ཡིད་འོང་འདབ་བརྒྱ་བཞེད་པའི་པད་ཚལ་དུ།།
སྙན་འཇེབས་འགྱུར་ཁུག་བཟང་བའི་ངང་པའི་བུ།།
དྭངས་པའི་མཚོ་ནང་རང་གི་གཟུགས་བརྙན་ལ།།
འགྲན་པ་བྱས་འདི་ཅི་ནས་བླུན་མ་ལགས།།

རང་ལུས་ཡལ་བར་མ་དོར།

རྟག་ཏུ་སེམས་ཅན་དོན་དུ་རང་གི་ལུས།།
ཡལ་བར་མ་དོར་རྗེ་བཙུན་བླ་མ་ལགས།།
ཁྱེད་ཀྱི་སྐུ་ཁམས་བདེ་བར་གནས་པ་ཡང་།།
གཞན་ཅི་མ་ཡིན་སེམས་ཅན་དོན་དག་ལགས།།

རྟག་ཏུ་ཕྲུག་གུའི་དོན་དུ་རང་གི་ལུས།།
ཡལ་བར་མ་དོར་དྲིན་ཆེན་ཨ་མ་ལགས།།
ཁྱེད་ཀྱི་སྐུ་གཟུགས་བདེ་ཐང་ཡོང་བ་ཡང་།།
གཞན་ཅི་མ་ཡིན་ཕྲུག་གུ་རེ་མདུན་ལགས།།

རྟག་ཏུ་བུང་བའི་དོན་དུ་རང་གི་ལུས།།
ཡལ་བར་མ་དོར་མཛེས་ལྡན་པད་མ་ལགས།།
ཁྱེད་ཀྱི་སྐུ་མདངས་གང་རྒྱས་འབྱུང་བ་ཡང་།།
གཞན་ཅི་མ་ཡིན་བུང་བའི་འཚོ་བ་ཡིན།།

རྟག་ཏུ་རང་གི་དོན་དུ་རང་གི་ལུས།།
ཡལ་བར་མ་དོར་ཉམ་ཐག་འགྲོ་བ་རྣམས།།
སོ་སོའི་གཟུགས་པོ་བདེ་བར་འཚོ་བ་ཡང་།།
གཞན་ཅི་མ་ཡིན་རང་དོན་དང་པོ་ཡིན།།

ལྷ་མོ་དབྱངས་ཅན་མ།

རབ་ཡངས་གླིང་འདིའི་ང་རོ་ཐ་དག་གཅིག་ཏུ་འདུས་ནས་འགྲན་པས་ཀྱང་།།
རབ་སྙན་ཁྱེད་གསུང་ཆ་ཙམ་མི་བཟོད་སྙན་འཇེབས་རྡུལ་སྙེད་དཔལ་ལྡན་པ།།
རབ་རྒྱས་མྱོས་བུམ་ཟུང་གི་མདུན་ནས་རྒྱུད་མངས་སྦྲེང་པའི་ཚུལ་འཛིན་མ།།
རབ་དཀར་དབྱངས་ཅན་ལྷ་མོའི་སྐུ་ཡི་འོད་རླབས་དེ་ཡིས་བདག་ཡིད་འཕྲོག།

རྣམ་དཔྱོད་བློ་ཡི་སྒོ་མོ་ཕྱེ་ནས་རིག་པའི་ཕོ་ཉ་སྒུག་པའི་ཚེ།།
བླུན་པོ་སྟོང་གིས་རྭ་ཅོ་ངོམ་བཞིན་ཐལ་བའི་ཁྲོད་ནས་སྐད་ཅིག་ལྷགས།
བྱམས་པའི་སེམས་ཀྱི་ལྕགས་ཀྱུས་བཟུང་སྟེ་རེ་ཞིག་འདུལ་བར་བསམས་ན་ཡང་།།
དཔྱོད་མེད་རིགས་ཀྱི་བྱེད་སྟངས་དེ་ཡི་རེ་ཞག་མདའ་རྩེ་བཞིན་དུ་འདྲོངས།

དཔའ་བོ་མིན།

གཡག་རྒོད་དར་མ་འདུལ་བའི་ཤེད་ཤུགས་དང༌།།

ལྕགས་མདོང་སྐེད་ནས་གཅོད་པའི་གྲི་ཡོད་ཀྱང༌།།

ཕ་རོལ་དགྲ་ལ་རྒོལ་དུས་མི་སྟོན་ན།།

བརྟུལ་ཕོད་ཅན་གྱི་དཔའ་བོ་ག་ལ་ཡིན།།



ནམ་མཁའི་ཁྱོན་ཀུན་འགེངས་པའི་ཤེས་ཡོན་དང༌།།

སྟོང་གསུམ་སྙན་པར་གྲགས་པའི་མིང་ལྡན་ཡང༌།།

འུ་ཐུག་ཉག་ཕྲའི་དུས་སུ་མི་ཕན་ན།།

བརྟུལ་ཕོད་ཅན་གྱི་དཔའ་བོ་ག་ལ་ཡིན།།



རི་རབ་ཁྱུར་མིད་བྱེད་པའི་སྙིང་སྟོབས་དང༌།།

སྤྱི་དོན་ཁོང་དུ་སྦྲུམ་པའི་བློ་ལྡན་ཡང༌།།

གཞུང་དང་མི་མང་དོན་དུ་མི་སྨན་ན།།

བརྟུལ་ཕོད་ཅན་གྱི་དཔའ་བོ་ག་ལ་ཡིན།།



རབ་དཀར་དར་ལ་འགྲན་པའི་ལྷག་བསམ་དང༌།།

དྲང་བདེན་ཁ་ནས་སྨྲ་བའི་ལྕེ་ལྡན་ཡང༌།།

མིང་འདོན་ཡིག་ཐོག་འགོད་པར་མི་ཕོད་ན།།

བརྟུལ་ཕོད་ཅན་གྱི་དཔའ་རྒོད་ག་ལ་ཡིན།།



ནོར་ལྡེ་ཚགས་པར་སྟེང་འགོད་ཟིན།

ཤོག་བུ་ཁྲ་ཁྲ། ? ཕྱེ་མ་ལེབ། ? ཅེམ་ཅེ་ལྷ་མོ། ?

དགོས་འདོད་ནོར་བུའི་འོད་ཀྱིས་ལྷ་ལམ་འགེངས།།
འགེངས་མེད་སྨྱུ་གུ་སྟེང་པས་མཛུབ་རྩེ་ནས།།
ནས་འབྲུ་ཐང་ལ་གཏོར་བའི་དོ་ཟླ་རུ།།
རུ་ངར་ཤོག་བུ་ཁྲ་ཁྲ་འདི་ལྟར་བཟོའོ།།

སྙན་གྲགས་ཀྱི་མིང་སྐམ་རང་བྱུང་གི་ཕུང་གཞི།།
འདོད་ཡོན་གྱི་ལོངས་སྤྱོད་རང་སྐྱེལ་གྱི་ཕུང་གཞི།།
གཉེན་ཉེ་ཡི་མཆེད་འཁོར་རང་སླུ་ཡི་ཕུང་གཞི།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

དམ་ཆོས་ཀྱི་སྣང་བ་ཉི་ཟེར་བཞིན་འཚེར་ཀྱང་།།
ཡོ་ལང་གི་ན་བུན་ཚང་ག་དེ་ཆེ་བས།།
དྲི་མེད་ཀྱི་བླ་མའི་མཇལ་ཁ་ཞིག་རག་ཆེད།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

རང་ལག་གི་སྨྱུ་གུ་ཕུང་སྐྱོར་གྱི་འཁར་བ།།
རང་ལུས་ཀྱི་གཟན་ཤམ་ཞེན་བྲལ་གྱི་སྐྱོ་གར།།
རང་སེམས་ཀྱི་འབའ་ཁུག་ལྟ་གྲུབ་ཀྱི་ཕག་ཚང་།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

དེང་དུས་ཀྱི་མི་གཤིས་མཐོ་སྒང་གི་དར་ལྕོགས།།
དེང་དུས་ཀྱི་འགྲིག་ལམ་ཐལ་རྡུལ་གྱི་རྭ་བ།།
དེང་དུས་ཀྱི་དཔལ་འབྱོར་མགོ་མེད་དམག་དཔུང་།།
ཆོས་བརྒྱད་ཀྱི་གྲོགས་པོ་ཕར་ཙམ་ཞིག་སོང་དང་།།

ལྷ་ཆོས་ཀྱི་བྱིན་རླབས་སྙིང་དབུས་སུ་མེད་ན།།
སྔོ་ལྗང་གི་སྒོར་མོའི་ཁྲི་སྟེང་དུ་ཉལ་ཡང་།།
སྙིང་མེད་གྱི་ཤོག་བུ་ཁྲ་ཁྲ་ཞིག་སྟེང་དུ།།
ཕྱེ་ལེབ་ཞིག་བབ་དང་ཁྱད་པར་ནི་ཨེ་མཆིས།།

ལོ་ངོ་མང་པོའི་གོང་དུ་ཚོགས་ཐུན་ཞིག་གི་སྐབས་ཤོག་སྙིགས་ཤིག་སྟེང་བྲིས་པ་ད་ལན་འདིར་བཀོད།

ལོ་གསར་ལ་བྲིས་པའི་སྙན་ཚིག ༼བཀྲ་ཤིས་བདེ་ལེགས།༽

རབ་ཡངས་གཤོག་ཟུང་མཁའ་རུ་བརྐྱངས་ནས་ངང་པ་ཁྱོ་ཤུག་བགྲོད་པའི་ཤུལ།།
ཉི་མ་དམར་པོའི་བཞིན་གྱི་དཀྱིལ་འཁོར་སྐྱོ་ཉམས་དུ་མས་ཁེངས་ནས་ནི།།
རྩེ་ཤིང་ནགས་ཀྱི་མགོ་སྤུ་ཟེང་བའི་རི་བོ་ཕ་གིའི་རྒྱབ་ཕྱོགས་སུ།།
མི་འདོད་ལས་ཀྱི་རླུང་བུས་དེད་དེ་ལོ་འདིའི་གྱེས་མཇལ་ཐ་མ་ཡིན།།

སྨག་རུམ་ཁྲོད་དུ་འོད་མདངས་ཉམས་མེད་ཆེམ་ཆེམ་སྐར་མའི་ཚོགས་འཁོར་འདི།།
མི་རིགས་ཆེད་དུ་ཟུངས་ཁྲག་ཟད་པའི་རྒྱལ་གཅེས་དཔའ་བོའི་རྣམ་ཤེས་འདྲ།།
ས་ཡ་དྲུག་གི་བདེན་དོན་རྩོད་པའི་མི་ཕམ་ལྕགས་ཀྱི་སྟག་རྒོད་དེས།།
བདེ་སྐྱིད་རང་དབང་སླར་གསོ་བྱེད་པར་སྨོན་སྨོན་བྱེད་སྙམ་འཕྱང་མོ་ཉུག།

ཁུ་སིམ་ལོ་མཐའི་མཚན་མོ་འདི་ལ་དབུགས་ཀྱི་རྒྱུ་བའི་བར་མཚམས་ན།།
རེ་སྨོན་ལྟོགས་པའི་སྟག་གིས་འདྲེད་པས་སྙིང་གི་འཕར་ལྡིང་ཇི་ཆེ་རེད།།
གཡོ་རྫུན་བཙན་ཤེད་འཕར་སྤྱང་དེ་ཚོ་རིང་སར་སྐྲོད་པའི་ཡིད་ཆེས་དང་།།
རྒྱལ་བའི་གསེར་ཁྲི་གངས་རྩེར་སྟེགས་པའི་རེ་འདུན་དེ་ཡིས་སྙིང་རུས་བཙུགས།།

སང་གི་ཐོ་རངས་སྐད་ཆེན་ཤར་ནས་སྐྱ་རེངས་དང་པོ་ཟིན་པ་ན།།
ལྕགས་སྟག་ངར་མའི་ལོ་ལ་ཆིབས་ནས་བོད་ཀྱི་རྩ་དོན་རྩོད་དུ་འགྲོ།
རིང་མིན་བློ་ལྡན་རི་བོང་སླེབས་དུས་གངས་ཅན་བོད་ཀྱི་ཞིང་ཁམས་སུ།།
གཞིས་བྱེས་མཉམ་འཛོམ་ཉི་གཞོན་འོག་ན་སྤྲོ་སྐྱིད་ངང་ནས་ལོ་གསར་ཆོག།

མགོ་ནད་ཀྱིས་ཟིན་བྲིས་་་་་་་་་་་་་་་་་་་་་་་་་་་་་་་་

ཉ་ཤ་བརྔོས་མ་ཟ་བའི་འདུན་པ་དང་།


མོག་ཐུག་ཚ་བོ་འཐུང་བའི་འདོད་པ་ཡང་།


མགོ་ནད་ཁྱི་ཡིས་ཁྱེར་ཏེ་མེད་པས་ན།


ཟིན་བྲིས་སྤེལ་ཐབས་རེ་ཞིག་ཡོད་རེ་སྐན།

དོན་འགྲུབ་རྒྱལ་དང་ར་ས་ཕོ་ཉས་གླེང་བ།

ད༽
ཀྲུང་གོ་གསར་པའི་རྒྱལ་ཁབ།།
མཁའ་ལ་ཉི་མ་ཤར་འདྲ།།
རྒྱ་བོད་མི་རིགས་མཐུན་སྒྲིལ།།
ས་ལ་པད་མོ་རྒྱས་འདྲ།།
ར༽
ཀྲུང་གོ་སྲིད་གཞུང་ངན་པ།།
མཁའ་ལ་ཐོ་བ་མེ་འབར།།
རྒྱ་བོད་མི་མང་ཚང་མའི།།
སྒལ་པ་འཚིག་རིལ་བཏང་བྱུང་།།


ད༽
ཏང་གི་ཉི་འོད་མེད་ན།།
པད་མོ་ཇི་ལྟར་བཞད་པ།།
རྒྱ་བོད་མཐུན་སྒྲིལ་མེད་ན།།
ཟེའུ་འབྲུ་ཇི་ལྟར་རྒྱས་ཨེ།།
ར༽
ཏང་གི་ཉི་མ་མེད་ཀྱང་།།
པད་མོ་སྔར་ནས་བཞད་ཡོད།།
བོད་རྒྱ་མཐུན་སྒྲིལ་ཆོག་ཀྱང་།།
ཟེའུ་འབྲུའི་གཡོ་རྒྱུ་མི་དགོས།།


ད༽
མི་རིགས་རང་སྐྱོང་བྱས་པས།།
མཐུན་སྒྲིལ་མེ་ཏོག་ཤར་བྱུང་།།
འདྲ་མཉམ་དྲི་བསུང་འཐུལ་བས།།
མཛའ་མཐུན་བུང་བ་འཁོར་བྱུང་།།
ར༽
མི་རིགས་རང་སྐྱོང་ཟེར་ནས།།
ཆོལ་གསུམ་སྤུན་ཟླ་གཏོར་བྱུང་།།
འདྲ་མཉམ་དྲི་བསུང་འཐུལ་རྒྱུ།།
མ་འབད་ལས་ཀྱིས་གྲུབ་ཡོང་།།


ད༽
མུ་མེད་ཐང་སྟོང་ཐོག་ལ།།
པ་ཏྲའི་རི་མོ་ཇི་བཞིན།།
གཞུང་ལམ་དྲ་བ་བསྣོལ་བས།།
རྒྱ་བོད་འགྲིམ་འགྲུལ་དར་སོང་།།
ར༽
མུ་མེད་བོད་ཀྱི་ཡུལ་ལ།།
གྱིག་གི་སྦུ་ག་འདྲ་བའི།།
གཞུང་ལམ་ཁག་མང་བཟོས་ནས།།
རིན་དངོས་རྒྱུ་ནོར་རྐུས་སོང་།།


ད༽
ལོ་ཁྲིར་གཉིད་དུ་ཡུར་བའི།།
གཏེར་གྱི་སྒོ་མོ་ཕྱེས་པས།།
གངས་ཅན་བཟོ་ལས་ཐོན་སྐྱེད།།
ཡར་ངོའི་ཟླ་ལྟར་འཕེལ་སོང་།།
ར༽
ཁྲི་ལོར་གཏེར་དུ་སྦྲུམ་པའི།།
རིན་ཆེན་རྐུ་རྒྱུར་བྲེལ་ནས།།
གངས་ཅན་བཟོ་ལས་ཡར་རྒྱས།།
བྱིའུའི་གཅིན་པ་འདྲ་བྱུང་།།


ད༽
ཞིང་ས་གྲུ་བཞིའི་ཐོག་ལ།།
འཕྲུལ་གྱི་ལྕགས་གླང་བཏང་བས།།
སྟོན་ཐོག་གྲོ་ནས་སྲན་གསུམ།།
རི་བོའི་གཏོས་དང་མཉམ་སོང་།།
ར༽
ཞིང་ཁ་ལེབ་མོའི་ལྒང་ལ།།
འཕྲུལ་ཆས་ཊཀ་ཊར་གཏོང་བར།།
ཧ་ལས་ཧོན་འཐོར་བྱས་པ།།
ལྐུགས་རྟགས་རི་དང་མཉམ་སོང་།།


ད༽
མཐའ་ཡས་སྤང་ལྗོངས་སྔོན་མོ།།
རྫས་འགྱུར་ལུད་ཀྱིས་གསོས་པས།།
སྒོ་ཕྱུགས་རྟ་ནོར་ལུག་གསུམ།།
ལ་ཐང་མེད་པར་ཁེངས་སོང་།།
ར༽
མཐའ་ཡས་ཞིང་ཁ་སྔོན་མོར།།
རྫས་འགྱུར་ལུད་ཀྱིས་བསླུས་ནས།།
ལོ་གསུམ་ལོ་བཞིའི་རྗེས་ལ།།
སྟོན་ཐོག་བརྔ་རིན་མི་འདུག།


ད༽
གོས་ཆེན་དར་གྱི་ཟ་འོག།
འཇམ་པོ་མི་འདུག་མ་གསུངས།།
བྷོ་ཊའི་སྨན་ཤར་བུ་མོ།།
ཟ་འོག་རི་མོར་ཞེན་སོང་།།
ར༽
གོས་ཆེན་ཟ་འོག་ཟེར་བས།།
སྔར་ནས་ད་བར་བསླུས་བྱུང་།།
བྷོ་ཊའི་སྨན་ཤར་བུ་མོར།།
ད་ཆ་ཟ་འོག་མི་དགོས།།


ད༽
ཁ་བཏགས་དཀར་པོའི་ཐོག་ཏུ།།
རི་མོ་མི་འདུག་མ་གསུངས།།
ཁ་བ་ཅན་པའི་བསམ་པ།།
ཁ་བཏགས་ལས་ཀྱང་དཀར་བ།།
ར༽
ཁ་བཏགས་དཀར་ཐག་ཆོད་ནས།།
རི་མོ་གང་འབྲི་སོང་ཙང་།།
ཤར་གྱི་འདྲེ་ལག་ནག་པོས།།
ས་བཀྲ་གང་འདོད་བྲིས་སོང་།།


ད༽
ཇ་ནག་ཁུ་བའི་ནང་དུ།།
འོ་མ་མི་འདུག་མ་གསུངས།།
རྒྱ་རིགས་བུ་མོའི་མཆུ་སྒྲོས།།
འོ་མ་ལས་ཀྱང་ཞིམ་པ།།
ར༽
རྒྱ་རིགས་བུ་མོའི་མཆུ་ཏོ།།
རེག་དུག་ནད་ཀྱི་རྩ་བ།།
དེ་ལས་འོ་མ་མེད་ཀྱང་།།
ཇ་དྭངས་འཐུང་ན་བདེ་བ།།

མཆན།

ཊཀ་ཊར་ནི་ཞིང་རྨོ་བྱེད་ཀྱི་མོ་ཏ་འཁོར་ལོ་ཆེན་པོ་ཅན།

རེག་དུག་ནི་འཁྲིག་སྤྱོད་བྱས་པ་སོགས་ལས་བགོས་པའི་ཨེ་ཛེ་(HIV)ནད་དེ་མགྱོགས་མྱུར་འཆི་བ་ལས་ཐར་ཐབས་མེད་པ་ཞིག

གྲོགས་པོ་ཞིག་ལ་སྤྲིངས་པ། ཀ་བཤད།

ཀ་ཡེ་གསོན་དང་གྲོགས་པོ་གྷ་ཇེ་ནི།
ཁ་ཞེ་གཉིས་མེད་གྲོགས་པོ་ཡིན་ན་ནི།
ག་ཡང་ཡི་གེ་གཅིག་ཀྱང་གཏོང་ངེས་ནའང་།
ང་ལ་ད་རུང་མི་སླེབས་སེམས་པ་སྐྱོ།

ཅ་ཅོ་དབྱིན་སྐད་འདྲེ་མོ་དེའི་ཆེད།
ཆ་འཇོག་གྲོགས་པོ་ཚང་མ་བློས་བཏང་ན།
ཇ་ཆང་ཁམ་བུ་གང་གི་ཆེད་དུ་ནི།
ཉ་ཤ་ལུག་ཤ་བཏང་དང་ཁྱད་པར་ཅི།

ཏ་ལའི་བླ་མའི་བཀའ་ཡིས་མ་བསྐུལ་ཞིང་།
ཐ་མལ་དབུལ་པོ་དག་གིས་མ་གསོལ་བར།
ད་ལྟ་དབྱིན་ཇིའི་ཡུལ་དུ་འཁྱམས་པ་འདི།
ན་གཞོན་གཤོག་རྩལ་ངོམ་པའི་ཚུལ་རེད་དམ།

པ་ལགས་དམ་པའི་རེ་བཞག་མ་ཤོར་བར།
ཕ་རོལ་མགོ་སེར་ཚོ་དང་ཐག་རིང་བྱོས།
བ་ལྒང་བཞིན་དུ་དབྱིན་སྐད་རྒྱབ་དྲག་ན།
མ་གིའི་རྫབ་དོང་ནང་དུ་ཟགས་ཡོང་ང་།

ཙ་རྟགས་ཙམ་གྱི་གྲོགས་པོའི་ལ་རྒྱ་ཞིག
ཚྭ་འབུམ་བཞིན་དུ་ཁྱེད་ལ་ཨེ་ཡོད་བསམ།
ཛ་དྲག་གཤེན་རྗེའི་འཕྲང་སྒོར་སླེབས་མེད་ན།
ཝ་ལེར་ངེད་ལ་བརྡ་ཞིག་བྱེད་དགོས་ངེས།

ཞྭ་མོ་ལྷགས་པས་ཁུར་འདྲའི་གྲོགས་པོ་ཁྱེད།
ཟ་འོག་ལོན་ཌོན་གྲོང་དུ་སླེབས་པའི་ཚེ།
འ་ཅག་གྲོགས་པོ་ཚང་མ་བརྗེད་སོང་ན།
ཡ་ཡུག་བསྒྲིལ་ནས་ཚུར་ལ་ལོག་མ་ཡོང་།

ར་ཅོ་ཅན་གྱི་རྒྱབ་ནས་ཕུགས་པ་ལས།
ལ་ལུང་འདི་ན་ལན་གཅིག་ཚུར་འོང་ཚེ།
ཤ་ཕྱེད་རུས་ཕྱེད་བཟོས་པར་མ་གྱུར་ན།
ས་སྟེང་འདི་ན་ར་ས་ཕོ་ཉ་མེད།

ཧ་ཧ་ཞེད་སྣང་མ་བྱོས་གྲོགས་པོ་ལགས།
ཨ་ཙི་དུས་ཚོད་བྱུང་ན་ཁ་པར་ཐོངས།
ཧ་ཅང་རིན་གོང་ཆེན་པོ་ཡིན་འདུག་ན།
ཨ་དྲུང་ལག་ཏུ་ཨང་ཀི་སྐུར་ཤོག་དང་།

མཆན། བ་ལྒང་དང་ཚྭ་འབུམ་ཞེས་པ་མི་གཉིས་ཀྱི་མིང་ཡིན།

ས་གླང་མགོ་༢༥ཉིན་བྲིས་ཤིང་སྤེལ།

དེ་རིང་གི་ཟིན་ཐོ།

གཉིད་ཀྱི་བུ་མོས་མགོ་བོར་བུམ་པ་རེ་བཞག་ནས།།

སྐྱ་རེངས་བུ་ཆུང་སྐད་ཅིག་བཙའ་འདོད་ཞིག་བྱས་ཀྱང་།།

རྐང་དྲུག་བུང་བ་གཞོན་ནུ་བློ་གསར་ཚོའི་དབྱངས་ཀྱིས།།

ཕྱག་དཔེ་སྐྱོར་སྦྱངས་གནངས་པས་རྨོངས་གཉིད་ལས་སད་སོང་།།

ནར་ནར་དཔེ་ཆ་བལྟ་བའི་འདུན་པ་དག་ཡོད་ཀྱང་།།

ཟང་ཟིང་ལེ་ལོའི་གྲོགས་པོས་ཨུ་ཚུགས་ཀྱིས་བསྐུལ་ཏེ།།

ཞིམ་ཞིམ་ཐུག་པ་འཐུང་སར་ཟ་ཁང་དུ་ཁྲིད་ནས།།

དཀོན་དཀོན་དེ་རིང་ཉིན་མོའི་མཇུག་རྩེ་དེར་བསྐྱལ་བྱུང་།།

སྐྱ་ལེབ་རྩངས་པ་སྒལ་ལེབ་ཁྲེལ་བགད་འགའ་བྱེད་བཞིན།།

སྐྱག་ནག་རྩེ་མོ་དཀར་པོ་ཆུ་ཚོད་སྟེང་བཏང་པས།།

དེ་རིང་ཉིན་མ་གང་པོ་མུན་ནག་ཏུ་འདས་ཀྱང་།།

ཐ་མར་དཀར་ཆོས་ཏོག་ཙམ་བསྒྲུབ་རྒྱུ་ཞིག་གོ་ནས།།

ཕག་ཚང་འདྲ་བའི་ཤག་དེར་བསྡད་ས་ཞིག་བཟོས་ནས།།

སྲས་མོ་འདྲ་བའི་ཉ་ཚོར་ཁ་ལག་ཞིག་སྤྲད་ནས།།

སྣབས་ཕྱིས་འདྲ་བའི་ཉིན་ཐོར་ཟིན་བྲིས་འདི་རྒྱབ་ནས།།

སངས་རྒྱས་འདྲ་བའི་ཕྱག་དཔེར་ཞལ་མཇལ་ཞིག་ཞུ་དགོས།།

གསེར་མིག་ཅན།

མཛའ་བརྩེའི་རྒྱན་གྱིས་ཕན་ཚུན་ཉམས་དགའ་བ།
མི་མཐུན་ལས་དང་མ་འབྲེལ་རྟག་ཏུ་རྩེན།
ཁ་ཟས་ཐན་ཐུན་རེ་ཡི་ཆེད་དུ་ཡང།
ལེགས་གཟོའི་ཚུལ་དུ་ཆུའི་ཁར་ཡང་ཡང་ཕྱོགས།

གསེར་ལྗང་བཙོ་མར་དོ་བའི་བཀྲག་མདངས་ཅན།
ལྡེམ་ལྡེམ་ལུས་ཀྱིས་ལྷ་མོའི་ཁེངས་པ་བསྙིལ།
རྩུབ་བྲལ་བཟང་པོའི་གཤིས་ཀྱིས་མཛེས་པ་དེ།
པད་མའི་བཞིན་ལ་མིག་གིས་སྤྲས་པ་བཞིན།

འབུར་འབུར་ཝུ་བ་གཏོར་བའི་ཤེལ་སྒྲོམ་ནང་།
དཁྱུག་དཁྱུག་མཇུག་མ་གསུམ་ལྡན་གསེར་མིག་ཅན།
བསིལ་བསིལ་དྭངས་གཙང་ཆུ་ནང་དལ་མེད་དུ།
འཁོར་འཁོར་སེམས་ཀྱི་མཐིལ་དུ་ཟུག་རྔུ་བྱིན།

མཐའ་ཡས་འཛམ་གླིང་ས་ཡི་གླིང་ཆེན་པོར།
ཉུལ་བའི་གོ་སྐལ་ཚེ་འདིར་ཁྱེད་བསྐལ་ཡང་།
རྣམ་རྟོག་རི་དྭགས་སྟོང་གིས་རབ་བསྡུར་བའི།
མྱང་ངམ་སེམས་ཀྱི་ཐང་ན་གང་དགར་རྒྱུ།

ཟླ་དཀར།

ཕྲ་ཆུང་མིག་གིས་མཛེས་པ་ཡི།།
གསེར་ཉ་དུ་མས་རབ་དཁྱིལ་བ།།
རྫིང་བུ་གཡོ་བའི་ཁར་རྩེན་པའི།།
ཟླ་དཀར་གཟུགས་བརྙན་ཡིད་རབ་འཕྲོག།

བློ་གྲོས་སྤྲེའུ་ལས་ལྷག་གྱུར་ན།།
བལྟ་འདོད་མིག་གིས་དགུང་ལ་སྙེགས།།
མུན་ནག་མཁའ་ཡི་གླང་པོ་ཁྱུས།།
ཟླ་དཀར་བྱད་བཞིན་དཀྱིལ་འཁོར་སྒྲིབ།།

རེ་ཞག་དར་གྱིས་བཅིངས་བྱེད་པ།།
སྙིང་གི་བུ་མོ་དལ་མེད་འཕར།།
རྣ་བའི་བུ་ག་རླུང་གིས་འགགས།།
འདྲེན་བྱེད་ཅེ་རེར་ལོང་པར་སྙམ།།

སྒྲ་སྒྲོག་དཔུང་གི་བར་གསེབ་ནས།།
བདེ་འཐུང་གློག་གི་གསལ་ཆའི་འོག།
མཆི་མས་གོར་དུ་བརླན་པ་ཡི།།
མིག་ནང་ཟླ་དཀར་གཟུགས་བརྙན་འཆར།།

མིག་ཆུའི་ཐིགས་པས་བརྡུངས་པ་ཡིས།།
རི་བོང་མཚན་མ་རབ་རིབ་གྱུར།།
དྲན་གདུང་རྩ་ལམ་ཁྲག་གིས་འགེངས།།
མིག་གི་ཟླ་དཀར་དམར་མདངས་རྒྱས།།

སྐད་ཅིག་ཆུ་འཛིན་དཔུང་གི་ཚོགས།།
རླུང་གི་རྟ་མཆོག་ལ་བརྟེན་ནས།།
མགྲིན་པ་བཅུ་པས་སི་ཏ་བཞིན།།
ཟླ་དཀར་གཟུགས་བརྙན་སྐུང་པར་བྱེད།།

བསམ་པ་དག་པའི་ཡིད་ཀྱི་མིག།
ཀུན་གསལ་དག་པའི་ངོས་ལ་ཕྱོགས།།
ལིང་ཏོག་དག་པའི་མིག་ཟུང་གིས།།
ནམ་ཡང་མི་འཛུམ་ཟླ་དཀར་སྒུག།

༢༠༠༩ཟླ་བ་༡༢ཚེས་༢༩ཉིན་བྲིས།

ཆོས་གྲོགས་ལ་སྤྲིངས་པ། ཀ་བཤད།

ཀ་ཡེ་གསོན་དང་ཆོས་ཀྱི་གྲོགས་རྣམ་པ།

ཁ་སང་ནས་བཟུང་རྡོ་རྗེ་གདན་ཕྱོགས་སུ།

ག་ལེར་གསུང་ཆོས་སོགས་ལ་ཕེབས་འགྲོ་དུས།

ང་ཡི་སེམས་ཀྱིས་མ་བཟོད་གཏམ་འདི་ཞུ།


ཅ་དག་བྱས་ནས་རི་ལི་སོགས་ཀྱི་ནང༌།

ཆ་རྒྱུས་མེད་པའི་མི་ལ་རྟོན་པར།

ཇ་དང་བག་ལེབ་ལྟ་བུ་དཀར་ཟས་ལས།

ཉ་ཤ་ལ་སོགས་དམར་ཟས་སྤོང་ན་མཛེས།


ཏ་ཐ་ག་ཏའི་བསྟན་ལ་དམོད་དོགས་ཀྱིས།

ཐ་ན་འགྲུལ་སྐྱོད་ཚེ་ནའང་སྤྱོད་ལམ་བསྟེན།

ད་ལྟ་སྙིགས་ལྔ་བདོ་བའི་དུས་སྐབས་སུ།

ན་གཞོན་རྣམས་ཀྱིས་དེ་བས་གཟབ་པ་གལ།



པ་ཊ་ན་སོགས་གྲོང་འཁྱེར་བགྲོད་པ་ན།

ཕ་རོལ་མི་སར་འབྱོར་མདོག་བྱ་རྒྱུ་མེད།

བ་རྫི་བཞིན་དུ་གྲོགས་མང་རྗེས་ལ་སྙེགས།

མ་མཐར་གྲོགས་མེད་ཁྲོམ་ལ་མ་ཉུལ་ལ།



ཙ་རི་བསྐོར་དུས་གཅན་གཟན་གཏུམ་པོར་གཟབ།

ཚ་བ་འབར་དུས་བསིལ་བའི་རེག་པར་གཟབ།

ཛ་ཡའི་གནས་མཆོག་རྡོ་རྗེ་གདན་ལ་ནི།

ཝ་མ་ཝོ་ལ་འགྲོ་དུས་ཇག་པར་གཟབ།



ཞ་བོ་མིན་དུས་རྐང་པ་བདེ་མདོག་གིས།

ཟ་ཁང་ཚོང་ཁང་ལྟད་མོ་ཁང་ལ་སོགས།

འ་རེ་འུ་རེར་གང་སར་འགྲོ་འབེལ་ན།

ཡ་མ་ར་ཛའི་ཞལ་དུ་ཐོབ་ཡོང་ང༌།



ར་མ་ནི་ཡི་ཧ་ནུ་མན་ཐ་བཞིན།

ལ་ཀླུང་ག་སར་འགྲིམས་པའི་གྲོགས་པོ་ལ།

ཤ་ཚའི་གཏམ་གྱི་སྦྱོར་བ་འདི་ཐལ་བས།

ས་མཐར་སླེབས་ཀྱང་ཡིད་ལ་ཟུངས་ཤིག་ཨང༌།



ཧ་ཅང་དུས་ཚོད་རིང་པོ་མ་འགོར་བར།

ཨ་རོགས་ང་ཚོ་འཕྲད་རྒྱུ་ཡིན་འདུག་ན།

ཧ་ལམ་ལག་པ་སྟོང་མིན་ཙམ་ཞིག་གི

ཨ་དར་ང་ལ་རྔན་པའང་འཁྱེར་ཤོག་ཝེ།

ཁ་ཆེ་རྒྱལ་པོ་དང་། པན་ཇབ་སློབ་དཔོན།

སྔོན་དུས་ཁ་ཆེ་རྒྱལ་པོ་ཡིས།
རྒྱ་གར་དབང་དུ་བསྡུ་བའི་དུས།
མོག་ཁྲོ་འདྲ་བའི་སླ་ངའི་ནང་།
པན་ཇབ་སློབ་དཔོན་རྣམས་ནི་བཙོས།

དེ་ཚེ་པཎ་ཇབ་སློབ་དཔོན་ཞིག
ཁ་ཆེ་རྒྱལ་པོས་ཚུར་བཟུང་ནས།
ཁྱེད་ཀྱིས་ཆོས་ལུགས་བློས་ཐོངས་སམ།
ཡང་ན་སྒྲུབ་རྟགས་བསྟན་ནམ་དྲིས།

པན་ཇབ་སློབ་དཔོན་དེ་ཡིས་ནི།
སྒྲུབ་རྟགས་བསྟན་པར་ཁས་འཆེ་ནས།
ཤོག་བུའི་ངོས་སུ་ཡི་གེ་བྲིས།
དེ་ཉིད་རང་གི་སྐེ་ལ་བཏགས།

དེ་ནས་ཁ་ཆེ་རྒྱལ་པོ་ལ།
བདག་གི་མགོ་བོ་ཆོད་ཞིག་དང་།
བདག་གིས་སླར་ཡང་འཐུད་ཟེར་བས།
ཁ་ཆེ་རྒྱལ་པོས་དེ་མ་ཉིད།

བཤས་མ་མངགས་ཏེ་པན་ཇབ་ཀྱི།
སློབ་དཔོན་མགོ་བོ་ས་རུ་གཡུགས།
ཁྲག་གི་ཐིགས་པ་གང་སར་འཐོར།
པན་ཇབ་སློབ་དཔོན་ལྔ་ལམ་གྱུར།

ཁ་ཆེ་རྒྱལ་པོ་རབ་དགོད་ཤིང་།
ཁེངས་པའི་ཆུ་འཛིན་མཁའ་ལས་བརྒལ།
འོན་ཀྱང་ཡིད་ཀྱི་དྲན་ལམ་དུ།
སློབ་དཔོན་དེ་ཡི་ཡི་གེ་དྲན།

དེ་མུར་ས་རུ་ཟགས་པ་ཡི།
ཡི་གེ་བླངས་ཏེ་བལྟས་པ་དང།
ཁྲོང་ཁྲོའི་མེ་ལྕེ་ཆེར་འབར་ཞིང་།
འགྱོད་པའི་འཚེར་མ་སྙིང་ལ་ཟུག

སློབ་དཔོན་དེ་ཡི་ཡི་གེའི་དོན།
ཚིག་རྐང་གཉིས་སུ་འདི་ལྟར་བྲིས།
"རང་གི་ཆོས་ལུགས་མ་བཏང་བར།"
"རང་སྲོག་བཏང་བ་སྒྲུབ་རྟགས་ཡིན།"

བཀྲ་ཤིས་རྟགས་བརྒྱད།

ལྷ་ཡི་ཚངས་པས་གདུགས་ཀྱི་བླ་བྲེ་ཕུབ།
ཆོས་སྲིད་གསེར་ཉ་ཟུང་གིས་ཕྱོགས་ཀུན་མཛེས།
ཐུགས་རྗེ་པད་མས་རང་མདངས་ཀུན་ལ་སྙོམས།
བློ་གྲོས་དཔལ་བེའུས་ནམ་མཁའི་མཐའ་ལ་བསྙེགས།
ཉམ་ཐག་འགྲོ་བའི་གདུང་སེལ་བུམ་པ་བསྣམས།
མ་རིག་སྨག་རུམ་བསངས་པའི་དུང་དཀར་བུས།
ཟབ་རྒྱས་ཆོས་ཀྱི་འཁོར་ལོ་འགོག་མེད་བསྐོར།
ཐུབ་བསྟན་རྒྱལ་མཚན་སྲིད་འདིར་རབ་ཏུ་སྒྲེང།

ཕལ་སྐད་གསོང་པོར་བརྗོད་པའི་སྤེལ་རྩོམ། ཀ་རྩོམ།

ཀ་ལི་ཀ་ཏ་བལ་ཡུལ་པེ་ཅིང་དང་།།
ཁ་བ་ཅན་གྱི་གྲོང་ཁྱེར་ལྷ་ས་སོགས།
ག་ས་གང་དུ་ཡོད་པའི་མི་འདི་རྣམས།།
ང་ཡིས་བལྟས་ན་རང་བཞིན་གཅིག་པར་མཐོང་།།


ཅ་ཅོ་འུར་ཟིང་རྒྱག་རྒྱུར་དཔེ་དགའ་ཞིང་།།
ཆ་ལུགས་འདྲ་མིན་གོན་ལ་དེ་བས་དགའ།།
ཇ་མར་རྩམ་པ་སོགས་ལ་ཞེ་མེར་ལང་།།
ཉ་སྦལ་སྡིག་སྲིན་ཟ་རྒྱུར་ཧ་ཅང་དགའ།།


ཏ་རེན་སྐུ་དྲག་ངོ་བསྟོད་གཏམ་ལ་དགའ།།
ཐ་མལ་མི་རྣམས་གཡོ་དང་རྒྱུ་ལ་དགའ།།
ད་ལྟ་ཕལ་ཆེར་ཐ་མག་ཆང་ལ་དགའ།།
ན་གཞོན་རྣམས་ནི་མཆོར་སྒེག་ཉམས་ལ་དགའ།།


པཱ་ཕ་ཨ་མའི་ཕྱོགས་ལ་ལྡང་བ་དང་།།
ཕ་རོལ་དགྲ་བོའི་ཕྱོགས་ལ་ངང་གིས་དགའ།།
བ་ལང་ལྟ་བུའི་རྣམ་དཔྱོད་ཙམ་དབེན་པ།།
མ་རབས་མི་ཚོའི་རང་མདོག་ངང་གིས་མཐོང་།།


ཙ་རི་གནས་སྐོར་བྱེད་པ་མིང་གི་དོན།།
ཚ་གྲང་དཀའ་ཐུབ་བྱེད་པ་ལྟོ་ཡི་དོན།།
ཛ་ཡའི་གསུང་རབ་ཀློག་པ་ཡོན་གྱི་དོན།།
ཝ་ལེར་བསམ་ན་ཐམས་ཅད་ནོར་གྱི་དོན།།


ཞྭ་མོ་འདྲ་མིན་ཆོས་ལུགས་ཕན་ཚུན་དུ།།
ཟ་རྒྱ་འཐུང་རྒྱུའི་ཆེད་དུ་མིན་ན་ཡང་།།
འ་རེ་འུ་རེར་ཅི་དང་ཅི་རྩོད་པ།།
ཡ་མཚན་ཙམ་ལས་དོན་གྱི་གནས་མ་མཐོང་།།


ར་ཁང་ཁྱི་ཁང་ནང་དུ་སླེབས་པ་བཞིན།།
ལ་ལུང་གང་ན་བདེ་སྐྱིད་མི་འདུག་ཀྱང་།།
ཤ་ཁྲག་སྒྱུ་མའི་ལུས་འདི་མི་འཇིག་པར།།
ས་སྟེང་འདི་རུ་མི་སྡོད་ཀ་མེད་ལགས་།།


ཧ་ཅང་སྙན་པོ་མེད་དུས་ཀ་བཤད་འདིར།།
ཨ་ཙི་གཞན་ཚོ་ཚིག་པ་ཟ་ལས་ཆེ།།

འགྲུལ་བསྐྱོད་ལམ་སྟོན།

ཀ་ན་ཊ་ཡི་བྱང་ཕྱོགས་མོན་གྷོ་ནས།།

ཁ་ན་ཌ་དང་ཨ་མི་རི་ཀ་རུ།།

ག་འདྲ་བྱས་ནས་འགྲོ་དགོས་དོགས་པ་ཡི།།

ང་ཡི་གྲོགས་པོ་འགའ་ལ་ཚིག་གསུམ་ཞུ།།



ཅ་ལགས་མང་པོ་འཁྱེར་བར་མ་གནང་ཤིག།

ཆ་ལུགས་འདྲ་མིན་བཅངས་པར་མ་གནང་བར།།

ཇ་དང་ཀོ་ཕི་ལ་སོགས་མཆོད་ན་ཡང་།།

ཉ་སོགས་ཟས་རིགས་འདྲ་མིན་བསྣམས་མ་ཆོག།



ཏ་ལི་བྷན་གྱིས་གུད་ཆགས་བྱུང་བ་ནས།།

ཐ་ན་ལྷམ་གོ་ཡིན་ནའང་བརྟགས་དཔྱད་དགོས།།

ད་དུང་སྐེ་རགས་སོགས་ལ་ལྕག་ཡོད་ན།།

ན་འགྱངས་མེད་པར་ཕུད་ན་སྟབས་བདེ་ཡོང།།



པ་ལོ་བཅད་པའི་གྲྭ་པ་ཡིན་ན་ནི།།

ཕ་རོལ་མི་ལ་འཛུམ་སྟོན་སྤྱོད་ལམ་གཟབ།།

བ་མོ་བཞིན་དུ་གཞན་ལ་ཚིག་ངན་སྤོངས།།

མ་འོངས་བོད་མིའི་མཚན་དང་གྲགས་པར་སྨན།།



ཙ་རི་གནས་བསྐོར་ཕྱིན་དང་མི་འདྲ་བར།།

ཚ་གྲང་སྙོམ་པའི་གནམ་གྲུ་ནང་འགྲོ་དུས།།

ཛ་དྲག་གནས་ཚུལ་གང་བྱུང་མི་ལྟོས་པར།།

ཝ་ལེར་ལག་འཁྱེར་བདག་པོ་གང་ཐུབ་རྒྱོབ།།



ཞ་ར་ཇི་བཞིན་ཉལ་རྐྱང་མ་བསྡད་པར།།

ཟ་མ་ཟོས་ནས་ཡར་འགྲོ་མར་འགྲོ་བྱོས།།

འ་རེ་འུ་རེ་མེད་པར་འགེང་ཤོག་འགྱངས།།

ཡ་མེད་མ་ཤེས་འགྱངས་ན་སྙོག་སྒྲ་ཡོང་།།



ར་བཟི་ལྟར་དུ་གོམ་ཁ་མ་ནོར་བར།།

ལ་ལུང་གང་དེའི་ཆོག་མཆན་ཐམ་ཁ་གཟེས།།

ཤ་རེར་རང་གི་ཅ་ལག་ལེན་ནས་ནི།།

ས་ཆ་གང་དེར་སྤྲོ་པོ་གནང་རོགས་ཨང་།།



ཧ་ལོ་ཞེས་ནས་ཀུན་ལ་མདུན་ནས་བསུས།།

ཨ་འོ་ཞེས་ནས་ཧ་ལས་ཧང་སངས་བྱོས།།