2010-05-14

འདུལ་བའི་ཚིག་མཛོད། དཔེ་དེབ་ངོ་སྤྲོད།

འདུལ་བའི་ཚིག་མཛོད། དཔེ་དེབ་ངོ་སྤྲོད།

མདང་ནུབ་གྲོགས་པོ་ཞིག་གིས་ཁོ་བོ་ལ་ཚིག་མཛོད་ཞིག་གནང་བྱུང་།

ཚིག་མཛོད་དེའི་ཁ་བྱང་དུ་༼དམ་ཆོས་འདུལ་བ་གཙོ་གྱུར་གྱི་གཞུང་སྣེ་མང་ལས་བཏུས་པའི་ཚིག་མཛོད་མུན་སེལ་སྒྲོན་མེ་ཞེས་བྱ་བ་བཞུགས་སོ།།༽ཞེས་འཁོད་འདུག་ལ། རྩོམ་པ་པོའི་མཚན་ལ། འབྲས་བློ་གླིང་ཉག་རེ་ལྷ་རམས་དགེ་བཤེས་ཚེ་དབང་ཉི་མས་བརྩམས་ཞེས་བྲིས་འདུག
དཔར་སྐྲུན་མཁན། ནོར་གླིང་བོད་ཀྱི་རིགས་གཞུང་གཅེས་སྐྱོང་ཁང་དང་ཞུ་དག་ལ་རྡོ་རྗེ་དབང་ཕྱུག་རེད་འདུག་ལ། དེབ་ཀྱི་རྒྱུ་གྲོན་དང་བཟོ་མཁན་ཐའི་ཝན་སངས་རྒྱས་ཀྱི་ཤེས་ཡོན་ཚོགས་པ་རེད་འདུག

རྩོམ་པ་པོའི་ངོ་སྤྲོད་སྙིང་བསྡུས་སུ་ཁོང་ནི་ཕྱི་ལོ་༡༩༣༧ལོར་བོད་ཀྱི་རྒྱལ་ས་ལྷ་སར་སྐྱེས་པ་དང་། རང་ལོ་དགུ་ལ་ཆོས་ཞུགས་བྱས་པ་དང་རང་ལོ་བཅོ་ལྔ་ལ་དགེ་བའི་བཤེས་གཉེན་ཆེན་པོ་པད་མ་རྒྱལ་མཚན་སོགས་བློ་གསལ་གླིང་གི་མཁས་པ་དུ་མ་བསྟེན་ནས་དབུ་མའི་བར་ལ་བོད་དུ་གཟིགས་པ་དང་། དེ་ནས་སྦག་ས་དང་མོན་གྷོ་གཉིས་སུ་དབུ་མ། འདུལ་མཛོད། སྔགས་ལ་སོགས་པ་ལ་སྦྱངས་པ་མཐར་ཕྱིན་བྱས་རྗེས།
ཕྱི་ལོ་༡༩༧༥ལོར་དགེ་ལུགས་རྒྱུགས་སྤྲོད་ཆེན་མོ་གསར་འཛུགས་སྐབས་རྒྱུགས་སྤྲོད་དུ་ཞུགས་ནས་གདན་ས་ཆེན་པོ་སེར་འབྲས་དགའ་གསུམ་དུ་དགེ་བཤེས་ལྷ་རམས་པའི་དམ་བཅའ་བཞག་པ་དང་། ༸གོང་ས་མཆོག་གི་བཀའ་བཞིན་སྤི་ཏིར་མཚན་ཉིད་སློབ་གྲྭ་གསར་འཛུགས་བྱས་པ་དང་། དེ་ནས་རང་གཞུང་ཆོས་དོན་ལས་ཁུངས་ཀྱི་རེ་སྐུལ་བཞིན་བཙུན་དགོན་སྒྲོལ་མ་གླིང་། ནོར་གླིང་ངེས་སྟོན་པས་རེ་སྐུལ་བཞིན་ནོར་གླིང་སློབ་གྲྭ་བཅས་སུ་ནང་ཆོས་ཀྱི་སློབ་ཁྲིད་བྱས། ད་ལྟ་ནོར་གླིང་འཁྲིས་སུ་ཡོད་པའི་ཕྱི་རྒྱལ་བཙུན་དགོན་དུ་ཕྱི་རྒྱལ་སེར་སྐྱ་ཕོ་མོ་ནང་ཆོས་སློབ་ཁྲིད་བྱས་མུས་ཡིན་པ་བྲིས་འདུག

བརྩམས་ཆོས་ལ། སྦག་ས་ཆོས་སྒར་གྱི་ཆོས་འབྱུང་། ལོ་ཉིས་སྟོང་ལྔ་བརྒྱའི་གོང་ནས་བྱུང་བའི་ཁོར་ཡུག་སྲུང་སྐྱོབ་སྐོར། འདུལ་བའི་ཚིག་མཛོད་བཅས་ཡོད་འདུག

ཚིག་མཛོད་ནང་དུ་དཔེར་ན། ༼ག་ག་ཚིལ། གཡའ་སྒོག་པ་སྟེ་མཆན་ཁུང་དུ་སོར་མོས་རེག་ཅིང་མཉེད་པ།༽ ཞེས་འགྲེལ་བཤད་མདོར་བསྡུས་སུ་དོན་གྱི་ངོ་བོ་སྟོན་པ་དང་། ཡང་ལྕི་ཆོས་བརྒྱད་ལྟ་བུ་ལ་འགྲེལ་བཤད་ཤོག་ངོས་གསུམ་ལྷག་པ་ཡང་གནང་འདུག

མདོར་ན་ཚིག་མཛོད་དེ་ནི་ནང་དོན་རིག་པའི་འཐད་ཕྱུག་པའི་ཚིག་མཛོད་ཅིག་གི་རྣམ་པར་འདུག་ཅིང་། ནང་དོན་ལ་འདུལ་བའི་གཞུང་ཙམ་མིན་པར་ནང་དོན་རིགས་པའི་གཞུང་སྤྱིའི་ཚིག་མང་པོའི་བཤད་པ་ཡང་མཛད་འདུག

No comments:

Post a Comment

བསམ་འཆར་གང་མང་གནང་ན་དགའ་བསུ་ཡོད།