2010-05-14

གསེར་མིག་ཅན།

མཛའ་བརྩེའི་རྒྱན་གྱིས་ཕན་ཚུན་ཉམས་དགའ་བ།
མི་མཐུན་ལས་དང་མ་འབྲེལ་རྟག་ཏུ་རྩེན།
ཁ་ཟས་ཐན་ཐུན་རེ་ཡི་ཆེད་དུ་ཡང།
ལེགས་གཟོའི་ཚུལ་དུ་ཆུའི་ཁར་ཡང་ཡང་ཕྱོགས།

གསེར་ལྗང་བཙོ་མར་དོ་བའི་བཀྲག་མདངས་ཅན།
ལྡེམ་ལྡེམ་ལུས་ཀྱིས་ལྷ་མོའི་ཁེངས་པ་བསྙིལ།
རྩུབ་བྲལ་བཟང་པོའི་གཤིས་ཀྱིས་མཛེས་པ་དེ།
པད་མའི་བཞིན་ལ་མིག་གིས་སྤྲས་པ་བཞིན།

འབུར་འབུར་ཝུ་བ་གཏོར་བའི་ཤེལ་སྒྲོམ་ནང་།
དཁྱུག་དཁྱུག་མཇུག་མ་གསུམ་ལྡན་གསེར་མིག་ཅན།
བསིལ་བསིལ་དྭངས་གཙང་ཆུ་ནང་དལ་མེད་དུ།
འཁོར་འཁོར་སེམས་ཀྱི་མཐིལ་དུ་ཟུག་རྔུ་བྱིན།

མཐའ་ཡས་འཛམ་གླིང་ས་ཡི་གླིང་ཆེན་པོར།
ཉུལ་བའི་གོ་སྐལ་ཚེ་འདིར་ཁྱེད་བསྐལ་ཡང་།
རྣམ་རྟོག་རི་དྭགས་སྟོང་གིས་རབ་བསྡུར་བའི།
མྱང་ངམ་སེམས་ཀྱི་ཐང་ན་གང་དགར་རྒྱུ།

No comments:

Post a Comment

བསམ་འཆར་གང་མང་གནང་ན་དགའ་བསུ་ཡོད།