ཧི་མ་ལ་ཡའི་ཡིག་གཟུགས་གློག་ཀླད་དུ་འཇུག་ཐབས།

སྔོན་གླེང་།

ཧི་མ་ལ་ཡ་བོད་ཡིག་ནི་འཛམ་གླིང་སྤྱི་གྱུར་གྱི་ཨང་རྟགས་ཅན་གྱི་གློག་ཀླད་ཡིག་གཟུགས་ཤིག ཡིག་གཟུགས་དེའི་ཐོག་ནས་ཁྱེད་གློག་འཕྲིན་སོགས་བདེ་བླག་དུ་གཏོང་ཐུབ་ངེས་ཡིན་ལ། དྲ་ཚིག་སོགས་ཀྱི་ནང་དུ་རྩོམ་ཡིག་སྤེལ་སྐབས་ཡིག་གཟུགས་འདི་ཕུལ་དུ་བྱུང་བ་ཞིག་ཡིན། ཡིག་གཟུགས་དེ་གློག་ཀླད་རྒྱུད་དྲ་ཚིག་དུ་བེད་སྤྱོད་བྱེད་པར་དྲ་འདྲེན་གཉེན་ཆས་ཨང་༦་ལས་གསར་བ་དགོས་ཡོད། དཔེར་ན་IE7(internet explorer 7)དངIE8སོགས། གལ་ཏེ་ཉིད་ཀྱིས་གཤམ་གསལ་ལྟར་བྱས་ན། ཧི་མ་ལ་ཡའི་མཛུབ་བསྣུན་དང་མཐུན་པར་བཀོལ་སྤྱོད་བྱ་ཐུབ་རྒྱུ་ཡིན་ནའང་། གལ་ཏེ་TCRCབོད་གཞུང་ཡིག་གཟུགས་དང་སྨོན་ལམ་དང་པོའི་ཡིག་གཟུགས་ཀྱི་མཛུབ་བསྣུན་ལ་ཧ་ཅང་གོམས་པ་ཞིག་ཡིན་ན། སྨོན་ལམ་གསུམ་པའི་ནང་གི་TCRCདང་མཐུན་པའི་མཛུབ་བསྣུན་བེད་སྤྱད་བྱ་ཆོག སྤྱིར་བཏང་ཁྱེད་ཀྱིས་སྨོན་ལམ་གསུམ་པ་ཞེས་པའི་ཡིག་གཟུགས་བེད་སྤྱད་གནང་ཐུབ་ན་དེས་ཀྱང་ཧི་མ་ལ་ཡའི་ཡིག་གཟུགས་ཀྱི་གོ་ཆོད་ཀྱི་ཡོད་པ་ཡིན།

༡ གློག་གླད་དུ་ཧི་མ་ལ་ཡའི་བོད་ཡིག་འཇུག་ཚུལ་དངོས་གཞི།
དང་ཐོག་ཉིད་ནས་དྲ་རྒྱ་བརྒྱུད་ཧི་མ་ལ་ཡའི་ཡིག་གཟུགས་སྒམ་ཆུང་ཕབ་ལེན་གནང་དགོས། ཕབ་ལེན་གྲུབ་པའི་རྗེས་སྒམ་ཆུང་དེའི་ནང་དུ་འཛུལ་ནས་གཤམ་གྱི་ལམ་སྟོན་ཀ་པ་དང་ཁ་པ་ལྟར་ལག་ལེན་གནང་རྒྱུ། ཕབ་བྱས་པའི་སྒམ་ཆུང་དེའི་ནང་དུ་མཛུབ་བསྣུན་གྱི་ས་ཁྲ་ཡང་ཡོད་པ་ཐུགས་འཇགས་འཚལ།


༢ ཧི་མ་ལ་ཡའི་ཡིག་གཟུགས་ཕབ་ལེན་གནང་སའི་དྲ་ཚིག་གི་ཁ་བྱང་། http://tibettimes.dhasatimes.com/upload/pages/himalaya.ttf



http://tibettimes.dhasatimes.com/upload/pages/himalaya.ttf

(ཀ) ཧི་མ་ལ་ཡའི་བོད་ཡིག་གློག་ཀླད་ནང་འཇུག་ཚུལ།
1) Tibetan ཞེས་པ་དེ་སྒོ་ཕྱེ།
2) "Setup"ཞེས་པ་དེར་ཐེངས་མ་གཉིས་བསྟུད་མར་བསྣུན།
3) འཐེབ་གཞོང་སྟེང་གི་"Enter"ཞེས་པ་དེར་བསྣུན།
4) (Windows File Protection)this "Cancel'
ཧི་མ་ལ་ཡའི་བོད་ཡིག་གློག་ཀླད་ནང་བཅུགས་ཟིན་པ་ཡིན།.

(ཁ) འཐེབ་གཞོང་སྒྲིག་ཚུལ།
1) Control Panel ཞེས་པ་དེར་ཕྱིན་ནས།
2) "Languages"ཞེས་པ་དེར་བསྣུན།
3) དེ་ནས་"Add other languages"ཞེས་པར་བསྣུན།
4) དེ་ནས་"Details"ཞེས་པར་བསྣུན།
5) དེ་ནས་"Add"ཞེས་པར་བསྣུན།
6) ལྒི་ཁུང་དེའི་གོང་མའི་ནང་"chinese(PRC)"འོག་མའི་ནང་"Tibetan(PRC)"ཞེས་པ་འདེམས།
7) "Apply"ཞེས་པར་བསྣུན།
8) "Ok"ཞེས་པར་བསྣུན།
དབྱིན་ཡིག་དང་བོད་ཡིག་འཐེབ་གཞོང་བརྗེ་པ་རྒྱག་དུས་༼Ctrl༽ཞེས་པ་དང་༼Shift༽ཞེས་པའི་མཛུབ་བསྣོན་མཉམ་དུ་བསྣུན་དགོས།

ཟིན་བྲིས་པའི་མཆན། གོང་གསལ་ལྟར་ལག་ལེན་གྱི་ཚོད་བལྟ་བྱ་རྒྱུ་མ་བྱུང་།

ཡིད་ཆེས་བདག་གི་སེམས་སུ་ཡོད།

སྙན་འཇེབས་དྲུག་ཅུའི་གསུང་དབྱངས་ཤིག་གིས་ཡིད་ཀྱི་ཁ་ལོ་སྒྱུར་བྱེད་པའི།།

འཇམ་གཉེན་ཕྱག་གི་འཁྲི་ཤིང་གསེབ་ནས་རྒྱུད་མངས་ལན་གཅིག་རབ་བརྐུས་ནས།།

རྒྱས་གྱུར་ཀུ་མུད་ཀེ་ལ་ཤ་དང་འོ་མའི་མཚོ་གཏེར་ལས་དཀར་བ།།

དྭངས་གསལ་ཡེ་ཤེས་མཁྱེན་བརྩེའི་མིག་ཀུན་རྒྱན་དུ་བཞེས་དེར་སྙིང་ནས་གསོལ།།



སྲིད་ཞིའི་གདུང་བ་མ་ལུས་སེལ་བའི་ཁྱོད་ཞལ་སྟོན་གྱི་ཟླ་བ་ལ།།

ཀུན་ནས་མཛེས་པའི་ཚ་ཟེར་མིག་གི་འོད་ཞགས་རླབས་ཕྲན་འཕངས་ཙམ་གྱིས།།

རབ་གདུང་ཡིད་ཀྱི་ཀུ་མུད་འཛུམ་བཞིན་རྣམ་དཀར་དང་བའི་པད་འདབ་གྲོལ།།

མཚན་མོར་བསྐྱོད་པའི་དུག་གསུམ་པོ་དག་ཅི་དགར་རྒྱུ་བའི་གོ་སྐབས་འཕྲོག།



སྟོང་གསུམ་ཁམས་བརྒྱའི་འཇིག་རྟེན་གང་དུའང་ཁྱོད་ཀྱི་དགྲ་ཡི་མིང་མེད་ཀྱང༌།།

དམིགས་མེད་ཐུགས་རྗེ་སྲེག་ཟའི་དཔུང་གིས་ཀླ་ཀློ་སྡེར་བཅས་མནར་གྱུར་པས།།

མི་བཟོད་སྒྲོ་འདོགས་ལྕེ་བརྒྱ་སྤྲུལ་ནས་ལོག་སྨྲའི་དུག་ཚོན་འཕངས་པའི་ལན།།

གཉིས་ཕན་ལམ་བཟང་མེ་ཏོག་སྦྱིན་འདི་སེམས་པ་དཔའ་ཆེན་པོའི་རང་མདངས་ཉིད།།



དེ་ཕྱིར་འཛམ་གླིང་ཞི་བདེའི་གླིང་དུ་ཁ་སྒྱུར་དེད་དཔོན་མཆོག་སྟེ་ཁྱོད།།

ཕྲ་ཞིབ་རིག་པའི་རྩལ་གྱིས་ཕྱུག་པའི་མཚན་རིག་པས་ཀྱང་བསྟོད་ཡུལ་ཁྱོད།།

འཁོར་འདས་འདམ་ལས་བགྲོད་པར་འདོད་པའི་ཆོས་པ་དག་གི་སྐྱབས་མགོན་ཁྱོད།།

ཁྱོད་ཉིད་འདྲ་བའི་ནམ་མཁའ་ཁྱོན་འདི་ཕྱེད་ཙམ་གང་ཡང་ཉུང་བར་སེམས།།



འོན་ཀྱང་བདག་ནི་མཐའ་ཡས་རྒྱ་མཚོ་ཕུལ་གྱིས་གཞལ་བར་བྱེད་པར་རམ།།

གངྒའི་ཀླུང་གི་བྱེ་མ་རྙེད་དག་རེ་རེར་བགྲང་ལ་མི་ངལ་ཡང༌།།

ལྷ་གཅིག་ཁྱོད་ཀྱི་དཔེ་ཟླར་འོས་ཤིག་སྲིད་པ་གསུམ་ན་འཚོལ་ཞིག་ཅེས།།

ཐོས་པར་གྱུར་ན་ཀླད་པ་ཟུང་ཡང་དུམ་བུར་འཐོར་སྙམ་ཁྱོགས་ལ་འཕྱང༌།།



དེས་ན་བདག་ལ་མིག་སྟོང་ཅན་གྱིས་འདྲེན་བྱེད་མཐའ་དག་གཡར་གྱུར་ཀྱང༌།།

ཁྱོད་མིན་ཁྱོད་འདྲ་ཁམས་གསུམ་གང་ནའང་རྙེད་པའི་རེ་འདུན་མ་མཆིས་པས།།

མགོན་པོ་ཁྱེད་ཀྱི་ཐུགས་རྗེའི་ལྕགས་ཀྱུས་བྲལ་མེད་སྙིང་ནས་ལེགས་བཟུང་སྟེ།།

པོ་ཏ་ལ་རུ་ལན་གཅིག་ཁྲིད་པའི་ཡིད་ཆེས་བདག་གི་སེམས་སུ་ཡོད།།

དགུང་གྲངས་རེ་དགུར་ཕེབས་པའི་འཁྲུངས་སྐར་ཉིན།

གློག་ཀླད་དང་བོད་ཡིག

ཐོག་མར་ངས་ཧི་མ་ལ་ཡ་བོད་ཡིག་བཟོ་བ་པོ་དང་སྨོན་ལམ་ཡིག་གཟུགས་བཟོ་བ་པོ་དང་དེའི་ཐད་རོགས་རམ་གནང་མཁན་ཡོང་ལ་ཐུགས་རྗེ་ཆེ་ཞུ་ཡི་ཡིན།

ཀ༽ ངས་ཤེས་པའི་གློག་ཀླད་བོད་ཡིག་གི་ལོ་རྒྱུས།

འདིར་ངས་བཤད་འདོད་པ་ནི། ལོ་ངོ་དྲུག་ཙམ་གྱི་རིང་ངས་གློག་ཀླད་བེད་སྤྱོད་བྱས་པའི་བརྒྱུད་རིམ་ནང་བོད་ཡིག་གི་ཐོག་དཀའ་ངལ་མང་པོ་ཕྲད་མྱོང༌།

སྤྱིར་བཏང་འཛམ་གླིང་ནང་གློག་ཀླད་གཉེན་ཆས་ཁ་ཤས་ཡོད་ལས་གྲགས་ཆེ་བ་ནི་windowsལྒེ་ཁུང་དང་appleཀུ་ཤུ་ཟེར་བ་གཉིས་ཡིན་ན་དེ་དག་གི་ནང་ནས་
༡ དང་པོ་ལྒེ་ཁུང་གཉེན་ཆས་ནང་བོད་ཡིག་བཀོལ་སྤྱོད་ཐད་བཤད་ན།

ཕྱི་ལོ་བརྒྱད་ཅུ་ནང་ངས་ཀུ་ཤུའི་གཉེན་ཆས་ཅན་གྱི་གློག་ཀླད་གཅིག་མཐོང་ཡང་ལྒེ་ཁུང་གཉེན་ཆས་ཅན་དགུ་བཅུའི་ནང་ཐོག་མར་མཐོང་བྱུང༌། དེ་དུས་གཉེན་ཆས་ཌོ་སེ་DOSཟེར་བ་བེད་སྤྱད་ཀྱི་འདུག་ལ། ལྒེ་ཁུང་༩༥་གསར་དུ་འཐོན་པའི་སྒང་རེད། སྐབས་དེ་དུས་བོད་ཡིག་བྲི་བར་ངེས་པར་དུ་ཌོང་གྷོལ་ཟེར་བ་རྡོག་རྡོག་ཞིག་རྒྱ་གར་གྱི་གྲོང་ཁྱེར་Puneཔུ་ན་ནས་ཉོ་དགོས་ཀྱི་འདུག །ཡིག་གཟུགས་ཡག་པོ་འདུག།།འོན་ཀྱང་རིམ་པའི་དུས་གྱུར་གྱིས་རྐྱེན་པའི་ལྒེ་ཁུང་༩༨པ་དང་ལྒེ་ཁུང་༢༠༠༠དང་ལྒེ་ཁུང་xpཨེཀ་སེ་པི་དང༌། ཨེཀ་སེ་པི་ཁྱིམ་སྤྱོད་xp home editionདང་proffessionalམཁས་སྤྱོད། ཨེཀ་སེ་པི་དཔར་གྱི་ལྟེ་གནས་media center editionདང༌། ལྒེ་ཁུང་ཝི་སི་ཏ་vistaསོགས་འཐོན་སོང༌། གོང་སྨོས་བོད་ཡིག་དེ་ལྒེ་ཁུང་༩༨windows 98ཕན་ལ་བེད་སྤྱོད་མེད་པ་ཆགས་པ་རེད། དེ་སྐབས་བཙན་བྱོལ་བོད་གཞུང་གིས་ཌོང་གྷོལ་ཟེར་བའི་རྡོག་རྡོག་དེ་འདྲ་མི་དགོས་པའི་ཊི་སི་ཨར་སི་tcrcཟེར་བའི་བོད་ཡིག་བརྙན་ཆས་བཏོན་གནང༌། འོན་ཀྱང་གཉེན་ཆས་དེར་ཡིག་གཟུགས་མི་འདྲ་བ་གཉིས་youtso/boyigཙམ་ལས་མེད།

དེ་ནས་བློ་བཟང་སྨོན་ལམ་ལགས་ཀྱིས་རང་སྒེར་གྱི་རང་སྦྱོང་བྱས་ནས་སྨོན་ལམ་ཡིག་གཟུགས་དང་པོ་བཏོན། དེར་ཡིག་གཟུགས་ཁག་པོ་མང་ཡོད་པས་མ་ཚད་དབུ་མེད་སོགས་ཀྱང་ཡོད།། འོན་ཀྱང་གོང་གསལ་ཡིག་གཟུགས་ཚང་མར་སྔགས་ཡིག་འབྲི་དུས་སྔགས་ཡིག་རྩེག་མི་ཐུབ་པའི་དཀའ་ངལ་ཡོད་པར་སོང༌། བློ་བཟང་སྨོན་ལམ་གྱིས་སྨོན་ལམ་གཉིས་པ་བཏོན་པ་རེད། སྨོན་ལམ་གཉིས་པའི་འཐེབ་གཞོང་ཅུང་མི་འདྲ་བ་ཡོད། དེ་ལྟར་སྨོན་ལམ་གཉིས་པ་བཏོན་པ་ལས་སྔགས་ཡིག་གི་དཀའ་ངལ་བསལ་བ་ལྟ་བུ་ཡིན་ནའང༌། འཐེབ་གཞོང་ཅུང་ཟད་བེད་སྤྱད་དཀའ་བ་དང༌། རྒྱལ་སྤྱིའི་གཅིག་གྱུར་གྱི་ཨང་རྟགས་ཐོག་བཟོས་མེད་པ་རེད། དེ་ནས་བོད་ནང་ནས་མི་ཞིག་སྐད་བཏང་ནས་ལྒེ་ཁུང་གཉེན་ཆས་ཚོགས་པས་ཧི་མ་ལ་ཡ་བོད་ཡིག་དེ་བཟོས་པ་རེད། ཡིག་གཟུགས་དེ་ནི་ལྒེ་ཁུང་གཉེན་ཆས་ཚོགས་པའི་ཝི་སི་ཏ་གཉེན་ཆས་གསར་པ་ཚོ་དང་མཉམ་དུ་དང་པོ་ནས་ཡོང་གི་ཡོད་ཅིང༌། ལྒེ་ཁུང་གཉེན་ཆས་དྲ་རྒྱ་འཐེན་ཆེད་ཨང་༧་windows internet explorer 7ཕན་ལ་རང་ཆས་སུ་བོད་ཡིག་འཆར་རྒྱུ་ཡོད། དེས་ན་ཁྱོད་ཀྱི་ལྒེ་ཁུང་གཉེན་ཆས་ཅན་གྱི་གློག་ཀླད་ནང་བོད་ཡིག་ཡག་པོ་མ་ཤར་ན་དྲ་རྒྱ་འཐེན་ཆས་ཨང་༧་པའམ་བྱུང་ན་ཨང་༨་བླུགས་དགོས། ཨང་བརྒྱད་པ་བླུགས་མ་ཐག་བོད་ཡིག་ཡག་པོ་མི་འཆར་བ་འདྲ་པོ་བྱ་ངེས་ཀྱང་ཆུ་ཚོད་ཁ་ཤས་རྗེས་ཡག་པོ་ཤར་ངེས་རེད། མ་གཞི་ཡིག་གཟུགས་སྒྲིག་བྱེད་ཀྱི་བརྡ་དཀྱོག་དཀྱོག་ཅན་གྱི་compatibillityཞེས་པའི་བསྣོན་ས་ཞིག་ཁ་བྱང་འབྲི་སའི་ཟུར་དེར་ཡོད་པ་དེར་གནོན་ན་དཀའ་ངལ་སེལ་གྱི་རེད། དེས་ན་ཧི་མ་ལ་ཡ་ཡིག་གཟུགས་དེའི་ཐོག་ཁྱོད་ཀྱི་བོད་ཡིག་གློག་འཕྲིན་སོགས་བདེ་བླག་གཏོང་ཐུབ་ཅིང་དྲ་ཚིགས་སུ་བོད་ཡིག་བདེ་བླག་བྲི་ཐུབ་པ་ཡོང་གི་རེད། འོན་ཀྱང་གློག་འཕྲིན་གཏོང་སྐབས་འབྱོར་ས་དེར་དྲ་རྒྱའི་གཉེན་ཆས་ཨང་༧་ཡན་དགོས། འོན་ཀྱང་འདིའི་མཛུབ་བསྣོན་གོང་གསལ་ཚང་མ་དང་མི་འདྲ་བ་རེད།

ཡིན་ན་ཡང་ད་ཆ་སྨོན་ལམ་གསུམ་པ་འདོན་པ་ནས་ཕལ་ཆེར་བཀའ་ངལ་མེད་པ་ལྟ་བུ་རེད་ཤག།།སྨོན་ལམ་གསུམ་པའི་ནང་ཡིག་གཟུགས་ཁག་བཅུ་གསུམ་ཙམ་འདུག་ལ། ཡིག་གཟུགས་དེ་ཚོ་ཡག་པོ་འདུག།། མ་ཟད་ཡིག་གཟུགས་དེ་ཚོ་རང་འདོད་ལྟར་ཊི་སི་ཨར་སི་འཐེབ་གཞོང༌། པཎ་ཏི་ཏའི་འཐེབ་གཞོང༌། སྨོན་ལམ་གཉིས་པའི་འཐེབ་གཞོང༌། སོགས་ཀྱིས་བེད་སྤྱོད་གཏོང་ཆོག་འདུག།། མ་ཟད་ཕལ་ཆེར་སྨོན་ལམ་གསུམ་པ་ཡོད་ན་ཧི་མ་ལ་ཡ་རང་ཆས་སུ་ཡོང་གི་ཡོད་པ་འདྲ།

༢ ཀུ་ཤུ་གཉེན་ཆས་ཀྱི་ནང་སྔོན་མ་ནས་ཕལ་ཆེར་tibetanཟེར་བའི་བོད་ཡིག་ཡིག་གཟུགས་སྐྱོ་པོ་ཞིག་འདུག།།ཕྱིས་སུ་སམ་བྷོ་ཏ་ཟེར་བ་དང༌། ཡང་ཎི་ཐར་དྷ་སམ་བྷོ་ཏ་ཟེར་ཞིག་འདུག །དེ་ལ་དངུལ་སྤྲད་ནས་ཉོ་དགོས་འདུག ཡིག་གཟུགས་དེ་དག་འབྲི་དཀའ་བ་མ་ཟད། བཟོ་ལྟ་ཡང་དེ་ཙམ་ཡག་པོ་མེད། ད་དུང་ལྒེ་ཁུང་གཉེན་ཆས་ཡོད་སར་ཁྱེར་ན་འཆར་མི་ཐུབ་པ་བཅས་ཀྱི་སྐྱོན་ཡོད།

ད་ཆ། ཀུ་ཤུ་གཉེན་ཆས་ཀྱི་ཆེད་སྨོན་ལམ་གསུམ་པ་ཡང་བཟོས་འདུག་པས་ཡིག་གཟུགས་ཡག་པོ་ཡོད་པས་མ་ཚད་བྲིས་རྒྱུ་ཡང་དེ་ཙམ་དཀའ་བ་མི་འདུག འོན་ཀྱང་ཀུ་ཤུ་གཉེས་ཆས་རྒྱུས་དྲ་ཚིགས་སུ་བོད་ཡིག་བྲིས་ན། ལྒེ་ཁུང་གཉེན་ཆས་ནང་ཡག་པོ་འཆར་ཐུབ་ཀྱི་མི་འདུག།

ཁ༽ གློག་ཀླད་ནང་བོད་ཡིག་གང་དང་གང་བླུག་ན་བཟང་ངམ།

ཁྱེད་ཀྱིས་རང་གི་གློག་ཀླད་ནང་བོད་ཡིག་འཐུས་ཚང་བཟོ་དགོས་ནས་སྨོན་ལམ་ཡིག་གཟུགས་དང་གཉིས་གསུམ་ངེས་པར་དུ་བླུགས་དགོས་ཤིང་བྱུང་ན་ཧི་མ་ལ་ཡ་ཟུར་དུ་བླུགས་ན་ཡག་པོ་མེད་འགྲོ་བསམས།

༡ དེ་ཡང་སྨོན་ལམ་དང་པོ་བླུགས་པ་ཡིན་ན། ཊི་སི་ཨར་སི་རང་ཆས་སུ་ཡོད་ཅིང༌། ཤོག་ངོས་བཟོ་ས་pagemakerསོགས་ཀྱི་ནང་བོད་ཡིག་བདེ་བླག་བྲིས་ཐུབ།

༢ སྨོན་ལམ་གཉིས་པ་བླུགས་པ་ཡིན་ན། ཁྱོད་ཀྱི་གློག་ཀླད་ཀྱི་དྲ་ཚིགས་དེ་ཚོ་མིང་བོད་ཡིག་ཐོག་ཤར་ཐུབ་ཅིང༌། ཡིག་ཆ་དེ་ཚོར་བོད་ཡིག་ཐོག་མིང་བཏགས་ཆོག། །དེ་མེད་ན་ཁྱོད་ཀྱི་གློག་ཀླད་ཀྱི་བོད་ཡིག་དྲ་ཚིགས་ཀྱི་ཁ་བྱང་ལ་སྟོང་པ་གྲུ་བཞི་མང་པོ་ཤར་གྱི་རེད།

༣ སྨོན་ལམ་གསུམ་པ་བླུགས་པ་ཡིན་ན། ཁྱོད་ཀྱི་དྲ་ཚིགས་དག་ཏུ་བོད་ཡིག་བདེ་བླག་བྲི་ཐུབ་པ་མ་ཟད། ཧི་མ་ཡའི་ཡིག་གཟུགས་དེ་ཚོ་ཡང་རང་གི་གོམས་འདྲིས་གང་ལ་ཡོད་པའི་ཊི་སི་ཨར་སིའམ་སྨོན་ལམ་དང་པོ་དང༌། པཎ་ཊི་ཏ། སྨོན་ལམ་གཉིས་པ་སོགས་ཀྱི་འཐེབ་གཞོང་གཞིར་བཞག་བྲིས་ཐུབ།

ག༽ གློག་ཀླད་བོད་ཡིག་བཟོ་ཕྱོགས་ཁོ་བོས་བསམ་འཆར་ཆུང་ཆུང་འགའ་ཤས།

༡ གློག་ཀླད་ནང་བོད་ཡིག་tcrcལྟ་བུ་བེད་སྤྱད་སྐབས་གྲལ་གྱི་མཐར་གནས་པའི་ཚེག་དེ་ཚོ་གཤམ་གྱི་གྲལ་གྱི་མགོར་མི་སླེབས་པ་བཞིན་ཤད་དེ་ཚོ་ཡང་མི་སླེབས་པ་བཟོ་དགོས་འདུག།

༢ བོད་ཡིག་ནང་གཏན་ནས་མེད་པའི་ཡི་གེ་དཔེར་ན་རྤ་དང་ལྨ་ལྟ་བུ་གློག་ཀླད་ནང་མི་ཡོང་བ་བཟོ་དགོས།

༣ སྨོན་ལམ་གསུམ་པའི་ཡིག་གཟུགས་ཚང་མ་དྲ་ཚིག་གཉེན་ཆས་ནང་རང་ཆས་སུ་ཡོང་བ་བཟོ་དགོས།

༤ བོད་ཡིག་གི་ཡིག་གཟུགས་མང་པོ་ཡོད་པ་དེ་ཚོ་ཚང་མར་ཕར་ཚུར་གཟུགས་བསྒྱུར་བྱ་ཆེད་དུ་གཉེན་ཆས་དམིགས་གསལ་ཅན་ཞིག་བཟོ་དགོས།

༢༠༠༩། ༦། ༡༢ཉིན་བྲིས་སོ།།

རྨད་བྱུང་མཛད་པ།

ཟབ་གསལ་ཡེ་ཤེས་སྤྱན་གྱི་མེ་ལོང་ཆེར།།
སྐྱེ་རྒུའི་སྡུག་བསྔལ་གཟུགས་བརྙན་ཡོངས་རྫོགས་པ།།
འཛམ་གླིང་འགྲོ་བའི་སྐྱབས་གཅིག་རྒྱལ་ཀུན་གྱི།།
ཐུགས་རྗེའི་རང་གཟུགས་ཕྱག་ན་པད་མོ་རྒྱལ།།

མི་ཕྱེད་དད་པའི་ཐལ་མོ་རབ་སྦྱར་ནས།།
ངུ་འབོད་ང་རོས་གསོལ་འདེབས་གངས་སྐྱེས་འགྲོར།།
མང་གཙོའི་ལུགས་བཟང་ངལ་མེད་བདེ་བླག་ཏུ།།
ཡིད་བཞིན་བྱིན་པར་མཛད་པ་རྨད་དུ་བྱུང༌།།

རང་དོན་ཡལ་བར་དོར་ནས་གཞན་གྱི་དོན།།
གཅེས་པར་འཛིན་པའི་བརྩེ་ཆེན་ཐུགས་རྗེ་ཡིས།།
མི་བཟོད་རྒྱ་བོད་སྐྱེ་བོའི་བདེ་དོན་དུ།།
དབུ་མའི་ལམ་སྟོན་མཛད་པ་རྨད་དུ་བྱུང༌།།

ཁྱད་པར་ཆོས་མེད་བདུད་རྒྱལ་སྙིགས་དུས་འདིར།།
མཐའ་ཀླས་འཛམ་གླིང་གོ་ལའི་མཁའ་དབྱིངས་སུ།།
འཚེ་མེད་གྲགས་པའི་ཆུ་འཛིན་རབ་བརྟས་ནས།།
ཞི་བདེའི་དེད་དཔོན་མཛད་པ་རྨད་དུ་བྱུང༌།།

གཞིས་བྱེས་བདེ་དང་ཆོས་དད་རང་མོས་ཀྱི།།
ཉིན་བྱེད་ཟ་པོ་སྨོན་ལོག་མུན་པ་ཅན།།
ལུང་རིགས་སྣང་བས་ངོ་གདོང་སྐྱེངས་བྱེད་དེ།།
ཆོས་ལུགས་རིས་མེད་མཛད་པ་རྨད་དུ་བྱུང༌།།

གང་དག་གང་གི་རྨད་བྱུང་མཛད་རྗེས་ཀུན།།
ཐ་མའི་ཐ་ཤལ་བདག་ལྟས་བསྙད་བསམས་ཀྱང༌།།
མཁའ་ལ་མཁའ་མཐའ་བཞིན་དུ་བརྗོད་ཀླས་ཕྱིར།།
མཛད་པའི་མཛད་ཟུར་ཙམ་ཞིག་བྲིས་པ་ལགས།།
༢༠༠༡ ཟླ་བ་༢ ཚེས་༤ཉིན།
ནོར་ལྡེ་ཚགས་པར་སྟེང་བཀོད་ཟིན།

ངེས་དོན་བསྟོད་པ།

གང་དག་སྲིད་པའི་བཙོན་རར་བསྡམས་པ་ཡི།།
མ་ལུས་འགྲོ་བའི་སྐྱབས་གཅིག་བཅོམ་ལྡན་མ།།
བརྩེ་ཉིད་རྫོགས་བྱང་གོ་འཕང་དམ་པ་ཡི།།
ཕུན་ཚོགས་རྒྱུ་ཡི་ཐོག་མ་དེ་ལ་འདུད།།


གང་ཞིག་འཛམ་གླིང་ཧྲིལ་པོ་རྡུལ་ཕྲན་དུ།།
བརླག་ཉེན་སྙིགས་མ་ལྔ་ཡིས་བདོ་བའི་དུས།།
ཉམ་ཐག་ལུས་ཅན་ཀུན་གྱི་མགོན་གཅིག་པུར།།
བྱོན་མཛད་སྙིང་རྗེའི་རང་གཟུགས་གང་དེར་བསྟོད།།


འཇིག་རྟེན་འདི་ན་འཁྲུག་རྩོད་མུ་གེ་ནད།།
མི་འདོད་རྒུད་རྒུ་ཆར་ལྟར་འབྱུང་བའི་གཞི།།
བྱམས་དང་སྙིང་རྗེ་གོམས་པ་མེད་ཉིད་དུ།།
འདི་ན་ཁྱོད་མིན་སུ་ཡིས་རབ་ཏུ་གསུངས།།


དེ་ཕྱིར་འཇིག་རྟེན་མིག་གཅིག་ཁྱོད་ཉིད་ནི།།
རང་སེམས་གོ་ལའི་ངོས་ལ་ཞི་བདེའི་དཔལ།།
དྲོད་སྣང་ཡོད་རྒུ་བྱིན་པའི་མགོན་མཆོག་ཏུ།།
གཟུར་གནས་དཔྱོད་ལྡན་སུ་ཡིས་བཀུར་མི་འགྱུར།།


གངས་རིའི་ལྗོངས་འདིར་པད་དཀར་འཆང་བའི་སྤྲུལ།།
སྲོང་བཙན་སྒམ་པོ་གེ་སར་རྒྱལ་ལ་སོགས།།
ཐུགས་རྗེའི་བདག་ཉིད་རྣམས་ཀྱང་དྲག་ཤུགས་ཀྱིས།།
བྱ་བས་འགྲོ་དོན་མཛད་པར་གྲགས་གྱུར་ནའང༌།།


ཁྱོད་ནི་རང་གི་རྒྱལ་འབངས་ལོངས་སྤྱོད་སོགས།།
མི་བཟད་བཙན་གྱིས་འཕྲོག་པའི་བརླང་སྤྱོད་ཀྱི།།
རྣམ་དཔྱོད་བློ་ཡི་མིག་ལྡོངས་དག་ལ་ཡང།།
ཆེ་ཆེར་གཅེས་པ་འཛིན་པས་ཤིན་ཏུ་རྨད།།


ལོག་པའི་ཡིད་ཅན་གང་གིས་ཁྱོད་ཉིད་ལ།།
སྨོད་གཤེ་མཚང་འབྲུ་སྡིགས་པ་ཅི་བྱས་ཀྱང༌།།
ཆ་རྫོགས་རྟ་བདུན་དབང་པོའི་དཀྱིལ་འཁོར་ལ།།
རབ་གླེན་རྔོན་པས་འཕངས་པའི་ཉག་ཕྲན་བཞིན།།


ཀྱེ་མ་ཁྱོད་ཀྱི་ཚངས་པའི་དབྱངས་ཀྱིས་ནི།།
རང་རྒྱུད་ཇི་ལྟར་མྱོང་བའི་སྟོབས་ཉིད་ལས།།
འཚེ་མེད་བྱམས་བརྩེའི་ངོ་བོ་ཕན་ཡོན་བཅས།།
གང་གསུངས་དེ་ཀུན་སུ་ཡིས་ཐོས་གྱུར་པ།།


དེ་ཡི་ཞེ་ལྡང་རྒོད་ཁའི་མེ་ཕུང་ཆེ།།
ཐམས་ཅད་དབྱིངས་སུ་ངང་གྱིས་ཞི་འགྱུར་ཞིང༌།།
བླ་མེད་དགེ་ཚོགས་ཀུན་གྱི་རྩ་བ་མཆོག།
སྙིང་རྗེའི་ས་བོན་བསྐྲུན་པ་དེ་ཡི་ཕྱིར།།


ཐུན་དྲུག་ཤ་ཁྲག་རུས་པར་རྔམ་པ་ཡི།།
དམུ་རྒོད་འཇིགས་རུང་མི་བསྲུན་གང་དག་ཀྱང༌།།
ཁྱོད་ཀྱི་ཞབས་དཀར་ཟུང་གི་པད་མོའི་འོག།
ཕྲ་རབ་རྡུལ་ཀྱང་མཆོད་པར་ཅིས་མི་འགྱུར།།


ཨེ་མ་གོ་ལའི་ཁྱོན་འདིར་མདོ་སྔགས་ཀྱི།།
ཡོངས་རྫོགས་རྒྱལ་བསྟན་འཕྱོ་བའི་ཆུ་གཏེར་ཆེ།།
ཁ་བ་ཅན་ཞེས་བྱ་བར་མགོན་ཁྱོད་ཀྱི།།
སྐྱེ་རབས་དུ་མས་རྗེས་སུ་བཟུང་གྱུར་ཅིང༌།།


ལྷག་པར་བསྟན་འགྲོའི་ཆགས་འཇིག་ངེས་དཀའ་བའི།།
ཉག་ཕྲའི་དུས་འདིར་དཀའ་བ་འབུམ་ཕྲག་གིས།།
ལྷོད་པ་མེད་པར་འཛིན་ཅིང་སྐྱོང་བ་ཡིས།།
གང་ཁྱོད་པད་དཀར་འཛིན་པ་དངོས་མིན་ཅི།།


གང་དག་དམ་པའི་ཆོས་ཀྱི་མིང་ཙམ་ཡང༌།།
རྣ་བས་མ་ཐོས་ལྟེ་ཁྲག་གངས་རིའི་སུལ།།
འཕོ་བར་བསྐལ་བས་མགོན་པོ་གང་ཉིད་ལ།།
ཤིན་ཏུ་ལྡང་ཡང་དེ་ལ་མཚར་དུ་ཅི།།


མ་བསྐུལ་གང་གི་ཞབས་རྡུལ་སྤྱི་བོས་ལེན།།
ཟབ་རྒྱས་དམ་ཆོས་འདུད་རྩིའི་རོ་མྱངས་པའི།།
གངས་སྐྱེས་གང་གིས་ཅུང་ཟད་ཞེ་འགྲས་པ།།
དེ་ལས་ངོ་མཚར་གྱུར་པ་གཞན་ཅི་ཞིག།


འོན་ཏང་རྒྱ་དམར་ཀླ་ཀློའི་མཆེ་སྡེར་དབར།།
སྲོག་གི་མྱུ་གུ་འཚོ་བའི་བོད་དམངས་རྣམས།།
རྐང་གི་ཁོང་ནས་ཁྱོད་ལ་སྐྱབས་མཆིས་པ།།
འོ་སྐོལ་གངས་ཅན་བོད་པའི་གཟི་བརྗིད་སྙམ།།


ཀྱེ་ཧུད་མ་རིག་མུན་པས་མིག་ཀུན་སྒྲིབ།།
དགྲ་གཉེན་ཆགས་ལྡང་དྲག་པོའི་འཐེན་ཁྱེར་བར།།
རང་དོན་ཡིད་བྱེད་བསམ་པའི་འདམ་རྫིང་དུ།།
མ་ལུས་བྱིངས་པ་བདག་ཀྱང་རིང་མོ་ནས།།


མཁྱེན་པའི་སྤྲིན་གྱིས་འཁྲིགས་པའི་ཆོས་སྐུའི་མཁར།།
བྱམས་བརྩེ་བྱ་དཀར་རྩེན་པའི་ཁྲི་སྟེང་ནས།།
ཡོད་དོ་འགྲོ་བའི་བདེ་སྡུག་གཟིགས་མཛད་པ།།
ཞི་བདེའི་དེད་དཔོན་ཁྱེད་ལ་སྐྱབས་འགྲོ་ཡང༌།།


ཡང་དག་རྟེན་འབྱུང་ལྟ་བ་མ་གོ་ཞིང༌།།
ངེས་འབྱུང་བྱང་ཆུབ་སེམས་ཀྱིས་རྒྱུད་མ་བརླན།།
ཐ་ན་མཆོག་གསུམ་དད་པའི་སྐྱབས་འགྲོ་ཡང༌།།
རྩ་བརྟན་བཅོས་མིན་ཞིག་ཀྱང་མེད་པ་སྐྱོ།།


འོན་ཏེ་མཆི་བདག་ཆུ་སྲིན་འབྱུང་གནས་སུ།།
དལ་མེད་རྒྱུ་བའི་ཚེ་སྲོག་གང་གཱའི་རྒྱུན།།
ཇི་སྲིད་གནས་པ་དེ་སྲིད་མགོན་ཁྱོད་ལ།།
བློ་སེམས་ཕྱོགས་པ་དེ་ཡང་ཡིད་རང་གནས།།


ཕྲར་འཇུག་འཆི་མེད་ལམ་དུ་མཚན་མོའི་མགོན།།
ཉིན་མོར་ཚ་ཟེར་ཨེཀ་ཛ་ཏིར་མིག།
དེ་བཞིན་རྒྱལ་བར་ཏོག་བཞིན་གངས་ཁྲོད་འདིར།།
ཇི་སྙེད་འགྲོ་ལ་མགོན་སྐྱབས་ཁྱོད་གཅིག་ཉིད།།


དེ་ཕྱིར་ཀུན་ཏུ་ཁྱོད་སྐུ་ཉིན་བྱེད་དབང༌།།
སྤྱི་སྒོས་གངས་ལྗོངས་བསྟན་འགྲོའི་མགོན་ཉིད་དུ།།
མི་ཉམས་བསྐལ་བརྒྱའི་བར་དུ་རབ་ཞུགས་པར།།
མི་སྨོན་གངས་ཕྲུག་དངོས་གནས་གང་ན་མཆིས།།


བདག་ཀྱང་གདུང་ཤུགས་དྲག་པོའི་རླབས་ཀྱིས་ནི།།
ལག་པའི་ཆུ་སྐྱེས་སྙིང་ཁའི་ཐད་ལ་ཟུམ་བཞིན།།
མགོན་ཁྱོད་མི་གཤིགས་ཞབས་པད་རྟོག་བརྟན་པར།།
མི་ཕྱེད་སྙིང་ནས་གསོལ་འདེབས་གྲངས་མེད་ཞུ།།


དེ་ལྟར་བསྟོད་པའི་ངག་གི་ཕྲེང་བ་འདིར།།
ཚིག་དོན་གཉིས་ནས་གོལ་ས་མང་ན་ཡང༌།།
འཕྱུག་པ་མེད་པའི་ལྷག་བསམ་སྨྱུག་རྩེ་ནས།།
གངས་ཕྲུག་བསྟན་ཕུན་དཔལ་གྱིས་བྲིས་པ་དགེ།


བོད་རབ་བྱུང་བཅུ་བདུན་པའི་ཆུ་ཕོ་རྟ་ཡི་ལོ་ཟླ་བ་བཅུ་གཉིས་པའི་ཚེས་བཞིའི་ཉིན་མཁས་མང་བློ་གསལ་བྱེ་བའི་གླིང་གི་ཆོས་གྲྭ་པ་དགེ་སྦྱོང་བསྟན་ཕུན་དཔལ་གྱིས་སྟོན་པ་བཅོམ་ལྡན་འདས་འཚང་རྒྱ་བའི་གནས་སུ་གྲགས་པ་རྒྱ་གར་རྡོ་རྗེ་གདན་དུ་བྲིས་པ་དགེ་ཅིག་གུ།།