ཀིང་ཕི་ཤར་Kingfisher IT ༠༣༠༧

༢༠༡༠། ༡༠། ༠༩།


༡
ད་རངས་ཀྱི་ཉི་གཞོན་དང་ལྷན་དུ་ལང་བཞིན་མདང་དགོང་ཀྱི་ནམ་ཕྱེད་དུ་བསྡུ་ཆས་བྱས་པའི་ཁ་མ་བརྒྱབ་པའི་སྒམ་གཉིས་ཀྱི་ནང་ཨ་ཅོ་དང་ཡེག་རྩི་དང་སོ་སྨན་དང་སེན་བཏུབ་སོགས་བླུགས་ནས་མཆོད་ཁང་ནང་གི་སྐུ་གསུང་ཐུགས་རྟེན་དྲུང་སྨོན་ལམ་འདེབས་ཞོར་པོད་གཉིས་ལ་མེ་ལྕེ་བསྒྲོན་ཞིང་ཁ་ནས་གངས་རི་ར་བས་བསྐོར་བའི་ཞིང་ཁམས་འདིར་ཞེས་འདོན་མ་ཐག་སྒོ་ཁར་གླ་འཁོར་གྱི་མོ་ཊ་འབྱོར་བའི་བརྡར་སྤིབ་སྤིབ་ཞེས་བསྒྲགས།

༢
ངས་རླུང་ལྟར་མྱུར་བའི་གླ་འཁོར་དེར་བསྡད་རྗེས་ཅ་ལག་ལ་མིག་གཤེར་ཞིག་རྒྱག་གིན་ད་འགྲོ་ཟེར་མ་ཐག་ཚོུད་གཅིག་དང་ཕྱེད་ཀའི་ཐོག་གཞི་རྒྱ་ཆུང་བའི་འདི་ཁུལ་གྱི་གནམ་ཐང་ཀྱི་ཉེན་སྲུང་བའི་རྐང་གྲམས་སུ་སླེབས།
༣

ལྕགས་ཀྱི་རླུང་འཁོར་དམར་རྗེན་དུ་འཐོན་ནའང་མིང་གྲགས་ལྡན་པའི་ཀིང་ཕི་ཤར་kingfisherགྱི་མཚོན་རྟགས་ཀྱིས་རྒྱན་ཡོད་དུས་དངངས་སྐྲག་གི་སྙིང་ཁམས་འཕར་ལྡིང་དེ་ཙམ་མེད་པར་ཤར་མར་དེ་ནང་དུ་ཞུགས།
༤
མཁའ་དབྱིངས་ཀྱི་གནམ་གཤིས་དེ་འདྲའི་དྭངས་མ་མེད་དུས་སྒེའུ་ཁུང་ནས་ས་སྟེང་ཀྱི་མཛེས་སྡུག་གསལ་གསལ་དུ་མི་རིག་པའི་མུར་གང་མཚམས་ནས་ནག་འདིང་འདིང་གི་རྒྱ་མཚོ་མཐོང་གིན་མཐོང་གིན་ཁང་བརྩེགས་ཅན་གྱི་གྲོང་ཁྱེར་ཇི་གསལ་ཇི་གསལ་ལ་མམ་བྷེ་Mumbaiགནམ་ཐང་དུ་འབབ།

མམ་བྷེ་གནམ་ཐང་། ར་ས་ཕོ་ཉས་དཔར།

༥
བྱ་ཚང་དུ་མའི་ཁེངས་པའི་ཤིང་ལྡོང་ཞིག་དང་འདྲ་བར་མམ་བྷེ་གནམ་ཐང་དུ་གནམ་གྲུའི་བྱ་ཚོགས་ཀྱི་ཁེངས་འདུག་ཞིང་གནམ་གྲུ་དེ་དག་གི་མིང་ཡང་འདྲ་མིན་སྣ་ཚོགས་པ་དཔེར་ན་གྷོ་ཨི་ཡར་Go air སེ་པེ་སེ་ཇེཊ་Spice jet རྒྱ་གར་གནམ་གྲུ་Air India ཇེཊ་གནམ་གྲུ་Jet Airlineསོགས་རེད།
༦
ཚོུད་༢་༣༠ཐོག་འཐོན་མཁན་གནམ་གྲུ་རྒྱུན་ལྡན་འབྱུང་བཞིན་པའི་རྒྱ་གར་བའི་སྲོལ་ལུགས་བཞིན་ཚོུད་༥་༤༠བར་ཕྱིར་འགྱངས་བྱས་པའི་གནས་སྟངས་འོག་མམ་བྷེ་ཆ་ཏ་ར་་་པ་ཏི་་ཤི་བ་ཇི་chhatrapari shivaji གནམ་ཐང་དུ་ཚུ་ཚོད་ལྔ་ཙམ་ཉུལ་བའི་རིང་དེར་ཡོད་ཀྱི་ཚོང་ཁང་དང་ཟ་ཁང་བགྲང་བཞིན་པོ་ལོ་ཁོ་ལོས་བརྕམས་པའི་ཨེཁ་མེ་སེཊ་Atchemistཞེས་པའི་བརྩམས་སྒྲུང་གྲགས་ཅན་དེ་ཉོས།
༧
ད་ལྟ་ནི་ངའི་མདུན་ལྕོག་སྟེང་ཆུ་གྲང་མོ་Diet Pepsi གཅིག སྒྲུང་དེབ་གཅིག ལྟོ་ཕད་གཅིག ཉིན་དེབ་གཅིག ཞ་སྨྱུག་གཅིག ཡང་དེ་གའི་འགྱངས་སྟེང་དུ་ཡོད་པའི་གློག་འཐེན་ས་གསུམ། སྤར་ས་གཉིས་བཅས་རེད། གློག་འཐེན་ས་གསུམ་པོ་དེས་ངས་དོ་པོའི་ནང་བཏང་ཟིན་པའི་གློག་ཀླད་དེ་ཡང་ཡང་དྲན་དུ་འཇུག་གི་འདུག འོན་ཀྱང་གནམ་ཐང་དུ་སྤྱི་སྤྱོད་དྲ་འདྲེན་ཉིན་གསུམ་རིང་བཀག་འདུག་པས་ཅུང་ཟད་ལྷོད་དུ་ཕབ། ཡ་་། ཕ་གིར་་གནམ་གྲུ་གཅིག་ད་ལྟ་རང་ཕུར་སོང་། ད་བྲིས་མཚམས་བཞག་ནས་ལྡི་ལིར་བསྐྱོད་པའི་གནམ་གྲུའི་རྒྱལ་སྒོ་འཚོལ་དུ་འགྲོ A9 རེད་ཟེར།

ཉིན་ཐོ།

ད་རིང་ཉིན་རྒྱབ་ང་རང་གྲོགས་པོ་འགའ་ཞིག་དང་ལྷན་དུ་དཔེ་མཛོད་ཀྱི་ཇ་ཁང་ནང་ཆུ་འཐུང་པར་འགྲོ་དུས་ཟུར་དེར་ཡོད་པའི་དཔེ་མཛོད་ཀྱི་ཚོང་ཁང་དེ་མཐོང་བ་དང་ལམ་སེང་ལོ་ཐོ་གསར་པ་ཞིག་ཉོ་རྒྱུའི་བསམ་བློ་འཁོར་བས་རོགས་པ་ཚོ་དང་ལྷན་དུ་དཔེ་ཚོང་ཁང་ལ་ཕྱིན། དེར་ཚོང་པ་དེར་ལོ་ཐོ་ཞིག་བཙོང་རོགས་ཟེ་ཞོར་དུ་ལྕོག་རྩེ་སྟེང་གཅིག་བལྟས་པས་དེར་དགེ་སློང་རྣམ་རྒྱལ་དབང་ཆེན་གྱིས་བརྩམས་ཞེས་པའི་ཚན་རིག་གི་དཔྱད་དེབ་ཞིག་ཚོང་རྒྱུ་འདུག ངས་གོང་ཚད་དྲིས་པས་སྒོར་༡༥༠རེད་འདུག

ང་རང་ལ་དང་ཐོག་ནས་དོགས་པ་ཡོད་པ་བཞིན་འབའ་ཁུག་ནང་དངུལ་ག་ཚོད་འདུག་བལྟས་པས་སྒོར་བརྒྱ་དང་ལྔ་བཅུ་ལྷག་ཙམ་ལས་མེད་པ་ཤེས་པས་ངས་དེབ་དེ་ཉོ་ན་རོགས་པ་ཚོར་ཆུ་ཉོ་མ་ཐུབ་པར་སོང་ངས་ཁ་བསང་པོའི་ངང་ད་ལྟ་དངུལ་འདང་པ་མི་འདུག་ལབ་ནས་ཇ་ཁང་དུ་ཆུ་འཐུང་སར་ཕྱིན། དེར་ངས་ང་ཚོ་ཆུ་འཐུང་པའི་རིན་དུ་སྒོར་༥༥སྤྲད། ད་དུང་ངའི་སེམས་ནང་ཚན་རིག་དཔྱད་དེབ་དེ་བལྟ་འདོད་ཆེ་བས་རོགས་པ་ཚོ་ལ་དངུལ་ཡོད་མེད་དྲིས་དུས་ཁོང་ཚོས་ཀྱང་དངུལ་ཁྱེར་མི་འདུག

ངས་སླར་ཡང་དཔེ་ཚོང་ཁང་དེར་ཕྱིན་ནས་དངུལ་སང་ཉིན་སྤྲོད་ཆོག དེབ་ད་ལྟ་ཁྱེར་ཕྱིན་ན་འགྲིགས་སམ་ཞེས་དྲིས་དུས་དཔེ་ཚོང་མཁན་དེས་སང་ཉིན་གུང་སེང་རེད། ཁྱེད་ཀྱིས་དགེ་ཕྲུག་ཤིག་ད་ལྟ་གཏོང་ཤོག་ཟེར་ལན་བཏབ་བྱུང་བས་ངས་དངུལ་མ་སྤྲད་བར་དེབ་སྤྲོད་རྒྱུ་མ་ཡིན་པ་ཤེས། དེ་ནས་ངས་ཨུ་ཚུགས་མ་བྱས་པར་ལོག་ཕྱིན་པ་ཡིན། ༼ལམ་ཕྱེད་ཙམ་དུ་སླེབས་སྐབས་ངས་བསམ་བློ་གཏོང་དུས་ང་རང་དེབ་བལྟ་སྙིང་འདོད་ཐག་ཆོད་ནས་ངོ་ཚ་ཡང་བརྗེད་འདུག༽
ང་བསྡད་ས་ནས་དཔེ་ཚོང་ཁང་དེ་ཐག་རིང་པོ་ཡིན་པར་སོང་དགེ་ཕྲུག་གཏོང་བློ་བདེ་པོ་བྱུང་མ་སོང་ལ་ང་རང་ཡང་འགྲོ་རྒྱུ་ཁོམ་མ་སོང་། གནངས་ཉིན་ངས་དཔེ་ཚོང་ཁང་དེར་ཕྱིན་ནས་ཚན་རིག་དཔྱད་དེབ་དེ་ཉོ་ཁོ་ཐག་ཡིན་ན་དེ་དུས་ངོ་སྤྲོད་ཞིག་ཀྱང་བྲིས་ཡོང་ཞེས་ཟིན་བྲིས་སུ་བཏབ།