོད་ཚུལ་འདུག་པ་དང་། དེར་རྒྱ་ཡིག་དང་བོད་ཡིག་གཉིས་ཀའི་རྩོམ་ཡིག་འདུག

ལེགས་ཆ། དུས་དེབ་ཀྱི་ཡིག་གཟུགས་ཧི་གཟུགས་ཡིན་པས་སོ་སོའི་རྩོམ་ཡིག་ལ་ཡིག་ནོར་དང་ཆད་ལྷག་ཉུང་བའི་དགེ་མཚན་ཡོད་པ་དང་། དུས་དེབ་ཀྱི་རྒྱབ་མདུན་ནས་སྒྱུ་རྩལ་མཚོན་པ་དང་། ལོ་རེར་འདོན་ཐེངས་མང་པའི་དགེ་མཚན་འདུག

ཞན་ཆ། དེའི་ནང་དབྱིན་ཡིག་གི་རྩོམ་ཡིག་བྲི་སའི་ས་དམིགས་ཆད་འདུག་པ་དང་། ཁ་བྱང་དབྱིན་ཡིག་ཏུ་བྲིས་པའི་ནང་Changing Time ཞེས་བྲིས་འདུག་པ་དེ་Changing Timesབྲི་དགོས་འདུག་སྙམ། གང་ཡིན་ཟེར་ན་མང་ཚིག་དང་ཉུང་ཚིག་གི་འགྲོ་སྟངས་ཡོད།

༢ ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ཞེས་པའི་རྩོམ་ཡིག་ལ་རགས་ཙམ་དཔྱད་ན།
རྩོམ་ཡིག་དེ་ད་ལོ་འཇང་དགུན་ཆོས་སུ་མཐོང་བའི་མྱོང་ཚོར་དམར་རྗེན་ལྟ་བུར་བྲིས་འདུག་པ་ཡི་རང་གི་གནས་སུ་འདུག་མོད། རྩོམ་ཡིག་དེའི་ནང་དོན་གཉིས་ལ་ཁོ་བོས་རང་གི་འདོད་ཕྱོགས་བཤད་ན།



ཀ༽

རྩོམ་ཡིག་དེ་ནང་<<འགའ་ཤས་ཀྱིས་ཡིག་ཆའི་ཚིག་ཟིན་ཤོར་ན་སྡོམ་པ་ཤོར་ན་ཡང་དེ་ལས་ལྷག་པའི་འགྱོད་པ་ཞིག་སྐྱེ་ཨེ་འོང་སྙམ་པ་འདུག>>ཞེས་བྲིས་པར།
ངས་བྱས་ན། དམ་བཅའ་སྡོད་མཁན་དེས་སོ་སོའི་གྲྭ་ཚང་གི་ཡིག་ཆའི་ཚིག་ཟིན་མ་ཤོར་བར་ཟིན་དགོས་སྙམ། གཞན་དུ་ན། འཇང་དགུན་ཆོས་སྐབས་ལན་རྒྱག་མཁན་དེ་ཚོས་གང་དྲན་དྲན་ལབ་ནས་རྟགས་བསལ་གཏོང་རྒྱུ་ཁག་པོ་བྱེད་ཀྱི་རེད། གལ་ཏེ་རྗེ་ཡབ་སྲས་ཀྱི་གཞུང་ཚིག་ཟིན་དགོས་ཟེར་ན་ཁག་པོ་རེད། གང་ཡིན་ཟེར་ན་མཁས་པ་མི་འདྲ་བ་མང་པོའི་འདོད་པ་ཡིན་སྟབས་མཐའ་གཅིག་ཏུ་ཚིག་ཟིན་མཐུན་ཐབས་མེད། སོ་སོའི་ཡིག་ཆ་ནི་ཕལ་ཆེར་མཁས་པ་གཅིག་གིས་མཛད་པ་ཡིན་དུས་ཟིན་ན་ཟིན་ཐུབ་བསམས་པ་ཡོད་པ་ཡིན། འོན་ཀྱང་ཟིན་སྟངས་ནི་ལྐུགས་པ་ཨུ་ཚུགས་བྱས་མགོ་ལ་རྡོ་ཞུས་ནའང་གློད་ཀྱི་མིན་ཟེར་བ་ལྟ་བུ་མིན་པར་གཞུང་སྔ་ཕྱི་ཁས་ལེན་འགྲོ་སྟངས་དང་འདོད་ཚུལ་ཤེས་པའི་སྒོ་ནས་འགལ་མེད་ཀྱི་ལན་བཏབ་ནས་ཟིན་དགོས་སྙམ།

ཁ༽

རྩོམ་ཡིག་དེ་ནང་<<དཔེར་ན་སེ་ར་ལྟ་བུར་མཚོན་ན་ལོ་རེའི་རྩོད་རྒྱུགས་བརྒྱ་ཆའི་ཨང་རིམ་ལྟར་གྱིས་འཇང་དགུན་ཆོས་ལ་མངགས་ཀྱིན་ཡོད་པ་རེད། གལ་སྲིད་ཁྱེད་རང་འཇང་དགུན་ཆོས་ལ་ཁས་ཚར་ན་དགོངས་པ་ཞུ་རྒྱུ་ཡང་ཁག་པོ་ཡིན། ནད་པ་དང་ལས་དོན་དམིགས་གསལ་བ་མ་གཏོགས་ངེས་པར་འགྲོ་དགོས་པ་རེད། འོན་ཀྱང་ཁྱེད་རང་རྒྱུགས་སྤྲོད་ཀྱི་བརྒྱ་ཆ་མ་ལོན་ན་སོང་ན་ཉེས་ཆད་ཡོད་པ་རེད། འདི་ནི་ཧ་ཅང་ལེགས་པའི་དོན་དག་ཅིག་རེད། དེ་མིན་གདན་ས་གཞན་ཁག་ཅིག་གིས་འཛིན་གྲྭའི་ལོ་འཁོར་རྒྱུགས་སྤྲོད་ཀྱི་ཨང་རིམ་དང་པོ་དང་གཉིས་པ། གསུམ་པ་གསུམ་ངེས་པར་འགྲོ་དགོས་པ་རེད། གཞན་རང་རང་འགྲོ་འདོད་ཡོད་ཚེ་སོང་ན་འགྲིག་གི་ཡོད་པ་དང་མ་སོང་ཡང་མི་སྐྱོན། འདི་ནི་སྐྱོན་ཆ་ཆེན་པོ་ཞིག་རེད། >>ཞེས་བྲིས་པར།

ངས་བྱས་ན། ད་ལྟ་སེ་རས་ལག་བལྟར་བྱེད་བཞིན་པ་དེ་ཧ་ཅང་ལེགས་པའི་དོན་དག་ཅིག་དང་། གདན་ས་གཞན་གྱིས་བྱས་པ་དེ་སྐྱོན་ཆ་ཆེན་པོ་ཞིག་མ་རེད་སྙམ། གང་ཡིན་ཟེར་ན། ལོ་ངོ་དྲུག་བདུན་སྔོན་ངའི་ངོ་ཤེས་པའི་སྤྲུལ་སྐུ་ཞིག་འབྲས་སྤུངས་ལ་དང་བ་ཆེན་པོས་འཇང་དགུན་ཆོས་སུ་བསླབ་གཉེར་ལ་སླེབས་སོང་། བདུན་ཕྲག་གཅིག་ཙམ་གྱི་རྗེས་ཁོང་སེ་ར་ནས་དགེ་བསྐོས་ཀྱིས་ཁྱེད་བརྒྱ་ཆ་མི་ལངས་པས་ཚུར་ལོག་ཤོག དེ་མིན་ལས་སླ་པོར་བཞག་གི་མིན་ཟེར་ནས་ཕར་ལོག་དགོས་པ་བྱུང་སོང་། དེ་དུས་ངས་ཁོང་ལ་སྙིང་རྗེ་སོང་། སློབ་གཉེར་བྱ་རྒྱུར་ཡང་བཀག་འགོག་བྱེད་ཀྱི་འདུག་བསམས་བྱུང་། ཕྱོགས་གཞན་ནས་ཀྱང་འཇང་དགུན་ཆོས་ལ་འགྲོ་རྒྱུ་མ་ཁོམ་པས་གྲྭ་པ་ཁ་ཤས་ཀྱིས་ད་ལོ་དཔེ་ཆ་ཞེ་དྲག་ལྟ་མི་དགོས། རྒྱུགས་སྤྲོད་ཀྱང་ཡག་པོ་གཏོང་མི་ཉེན། འཇང་དགུན་ཆོས་ལ་འགྲོ་རྒྱུ་འཁེལ་ཡོང་ཟེར་ནས་དཔེ་ཆ་ལྟ་རྒྱུར་སྐྱོན་ཆ་ཆེན་པོ་ཤོར་ཉེན་ཡོད། ཡང་རིག་པ་སྐྱོ་བ་དེ་འདྲ། ད་ལོ་འཇང་དགུན་ཆོས་ལ་ཕྱིན་ནས་ཤུགས་རྒྱབ་ནས་རིགས་ལམ་ཆགས་པ་བྱས་དགོས་བསམས་ཀྱང་། རྒྱུགས་སྤྲོད་ལམ་འགྲོ་མ་རྒྱུགས་པའམ་རིག་པ་ཅུང་སྐྱོ་བས་བརྒྱ་ཆ་མ་ལོན་ནས་འཇང་དགུན་ཆོས་ཀྱི་གོ་བསྐལ་ཤོར་ནས་གཞར་ཡང་ཡར་རྒྱས་འགྲོ་མ་ཐུབ་པར་ལྷག་སོང་བ་ཡང་ཡོང་སྲིད་པ་ཡིན།

དེས་ན། འཇང་དགུན་ཆོས་འཚོགས་པའི་དམིགས་ཡུལ་ནི་གྲྭ་པ་མཁས་པ་རྐྱང་རྐྱང་འཛོམས་ནས་འགྲན་བསྡུར་བྱ་ས་ཞིག་མིན་པར། སློབ་གཉེར་ཡར་རྒྱས་ཡོང་རྒྱུ་དང་རིགས་ལམ་གྱི་རྣམ་དཔྱོད་འཕེལ་རྒྱུ་དེ་ཡིན་པར་སོང་། གདན་ས་གཞན་གྱི་བྱེད་ལུགས་དེ་ནི་སྐྱོན་ཆ་ཆེན་པོ་ཞིག་མིན་པར་ལེགས་ཆ་ཆེན་པོ་ཞིག་རེད་བསམས། ཨ་ཕོ་རང་གི་འཇོན་ན་དགའ་ལྡན་ཁྲི་ལ་བདག་པོ་མེད་ཟེར་བའི་དཔེ་ལྟར། སོ་སོའི་འཇོན་ན་འཇང་དགུན་ཆོས་ལ་གྲྭ་པ་སུ་ཡིན་ནའང་འགྲོ་ཆོག་ལ། དེ་ནི་དམངས་གཙོ་དང་རང་དབང་གི་རང་བཞིན་ལྡན་པ་ཞིག་ཀྱང་རེད་སྙམ། རིག་པ་ཅུང་སྐྱོ་བ་དེ་ཚོ་ཡང་འཇང་དགུན་ཆོས་ལ་ཕྱིན་ནས་ཚུར་ཡོང་དུས་སྔར་དང་མི་འདྲ་བ་རིགས་ལམ་ཡག་ཏུ་ཕྱིན་པ་དང་། རྩོད་ཤུགས་ཆེ་རུ་ཕྱིན་པ་དེ་འདྲའང་མངོན་སུམ་དུ་མཐོང་རྒྱུ་འདུག་པས། ཁོ་རིག་པ་སྐྱོ་བོ་དང་རྒྱུགས་སྤྲོད་བརྒྱ་ཆ་དམའ་བོ་རེད་ཞེས་བརྒྱལ་བའི་ལྒང་རྡོག་རྫིས་མ་བཏང་པར་གོ་སྐབས་སྤྲད་དེ་ཡར་རྒྱས་ཀྱི་ལམ་ལ་བཏང་པ་དེ་དངོས་གནས་ལེགས་ཆ་མ་རེད་དམ། ཡང་རྩོམ་ཡིག་དེའི་འཕྲོས་<འདིའི་སྐབས་སུ་རྟགས་གསལ་ཁྱབ་གསུམ་གྱིས་ལན་འདེབས་མི་ཤེས་མཁན་མང་བོ་འདུག་ལ། འདི་དག་གིས་གདན་སའི་མཚན་མཐོང་ལ་གནོད་གིན་ཡོད་པ་རེད།>ཞེས་བྲིས་འདུག་པས། གདན་ས་ཞིག་གི་ནང་འཛུལ་མ་ཐག་པ་ཞིག་ཡིན་ན་མ་གཏོགས་ལོ་གཉིས་གསུམ་མཚན་ཉིད་ཀྱི་དཔེ་ཆ་བལྟ་བའི་རྗེས་ད་དུང་རྟགས་བསལ་ཁྱབ་གསུམ་གྱི་ལན་མི་ཤེས་མཁན་དེ་འདྲ་རིག་མ་མྱོང་། གལ་ཏེ་དེ་འདྲ་ཡོད་ན་ཁོང་ཚོ་ད་དུང་འཇང་དགུན་སོགས་སུ་མ་བཏང་པར་བཞག་ན་རྗེས་མ་གདན་ས་ལོ་ངོ་ཉི་ཤུ་འགྲིམས་ཀྱང་རྟགས་བསལ་ཁྱབ་གསུམ་མི་ཤེས་མཁན་དེ་འདྲ་འཐོན་ཡོང་ཉེན་ཡོད་པས་དངོས་གནས་དེ་དུས་གདན་སའི་མཚན་སྙན་ལ་གནོད་ཀྱི་རེད་སྙམ།

ག༽

རང་གིས་འཇང་དགུན་ཆོས་ལ་མཐོང་བའི་མྱོང་ཚོར།

ངས་མ་གཞི་འཇང་དགུན་ཆོས་མ་མཐོང་བར་ལོ་ངོ་ལྔ་དྲུག་སོང་ཀྱང་། སྔོན་ཆད་ཐེངས་མ་དྲུག་བདུན་ཕྱིན་མྱོང་བས་འཇང་དགུན་ཆོས་ནི་དཔེ་མི་སྲིད་པའི་རིགས་ལམ་འཕེལ་ཁ་ཕྱེ་བའི་ཆོས་ཐོག་ཤིག་རེད། དེ་དུས་གྲྭ་པ་ཚོས་འཇང་དགུན་ཆོས་ལ་མ་འགྲོ་གོང་ནས་རྩོད་གཞུང་རྣམ་རྩ་དང་ཐར་ལམ་གསལ་བྱེད་གཉིས་ཀ་བློ་ལ་གཟུང་གི་ཡོད་པ་དང་། སོ་སོའི་གྲྭ་ས་ནས་ཀྱང་གང་འཚམས་རྩོད་པའི་རྗེས། འཇང་དགུན་ཆོས་ལ་འགྲོ་ཡི་ཡོད། འཇང་དགུན་ཆོས་སྐབས་སྔ་དྲོ་ཆོས་རར་རྩོད་པ་ཆུ་ཚོད་གཉིས་ལྷག་པ་འཚོགས་པ་དང་། དེ་ནས་ཉིན་གུང་དཔེ་ཁྲིད་དང་ཐོ་ཆོས་དམ་བཅའ་ལ་གཏོང་རྒྱུའི་རྟགས་བསལ་བཟོ་རྒྱུ། ཕྱི་དྲོ་ཚོགས་ཆེན་དུ་རྩོད་པ་དེ་ནས་དམ་བཅའ། དེ་ནས་མར་གྲོལ་ཙམ་བྱས་ནས་གྲྭ་ཚང་སོ་སོའི་རྩོད་པ་ཆུ་ཚོད་༡༢་ཙམ་བར་ཚོགས། དེ་དུས་བློ་ཁ་ཅུང་མཐོ་བ་དེ་ཚོས་གྲྭ་ཚང་གཞན་གྱི་རྩོད་པར་དམ་བཅའ་འཇོག་ཏུ་སོང་བ་སོགས་ཁྱད་ཆོས་དུ་མས་ཕྱུགས་ཡོད།
འོན་ཀྱང་རྩོམ་ཡིག་དེའི་ནང་གསལ་བ་བཞིན་གྲྭ་ཚང་ང་ཡིན་ཟེར་མཁན་དེ་འདྲ་ཐུག་དུས་མི་ཚོགས་ཆེན་པོས་ལྟད་མོ་བལྟ་བར་ཡོང་བ་དང་། ལན་རྒྱག་མཁན་གྱིས་ཀྱང་དམ་བཅའ་བརྟན་པོ་གཟུང་བ་དང་གཟབ་གཟབ་བྱས་ཀྱི་ཡོད་པ་དེ་དག་ནི་གདན་སའི་འགྲོ་སྟངས་ཤིག་ཡིན། འོན་ཀྱང་ངའི་མཐོང་ཚུལ་ལ། གྲྭ་པ་ཁ་ཤས་ཀྱིས་གཙོ་བོ་རྟགས་བསལ་ལ་མ་དམིགས་པར་ཕྱོགས་ལྷུང་དང་ཞེན་ཁོག་གི་བཟི་ནས་ཁྱེད་ཚོ་གཅིག་རེད་ཟེར་བ་དང་། ཡང་ལུང་དྲངས་དུས་མཁས་པ་དེ་དང་དེ་ཞེས་མཚན་གནས་ནས་མ་བརྗོད་པར་ཡིག་ཆའི་གསུངས་བ་པོ་ལ་ཟུར་ཟ་དང་མཐོང་ཆུང་གི་རྣམ་པ་བསྟན་པ་དང་། ཡང་། ལན་རྒྱག་མཁན་དེ་མི་ཤེས་པ་མ་རེད་ཡིག་ཆ་གསུངས་མཁན་ནོར་ཚར་བ་རེད་མདོག་དེ་འདྲ་བྱས་པ་དང་། ཡང་ལུང་ཚིག་མངོན་སུམ་དང་འགལ་བའི་ཡིག་ནོར་དེ་འདྲ་ཧ་གོ་བཞིན་དུ་དྲངས་པ་དང་། གཞན། གྲྭ་ཚང་དེ་དང་དེའི་ཁས་ལན་དུ་མེད་པའི་གྲྭ་ཚང་དེ་ཁུངས་ཀྱི་མཁས་པས་བྱས་པ་དེ་འདྲའི་གསུང་དྲངས་ནས་ཁ་རྡུང་བཏང་པ་སོགས་བྱས་པ་བྱུང་སོང་། དེ་འདྲ་བྱས་དུས་སྔ་ཕྱིའི་རྒོལ་བ་དང་ལྟད་མོ་བ་ཆ་ཚང་ཚ་པོ་ཆགས་ཀྱི་འདུག་པ་དེ་དག་ཅུང་ཟད་ངོ་གནོངས་དགོས་པ་ཡོང་གི་འདུག་ནའང་། དངོས་གནས་གྲྭ་པ་ནི་གྲྭ་པ་རང་ཡིན་པས་དེ་རིང་འཛིང་འགྲོ་འདྲ་ཞིག་ཡོད་ནའང་སང་ཉིན་ནས་སྣང་མེད་ངང་ཧ་ཧ་ཟེར་བཞིན་མཉམ་དུ་འགྲོགས་ཀྱི་ཡོད་པ་དང་། ད་དུང་ཕར་ལོག་འགྲོ་དུས་མདང་དགོང་འགལ་འདུ་བསྒྲིག་སའི་མཁས་པ་དེའི་གསུང་དེ་ཚོ་དད་པ་ཆེན་པོས་ཉོ་ནས་ལོག་ཕེབས་ཀྱིས་འདུག་པས། ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ནི་དོན་དངོས་མཁས་པ་མཛེས་པར་བྱེད་པའི་དོ་ར་རང་ཡིན་འདུག


ས་རྩོད་ཆུ་རྩོད་རྒྱག་པ་ལྟ་བུའི་འཇང་དགུན་ཆོས་ཞེས་རྩོམ་ཡིག་གཟིགས་ན་འདིར་བསྣུན་རོགས།

ཕྱི་དང་ནང་གི་ཚན་རིག། ༡

དུས་སྐབས་དང་མཐུན་པའི་ནང་ཆོས་དང་ཚན་རིག་དཔྱད་བསྡུར་བྱེད་པའི་དགོས་པ་དང་བྱ་ཐབས།



༡ ཚན་རིག་ཀྱི་ངོ་བོ་དང་དགོས་པ།
ཚན་རིག་ནི་ྋགོང་ས་མཆོག་གིས་གསུངས་པ་བཞིན་གཙོ་བོ་གཟུགས་ཅན་དང་འཛམ་གླིང་འདིའི་ཐད་བརྟག་ཞིབ་བྱས་པའི་སློབ་ཚན་ཞིག་ཡིན། དེ་ཡང་གཟུགས་ཅན་གྱི་དངོས་པོ་མཐའ་དག་ལ་བགྲངས་རྩིས་ཀྱིས་དཔྱད་པ་བྱས་པ་ལས་བསྒྲུབ་བྱ་ཞིག་གྲུབ་པར་འཇོག་པ་ཡིན། དེ་ལྟ་བུའི་དཔྱད་པ་བྱས་སྟོབས་ཀྱིས་དངོས་པོའི་གནས་ཚོད་གང་ཞིག་ཤེས་པ་དང༌། དེས་འཛམ་གླིང་འདིའི་སྟེང་གི་མི་མང་ལ་མཁོ་བ་གང་ཞིག་བཟོ་ཐུབ་མིན་སོགས་བསམ་བློ་བཏང་བ་ཡིན་པས། ཚན་རིག་དགོས་པ་ནི་འཛམ་གླིང་འདིའི་མི་ཚོའི་འདོད་པ་བསྐང་རྒྱུ་དང༌། དཀའ་ངལ་རགས་པ་དེ་ཚོ་བསལ་ནས་སྟབས་བདེ་རུ་གཏོང་དེ་རྒྱུ་ཡིན།

༢ ནང་ཆོས་ཀྱི་ངོ་བོ་དང་དགོས་པ།
ནང་ཆོས་ནི་ཕྱིའི་གཟུགས་ཅན་གྱི་གནས་ཚོད་ལ་གཙོ་བོ་མི་དཔྱད་པར་ནང་སེམས་ཀྱི་འཛིན་སྟངས་ལ་དཔྱད་ནས། དེ་ལྟར་འཛིན་པ་ནི་ལོག་པར་ཤེས་པའམ་འཁྲུལ་བ་ཡིན། འདི་ལྟར་ཤེས་པ་ནི་ཡང་དག་པར་ཤེས་པ་ཡིན་པས་མ་འཁྲུལ་བ་ཡིན་ན། བློ་འཁྲུལ་བའི་བཟུང་བ་ལྟར་འཛིན་ཅིང་ཞེན་པ་ལས་ལས་བཟང་ངན་སྣ་ཚོགས་བསགས་པ་ལས་འབྲས་བུ་འཁོར་བ་སྡུག་བསྔལ་གྱི་རྒྱ་མཚོ་ཆེན་མོར་ཡང་སྐྱེ་ཡང་ཤི་སྟེ་རྒྱུན་ཆད་མེད་པར་འཁོར། བློ་མ་འཁྲུལ་བའི་བཟུང་བ་ལྟར་འཛིན་ཅིང་བསྒོམས་པ་ལས་དེ་དག་ལྡོག་ནས་ལས་ཉོན་གྱི་སྐྱེ་མཆི་བྲལ་བའི་ཐར་པ་མྱང་ངན་ལས་འདས་པ་ཐོབ་པས། དེ་ལྟར་ཐར་པ་མྱང་ངན་ལས་འདས་པ་ཐོབ་བྱེད་དེ་ལ་ནང་ཆོས་དང༌། དེ་ལྟར་ཐོབ་པ་ལ་བློ་མ་འཁྲུལ་བའི་འཛིན་སྟངས་གཏན་ལ་ཕབ་བྱེད་ཀྱི་རིགས་པའི་ལམ་ལུགས་ལ་ནང་པའི་གྲུབ་མཐའ་བརྗོད་པ་ཡིན། དེས་ན་ནང་ཆོས་ཀྱི་དགོས་པ་ནི་སྣོད་ཀྱི་འཇིག་རྟེན་འཛམ་གླིང་འདི་དང་བཅུད་ཀྱི་འགྲོ་བ་མི་ཙམ་དུ་མ་ཟད་པའི་འགྲོ་བ་སྲོག་དང་ལྡན་ཚད་ཀྱི་གཏན་གྱི་འདུན་མ་བསྒྲུབ་རྒྱུ་ཡིན་ཞིང༌། དེ་ཡང་གནས་སྐབས་ཚེ་ཕྱི་མ་དུད་འགྲོ་དང་ཡེ་དྭགས་ལྟ་བུ་ངན་འགྲོར་མི་ལྟུང་བར་བདེ་འགྲོ་ལྷ་མིའི་སྐྱེ་བ་བརྒྱུད་ནས་མཐར་ཐར་དང་ཐམས་ཅད་མཁྱེན་པ་ཐོབ་པར་བྱ་རྒྱུ་ཡིན།

༣ ཚན་རིག་དང་ནང་ཆོས་ཀྱི་མཐུན་ས།
ནང་ཆོས་དང་ཚན་རིག་གཉིས་ཀྱི་མཐུན་ས་ཆེ་ཤོས་ནི། གཉིས་ཀའི་ལུང་ཙམ་གྱི་རྗེས་སུ་མ་འབྲངས་པར་མ་འཆོལ་བའི་རིགས་པའི་ལམ་ནས་དངོས་པོའི་གནས་སྟངས་གཏན་ལ་ཕབ་དགོས་པར་འདོད་པ་དེ་ཡིན་ཞིང༌། དེ་ཡང་ནང་པ་སངས་རྒྱས་པར་མཚོན་ན་དངོས་པོའི་གནས་སྟངས་འདོད་ཚུལ་མི་འདྲ་བའི་རྐྱེན་གྱི་རྩ་བའི་གྲུབ་མཐའ་བཞི་དང་ནང་གསེས་ཀྱི་གྲུབ་མཐའ་རྣམས་བྱུང་བ་ཡིན། དེ་བཞིན་ནང་པའི་རྡུལ་ཕྲན་ཆ་མེད་འགོག་པ་དང་ཚན་རིག་པས་ཆེ་ཤེལ་གྱི་མི་འདང་བས་རྡུལ་ཕྲན་གྱི་ཆུང་མཐའ་ད་དུང་བརྗོད་མི་ཐུབ་པར་བཤད་པ་རྣམས་མཐུན་ལ། ལྷག་པར་དེང་དུས་ཁོན་ཏོམ་(Quantum physics)ཚན་རིག་སྨྲ་བ་དང་ནང་པའི་བར་དངོས་པོ་མཐའ་དག་བརྟེན་ནས་འབྱུང་བར་འདོད་ཚུལ་བའི་ཚུལ་ལ་མཐུན་པོ་བྱུང་བ་ཡིན།

༤ ཚན་རིག་དང་ནང་ཆོས་ཀྱི་མི་མཐུན་ས།
ཚན་རིག་དང་ནང་ཆོས་གཉིས་ཀྱི་མི་མཐུན་ས་ནི། སྐྱེ་བ་སྔ་ཕྱི་དང༌། ཉོན་མོངས་གཏན་ཟད་ཀྱི་ཐར་པ། ལས། རྣམ་པར་ཤེས་པ་སོགས་ཚན་རིག་པས་མ་འདོད་ཅིང༌། ཡང་འགྲོ་བ་རྣམས་ཕ་མའི་གཟུགས་ཙམ་ལས་སྐྱེ་བ། ཀླད་པའི་ཆ་ཤས་ཀྱི་ཤེས་པ། དངོས་པོ་ཀུན་ཐོག་མཐའ་གཟུགས་ཅན་ལ་ཐུག་པ་སོགས་ནང་པ་སངས་རྒྱས་པས་མི་འདོད་པ་དང། གཉིས་ཀས་སྲོག་ཡོད་མེད་ཀྱི་འཇོག་མཚམས་ལ་མི་མཐུན་པར་སེམས།

"སི་པན་ཁ་ཚ་པོ་"

ད་གན་ང་རང་ཁ་ལག་ཟ་དུས་སི་པན་རིལ་རིལ་གཅིག་ཟས་པས་ཁ་ཞེ་དྲག་འཚིག་སོང་བས་ཆུ་ཡང་འགྱིག་དམ་གང་ཙམ་འཐུངས་པ་ཡིན། ཧུད། ད་རུང་ཡང་ཁ་འཚིག་གི་འདུག་མོད། ད་གིན་ང་རང་སི་པན་གྱིས་ཁ་འཚིག་ནས་ཆུ་འཐུང་བའི་སྐབས་སུ་དོགས་པ་ཞིག་ཟ་སོང་བ་འདིར་འགོད་པ་ལ།

སི་པན་གྱི་ཚ་བ་དེ་དོན་ལྔའི་ནང་ནས་རོ་རེད་དམ་རེག་བྱ་རེད།

༡་རོ་ཡིན་ན། ལུས་སྟེང་གི་རྨ་ཁ་སོགས་ལ་སི་པན་འབྱུག་དུས་ཚ་དགོས་དོན་ཅི་ཡིན། དཔེར་ན། ང་ཚོའི་རྨའི་སྟེང་སྐྱུར་འབྱུགས་ན་སྐྱུར་པོ་ཚོར་གྱི་མི་འདུག་ག ཡང་ལྕེ་ལབ་ལ་རེག་པས་ཚོར་བ་ཙམ་རྒྱུ་མཚན་གྱིས་རོ་ཡིན་ན་ལྕགས་དམར་པོ་དེ་ཚོའི་ཚ་བ་ཡང་རོ་རེད་དམ། ཡང་རོ་ཡིན་ན་སི་པན་གྱིས་ཁ་ཚ་དུས་ཆུ་སོགས་གྲང་མོ་མ་གཏོགས་ཆུ་ཚ་པོ་བཏུང་ན་མི་ཕན་པར་གནོད་དོན་ཅི་ཡིན། ཡང་རོ་ཡིན་ན་ཁ་སྐད་དུ་ཡང་"སི་པན་ཁ་ཚ་བོ་"བརྗོད་པ་མ་གཏོགས་ལྕེ་ཚ་པོ་མི་ལབ་དོན་གང་ཡིན།

༢ རེག་བྱ་ཡིན་ན། མངོན་པའི་གཞུང་ལས་རོ་ལ་དྲུག་ཏུ་ཕྱེ་ཞིང་དེའི་ནང་ཚ་བ་དང་ལན་ཚྭ་བ་གཉིས་གསུངས་པ་སོ་སོའི་ངོས་འཛིན་གང་ཡིན། ཡང་རེག་བྱ་ཡིན་ན་རྨ་ཁ་མེད་པའི་ལུས་ཀྱི་ཆ་ཤས་ལག་པ་ལྟ་བུའི་ལུས་ཤེས་ཀྱིས་མི་མྱོང་བའི་རྒྱུ་མཚན་གང་། ཡང་རེག་བྱ་ཡིན་ན་མེའི་རེག་བྱ་ཡིན་དགོས་པས་སི་པན་མང་པོས་གང་ཞིག་བསྲེགས་པར་བྱེད་ནུས་སམ།

༣ གཉིས་ཀ་ཡིན་ན། གྲང་མོ་ཡང་རོ་དང་རེག་བྱ་གཉིས་ཀ་རེད་དམ།

མགྲོན་ཤོག་བྲིས་པ་ལས་སྦྲོན་ཤོག་འབྲི་ན་མི་བཟང་ངམ།

དེང་སང་སྤྱི་ཚོགས་ནང་མི་སྣ་གལ་ཆེ་ཞིག་གམ་ཡང་ན་མི་བྱིངས་ཤིག་ཞེ་སའི་ངང་ནས་གདན་ཞུ་བྱ་དགོས་ཚེ། ལམ་སེང་མགྲོན་ཤོག་ཞེས་པའི་ཁ་བྱང་ཅན་གྱི་ཤོག་ལྷེ་ཞིག་འབུལ་གྱི་ཡོད། དེ་ཡང་མི་དེ་ཁ་ལག་ལ་གདན་འདྲེན་ཞུ་རྒྱུ་ཡིན་མིན་ལ་མ་བལྟོས་པར་མགྲོན་ཤོག་བྲིས་ཀྱང་རེད་འདུག འདི་བསམ་གཞིགས་བྱས་ན་མགྲོན་ཤོག་ཞེས་པ་ནི་མགྲོན་དུ་འབུལ་རྒྱུའི་སྙན་སེང་གི་ཤོག་བུ་ཡིན་པར་སོང་མི་དེ་ཚོགས་འདུ་གལ་ཆེ་ཞིག་ཏུ་ཕེབས་བསུ་ཞུ་དུས་སོགས་འབྲི་མི་འོས་པ་རེད་སྙམ། དེས་ན་ང་ཚོ་༼མགྲོན་ཤོག་༽ཞེས་པའི་དོད་དུ་༼སྦྲོན་ཤོག་༽བྲིས་ན་དོན་དངོས་དང་འཚམས་ཤིང་། སུ་ཞིག་གང་གི་ཕྱིར་ཕེབས་བསུ་ཞུ་དགོས་ཀྱང་འབུལ་ཆོག་པ་ཞིག་འདུག ནང་དོན་དུའང་སྦྲོན་ཞེས་པ་ནི་འབོད་པའི་དོན་ཡིན་དུས་སྦྲོན་ཤོག་བྲིས་ན་སྦྲོན་འབོད་ཞུ་རྒྱུའི་ཤོག་ལྷེའམ་སྦྲོན་བརྡའི་ཤོག་ལྷེ་ལ་གོ།

༢༠༡༢་ཞེས་པའི་གློག་བརྙན་དང་བོད་འཇིག་བསྐལ།

འདི་ལོར་སྐུ་ཞབས་རོ་ནལཌ། ཨེམ་མེ་རི་ཆིས་ Roland Emmerich བཟོས་པའི་གློག་བརྙན༢༠༡༢ཞེས་པ་འཛམ་གླིང་འཇིག་ཚུལ་གྱི་སྐོར་ཞིག་བཏོན་ཡོད་པ་བལྟས་པའི་རྗེས། རྒྱ་ཕྲུག་དང་བོད་ཕྲུག་མང་པོ་ཞིག་གིས་མཐའ་མ་འཛམ་གླིང་སྐྱོབ་མཁན་དེ་རྒྱ་ནག་རེད་ཟེར་བ་དང་རྒྱ་ནག་མ་རེད་བོད་རེད་ཟེར་བའི་གླེང་སློང་བྱེད་ཀྱི་ཡོད།

དེའི་དོན་རྐྱེན་ནི་གློག་བརྙན་དེའི་ནང་འཛམ་གླིང་གི་ཚ་དྲོད་འཕེལ་བས་དང་ཐོག་ས་འགུལ་གྱི་འཇིག་པ་དང་། དེ་ནས་མཐའི་རྒྱ་མཚོ་ཆེན་པོ་འཕེལ་ཏེ་འཛམ་གླིང་ཡོངས་རྫོགས་ཆུས་ནུབ་ལ་ཉེ་བ་ན་གནས་ལུགས་ཤེས་པའི་མི་ཚོས་བོད་ཀྱི་ཇོ་མོ་གླང་མ་ཉེ་འཁྲིས་སུ་བྲོས་ཕྱིན་པ་དང་། དེར་ཆེད་ལས་ཀྱིས་བཟོས་པའི་གྲུ་བོ་ཆེར་བསྡད་དེ་མི་མང་ཁྲི་ཚོ་མང་པོའི་སྲོག་སྐྱོབ་པ་འཁྲབ་ཡོད་པ་དེ་རེད།

འོན་ཀྱང་ངས་ངོས་ནས་བྱས་ན། འཛམ་གླིང་སྐྱོབ་མཁན་བོད་དང་རྒྱ་ནག་སུ་ཡིན་རྩོད་གླེང་བྱ་རྒྱུ་མ་ཡིན་པར། ཆེས་བཀོད་ལེགས་མཛད་པའི་༢༠༡༢་ཞེས་པའི་གློག་བརྙན་དེ་རྫོགས་ལ་ཉེ་བའི་སྐབས་སུ་བོད་པའི་གྲྭ་པ་རེ་གཉིས་དང་བོད་མི་རེ་གཉིས་སྟོན་གྱི་འདུག་པ་དེའི་ཀུན་སྤྱོད་ཡིན། གློག་བརྙན་དེ་ཡག་པོ་དེ་འདྲ་ཞིག་བཟོས་ཡོད་ནའང་། དེའི་ནང་གི་བོད་མི་འཁྲབ་མཁན་དེ་ཚོས་བོད་སྐད་རྩ་བ་ནས་ཡག་པོ་རྒྱག་ཤེས་ཀྱི་མེད་པ་དང་། ལྷག་པར་དུ་བོད་པའི་གྲྭ་པ་བགྲེས་སོང་ཞིག་གི་རྒྱ་བཟོའི་དྲིལ་པོ་ཆེན་པོ་ཞིག་བརྡུངས་པ་དང་། ཆེས་མི་མཛེས་པ་ཞིག་ལ་བོད་ཆས་ལེགས་པར་གོན་པའི་བོད་པའི་རྨོ་ལགས་ཤིག་གིས་གྲྭ་པ་ཞིག་གི་མདུན་སར་སྟ་རེ་འཆར་ནས་བྱ་དེའི་སྐེ་གཅོད་པ་དེ་འདྲ་འཁྲབ་འདུག
གནས་དོན་དེའི་འཐད་ཕྱོགས་གཉིས་ནས་ཁོ་བོས་བཤད་ན།
༡ གློག་བརྙན་དེའི་ནང་བོད་ཀྱི་སྐད་ཡིག་ལ་མཐོང་ཆུང་བྱས་པ་དང་། བོད་ཀྱི་རིགས་གཞུང་ལ་མཐོང་ཆུང་བྱས་པ་དང་། བོད་ཀྱི་ཆོས་དད་ལ་དམའ་འབེབས་བྱེད་པ་ཞིག་མཐོང་གི་འདུག

༢ ཡང་ཕྱོགས་གཞན་ནས་བཤད་ན། དངོས་གནས་བོད་ལ་རང་དབང་ངམ་རང་སྲིད་རང་སྐྱོང་ཚད་ལྡན་ཞིག་མ་རག་ན་རིང་མིན་༢༠༡༢ལོར་བོད་དེའང་གློག་བརྙན་ནང་བསྟན་པ་ནང་བཞིན་ཆག་རྒྱུའི་ཉན་ཁ་ཡོད་པ་སྟོན་གྱི་ཡོད་པ་འདྲ་པོ་མིན་ནམ་སྙམ།

༼དིང་སང་ཁ་ཤས་ཀྱིས་ལྟད་མོ་དེའི་མིང་ལ་2012 end of tibet བོད་ཀྱི་འཇིག་བསྐལ་༢༠༡༢་ལབ་ཀྱི་ཡོད།༽

ཡ་མ་བརླ་མཁན་ཞེས་སོགས་ལྷ་སའི་ཡུལ་སྐད་ལ་བསམས་པ།

ལྷ་ས་བ་ཚོས་མི་འདི་ཡ་མ་བརླ་མཁན་ཞིག་འདུག་ལབ་དུས། མི་ཁ་ཅིག་གིས་སྐད་ཆ་དེར་གོ་ཡག་མི་འདུག་ཟེར།
ངས་བསམ་བློ་ཞིག་བཏང་དུས་སྐད་དེའི་གོ་དོན་འདི་ལྟར་རེད་སྙམ།

ཡ་མ་བརླ་མཁན། ཆོ་མེད་པའི་སྐད་ཆ་ཤོད་མཁན་ནམ། མི་ལ་དོན་མེད་སྐད་ཆ་རྩེད་མོའི་བཟོ་འདྲ་བཤད་ནས་བརྙས་རྐོ་མཁན་ལ་གོ། ༼ཡ་མ་བརླ་ནི་སྙིང་པོ་མེད་པའི་དོན་ཡིན།༽༼སྤྱིར་བཏང་ལས་ཀ་བྱེད་དུས་སམ་རྩེད་མོ་མི་རྩེ་དུས་མི་ཞིག་གིས་ཆོ་མེད་དེ་འདྲ་བྱེད་དུས། འ་ཛི། "མི་དེ་ཡ་མ་བརླ་མཁན་ཞིག་འདུག" ཟེར། ཡང་ན། "མི་དེ་ཡ་མ་བརླ་མཁན་འདྲ་པོ་ཞིག་འདུག་"ཟེར།༽

དེ་བཞིན་དུ་"མི་རྒྱས་པོ་ཞིག་སླེབས་སོང་"ཟེར་དུས་མི་མང་པོ་སླེབས་པ་དང་། "ངས་བར་ཁ་ལྟར་ནི་ཡོང་བ་ཡིན་"ཟེར་དུས་བར་ཁ་ནང་བཞིན་མགྱོགས་པོར་ཡོང་བའི་དོན་དུ་གོ་དགོས་སམ་དཔྱད།

དགེ་ཚུལ་མ་ལ་ཕམ་འདྲའི་ཉེས་བྱས་དུ་ཡོད་དཔྱད་པ།

དགེ་ཚུལ་མ་ལ་ཕམ་འདྲའི་ཉེས་བྱས་དུ་ཡོད་དཔྱད་པ།

འགྲོ་ལ་ཐུགས་བརྩེ་རྗེ་བཙུན་བླ་མ་དང༌།
རྒྱལ་ཀུན་ཡབ་གཅིག་རྗེ་བཙུན་མཁྱེན་པའི་གཏེར།
དམ་པའི་ཆོས་ལ་ཚངས་པར་སྤྱོད་པ་ཡི།
གྲོགས་བཟང་རྣམས་ཀྱིས་དགེ་ལེགས་ཤིས་པ་སྩོལད།

་ རྟོག་པ་དང་ལྡན་པ་གང་ཞིག་གིས་དགེ་སློང་ཕ་ལ་ཕམ་པ་བཞི་དང་དགེ་ཚུལ་ཕ་ལ་ཕམ་འདྲའི་ཉེས་བྱས་བཞིར་བཞག་པས། དགེ་སློང་མ་ལ་ཕམ་པ་བརྒྱད་ཡོད་པ་ལྟར་དགེ་ཚུལ་མ་ལའང་ཕམ་འདྲའི་ཉེས་བྱས་བརྒྱད་འདོད་དགོས་སམ་ཞེ་ན། དགེ་ཚུལ་ཕ་དང་འདྲ་བར་དགེ་ཚུལ་མའང་ཕམ་འདྲའི་ཉེས་བྱས་བཞི་ལས་ལྷག་པ་ཡོད་པ་མིན་པར་སེམས་ཏེ།
ཕམ་འདྲའི་ཉེས་བྱས་ནི། མཚོ་ཊིཀ་༧༧༩ལས། ཕམ་འདྲའི་ཉེས་བྱས་ཀྱི་མཚན་ཉིད་ནི། རབ་བྱུང་བསྙེན་པར་མ་རྫོགས་པས་རང་གི་བསླབ་པའི་གཞི་རྣམ་པར་བཞག་པ་ལས་འདས་པ་གང་ཞིག་ལྟུང་བའི་ངོ་བོའི་ཆ་ནས་ཆང་འཐུང་བའི་ཁ་ན་མ་ཐོ་བ་མན་ཆད་ལ་ལྟོས་ཏེ་ཆད་པ་ལྕིར་རུང་བའོ། །ཕམ་འདྲའི་ཉེས་བྱས་འཆབ་བཅས་བསྙིལ་བ་དང་འཆབ་མེད་བསླབ་པ་བྱིན་དགོས་གཉིས་ཀ་ལ་བྱས་པའོ།། ཞེས་གསུངས་པས། ཕམ་འདྲའི་ཉེས་བྱས་ལ་བླངས་འདས་ཀྱིས་ཁྱབ་པར་གྲུབ་ཏེ། ལུང་དེའི་གོང་དེ་གར་བླངས་འདས་ཀྱི་མཚན་ཉིད་འཇོག་པ་ན། དེ་ཉིད་ལས། སྐབས་འདིར་བརྗོད་པའི་ལྟུང་བ་ཙམ་གྱི་མཚན་ཉིད་ནི། རབ་བྱུང་བསྙེན་པར་མ་རྫོགས་པས་རང་གི་བསླབ་པའི་གཞི་རྣམ་པར་བཞག་པ་ལས་འདས་པའི་ཁ་ན་མ་ཐོ་བའོ། །ཞེས་གསུངས་པའི་ཕྱིར།
མ་ཟད་རིགས་པས་ཀྱང་སྒྲུབ་ཏེ། དགེ་ཚུལ་གྱི་ཕམ་འདྲའི་ཉེས་བྱས་ལ་བླངས་འདས་དང་ཕྱོགས་མཐུན་གཉིས་ལས་གཞན་དུ་འདའ་ས་མེད་པ་གང་ཞིག །ཕྱོགས་མཐུན་དུ་གཏན་མི་རིགས་པའི་ཕྱིར་བླངས་འདས་སུ་གྲུབ་བོ། །ཕྱོགས་མཐུན་དུ་མི་རིགས་པ་ནི་མདོ་རྩ་བ་ལས། དེའི་ཕྱོགས་དང་མཐུན་པ་ལ་ནི་ཡིད་ཀྱིའོ། །ཞེས་ཕྱོགས་མཐུན་ལ་ཡིད་ཀྱི་བསྡམ་བྱར་གསུངས་ཞིང༌། ཕམ་འདྲའི་ཉེས་བྱས་ལ་ཡིད་ཀྱིས་གཤགས་པ་ཙམ་གྱིས་དག་ཏུ་མེད་པར་འཆབ་བཅས་བསྙིལ་བ་དང་འཆབ་མེད་བསླབ་པ་བྱིན་པར་མཚོ་མཆན་དུ་གསུངས་པ་གོང་དུ་དྲངས་པ་དེའི་ཕྱིར།
དེས་ན་དགེ་ཚུལ་མ་ལ་རེག་བཀན་ལ་སོགས་པའི་ཐུན་མོང་མིན་པའི་ཕམ་འདྲའི་ཉེས་བྱས་མཆིས་ན་བླངས་འདས་སུ་འདོད་དགོས་པས་དགེ་ཚུལ་མ་ལ་བླངས་འདས་བཅུ་བདུན་ཏུ་འགྱུར་ན། དེ་ནི་མི་རིགས་པའི་ཕྱིར་ཏེ། མཚོ་ཊིཀ་ཉི་མའི་འོད་ཟེར་༧༧༦ལས། ཆེ་ལོང་དུ་ཕྱེ་ན་དགེ་ཚུལ་ཕ་མ་ལ་བཅུ་གསུམ་དང༌། དགེ་སློབ་མ་ལ་ཉི་ཤུ་རྩ་ལྔ་ཡོད་དོ། །ཞེས་དང༌། འདུལ་བ་རྒྱ་མཚོ་སྙིང་པོར། སྤང་བྱ་བཅུ་གསུམ་དག་ཏུ་འགྱུར། །ཞེས་གསུངས་པའི་ཕྱིར།

རྟགས་གཞན་ཡང༌། དངོས་བླངས་ནི་མཁན་པོ་དང་སློབ་དཔོན་ལས་དངོས་སུ་བླངས་པ་ཡིན་ལ། ཐུན་མིན་གྱི་ཕམ་འདྲ་བཞི་ཁས་འཆེ་བའི་ཚིག་ཆོ་ག་ལས་དངོས་སུ་མ་གསུངས་པའི་ཕྱིར། རྟགས་གྲུབ་སྟེ། དགེ་ཚུལ་ཕ་མའི་ཆོག་ག་འདྲ་བའི་ཕྱིར་ཏེ། ཀརྨ་ཤཱ་ཏམ་ལས། ཡོངས་སུ་དག་ནས་སྐྱབས་སུ་འགྲོ་བ་དང༌། དགེ་ཚུལ་ཉིད་དུ་ཁས་བླངས་པས་དགེ་ཚུལ་མར་ཉེ་བར་བསྒྲུབ་པར་བྱའོ། །ཞེས་གསུངས་པའི་ཕྱིར། ཁྱབ་པ་ཡང་གྲུབ་སྟེ། ཕྲ་མ་ཚིག་རྩུབ་ངག་འཁྱལ་སྤོང་བར་ཁས་ལེན་པའི་ཚིག་ཆོ་ག་ལས་དངོས་སུ་མ་གསུངས་པས་དེ་གསུམ་དགེ་ཚུལ་ལ་སོགས་པ་གསུམ་གྱིས་སྤོང་བར་དངོས་སུ་ཁས་མ་བླངས་པར་མཚོ་ཊིཀ་ལས་གསུངས་པའི་ཕྱིར། མདོ་རྩ་མཆན་འགྲེལ་ལས་ཀྱང༌། དེའི་ཕྱོགས་དང་མཐུན་པ་ལས་འདས་པ་སྟེ་དགེ་ཚུལ་གྱིས་འབྱིན་རེག་བྱེད་པ་ལྟ་བུ་ལ་ནི་ཡིད་ཀྱི་བསྡམ་བྱའི་ཉེས་བྱས་སུ་འགྱུར་བའོ། །ཞེས་ཕ་མ་དབྱེར་མེད་དུ་གསུངས་པའི་ཕྱིར་དགེ་ཚུལ་མས་འབྱིན་རེག་བྱེད་པ་ནི་ཕྱོགས་མཐུན་ལས་འདས་པའི་ཉེས་བྱས་ཡིན་པས་ཕམ་འདྲར་མི་རིགས་སོ།།

ཅི་སྟེ་དགེ་ཚུལ་མ་ལ་རེག་པའི་ཕམ་འདྲའི་ཉེས་བྱས་འཇོག་ན་དགེ་སློབ་མའི་བླངས་འདས་ཀྱི་སྐབས་སུ་རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་གནོན་པ་དོན་མེད་པར་ཐལ། རེག་པ་ཉིད་སྔར་དགེ་ཚུལ་གྱི་སྐབས་ནས་བླངས་འདས་ཀྱི་ཉེས་བྱས་སུ་ཡོད་པའི་ཕྱིར་ཏེ། ཕམ་འདྲ་ལ་བླངས་འདས་ཀྱིས་ཁྱབ་པར་གྲུབ་ཟིན་པའི་ཕྱིར། ཡང་དགེ་ཚུལ་མས་རེག་པར་བྱེད་པ་བླངས་འདས་སུ་འདོད་པ་མི་འཐད་དེ། དེ་བསྡམ་བྱའི་ཉེས་བྱས་ཡིན་པའི་ཕྱིར་ཏེ། མཚོ་ཊིཀ་༢༠༢ལས་དེ་དག་ཀྱང་༼རྩ་བའི་ཆོས་དྲུག་དང་རྗེས་མཐུན་ཆོས་དྲུག༽དགེ་ཚུལ་མས་སྤངས་ཟིན་ཏོ་སྙམ་ན། དེ་དག་ལས་འདས་ན་འདས་ན་དགེ་སློང་མ་ལ་བཤགས་པར་འགྱུར་ཡང༌། དགེ་ཚུལ་མ་ལ་བསྡམ་བྱར་འགྱུར་བས། བཤགས་བྱ་ལ་འཛེམ་པའི་ཤེས་པ་སྐྱེ་བ་དེ་ཙམ་དུ་བསྡམ་བྱ་ལ་དེ་ལྟར་མ་ཡིན་པའི་ཕྱིར་རོ། །ཞེས་དགེ་སློབ་མའི་ཚིག་གི་དགོས་དོན་དུ་གསུངས་སོ།།

དགེ་ཚུལ་མ་ལ་ཕམ་འདྲ་དུ་ཡོད་ཀྱི།
དཔྱོད་པ་ས་འབུའི་འགྲོས་ཀྱིས་འབུངས་པ་ལ།
དགེ་ལེགས་ཡོན་ཏན་འབུམ་གྱིས་བསྟམས་པ་ཡི།
དཔྱོད་ལྡན་རྣམས་ཀྱིས་ཁྲེལ་བར་མ་འཚལ་ཞུ།
འཛིན་གྲོགས་སྐལ་བཟང་དོན་འགྲུབ་ཀྱིས་མངགས་པ་ལས་ར་ས་བསྟན་ཕུན་དཔལ་གྱིས་ས་གླང་མགོ་ཟླ་བའི་ཚེས་༥ཉིན་བྲིས།

གློག་ཀླད་དང་བོད་ཡིག

ཐོག་མར་ངས་ཧི་མ་ལ་ཡ་བོད་ཡིག་བཟོ་བ་པོ་དང་སྨོན་ལམ་ཡིག་གཟུགས་བཟོ་བ་པོ་དང་དེའི་ཐད་རོགས་རམ་གནང་མཁན་ཡོང་ལ་ཐུགས་རྗེ་ཆེ་ཞུ་ཡི་ཡིན།

ཀ༽ ངས་ཤེས་པའི་གློག་ཀླད་བོད་ཡིག་གི་ལོ་རྒྱུས།

འདིར་ངས་བཤད་འདོད་པ་ནི། ལོ་ངོ་དྲུག་ཙམ་གྱི་རིང་ངས་གློག་ཀླད་བེད་སྤྱོད་བྱས་པའི་བརྒྱུད་རིམ་ནང་བོད་ཡིག་གི་ཐོག་དཀའ་ངལ་མང་པོ་ཕྲད་མྱོང༌།

སྤྱིར་བཏང་འཛམ་གླིང་ནང་གློག་ཀླད་གཉེན་ཆས་ཁ་ཤས་ཡོད་ལས་གྲགས་ཆེ་བ་ནི་windowsལྒེ་ཁུང་དང་appleཀུ་ཤུ་ཟེར་བ་གཉིས་ཡིན་ན་དེ་དག་གི་ནང་ནས་
༡ དང་པོ་ལྒེ་ཁུང་གཉེན་ཆས་ནང་བོད་ཡིག་བཀོལ་སྤྱོད་ཐད་བཤད་ན།

ཕྱི་ལོ་བརྒྱད་ཅུ་ནང་ངས་ཀུ་ཤུའི་གཉེན་ཆས་ཅན་གྱི་གློག་ཀླད་གཅིག་མཐོང་ཡང་ལྒེ་ཁུང་གཉེན་ཆས་ཅན་དགུ་བཅུའི་ནང་ཐོག་མར་མཐོང་བྱུང༌། དེ་དུས་གཉེན་ཆས་ཌོ་སེ་DOSཟེར་བ་བེད་སྤྱད་ཀྱི་འདུག་ལ། ལྒེ་ཁུང་༩༥་གསར་དུ་འཐོན་པའི་སྒང་རེད། སྐབས་དེ་དུས་བོད་ཡིག་བྲི་བར་ངེས་པར་དུ་ཌོང་གྷོལ་ཟེར་བ་རྡོག་རྡོག་ཞིག་རྒྱ་གར་གྱི་གྲོང་ཁྱེར་Puneཔུ་ན་ནས་ཉོ་དགོས་ཀྱི་འདུག །ཡིག་གཟུགས་ཡག་པོ་འདུག།།འོན་ཀྱང་རིམ་པའི་དུས་གྱུར་གྱིས་རྐྱེན་པའི་ལྒེ་ཁུང་༩༨པ་དང་ལྒེ་ཁུང་༢༠༠༠དང་ལྒེ་ཁུང་xpཨེཀ་སེ་པི་དང༌། ཨེཀ་སེ་པི་ཁྱིམ་སྤྱོད་xp home editionདང་proffessionalམཁས་སྤྱོད། ཨེཀ་སེ་པི་དཔར་གྱི་ལྟེ་གནས་media center editionདང༌། ལྒེ་ཁུང་ཝི་སི་ཏ་vistaསོགས་འཐོན་སོང༌། གོང་སྨོས་བོད་ཡིག་དེ་ལྒེ་ཁུང་༩༨windows 98ཕན་ལ་བེད་སྤྱོད་མེད་པ་ཆགས་པ་རེད། དེ་སྐབས་བཙན་བྱོལ་བོད་གཞུང་གིས་ཌོང་གྷོལ་ཟེར་བའི་རྡོག་རྡོག་དེ་འདྲ་མི་དགོས་པའི་ཊི་སི་ཨར་སི་tcrcཟེར་བའི་བོད་ཡིག་བརྙན་ཆས་བཏོན་གནང༌། འོན་ཀྱང་གཉེན་ཆས་དེར་ཡིག་གཟུགས་མི་འདྲ་བ་གཉིས་youtso/boyigཙམ་ལས་མེད།

དེ་ནས་བློ་བཟང་སྨོན་ལམ་ལགས་ཀྱིས་རང་སྒེར་གྱི་རང་སྦྱོང་བྱས་ནས་སྨོན་ལམ་ཡིག་གཟུགས་དང་པོ་བཏོན། དེར་ཡིག་གཟུགས་ཁག་པོ་མང་ཡོད་པས་མ་ཚད་དབུ་མེད་སོགས་ཀྱང་ཡོད།། འོན་ཀྱང་གོང་གསལ་ཡིག་གཟུགས་ཚང་མར་སྔགས་ཡིག་འབྲི་དུས་སྔགས་ཡིག་རྩེག་མི་ཐུབ་པའི་དཀའ་ངལ་ཡོད་པར་སོང༌། བློ་བཟང་སྨོན་ལམ་གྱིས་སྨོན་ལམ་གཉིས་པ་བཏོན་པ་རེད། སྨོན་ལམ་གཉིས་པའི་འཐེབ་གཞོང་ཅུང་མི་འདྲ་བ་ཡོད། དེ་ལྟར་སྨོན་ལམ་གཉིས་པ་བཏོན་པ་ལས་སྔགས་ཡིག་གི་དཀའ་ངལ་བསལ་བ་ལྟ་བུ་ཡིན་ནའང༌། འཐེབ་གཞོང་ཅུང་ཟད་བེད་སྤྱད་དཀའ་བ་དང༌། རྒྱལ་སྤྱིའི་གཅིག་གྱུར་གྱི་ཨང་རྟགས་ཐོག་བཟོས་མེད་པ་རེད། དེ་ནས་བོད་ནང་ནས་མི་ཞིག་སྐད་བཏང་ནས་ལྒེ་ཁུང་གཉེན་ཆས་ཚོགས་པས་ཧི་མ་ལ་ཡ་བོད་ཡིག་དེ་བཟོས་པ་རེད། ཡིག་གཟུགས་དེ་ནི་ལྒེ་ཁུང་གཉེན་ཆས་ཚོགས་པའི་ཝི་སི་ཏ་གཉེན་ཆས་གསར་པ་ཚོ་དང་མཉམ་དུ་དང་པོ་ནས་ཡོང་གི་ཡོད་ཅིང༌། ལྒེ་ཁུང་གཉེན་ཆས་དྲ་རྒྱ་འཐེན་ཆེད་ཨང་༧་windows internet explorer 7ཕན་ལ་རང་ཆས་སུ་བོད་ཡིག་འཆར་རྒྱུ་ཡོད། དེས་ན་ཁྱོད་ཀྱི་ལྒེ་ཁུང་གཉེན་ཆས་ཅན་གྱི་གློག་ཀླད་ནང་བོད་ཡིག་ཡག་པོ་མ་ཤར་ན་དྲ་རྒྱ་འཐེན་ཆས་ཨང་༧་པའམ་བྱུང་ན་ཨང་༨་བླུགས་དགོས། ཨང་བརྒྱད་པ་བླུགས་མ་ཐག་བོད་ཡིག་ཡག་པོ་མི་འཆར་བ་འདྲ་པོ་བྱ་ངེས་ཀྱང་ཆུ་ཚོད་ཁ་ཤས་རྗེས་ཡག་པོ་ཤར་ངེས་རེད། མ་གཞི་ཡིག་གཟུགས་སྒྲིག་བྱེད་ཀྱི་བརྡ་དཀྱོག་དཀྱོག་ཅན་གྱི་compatibillityཞེས་པའི་བསྣོན་ས་ཞིག་ཁ་བྱང་འབྲི་སའི་ཟུར་དེར་ཡོད་པ་དེར་གནོན་ན་དཀའ་ངལ་སེལ་གྱི་རེད། དེས་ན་ཧི་མ་ལ་ཡ་ཡིག་གཟུགས་དེའི་ཐོག་ཁྱོད་ཀྱི་བོད་ཡིག་གློག་འཕྲིན་སོགས་བདེ་བླག་གཏོང་ཐུབ་ཅིང་དྲ་ཚིགས་སུ་བོད་ཡིག་བདེ་བླག་བྲི་ཐུབ་པ་ཡོང་གི་རེད། འོན་ཀྱང་གློག་འཕྲིན་གཏོང་སྐབས་འབྱོར་ས་དེར་དྲ་རྒྱའི་གཉེན་ཆས་ཨང་༧་ཡན་དགོས། འོན་ཀྱང་འདིའི་མཛུབ་བསྣོན་གོང་གསལ་ཚང་མ་དང་མི་འདྲ་བ་རེད།

ཡིན་ན་ཡང་ད་ཆ་སྨོན་ལམ་གསུམ་པ་འདོན་པ་ནས་ཕལ་ཆེར་བཀའ་ངལ་མེད་པ་ལྟ་བུ་རེད་ཤག།།སྨོན་ལམ་གསུམ་པའི་ནང་ཡིག་གཟུགས་ཁག་བཅུ་གསུམ་ཙམ་འདུག་ལ། ཡིག་གཟུགས་དེ་ཚོ་ཡག་པོ་འདུག།། མ་ཟད་ཡིག་གཟུགས་དེ་ཚོ་རང་འདོད་ལྟར་ཊི་སི་ཨར་སི་འཐེབ་གཞོང༌། པཎ་ཏི་ཏའི་འཐེབ་གཞོང༌། སྨོན་ལམ་གཉིས་པའི་འཐེབ་གཞོང༌། སོགས་ཀྱིས་བེད་སྤྱོད་གཏོང་ཆོག་འདུག།། མ་ཟད་ཕལ་ཆེར་སྨོན་ལམ་གསུམ་པ་ཡོད་ན་ཧི་མ་ལ་ཡ་རང་ཆས་སུ་ཡོང་གི་ཡོད་པ་འདྲ།

༢ ཀུ་ཤུ་གཉེན་ཆས་ཀྱི་ནང་སྔོན་མ་ནས་ཕལ་ཆེར་tibetanཟེར་བའི་བོད་ཡིག་ཡིག་གཟུགས་སྐྱོ་པོ་ཞིག་འདུག།།ཕྱིས་སུ་སམ་བྷོ་ཏ་ཟེར་བ་དང༌། ཡང་ཎི་ཐར་དྷ་སམ་བྷོ་ཏ་ཟེར་ཞིག་འདུག །དེ་ལ་དངུལ་སྤྲད་ནས་ཉོ་དགོས་འདུག ཡིག་གཟུགས་དེ་དག་འབྲི་དཀའ་བ་མ་ཟད། བཟོ་ལྟ་ཡང་དེ་ཙམ་ཡག་པོ་མེད། ད་དུང་ལྒེ་ཁུང་གཉེན་ཆས་ཡོད་སར་ཁྱེར་ན་འཆར་མི་ཐུབ་པ་བཅས་ཀྱི་སྐྱོན་ཡོད།

ད་ཆ། ཀུ་ཤུ་གཉེན་ཆས་ཀྱི་ཆེད་སྨོན་ལམ་གསུམ་པ་ཡང་བཟོས་འདུག་པས་ཡིག་གཟུགས་ཡག་པོ་ཡོད་པས་མ་ཚད་བྲིས་རྒྱུ་ཡང་དེ་ཙམ་དཀའ་བ་མི་འདུག འོན་ཀྱང་ཀུ་ཤུ་གཉེས་ཆས་རྒྱུས་དྲ་ཚིགས་སུ་བོད་ཡིག་བྲིས་ན། ལྒེ་ཁུང་གཉེན་ཆས་ནང་ཡག་པོ་འཆར་ཐུབ་ཀྱི་མི་འདུག།

ཁ༽ གློག་ཀླད་ནང་བོད་ཡིག་གང་དང་གང་བླུག་ན་བཟང་ངམ།

ཁྱེད་ཀྱིས་རང་གི་གློག་ཀླད་ནང་བོད་ཡིག་འཐུས་ཚང་བཟོ་དགོས་ནས་སྨོན་ལམ་ཡིག་གཟུགས་དང་གཉིས་གསུམ་ངེས་པར་དུ་བླུགས་དགོས་ཤིང་བྱུང་ན་ཧི་མ་ལ་ཡ་ཟུར་དུ་བླུགས་ན་ཡག་པོ་མེད་འགྲོ་བསམས།

༡ དེ་ཡང་སྨོན་ལམ་དང་པོ་བླུགས་པ་ཡིན་ན། ཊི་སི་ཨར་སི་རང་ཆས་སུ་ཡོད་ཅིང༌། ཤོག་ངོས་བཟོ་ས་pagemakerསོགས་ཀྱི་ནང་བོད་ཡིག་བདེ་བླག་བྲིས་ཐུབ།

༢ སྨོན་ལམ་གཉིས་པ་བླུགས་པ་ཡིན་ན། ཁྱོད་ཀྱི་གློག་ཀླད་ཀྱི་དྲ་ཚིགས་དེ་ཚོ་མིང་བོད་ཡིག་ཐོག་ཤར་ཐུབ་ཅིང༌། ཡིག་ཆ་དེ་ཚོར་བོད་ཡིག་ཐོག་མིང་བཏགས་ཆོག། །དེ་མེད་ན་ཁྱོད་ཀྱི་གློག་ཀླད་ཀྱི་བོད་ཡིག་དྲ་ཚིགས་ཀྱི་ཁ་བྱང་ལ་སྟོང་པ་གྲུ་བཞི་མང་པོ་ཤར་གྱི་རེད།

༣ སྨོན་ལམ་གསུམ་པ་བླུགས་པ་ཡིན་ན། ཁྱོད་ཀྱི་དྲ་ཚིགས་དག་ཏུ་བོད་ཡིག་བདེ་བླག་བྲི་ཐུབ་པ་མ་ཟད། ཧི་མ་ཡའི་ཡིག་གཟུགས་དེ་ཚོ་ཡང་རང་གི་གོམས་འདྲིས་གང་ལ་ཡོད་པའི་ཊི་སི་ཨར་སིའམ་སྨོན་ལམ་དང་པོ་དང༌། པཎ་ཊི་ཏ། སྨོན་ལམ་གཉིས་པ་སོགས་ཀྱི་འཐེབ་གཞོང་གཞིར་བཞག་བྲིས་ཐུབ།

ག༽ གློག་ཀླད་བོད་ཡིག་བཟོ་ཕྱོགས་ཁོ་བོས་བསམ་འཆར་ཆུང་ཆུང་འགའ་ཤས།

༡ གློག་ཀླད་ནང་བོད་ཡིག་tcrcལྟ་བུ་བེད་སྤྱད་སྐབས་གྲལ་གྱི་མཐར་གནས་པའི་ཚེག་དེ་ཚོ་གཤམ་གྱི་གྲལ་གྱི་མགོར་མི་སླེབས་པ་བཞིན་ཤད་དེ་ཚོ་ཡང་མི་སླེབས་པ་བཟོ་དགོས་འདུག།

༢ བོད་ཡིག་ནང་གཏན་ནས་མེད་པའི་ཡི་གེ་དཔེར་ན་རྤ་དང་ལྨ་ལྟ་བུ་གློག་ཀླད་ནང་མི་ཡོང་བ་བཟོ་དགོས།

༣ སྨོན་ལམ་གསུམ་པའི་ཡིག་གཟུགས་ཚང་མ་དྲ་ཚིག་གཉེན་ཆས་ནང་རང་ཆས་སུ་ཡོང་བ་བཟོ་དགོས།

༤ བོད་ཡིག་གི་ཡིག་གཟུགས་མང་པོ་ཡོད་པ་དེ་ཚོ་ཚང་མར་ཕར་ཚུར་གཟུགས་བསྒྱུར་བྱ་ཆེད་དུ་གཉེན་ཆས་དམིགས་གསལ་ཅན་ཞིག་བཟོ་དགོས།

༢༠༠༩། ༦། ༡༢ཉིན་བྲིས་སོ།།