ཁེར་རྐྱང་གི་རྒྱལ་མཚན།

ཁེར་རྐྱང་དུ་རྒྱལ་མཚན་དང་ལྷན་དུ་འགྲེང་པ། ར་ས་ཕོ་ཉས་དཔར།



ངས་ལེགས་པར་བསམ་ན།
ང་ནི་ཁེར་རྐྱང་གི་འདུ་ཁང་སྟེང་གི་རྒྱལ་མཚན་དེ་དང་འདྲ།

རྒྱུན་དུ་ཞོགས་ཀའི་ཉི་འཆར་ལ་བལྟ་བཞིན།
མ་འོངས་པར་རེ་སྒུག་གི་སྔ་འདང་རྒྱབ།
སུས་ཀྱང་སྙིང་ཁུངས་ནས་ཁ་ཏ་བྱེད་མཁན་མེད་ལ།
རླུང་འཚུབ་དང་ཆར་བརྡུང་གི་བརྙས་བཅོས་ཟེགས།

མིང་འདོགས་ལ་རྒྱལ་མཚན་ཡིན་ཀྱང་།
དོན་དངོས་རང་དབང་དང་སྤྱི་ཚོགས་མེད་པའི་ཁེར་མཚན་ཞིག་ཡིན།
རྒྱུན་དུ་འདུ་ཁང་གི་ཡང་རྩེ་ཁོ་ནར།
ཐག་རིང་གི་མཛེས་ལྗོངས་ལ་བལྟ་བཞིན་ཡོད་ཀྱང་།
འགྲོ་ཐབས་ཟད།

ཕུག་རོན་དང་ཁྭ་ཏས་སྐྱག་གཅིན་གྱིས་མགོ་བོ་བསྣན་ཡང་།
སུ་ཞིག་ལ་འགན་འཁྲི་མེད། ཡིན་ནའང་།
ངའི་ཕྱོགས་བཞིར་ཆུ་སྲིན་གྱི་ཁ་བཞི་ཡོད་པ་དེར།
སྐད་རྒྱག་དབང་ཞིག་མེད་ནའང་། རྒྱུན་དུ།
སྐེ་འོག་གི་དྲིལ་བུ་ཆུང་ཆུང་དེ་ཚོར།
"རང་དབང"དང་"རང་དབང་"
ལོབ་རོགས་ཟེར་ཀྱང་། ད་ཆ།


དྲིལ་བུ་དེ་ཚོ་ཡང་། སྤྲེའུ་ཚོས་ཁྱེར་ནས་བྱི་བ་ལ་སྤྲད།
བྱི་བས་བྱི་ལའི་སྐེ་ལ་བཏགས་པས།

ད་ཆར་རང་སྐྱོབ་ཀྱི་ནུས་པ་ལས།
རང་དབང་གི་འཚོལ་སྙེགས་མེད་ཐལ།

ཨ་ཙི། ཅི་མ་རུང། འདུ་ཁང་གི་མཐོ་ལྒང་སྟེང་།
འཕྲད་ཐབས་བྲལ་བའི་རོགས་པ་དང་ལྷན་དུ།
ཉི་འཆར་ལ་འདང་རེ་རྒྱག་བཞིན།
ལོ་གསར་གྱི་མདུན་དུ་རྒྱུགས།

༡ ་ ༢ ་ ༣།

ར་ས་ཕོ་ཉས་འདྲ་པར་ལ་བལྟས་ནས་ཐད་ཀར་བྲིས།