འབྲོག་པ་དང་གསོན་འདྲེ་མ། (དམངས་སྒྲུང་།)

ར་ས་ཕོ་ཉས་བྲིས།

གནའ་སྔ་མོ་ལུང་པ་ཞིག་གི་ཕུག་ལ་ལུག་བརྒྱ་ཕྲག་ཡོད་པའི་འབྲོག་པ་ཞིག་པ་ཡོད། ནམ་ཞིག་འབྲོག་པ་དེས་ལུང་པའི་འདའ་ནས་གནའ་མ་ཞིག་ལེན་པ་རེད། དེ་ནས་བཟུང་འབྲོག་སར་དེར་མཚན་མོ་རླུང་འཚུབ་སྡང་བ་དང་། ཞོགས་པ་རྟག་པར་འབྲོག་པ་དེའི་ལྷས་ར་ནང་ལུག་རེ་བསད་ནས་བཞག་གི་ཡོད་པས། འབྲོག་པ་དེའི་བསམ་པར་སྤྱང་ཀི་ཞིག་གིས་རྒྱུན་དུ་དེ་ལྟར་བྱེད་ཀྱི་འདུག་དྲན། འོན་ཀྱང་དུས་ཡུན་གང་མཚམས་བར་འབྲོག་པ་དེས་བརྟག་དཔྱད་གང་མང་བྱས་ཀྱང་། ལུང་པ་དེར་སྤྱང་ཀི་དང་གཟིག་སོགས་གཅན་གཟན་སྟུམ་པོ་དེ་འདྲ་ཡོད་པ་གཏན་ནས་མ་ཐོས་པས། ཡུད་ཙམ་རིང་ཅི་རེད་འདི་རེད་ཟེར་རྒྱུ་མེད་པར་སོམ་ཉིའི་གནས་སུ་ལྷུང་། དེ་ནས་ཉིན་ཞིག་འབྲོག་པ་དེའི་རྨི་ལམ་གྱི་ནང་དུ། ཁོ་རང་གི་གཟའ་ཟླ་དེས་པུ་གུ་ཆུང་ཆུང་གི་མགོ་ཞིག་མནལ་མགོའི་འོག་ཏུ་སྦས་ནས་ཟ་བཞིན་པ་རྨིས་པས་འབྲོག་པ་དེ། ཁོང་ཁྲོ་ཟ་ཐག་ཆོད་ནས་རྨི་ལམ་ནང་དེ་གར་གཟའ་ཟླའི་མགོ་ནས་བཟུང་ནས་ཤུགས་དྲག་བརྡུང་པས་ཧོབ་དེ་གཉིད་སད་དུས་རང་གི་ལག་པའི་ནང་མི་སྤགས་སྦར་ར་གང་ཐོབ་ཡོད་པས། འབྲོག་པ་དེ་ཧ་ལས་ཤིང་ཅུང་ཟད་སྐྲག་ཀྱང་དེ་མུར་རང་གི་གཟའ་ཟླར་ལྟ་བར་སོང་། ཡིན་ནའང་། འབྲོག་པའི་གཟའ་ཟླ་མོ་ནི་གཉིད་ཐུག་པོ་ཁུག་བཞིན་བསྡད་ཡོད་པར་བརྟེན། འབྲོག་པ་དེ་སྐབས་འཕྲལ་ཅི་ཡང་བརྗོད་མ་ཤེས་པར་གྱུར། འོན་ཀྱང་ཁོ་རང་བློ་བདེ་པོ་ཁྱོན་ནས་མ་བྱུང་བས་ལུང་པའི་མདའ་དེར་བླ་མ་ཞིག་ཡོད་པ་དེའི་གྲམས་དུ་སོང་། འབྲོག་པ་དེས་འབྲོག་སར་བྱུང་བའི་ཡ་མཚན་གྱི་གནས་ཚུལ་རྣམས་བླ་མ་ལ་ཞུས་པས། བླ་མས་འབྲོག་པ་དེར་དེ་སྐོར་རེ་ཞིག་སྣང་མེད་དུ་བཞག་ན་དེ་ཡག་པ་འདུག གལ་ཏེ་ཅི་སྟེ་གཉིས་མེད་ཀྱིས་རྩེད་གཅོད་དགོས་ན་ཤེས་དེ་ཙམ་དཀའ་བ་རང་མི་འདུག་གསུངས། འབྲོག་པ་དེས་བླ་མར་་་ངའི་ལུག་གསོད་མཁན་དེ་ཅི་ཡིན་གསལ་པོ་གསུངས་རོགས། ངས་ལུག་གསོད་མཁན་དེ་སུ་ཡིན་རུང་མེད་པ་བཟོ་ཡི་ཡིན་ལབ་པས། བླ་མ་དེས་གད་མོ་བྱས་ནས་ལུག་གསོད་མཁན་དེ་གཅན་གཟན་དེ་འདྲ་མ་རེད། དེ་ནི་ཁྱོད་རང་གི་གཟའ་ཟླ་གསར་པ་དེ་རེད། ད་གསོད་ཕོད་པ་འདུག་གམ་གསུངས་པས། འབྲོག་པ་དེས་བླ་མའི་སྐད་ཆ་དེར་ཡིད་ཆེས་བརྟན་པོ་བྱུང་ནས་གསོན་འདྲེ་མ་ཡིན་ན་གསོད་མ་ཕོད་པ་ཅི་ལ་ཡོད། ང་ལ་ཡང་རྨི་ལམ་འདི་འདྲ་རྨིས་སོང་ཞེས་དེ་སྔ་བྱུང་བའི་རྨི་ལམ་རྣམས་ཞུས། བླ་མ་དེས་འབྲོག་པ་དེར་གསོན་འདྲེ་མ་དེ་གསོད་རྒྱུ་དེ་ལས་སླ་པོ་མ་རེད། ཁྱོད་དེ་རིང་ཡར་སོང་ནས་མདའི་མདེའུ་ཞིག་ཁུར་ནས་སང་ཉིན་སྔ་པོ་འདིར་ཤོག་དང་ཟེར། དེ་ནས་འབྲོག་པོ་དེས་དེ་ཉིན་འབྲོག་སར་ཕྱིན་ནས་སང་ཉིན་དེར་རང་གི་གཟའ་ཟླས་མ་ཚོར་བར་མདེའུ་ཞིག་ཁྱེར་ནས་བླ་མའི་སར་ཡོང་། བླ་མས་མདེའུ་དེར་སྔགས་ལེགས་པར་བཏབ་རྗེས་འབྲོག་པ་དེ་ལ། དེ་རིང་ནམ་ཕྱེད་ཙམ་ལ་ཁྱེད་རང་ག་ལེར་ལངས་ནས་མེ་མདའི་ནང་མདེའུ་དེ་བླུགས་ཏེ་སྦྲ་གུར་གྱི་ཕྱི་རོལ་དུ་སྒུག་སྡོད། ནམ་རླུང་འཚུབ་དྲག་པོ་རྒྱབ་དུས་སྦྲ་གུར་གྱི་སྒོ་ནས་ཁྱི་དམར་པོ་ཆེན་པོ་སྙིང་གར་སྤུ་དཀར་པོ་ཡོད་པ་ཞིག་ཡོང་བས། ཐེ་ཚོམ་མེད་པར་དེའི་སྙིང་གར་མེ་མདའ་རྒྱོབ་དགོས་ཞེས་ལམ་སྟོན་མཛད། དེ་ཉིན་འབྲོག་པ་དེ་ཡར་སོང་ནས་རང་གི་གཟའ་ཟླའི་མདུན་རྒྱུན་ལྡན་བཞིན་བྱས་ནས་བསྡད། མཚན་མོ་གཉིད་མ་ཁུག་པར་སྡུག་རུས་བྱས་ནས་བསྡད། ནམ་ཕྱེད་ཟིན་མཚམས་རང་གི་མེ་མདའ་དང་བླ་མས་སྔགས་བཏབ་པའི་མདེའུ་དེ་ཁྱེར་ནས་ག་ལེར་གཟའ་ཟླས་མ་ཚོར་བར་སྦྲ་གུར་གྱི་ཕྱིར་རོལ་དུ་སོང་། སྦྲ་གུར་གྱི་སྒོ་ཐད་ཀྱི་མདུན་དེར་འདོམས་བཅུ་གྲངས་བཅུ་ཕྲག་འགའི་སར་རྡོ་ཕོང་རྒན་ཞིག་ཡོད་པ་དེའི་སྟེང་མེ་མདའ་དེ་བཞག་ནས་སྒུག་བསྡད་པས། དུས་རིང་པོ་མ་སོང་བར་རླུང་འཚུབ་ལངས། འབྲོག་པས་གཟབ་གཟབ་བྱས་མེ་མདའ་ཚད་ནས་བསྡད་པས་དེར་བླ་མས་ཟེར་བ་བཞིན་ཁྱི་དམར་པོ་ཆེན་པོ་ཞིག་འགྱིངས་ཉམས་ཀྱིས་མར་འཐོན་ཡོང་བ་དང་། འབྲོག་པ་དེས་ཁྱི་དེའི་སྙིང་གའི་སྤུ་དཀར་པོ་ཡོད་ས་དེ་གར་ཚད་ནས་མེ་མདའ་ཞིག་ཚམ་ཚོམ་མེད་པར་རྒྱབ་པས། དེ་མ་ཉིད་ལ་མེ་མདའི་སྐད་སྒྲ་དང་ལྷན་དུ་རླུང་འཚུབ་འཇགས། ཁྱི་དམར་པོ་དེ་ཡང་མཐོང་སར་མེད། འབྲོག་པས་ལམ་སེང་སྔར་ནས་དོགས་པ་ཡོད་པ་བཞིན་རང་གི་གཟའ་ཟླར་བལྟ་བར་སོང་བས། གསོན་འདྲེ་མར་གྱུར་པའི་རང་གི་གཟའ་ཟླ་དེ་མལ་སའི་ནང་ཤི་ཡོད་པ་མཐོང་། དེ་ནས་བཟུང་འབྲོག་པ་དེའི་ལྷས་རའི་ནང་ཉིན་ལྟར་ལུག་རེ་བསད་པའི་གནས་ཚུལ་དེ་འདྲ་མ་བྱུང་ངོ་།།

སྦྲུལ་དང་། ཨ་མ།

སྔོན་ལུང་པ་ཞིག་ལ་ཨ་མ་ཞིག་ལ་བུ་བདུན་ཡོད། བུ་བདུན་གྱི་ཕ་ནི་སྔ་ས་ནས་འདས་ཟིན་སྟབས་ཁྱིམ་ཚང་གི་འཚོ་བ་ཨ་མ་རྐྱང་པར་བརྟེན་དགོས་ཀྱི་ཡོད། ཁྱིམ་ཚང་ནང་ལ་ཨ་མ་གཅིག་པུས་བུ་བདུན་གསོ་དགོས་པར་བརྟེན་ཉིན་རེ་ནས་ཉིན་རེ་བཞིན་ཁྱིམ་གྱི་འཚོ་བ་ཇེ་ཞན་ཇེ་ཞན་དུ་ཕྱིན་ནས་མཐར་གང་ཡང་ཟ་རྒྱུ་མེད་པར་བཀྲེས་སྐོམ་གྱིས་མནར་བའི་ཉིན་ཞིག་སླེབས། སྐབས་དེར་ཨ་མ་དེས་རང་གི་བུ་རྣམས་གྲོད་པ་ལྟོགས་པ་འཇོག་རྒྱུ་མ་བཟོད་པར་རང་གི་གཅེན་མོ་འབྱོར་ལྡན་ཞིག་གཤམ་གྱི་གྲོང་པའི་ནང་ཡོད་པ་དེའི་སར་ཕྱིན། གཅེན་མོའི་ནང་དུ་སླེབས་སྐབས་གཅེན་མོ་ནི་ལས་ཀ་གང་ཡང་མེད་པར་བག་མེད་ཀྱི་འཚོ་བར་རོལ་བཞིན་བསྡད་ཡོད། བུ་བདུན་གྱི་ཨ་མས་གཅེན་མོར་རང་གི་དཀའ་ངལ་རྣམས་བཤད་དགོས་བསམས་ཀྱང༌། གཅེན་མོས་མོ་མཐོང་མ་ཐག་ཨ་ཙི། ད་རིང་གཅུང་མོ་སླེབས་བྱུང༌། ད་དཔེ་ཡག་པོ་བྱུང༌། དེ་རིང་ང་གཉིས་ཁྲུས་བྱེད་དོ་ཞེས་ལབ་ནས་ལམ་སང་གཅེན་མོའི་དུག་ལོག་རྣམས་འཁྲུ་རུ་བཅུགས། དེ་ནས་ཕྱི་དྲོ་གཅེན་མོ་རང་གི་མགོ་བོའི་སྟེང་གི་ཤིག་རྣམས་སྒྲུག་ཏུ་བཅུགས། སྐབས་དེར་བུ་བདུན་ཡོད་པའི་ཨ་མ་དེས་རང་ཁྱིམ་དུ་ཡོད་པའི་བུ་བདུན་པོ་དེ་རྣམས་གྲོད་པ་ལྟོགས་པ་ཡིན་པ་དྲན་པས་རང་དབང་མེད་པར་མིག་ཆུ་ཤོར། མིག་ཆུའི་ཐིག་པ་གཅིག་གཉིས་གཅེན་མོའི་མགོ་བོའི་སྟེང་ཟགས་པས་གཅེན་མོས་དེ་གང་ཡིན་དྲིས་པར་ཨ་མ་དེས། ཆར་ཐིག་ཁ་ཤས་ལྷུང་བ་འདྲ་ལབ་པས། གཅེན་མོས་ཨ་ཁྱད་མཚར། གནམ་སྔོན་པོ་ལའང་ཆར་པ་རྒྱབ་ཀྱི་ཡོད་པ་རེད་ལབ། དེ་ནས་ས་མ་རུབ་ཙམ་ལ་གཅེན་མོ་དེ་རྩམ་པ་སྐྱོག་ཆུང་ཆུང་ཞིག་གང་ཙམ་སྤྲད་ནས་ལོག་བཏང་པ་རེད། རྩམ་པ་སྐྱོག་ཆུང་ཆུང་གང་གིས་བུ་བདུན་གྱི་གྲོད་པ་རྒྱགས་ཐབས་བྲལ་བར་སོང་ཨ་མ་དེ་ངུ་བཞིན་ངུ་བཞིན་ལམ་དུ་ཆས་པའི་སྐབས། ཟམ་པ་ཞིག་བརྒལ་དགོས་པ་དེའི་སྟེང་སྦྲུལ་ཤིན་ཏུ་ཆེན་པོ་ཞིག་ཉལ་ཡོད་པ་མཐོང་བས། ཨ་མ་དེས་བློ་ཁོག་ཆེན་པོའི་ངང་སྦྲུལ་དེའི་སར་ཕྱིན་ནས། ཀྱེ་ཧུད། ཚེ་སྔོན་ལས་ཀྱི་འབྲས་བུར་བདག་འཚོ་བ་ཤིན་ཏུ་སྐྱོ་བའི་ཁར་བུ་བདུན་གསོ་རྒྱུ་ཡོད་པས་ད་ལན་གཅེན་མོའི་སར་ཕྱིན་ཡང་རྩམ་པ་སྐྱོག་གང་ལས་མ་རགས། རྩམ་པ་དེ་ཙམ་གྱིས་ངའི་བུ་བདུན་པོ་གསོན་ཐབས་བྲལ་བས། སྦྲུལ་ཁྱོད་ལ་སྙིང་རྗེ་ཡོད་ན་ངའི་པང་དུ་ཡོང་རོགས། གལ་ཏེ་མེད་ན་ངའི་བུ་བདུན་པོ་ལྟོགས་སྐོམ་གྱི་མ་འཆི་གོང་ནས་ཁྱོད་ཀྱིས་ང་ཟ་རོགས་བྱོས། ལབ་པས། སྦྲུལ་དེས་ག་ལེར་ཨ་མ་དེའི་པང་པར་འཛུལ། ཨ་མ་དེ་ཤིན་ཏུ་དགའ་ནས་རང་ཁྱིམ་དུ་ཕྱིན་ནས་ཕྲུ་གུ་ཚོར་དེ་རིང་ཨ་མས་ཁ་ལག་བཟོ་རྒྱུ་ཁྱེར་ཡོད་ཞེས་ལབ་ནས་སྦྲུལ་དེ་དུམ་པོ་བདུན་དུ་གཏུབ་ནས་རྫ་ཁོག་ནང་བཙོས། གང་མཚམས་ནས་རྫ་ཁོག་ཁ་ཕྱེ་ནས་བལྟ་སྐབས་ད་གིན་གྱི་སྦྲུལ་གྱི་གཟུགས་པོ་དུམ་པོ་བདུན་དུ་གཏུབ་པ་དེ་དག་གསེར་རྡོག་རྡོག་བདུན་དུ་འགྱུར་ཡོད་པས་ཨ་མ་དེ་ཤིན་ཏུ་དགའ་བར་འགྱུར། དེ་ནས་ཉིན་ཞིག་བུ་བདུན་གྱི་ཨ་མ་དེ་གཟབ་འཆོར་ལེགས་པོ་ཞིག་སྤྲད་ནས་རང་གི་གཅེན་མོ་ཐུག་པར་ཕྱིན། གཅེན་མོས་རང་གི་གཅུང་མོ་སྐྱོ་པོ་དེ་ད་ཆ་ཕྱུག་པོ་ཆགས་པ་མཐོང་སྐབས་སེམས་ལ་མི་བཟོད་པ་ཆེན་པོ་བྱུང་ཡང་རྣམ་འགྱུར་གང་ཡང་མ་སྟོན་པར་རང་གི་གཅུང་མོ་ལ་ཐབས་མཁས་ཀྱི་སྒོ་ནས། ཇི་ལྟར་འབྱོར་བདག་ཏུ་གྱུར་པའི་བྱུང་བ་རྣམས་དྲིས་པས། བུ་བདུན་གྱི་ཨ་མས་དེས་སྦས་གསང་དང་གཡོ་རྒྱུ་གང་ཡང་མེད་པར་ཇི་བཞིན་བཤད། སང་ཉིན་དེ་གཅེན་མོ་དེས་འདོད་རྔམས་ཀྱི་མེ་ལྕེ་ཁོག་ཏུ་འབར་ནས་དུག་ལོག་སྙིང་པ་རྩབ་རལ་དེ་འདྲ་ཞིག་གོན་ཞིང་ལག་ཏུ་རྩམ་པ་ཉུང་ཉུང་ཞིག་འཁྱེར་ནས་གཅུང་མོ་ལ་སྦྲུལ་ཐུག་སའི་ཟམ་པ་དེའི་སྟེང་ངུ་བཞིན་ངུ་བཞིན་ཕྱིན་པས་སྔར་བཞིན་གཅེན་མོ་ལ་ཡང་སྦྲུལ་གཅིག་ཐུག །གཅུང་མོ་ཇི་བཞིན་ཁྱོད་ལ་སྙིང་རྗེ་ཡོད་ན་ངའི་པང་དུ་ཤོག གལ་ཏེ་མེད་ན་ང་ཟ་རོགས་བྱོས་ལབ་པས། སྦྲུལ་དེས་ཐེ་ཚོམ་མེད་པར་ཁ་གནམ་ས་བགྲེས་པ་ལྟ་བུ་ཞིག་གདངས་ནས་བཟས་སོ།།

སྨྲས་པ།

ཕན་སེམས་ཆུ་རྒྱུན་ཆད་གྱུར་ན། །

གཏོང་སེམས་སྦྱིན་པའི་ཟུངས་ཁྲག་སྐམ། །

འདོད་ཆགས་མེ་རླབས་ཁོག་ཏུ་འབར། །

གཏི་མུག་སྦྲུལ་གྱིས་ཟོས་པར་འགྱུར། །