ཟབ་གསལ་ཡེ་ཤེས་སྤྱན་གྱི་མེ་ལོང་ཆེར།།
སྐྱེ་རྒུའི་སྡུག་བསྔལ་གཟུགས་བརྙན་ཡོངས་རྫོགས་པ།།
འཛམ་གླིང་འགྲོ་བའི་སྐྱབས་གཅིག་རྒྱལ་ཀུན་གྱི།།
ཐུགས་རྗེའི་རང་གཟུགས་ཕྱག་ན་པད་མོ་རྒྱལ།།
མི་ཕྱེད་དད་པའི་ཐལ་མོ་རབ་སྦྱར་ནས།།
ངུ་འབོད་ང་རོས་གསོལ་འདེབས་གངས་སྐྱེས་འགྲོར།།
མང་གཙོའི་ལུགས་བཟང་ངལ་མེད་བདེ་བླག་ཏུ།།
ཡིད་བཞིན་བྱིན་པར་མཛད་པ་རྨད་དུ་བྱུང༌།།
རང་དོན་ཡལ་བར་དོར་ནས་གཞན་གྱི་དོན།།
གཅེས་པར་འཛིན་པའི་བརྩེ་ཆེན་ཐུགས་རྗེ་ཡིས།།
མི་བཟོད་རྒྱ་བོད་སྐྱེ་བོའི་བདེ་དོན་དུ།།
དབུ་མའི་ལམ་སྟོན་མཛད་པ་རྨད་དུ་བྱུང༌།།
ཁྱད་པར་ཆོས་མེད་བདུད་རྒྱལ་སྙིགས་དུས་འདིར།།
མཐའ་ཀླས་འཛམ་གླིང་གོ་ལའི་མཁའ་དབྱིངས་སུ།།
འཚེ་མེད་གྲགས་པའི་ཆུ་འཛིན་རབ་བརྟས་ནས།།
ཞི་བདེའི་དེད་དཔོན་མཛད་པ་རྨད་དུ་བྱུང༌།།
གཞིས་བྱེས་བདེ་དང་ཆོས་དད་རང་མོས་ཀྱི།།
ཉིན་བྱེད་ཟ་པོ་སྨོན་ལོག་མུན་པ་ཅན།།
ལུང་རིགས་སྣང་བས་ངོ་གདོང་སྐྱེངས་བྱེད་དེ།།
ཆོས་ལུགས་རིས་མེད་མཛད་པ་རྨད་དུ་བྱུང༌།།
གང་དག་གང་གི་རྨད་བྱུང་མཛད་རྗེས་ཀུན།།
ཐ་མའི་ཐ་ཤལ་བདག་ལྟས་བསྙད་བསམས་ཀྱང༌།།
མཁའ་ལ་མཁའ་མཐའ་བཞིན་དུ་བརྗོད་ཀླས་ཕྱིར།།
མཛད་པའི་མཛད་ཟུར་ཙམ་ཞིག་བྲིས་པ་ལགས།།
༢༠༠༡ ཟླ་བ་༢ ཚེས་༤ཉིན།
ནོར་ལྡེ་ཚགས་པར་སྟེང་བཀོད་ཟིན།
No comments:
Post a Comment
བསམ་འཆར་གང་མང་གནང་ན་དགའ་བསུ་ཡོད།