གཡག་རྒོད་དར་མ་འདུལ་བའི་ཤེད་ཤུགས་དང༌།།
ལྕགས་མདོང་སྐེད་ནས་གཅོད་པའི་གྲི་ཡོད་ཀྱང༌།།
ཕ་རོལ་དགྲ་ལ་རྒོལ་དུས་མི་སྟོན་ན།།
བརྟུལ་ཕོད་ཅན་གྱི་དཔའ་བོ་ག་ལ་ཡིན།།
ནམ་མཁའི་ཁྱོན་ཀུན་འགེངས་པའི་ཤེས་ཡོན་དང༌།།
སྟོང་གསུམ་སྙན་པར་གྲགས་པའི་མིང་ལྡན་ཡང༌།།
འུ་ཐུག་ཉག་ཕྲའི་དུས་སུ་མི་ཕན་ན།།
བརྟུལ་ཕོད་ཅན་གྱི་དཔའ་བོ་ག་ལ་ཡིན།།
རི་རབ་ཁྱུར་མིད་བྱེད་པའི་སྙིང་སྟོབས་དང༌།།
སྤྱི་དོན་ཁོང་དུ་སྦྲུམ་པའི་བློ་ལྡན་ཡང༌།།
གཞུང་དང་མི་མང་དོན་དུ་མི་སྨན་ན།།
བརྟུལ་ཕོད་ཅན་གྱི་དཔའ་བོ་ག་ལ་ཡིན།།
རབ་དཀར་དར་ལ་འགྲན་པའི་ལྷག་བསམ་དང༌།།
དྲང་བདེན་ཁ་ནས་སྨྲ་བའི་ལྕེ་ལྡན་ཡང༌།།
མིང་འདོན་ཡིག་ཐོག་འགོད་པར་མི་ཕོད་ན།།
བརྟུལ་ཕོད་ཅན་གྱི་དཔའ་རྒོད་ག་ལ་ཡིན།།
ནོར་ལྡེ་ཚགས་པར་སྟེང་འགོད་ཟིན།
No comments:
Post a Comment
བསམ་འཆར་གང་མང་གནང་ན་དགའ་བསུ་ཡོད།