2010-05-14

ཨ་མ་དྲན་མ།

ཚེ་སྔོན་ལས་དང་སྨོན་ལམ།
ངན་པའི་འབྲས་བུ་སྨིན་པས།
ངེད་ཅག་མ་བུ་གཉིས་པོ།
མ་ཤི་གསོན་བྲལ་བྱུང་སོང་།

བརྩེ་བའི་ཨ་མའི་བཞིན་རས།
དབང་ཕྱོགས་རི་བོའི་རྩེ་མོར།
ག་དུས་མཇལ་ཡོང་སྙམ་ནས།
བུ་ང་འགུག་ནས་བསྡད་ཡོད།

ལྕང་སྡོང་ལྒང་ལ་བྱིའུ་ཚོའི།
མ་བུ་མཉམ་འཛོམས་མཐོང་དུས།
ང་ཡི་ཨ་མའི་བཞིན་རས།
རང་དབང་མེད་པར་དྲན་གིས།

མིག་ནས་མིག་ཆུ་མང་པོ།
གཏོང་དགོས་བསམས་པ་མེད་ཀྱང་།
ཨ་མའི་འཛུམ་མདངས་འཆར་དུས།
འཛད་རྒྱུ་མེད་པ་ཤོར་སོང་།

སྐྱབས་ཅིག་ཡིད་བཞིན་ནོར་བུའི།
ཐུགས་རྗེ་ཉག་གཅིག་བརྟེན་ནས།
དྲིན་ཆེན་ཨ་མའི་བཞིན་རས།
འཇལ་བའི་སྨོན་ལམ་འདེབས་ཡོད།
༢༠༠༣་ལོར།

No comments:

Post a Comment

བསམ་འཆར་གང་མང་གནང་ན་དགའ་བསུ་ཡོད།