2010-05-14

grizzly bear དྲེད་མོང་།

ཆུང་དུས་ནས་མི་རྒན་པ་ཚོའི་ངག་ལས་དྲེད་མོང་གི་གཏམ་རྒྱུད་མང་པོ་གོ་མྱོང་ཡང་། དྲེད་མོང་བྱ་བའི་སེམས་ཅན་དེ་གང་འདྲ་ཞིག་ཡོད་དམ་སྙམ་ནས་རྟག་པར་དོགས་པ་ཟ་གི་ཡོད། ངས་མི་རྒན་འགའ་ཞིག་ལ་དྲེད་མོང་བྱ་བ་གང་འདྲ་ཞིག་ཡོད་དམ་ཞེས་སྐད་ཆ་དྲིས་དུས། ཁ་ཤས་ཀྱིས་གདོང་བེའུ་འདྲ་པོ་ཡོད་པ་དང་། ཡང་ཁ་ཤས་ཀྱིས་མགོ་ལ་སྤུ་བཟང་པོ་ཡོད་རབས་དང་། ཁ་ཤས་ཀྱིས་རྒྱང་རིང་ནས་བལྟས་ན་མི་འདྲ་པོ་ཡོད་པ་བཤད་སོང་། ཐམས་ཅད་ཀྱི་ཁ་ཆིག་བསྒྲག་ཏུ་དྲེད་མོང་གིས་གཡག་བསད་ནས་ཟ་གི་ཡོད་པ་བརྗོད་སོང་ལ་འགའ་ཞིག་གིས་དྲེད་མོང་ནི་བུང་བུ་ཟ་རྒྱུར་ལྷག་པར་དགའ་པོ་ཡོད་པ་བཤད་བྱུང་། དྲེད་མོང་གི་རིགས་ལའང་མི་དྲེད་དང་དོམ་དྲེད་ཞེས་གཉིས་ཕྱེ་ཡི་འདུག་ཅིང་ཁ་ངག་ལ་མི་དྲེད་ཀྱིས་གཡོ་ཐབས་ཀྱིས་མི་ཟ་གི་ཡོད་པའང་བཤད་སྲོལ་འདུག ཡིན་ནའང་ཁོ་བོས་དེ་སྔ་དྲེད་མོང་དངོས་སུ་མཐོང་རྒྱུ་ཕར་བཞག་འདྲ་སྣང་གི་སྒྲ་སྤྱི་ཙམ་ཡང་ཡག་པོ་ཞིག་ཤར་མ་ཐུབ་པས་དྲེད་མོང་བྱ་གང་འདྲ་ཞིག་ཡོད་དམ་སྙམ་པའི་ཤེས་འདོད་ཆེན་པོ་བྱུང་བས། ལོ་ཤས་ནང་ངའི་དྲ་ཚིག་སོགས་ནས་དཔར་དེ་འདྲ་ཕབ་ནས་མི་རྒན་ཁ་ཤས་ལ་བསྟན་པ་ལས་ད་ཆ་དྲེད་མོང་བྱ་བ་དེ་འདི་འདྲ་ཞིག་ཏུ་མཐའ་དཔྱོད་བྱས་པ་ཡིན།

དྲེད་མོང་།
བྱང་ཨ་མི་རི་ཀའི་གླིང་ཆེན་དང་བོད་དུ་ཡོད་པའི་སྲོག་ཆགས་ཀྱི་རིགས་ཤིག བྱང་ཨ་མི་རི་ཀའི་དྲེད་མོང་ལ་གྷྲི་ཛེ་ལི་བྷིར་grizzly bearཟེར་བ་དང་ཟས་སུ་ཉ་དང་གླ་གླང་སོགས་སྤྱོད་ཅིང་གངས་འཁྱགས་ཉེ་འཁྲིས་ཀྱི་བྲག་དང་ནགས་གསེབ་གནས། བོད་དུ་ཡོད་པའི་དྲེད་མོང་ནི་གཡག་དང་བོང་བུ་སོགས་ཕྱུགས་ཀྱི་རིགས་ཟོས་ཤིང་མི་དྲེད་ཀྱིས་མི་ལའང་འཚེ་བ་བྱེད། གངས་རི་ཉེ་འཁྲིས་ཀྱི་བྲག་རི་དང་ཛ་རི་ནགས་ཁྲོད་དུ་འཚོ། ༼དབྱིན་སྐད་ཚིག་མཛོད་ཁ་ཤས་ནང་blue bearདོམ་སྔོན་པོ་ཡང་ཟེར་འདུག༽
བོད་ཀྱི་དམངས་གཏམ་ཁྲོད་དྲེད་མོང་གི་སྒྲུང་གཏམ་ཡང་མང་པོ་བཤད་སྲོལ་ཡོད།

ལྷ་སའི་གཅན་གཟན་ཁང་དུ་ཡོད་པའི་དྲེད་མོང་



བོད་ཀྱི་དྲེད་མོང་


ཨ་མི་རི་ཀའི་དྲེད་མོང་། grizzly bear

No comments:

Post a Comment

བསམ་འཆར་གང་མང་གནང་ན་དགའ་བསུ་ཡོད།