2010-05-14

དེ་རིང་གི་ཟིན་ཐོ།

གཉིད་ཀྱི་བུ་མོས་མགོ་བོར་བུམ་པ་རེ་བཞག་ནས།།

སྐྱ་རེངས་བུ་ཆུང་སྐད་ཅིག་བཙའ་འདོད་ཞིག་བྱས་ཀྱང་།།

རྐང་དྲུག་བུང་བ་གཞོན་ནུ་བློ་གསར་ཚོའི་དབྱངས་ཀྱིས།།

ཕྱག་དཔེ་སྐྱོར་སྦྱངས་གནངས་པས་རྨོངས་གཉིད་ལས་སད་སོང་།།

ནར་ནར་དཔེ་ཆ་བལྟ་བའི་འདུན་པ་དག་ཡོད་ཀྱང་།།

ཟང་ཟིང་ལེ་ལོའི་གྲོགས་པོས་ཨུ་ཚུགས་ཀྱིས་བསྐུལ་ཏེ།།

ཞིམ་ཞིམ་ཐུག་པ་འཐུང་སར་ཟ་ཁང་དུ་ཁྲིད་ནས།།

དཀོན་དཀོན་དེ་རིང་ཉིན་མོའི་མཇུག་རྩེ་དེར་བསྐྱལ་བྱུང་།།

སྐྱ་ལེབ་རྩངས་པ་སྒལ་ལེབ་ཁྲེལ་བགད་འགའ་བྱེད་བཞིན།།

སྐྱག་ནག་རྩེ་མོ་དཀར་པོ་ཆུ་ཚོད་སྟེང་བཏང་པས།།

དེ་རིང་ཉིན་མ་གང་པོ་མུན་ནག་ཏུ་འདས་ཀྱང་།།

ཐ་མར་དཀར་ཆོས་ཏོག་ཙམ་བསྒྲུབ་རྒྱུ་ཞིག་གོ་ནས།།

ཕག་ཚང་འདྲ་བའི་ཤག་དེར་བསྡད་ས་ཞིག་བཟོས་ནས།།

སྲས་མོ་འདྲ་བའི་ཉ་ཚོར་ཁ་ལག་ཞིག་སྤྲད་ནས།།

སྣབས་ཕྱིས་འདྲ་བའི་ཉིན་ཐོར་ཟིན་བྲིས་འདི་རྒྱབ་ནས།།

སངས་རྒྱས་འདྲ་བའི་ཕྱག་དཔེར་ཞལ་མཇལ་ཞིག་ཞུ་དགོས།།

No comments:

Post a Comment

བསམ་འཆར་གང་མང་གནང་ན་དགའ་བསུ་ཡོད།